గార్డన్ గ్రీనిడ్జ్ (Cuthbert Gordon Greenidge) వెస్టీండీస్ మాజీ క్రికెట్ క్రీడాకారుడు. ఇతడు 1951, మే 1న బార్బడస్ లో జన్మించినాడు. గ్రీనిడ్జ్ వెస్టీండీస్ తరఫున ఓపెనింగ్ బ్యాట్స్మెన్గా 1974 నుంచి 1991 వరకు జట్టుకు ప్రాతినిధ్యం వహించినాడు. అతడి తొలి టెస్ట్ మ్యాచ్ భారత్ పై బెంగళూరులోని చిన్నస్వామి స్టేడియంలో ఆరంగేట్రం చేసినాడు. గ్రీనిడ్జ్ 108 టెస్టులు ఆడి 44.72 సగటుతో 7558 పరుగులు సాధించాడు. ఇందులో 19 సెంచరీలు కలవు. వన్డేలలో 128 మ్యాచ్లు ఆడి 45.03 సగటుతో 5134 పరుగులు చేశాడు. ఇందులో 11 సెంచరీలు సాధించాడు. 1975, 1979 మరియు 1983 ప్రపంచ కప్ క్రికెట్లో కూడా ప్రాతినిధ్యం వహించినాడు.
అతని యొక్క ఉత్తమ ప్రదర్శన 1984లో ఇంగ్లాండుతో జరిగిన సీరీస్లో సాధించాడు. ఆ సీరీస్ లోలార్డ్స్ లో జరిగిన రెండో టెస్టులో మరియు ఓల్డ్ ట్రాఫోర్డ్ లో జరిగిన నాల్గవ టెస్టులో రెండింటిలోనూ డబుల్ సెంచరీలు సాధించాడు. ఆ సీరీస్లో వెస్టీండీస్ 5-0 తేడాతో ఇంగ్లాండును చిత్తు చేసింది. అంతర్జాతీయ క్రికెట్ నుంచి నిష్క్రమించిన తరువాత 1997లో బంగ్లాదేశ్ కు కోచ్గా వ్యవహరించాడు. అతని మార్గదర్శకత్వంలో 1997లో బంగ్లాదేశ్ ఐ.సి.సి.ట్రోఫీని గెలిచింది. 1999లో జరిగిన ప్రపంచ కప్ క్రికెట్కు కూడా అర్హత పొందినది.
