మర్వన్ ఆటపట్టు

మర్వన్ ఆటపట్టు (Marvan Samson Atapattu) 1970, నవంబర్ 22న శ్రీలంక లోని కలుతరలో జన్మించాడు. ఇతడు శ్రీలంకకు చెందిన మాజీ క్రికెట్ కెప్టెన్. ప్రస్తుతం ఇండియన్ క్రికెట్ లీగ్ లో ఢిల్లీ జెట్స్ జట్టుకు కెప్టెన్‌గా వ్యవహరిస్తున్నాడు.

క్రీడా జీవితం

ఆతపట్టు నవంబర్ 1990లో టెస్ట్ క్రికెట్‌లో ఆరంగేట్రం చేసినాడు. ప్రారంభంలో అంతర్జాతీయ క్రికెట్‌లో అతని ఆటతీరు ఏ మాత్రం ఆశాజనకంగా లేదు. తొలి 6 ఇన్నింగ్సులలో 5 డకౌట్లు మరో ఇన్నింగ్సులో 1 పరుగు సాధించాడు. దేశవాళి పోటీలలో టన్నులకొద్ది పరుగులు సాధించే ఆటపట్టు ఆ తరువాత 11 ఇన్నింగ్సులలో అత్యధిక స్కోరు 29 మించలేకపోయాడు. అతని 10వ టెస్టులో భారత్ పై ఎట్టకేలకు తొలి సెంచరీని నమోదుచేశాడు. అప్పటికి టెస్ట్ క్రికెట్‌లో ఆరంగేట్రం చేసి 7 సంవత్సరాలు కావడం గమనార్హం. 22 మ్యాచ్‌లు పూర్తయ్యేసరికి డకౌట్లలో మరియు పేరౌట్లలో (రెండు ఇన్నింగ్సులలోనూ సున్నాకే ఔట్ కావడం) టాప్ ఆర్డర్ బ్యాట్స్‌మెన్‌గా రికార్డు సాధించాడు!

టెస్ట్ క్రికెట్ గణాంకాలు

క్రమక్రమంగా పట్టు సాధించి మొత్తంపై 89 టెస్టులలో 5502 పరుగులు సాధించాడు. అందులో 16 సెంచరీలు మరియు 16 అర్థసెంచరీలు ఉన్నాయి. టెస్ట్ క్రికెట్‌లో అతడి అత్యధిక స్కోరు 249 పరుగులు.

వన్డే క్రికెట్ గణాంకాలు

ఆటపట్టు 268 వన్డేలలో 37.57 సగటుతో 8529 పరుగులు సాధించాడు. అందులో 11 సెంచరీలు మరియు 59 అర్థసెంచరీలు ఉన్నాయి. వన్డేలలో అతడి అత్యధిక స్కోరు 132 (నాటౌట్).

ప్రపంచ కప్ క్రికెట్

ఆటపట్టు 4 సార్లు ప్రపంచ కప్ క్రికెట్ పోటీలలో ప్రాతినిధ్యం వహించాడు. తొలిసారిగా శ్రీలంక విజయం సాధించిన 1996లో, ఆ తరువాత 1999, 2003 మరియు 2007లలో కూడా శ్రీలంక క్రికెట్ జట్టుకు ప్రాతినిధ్యం వహించాడు.