ఇయాన్ బోథం
1955, నవంబర్ 24న జన్మించిన ఇయాన్ బోథం (Ian Botham) ఇంగ్లాండుకు చెందిన మాజీ క్రికెట్ క్రీడాకారుడు మరియు ప్రస్తుత క్రికెట్ వ్యాఖ్యాత. టెస్ట్ క్రికెట్లో ఆల్రౌండర్ ప్రతిభ చూపి 14 సెంచరీలు మరియు 383 వికెట్లు సాధించాడు. అనేక టెస్ట్ క్రికెట్ రికార్డులను సృష్టించిన బోథం రిటైర్మెంట్ అయి 15 సంవత్సరాలు గడిచినప్పటికీ ఇంగ్లాండు తరఫున అత్యధిక టెస్ట్ వికెట్లు పడగొట్టిన బౌలర్గా తన రికార్డును నిలబెట్టుకున్నాడు.
విషయ సూచిక |
టెస్ట్ క్రికెట్ గణాంకాలు [మార్చు]
ఇయాన్ బోథం 102 టెస్ట్ మ్యాచ్లు ఆడి 33.54 సగటుతో 5200 పరుగులు చేయడమే కాకుండా బౌలింగ్లో 28.40 సగటుతో 383 వికెట్లను సాధించాడు. టెస్ట్ క్రికెట్లో అతని అత్యధిక వ్యక్తిగత స్కోరు 208 పరుగులు. 14 సెంచరీలు మరియు 22 అర్థసెంచరీలు నమోదుచేశాడు. బౌలింగ్లో ఒకే ఇన్నింగ్సులో ఐదేసి వికెట్లను 27 సార్లు, ఒకే టెస్టులో పదేసి వికెట్లను 4 సార్లు సాధించాడు. అతని అత్యుత్తమ బౌలింగ్ విశ్లేషణ 34 పరుగులకు 8 వికెట్లు.
వన్డే క్రికెట్ గణాంకాలు [మార్చు]
బోథం 116 వన్డేలలో ఇంగ్లాండు జట్టుకు ప్రాతినిధ్యం వహించి 23.21 సగటుతొ 2113 పరుగులు చేశాడు. ఇందులో 9 అర్థసెంచరీలు ఉన్నాయి. వన్డేలో అతని అత్యధిక స్కోరు 79 పరుగులు. బౌలింగ్లో 28.54 సగటుతో 145 వికెట్లను పడగొట్టినాడు. అత్యుత్తమ బౌలింగ్ విశ్లేషణ 31 పరుగులకు 4 వికెట్లు.
ప్రపంచ కప్ పోటీలు [మార్చు]
ఇయాన్ బోథం 3 సార్లు ప్రపంచ కప్ టోర్నమెంట్లలో పాల్గొన్నాడు. 1979లో తొలిసారిగా ప్రాతినిధ్యం వహించగా, 1983లో జరిగిన మూడవ ప్రపంచ కప్లో విల్లీస్ నేతృత్వంలో పాల్గొన్నాడు. 1992లో గ్రాహం గూచ్ నేతృత్వంలోని ఇంగ్లాండు జట్టుకు చివరిసారిగా ప్రపంచ కప్లో ప్రాతినిధ్యం వహించాడు.
అవార్డులు [మార్చు]
- 1978లో విజ్డెన్ క్రికెటర్ ఆఫ్ ది ఇయర్ అవార్డుకు ఎంపికైనాడు.
- 1981లో బిబిసి స్పోర్ట్స్ పర్సనాలిటీ ఆఫ్ ది ఇయర్గా ఎంపికయ్యాడు.
సాధించిన రికార్డులు [మార్చు]
- అతి తక్కువ టెస్టులలో 1000 పరుగులు, 100 వికెట్లు; 2000 పరుగులు, 200 వికెట్లు; 3000 పరుగులు, 300 వికెట్లు సాధించిన రికార్డు సృష్టించాడు.
- అత్యధిక టెస్ట్ వికెట్లు సాధించిన రికార్డు సృష్టించిననూ అది తరువాతి కాలంలో పలువురిచే ఛేధించబడింది. అయిననూ అత్యధిక టెస్ట్ వికెట్లు సాధించిన ఇంగ్లాండు బౌలర్గా ఇంకనూ రికార్డు ఇతని పేరిటే కొనసాగుతోంది.
- ఒకే ఇన్నింగ్సులో సెంచరీ మరియు 5 వికెట్లను 5 పర్యాయాలు సాధించి ఈ ఘనత వహించిన ఏకైక క్రికెటర్గా కొనసాగుతున్నాడు.
- 1980లో భారత్పై ఒకే టెస్టులో 10 వికెట్లు మరియు సెంచరీ సాధించి ఈ ఘనత పొందిన తొలి క్రికెటర్గా రికార్డు సృష్టించాడు.
- 1981లో ఒకే టెస్టులో 6 సిక్సర్లు సాధించి రికార్డు సృష్టించాడు. తరువాత ఈ రికార్డు అధికమించబడింది.
