ఆనందబజార్ పత్రిక

ఆనందబజార్ పత్రిక

దస్త్రం:Anandabazar Patrika 9 December 2022 Front Page.jpg 9 డిసెంబర్ 2022 నాటి ఆనందబజార్ పత్రిక మొదటి పేజీ
రకం	దినపత్రిక
రూపం తీరు	బ్రాడ్‌షీట్
యాజమాన్యం	ఎబిపి గ్రూప్
సంపాదకులు	ఇషానీ దత్తా రే
భాష	బెంగాలీ
కేంద్రం	కోల్‌కతా, పశ్చిమ బెంగాల్, భారతదేశం
Circulation	802,289 (as of జనవరి–జూన్ 2022)
OCLC number	187024438

ఆనందబజార్ పత్రిక అనేది భారతదేశంలోని కోల్‌కతా నగరంలో ప్రచురితమవుతున్న బెంగాలీ భాష బ్రాడ్‌షీట్ దినపత్రిక. దీనిని ఎబిపి గ్రూప్ నిర్వహిస్తోంది. ఇది మొదటిసారిగా 13 మార్చి 1922న నాలుగు పేజీల సాయంత్రం పత్రికగా విడుదలైంది. వలస పాలనకు వ్యతిరేకంగా సాహసోపేతమైన వైఖరిని ప్రదర్శించడం ద్వారా అప్పటి బ్రిటిష్ పత్రికలలో "ప్రమాద సంకేతం" (డేంజర్ సిగ్నల్) అనే పేరు తెచ్చుకుంది. జనవరి-జూన్ 2022 నాటికి 802, 289 కాపీల ధృవీకరించిన సగటు సర్క్యులేషన్‌తో భారతదేశంలో అగ్రశ్రేణి ప్రాంతీయ భాషా పత్రికలలో ఒకటిగా ఎదిగింది.

ప్రస్తుతం ఈ పత్రికకు ఇషానీ దత్తా రే సంపాదకత్వం వహిస్తున్నారు. ప్రాంతీయ మీడియా సర్వేల ప్రకారం బర్తమాన్, ఈయ్ సమయ్, సంగ్బాద్ ప్రతిదిన్, ఆజ్‌కాల్, జాగో బంగ్లా, గణశక్తి, దైనిక్ స్టేట్స్‌మన్ పత్రికలు దీనికి ప్రధాన పోటీదారులు.

చరిత్ర

1871లో బ్రిటిష్ ఇండియాలోని (ప్రస్తుత బంగ్లాదేశ్) జెస్సోర్ జిల్లా, మాగురా అనే చిన్న గ్రామంలో తుషార్ కాంతి ఘోష్ తండ్రి సిసిర్ కుమార్ ఘోష్ ఒక బెంగాలీ వార్తాపత్రికను ప్రచురించారు. తుషార్‌కాంతి నానమ్మ సోదరి ఆనందమయి పేరు మీద దానికి ఆనంద బజార్ అని పేరు పెట్టారు. అయితే కొద్దికాలానికే ఆ పత్రిక మూతపడింది. 1868లో ఘోష్ తన నానమ్మ అమృతమయి పేరు మీద మరో పత్రికను ప్రచురించారు, అదే అమృత బజార్ పత్రిక.

