బండారులంక

వికీపీడియా నుండి
ఇక్కడికి గెంతు: మార్గసూచీ, వెతుకు

బండారులంక (ఆంగ్లము : Bandarulanka) గ్రామం చేనేత చీరలకు ప్రసిద్ధి. ఈ గ్రామంలో చేనేత కులాలకు చెందిన వారు అధికంగా నివసిస్తున్నారు. వారిలో దేవాంగులు అనే చేనేత కులస్థులు ఎక్కువగా నివసిస్తున్నారు. వీరు చేనేత చీరలు నేయటంలో అందె వేసిన వారు. రకరకాల డిజైన్లలో నేసిన చీరలు ఈ బండారులంక గ్రామం నుంచి ఎగుమతి అవుతున్నాయి. బండారులంక చీరలు ప్రతీ బట్టల షాపులోను దొరుకు తున్నాయి. ఈ గ్రామం అమలాపురం నుంచి 3 కిలో మీటర్ల దూరం వుంది. ఈ గ్రామంలో (కొత్త బండారులంకలో) శివాలయం, విష్ణుమూర్తిఆలయం, దేవాంగుల కుల దైవమైన చాముండేశ్వరి గుడి, గ్రామ దేవత 'మురుగులమ్మ గుడి వున్నాయి. పాత బండారులంకలో వీరభద్ర స్వామి గుడి వుంది. వీరభద్రపురంలో గణపతి గుడి వుంది. ఈ ఊరు రామలింగరాజు నగర్, పాత బండారులంక, వీరభద్ర పురం, కొత్త బండారులంక, కాపటి వీధి, బ్రాహ్మణ వీధి, కోమటి వీధి, మాడా వారి వీధి, చిన చంద్రపురం అనే ప్రాంతాలుగా విడదీయబడి వుంది. చేనేత కార్మికుల కోసం చేనేత సహకార సంఘం - వీవర్స్ కోపరేటివ్ సొసైటీ వుంది. ప్రతీ శ్రావణ పౌర్ణమి కి చాముండేశ్వరి గుడి దగ్గర జ్వాలా తోరణం వెలిగించటం సంప్రదాయం. గుడి ముఖ్య ద్వారం దగ్గర తోరణం లాగ గడ్డి కట్టి, శివ పార్వతుల విగ్రహాలు ఊరేగి వచ్చిన తరువాత, ఆ విగ్రహాలను తీసుకుని పూజారి ఆ తోరణం క్రిందగా వెళుతూ, గడ్డి తోరణాన్ని వెలిగిస్తాడు. అలా వెలుగుతున్న తోరణాన్నే జ్వాలా తోరణం అంటారు. ఆ వెంటనే భక్తులు, ఆ మంటల క్రింద నుంచి ఆలయంలోకి వెళ్ళి దైవ దర్శనం చేసుకుంటారు. అలా చేస్తే పుణ్యం అని భావిస్తారు.

  • పిండారీలు , థగ్గులు గ్రామాల మీద పడి దోచుకునే బ్రిటిష్ వారి కాలంలో , బండారులంక గ్రామం కూడా అందుకు బలి అయ్యింది. అయితే, మలిపెద్ది వెంకన్న అనే బండారులంక వాసి, తనకు తెలిసిన కర్ర సాము, కత్తిసాము తో (సాము, గరిడీలని, బాణాకర్ర, చెడీచేత, కర్రసాము అనే పేర్లతో పిలుస్తారు)వారిని వీరోచితంగా ఎదుర్కొని కొందరిని చంపగా , మరికొందరు పారిపోయారు. బ్రిటిష్ ప్రభుత్వం , ఈ వీరోచిత కార్యానికి, ధైర్య సాహాసాలకు మెచ్చి, బాటన్ ని బహూకరించారని ఇక్కడి పెద్దలు కథలు కథలుగా చెప్పుకుంటారు. (పోలీసు అధికార్లు, సైనికాదికారులు వాడే కర్ర ను బాటన్ అంటారు. అది చిన్న పోలీసు అధికార్లను, చిన్న సైనికాధికార్లను అజమాయిషీ చేయటానికి , అధికార చిహ్నం గా వాడతారు ). ఈ థగ్గులను, విలియం బెంటిక్, సమర్ధవంతంగా అణచివేసి, బ్రిటిష్ ఇండియాలోని పల్లెలకు ప్రశాంతతను ఇచ్చాడు.

ఈ గ్రామం ప్రక్క నుంచి, గోదావరి నది పాయ అయిన కౌశిక నది ప్రవహిస్తుంది. ఈ నదిని విశ్వామిత్రుడు తీసుకు వచ్చాడని ఇక్కడి ప్రజలు నమ్ముతారు. పూర్వం, ఈ గ్రామానికి గోదావరి వరద భయం ఉండేది. కానీ ప్రభుత్వ చర్యల వలన ఆ వరద భయం తప్పింది. 1956, ఆగష్టు లో వచ్చిన వరద అతి భయంకరమైనదిగా ఇక్కడ చెబుతారు. అపార నష్టం కలిగించిన వరద ఇది. ఆ తరం నాటి ప్రజలు ఇప్పటికీ 1956 నాటి వరదను తలుచుకుంటారు. గంగలకుర్తి అగ్రహారం బండారులంక గ్రామానికి దగ్గరలో ఉంది. అమలాపురం నుంచి అంబాజీపేట వెళ్ళే దారిలో ఈ గ్రామం రహదారి ప్రక్కనే కనిపిస్తుంది. సంస్కృత భాషలో మహా పండితుడైన, పండిత జగన్నాధ రాయలు, ఇక్కడికి దగ్గరలోనే వున్న ముంగండ గ్రామంలో జన్మించారు. ఒక ఉన్నత పాఠశాల (హై స్కూలు), ప్రాధమిక పాఠశాల, సబ్ పోస్టు ఆఫీసు వున్నవి. ఒకప్పుడు బండారులంక గ్రామానికి, అమలాపురం పట్టణానికి, మధ్య దారి పొడవునా వరి పొలాలు, పఛ్ఛని తివాచీలు పరిచినట్లుగా ఉండేవి. నేడు, అమలాపురం - బండారులంక ల మధ్య నివాసాలు పెరిగి, కలిసి పోయే పరిస్థితి లో వున్నాయి. ఆ పచ్చని పొలాలు తగ్గి పోయాయి.

కొన్ని విషయాలు[మార్చు]

  • పిన్ కోడ్ : 533221
  • ఎస్టీడీ కోడ్ : 08856
  • పోస్టాఫీసు టెలిఫోన్ నెంబరు : 233082
"http://te.wikipedia.org/w/index.php?title=బండారులంక&oldid=1060627" నుండి వెలికితీశారు