కల్పనా పటోవరీ

కల్పనా పటోవరీ
జననం	సోర్భోగ్, అస్సాం, భారతదేశం
ఇతర పేర్లు	భోజ్‌పురి రాణి
విద్యాసంస్థ	కాటన్ విశ్వవిద్యాలయం భట్‌ఖండే మ్యూజిక్ ఇన్‌స్టిట్యూట్ డీమ్డ్ యూనివర్శిటీ
వృత్తి	గాయని, నటి
క్రియాశీల సంవత్సరాలు	1993–ప్రస్తుతం
జీవిత భాగస్వామి	పర్వేజ్ ఖాన్
పిల్లలు	2

కల్పనా పటోవరీ అస్సాం రాష్ట్రానికి చెందిన భారతీయ నేపథ్య గాయని, జానపద గాయని. ఆమె అనేక భారతీయ భాషలలో పాటలు, జానపద సంగీతాన్ని రికార్డ్ చేసింది. ఆమె పాటలలో భోజ్‌పురి సంగీతం ప్రధాన శైలిగా ఉంటుంది.

ఆమె 4 సంవత్సరాల వయస్సులో కెరీర్ ప్రారంభించింది. లక్నోలోని భట్ఖండే సంగీత విశ్వవిద్యాలయంలో హిందుస్తానీ శాస్త్రీయ సంగీతంలో సంగీత బిషారద్ కోసం దీపేన్ రాయ్, శిఖా దత్తా ల వద్ద శిక్షణ పొందింది. ఆమె తన సోలో సంగీత ప్రయాణంలో భోజ్‌పురి, అస్సామీ, హిందీ, మరాఠీ, బెంగాలీ, ఇంగ్లీష్ లతో సహా 32 భాషలలో పాటలు పాడింది.

ప్రారంభ జీవితం

కల్పనా పటోవరీ అస్సాంలోని బార్పేట జిల్లాలో నాథ్ సంప్రదాయ సమాజానికి చెందిన యోగి-నాథ్ కుటుంబంలో జన్మించింది. ఆంగ్ల సాహిత్యంలో పట్టభద్రురాలైన ఆమె గౌహతిలోని కాటన్ కళాశాల పూర్వ విద్యార్థి. తన తండ్రి జానపద గాయకుడు బిపిన్ నాథ్ పటోవరీ వద్ద కామరూపియా, గోల్పోరియా జానపద సంగీతంలో శిక్షణ పొందింది. ఆమె 4 సంవత్సరాల వయస్సులో తన తండ్రితో కలిసి బహిరంగంగా ప్రదర్శన ఇవ్వడం ప్రారంభించింది. భట్ఖండే మ్యూజిక్ ఇన్స్టిట్యూట్ యూనివర్శిటీ, లక్నో నుండి భారతీయ శాస్త్రీయ సంగీతంలో సంగీత విశారద్ పూర్తిచేసింది. ఆమె పూర్వి, పచ్రా, కజ్రి, సోహర్, వివాహ్ గీత్, చైతా, నౌటంకి వంటి అనేక రకాల భోజ్‌పురి జానపద సంగీతాన్ని పాడుతుంది.

ఆమె భిఖారి ఠాకూర్ పనిని గుర్తుచేస్తూ ఒక ఆల్బమ్ ను విడుదల చేసింది.

కెరీర్

పాత ఖాదీ బిర్హా సంప్రదాయాన్ని అంతర్జాతీయ వేదికలకు పరిచయం చేసిన ప్రారంభ భోజ్‌పురి గాయకురాలిగా కల్పనా పటోవరీ విశిష్టతను కలిగి ఉంది.

2013 డిసెంబరు 8న విడుదలైన బిడెసియా ఇన్ బంబాయి అనే డాక్యుమెంటరీ చిత్రంలో ఆమె నటించింది. ఈ డాక్యుమెంటరీ వలస కార్మికుల దృక్పథాన్ని అందిస్తుంది.

భారత సాంస్కృతిక వ్యవహారాల మంత్రిత్వ శాఖ ఏర్పాటు చేసిన నాలుగు లాటిన్ అమెరికన్ దేశాలలో 15 రోజుల పర్యటనలో ప్రదర్శన ఇవ్వడానికి ఆమెకు ఆహ్వానం అందింది.

గతంలో పురుష కళాకారుల ఆధిపత్యం ఉన్న ఛప్రాహియా పూర్వి శైలిలో రికార్డ్ చేసి పాడిన మొదటి మహిళగా ఆమె సాధించిన మార్గదర్శక సాధన ఒక ముఖ్యమైన విజయం.

ఆమె భోజ్‌పురి చిత్రం "చలత్ ముసాఫర్ మొహ్ లియో రే" లో తన తొలి నటనా ప్రవేశం చేసింది, ఇందులో సహ నటుడు దినేష్ లాల్ యాదవ్ తో కలిసి జానకీ పాత్రను పోషించింది.

ఆమె ఎన్డిటివి ఇమాజిన్ లో రియాలిటీ షో జునూన్-కుచ్ కర్ దిఖానే కా (2008)లో పాల్గొంది.

రాజకీయ జీవితం

జూలై 2018లో, పాట్నా జరిగిన కార్యక్రమంలో భారతీయ జనతా పార్టీ (బిజెపి) అధ్యక్షుడు అమిత్ షా, బీహార్ ఉప ముఖ్యమంత్రి సుశీల్ మోడీ సమక్షంలో ఆమె ఆ పార్టీ సభ్యుడరాలయింది.

అక్టోబరు 2020లో గువహాటిలోని పార్టీ ప్రధాన కార్యాలయంలో నిర్వహించిన కార్యక్రమంలో ఆమె అసోం గణ పరిషత్ తో అనుబంధం ఏర్పరచుకుంది.

2021 అసోం శాసనసభ ఎన్నికలలో, ఆమె సరుఖేత్రి నియోజకవర్గం నుండి అసోం గణ పరిషత్ అభ్యర్థిగా పోటీ చేసింది. అయితే, భారత జాతీయ కాంగ్రెస్ అభ్యర్థి జాకీర్ హుస్సేన్ సిక్దర్ చేతిలో ఆమె ఓటమి చవిచూసింది.