తరువాత 1922లో యజమాని సురేష్ చంద్ర మజుందార్, సంపాదకుడు ప్రఫుల్ల కుమార్ సర్కార్ ఆనందబజార్ పత్రికను పునఃప్రారంభించారు. వారి యాజమాన్యంలో 13 మార్చి 1922న మొదటిసారిగా ముద్రించబడిన ఈ పత్రిక బ్రిటిష్ పాలనకు వ్యతిరేకంగా పనిచేసింది. 1922లో ఇది నాలుగు పేజీల సాయంత్రం దినపత్రికగా ప్రచురితమైంది. ప్రఫుల్ల కుమార్ సర్కార్ మరణానంతరం ఆయన కుమారుడు అశోక్ కుమార్ సర్కార్ ఈ పత్రికను అభివృద్ధి చేశారు. ఫీచర్స్ విభాగంలో మొట్టమొదటి కలర్ ప్రింటింగ్ ప్రారంభించారు. ఈ పత్రిక ఇంటర్నెట్ ఎడిషన్ 2001లో ప్రారంభమైంది, ఇది ప్రజలకు ఆన్‌లైన్ ద్వారా వార్తలను అందిస్తోంది. ముద్రిత పత్రికలో ప్రకటనలను కూడా అందిస్తుంది. 2010లో ఫార్చ్యూన్ ఇండియా మ్యాగజైన్‌ను ప్రచురించేందుకు టైమ్ ఇంక్ సంస్థ ఎబిపి గ్రూప్‌తో ఒక లైసెన్స్ ఒప్పందం కుదుర్చుకుంది. ఈ మ్యాగజైన్ ప్రతి సంవత్సరం ఫార్చ్యూన్ ఇండియా 500 జాబితాను ప్రచురిస్తుంది.

విమర్శలు, వివాదాలు

బంగ్లాదేశ్ గురించి ప్రచురించిన వార్తల విషయంలో ఆనందబజార్ విమర్శలు ఎదుర్కొంది. "దారుణమైన తప్పిదాలు" చేసిన దాని చరిత్రను ఉటంకిస్తూ 2017లో ది డైలీ స్టార్ (బంగ్లాదేశ్) ప్రచురించిన ఒక కథనం దీనిని "ఆల్ట్-జర్నలిజం" అని ఆరోపించింది.

జూన్ 2020లో బంగ్లాదేశ్ గురించి అవమానకరమైన వ్యాఖ్యలు చేసినందుకు ఈ పత్రిక తీవ్ర విమర్శల పాలైంది. తరువాత అది బేషరతు క్షమాపణతో పాటు ముద్రిత సంచికలో సవరణను జారీ చేసింది.

డిసెంబర్ 2024లో బంగ్లాదేశ్ సైన్యంపై ఆనందబజార్ ప్రచురించిన కథనాన్ని బంగ్లాదేశ్ ప్రధాన సలహాదారు 'అబద్ధం' అని ప్రకటించారు. ఈ కథనం "తప్పుదారి పట్టించేదిగా", "నిరాధారమైనదిగా" ఉందని బంగ్లాదేశ్ ఇంటర్-సర్వీసెస్ పబ్లిక్ రిలేషన్స్ (ISPR) ఆక్షేపించింది. అంతేకాకుండా ప్రత్యుత్తరం ఇచ్చే హక్కును కల్పించనందుకు "సరైన జర్నలిస్ట్ పద్ధతిని" పాటించలేదని ఇస్పర్ పత్రికను విమర్శించింది. సున్నితమైన సమస్యలపై వార్తలు రాసే ముందు విశ్వసనీయ వర్గాల నుండి సమాచారాన్ని నిర్ధారించుకోవాలని వారు మీడియాను కోరారు.

జనవరి 2025లో బంగ్లాదేశ్ సైన్యంపై ఆనందబజార్ రాసిన మరో కథనాన్ని బంగ్లాదేశ్ అధికారులు 'నకిలీ వార్త'గా గుర్తించారు. బంగ్లాదేశ్ సిఏ ప్రెస్ స్పందిస్తూ ఈ కథనానికి "బాలీవుడ్ రొమాంటిక్ కామెడీ సినిమా కంటే వాస్తవంలో ఎలాంటి ఆధారం లేదు" అని పేర్కొంది. ప్రచురితమైన ఒక రోజు తర్వాత ఈ కథనాన్ని ఆన్‌లైన్ పోర్టల్ నుండి తొలగించారు.

ఇవి కూడా చూడండి

• భారతదేశంలోని పత్రికల జాబితా
• ప్రపంచంలోని దినపత్రికల జాబితా

బయటి లింకులు

• Official website (in Bengali)
• ఆనందబజార్ దినపత్రిక ఈ-పేపర్