గోదావరి (సినిమా)
| గోదావరి | |
|---|---|
 | |
| దర్శకత్వం | శేఖర్ కమ్ముల |
| రచన | శేఖర్ కమ్ముల (కథ, స్క్రీన్ ప్లే, మాటలు) |
| నిర్మాత | జి.వి.జి.రాజు |
| తారాగణం | సుమంత్, కమలినీ ముఖర్జీ, తనికెళ్ళ భరణి, నీతూ చంద్ర |
| ఛాయాగ్రహణం | విజయ్ సి. కుమార్ |
| కూర్పు | మార్తాండ్ వెంకటేష్ |
| సంగీతం | కె. ఎం. రాధాకృష్ణన్ |
నిర్మాణ సంస్థ | ఎస్ ఎస్ సి ఆర్ట్స్ |
| పంపిణీదార్లు | అమిగోస్ క్రియేషన్స్ |
విడుదల తేదీ | మే 19, 2006 |
సినిమా నిడివి | 160 ని |
| భాష | తెలుగు |
గోదావరి 2006 సంవత్సరంలో శేఖర్ కమ్ముల దర్శకత్వంలో విడుదలైన సినిమా. ఇందులో సుమంత్, కమలినీ ముఖర్జీ ప్రధాన పాత్రల్లో నటించారు. ఈ చిత్రాన్ని జి.వి.జి రాజు అమిగోస్ క్రియేషన్స్ పతాకంపై నిర్మించారు. ఈ సినిమాలో చాలా భాగం గోదావరి నది, పాపికొండల ప్రాంతంలో చిత్రీకరించారు. ఇంతకు మునుపు అక్కినేని నాగేశ్వరావు నటించిన అందాల రాముడులో కూడా చాలాభాగం గోదావరి నది మీద చిత్రీకరించారు. ఈ సినిమా ద్వితీయ ఉత్తమ చిత్రం, ఉత్తమ దర్శకుడితో కలిపి మొత్తం ఐదు విభాగాల్లో నంది పురస్కారాలు దక్కించుకుంది.
కథ
[మార్చు]సీతా మహాలక్ష్మి ఆత్మాభిమానం కలిగిన ఆడపిల్ల. సొంతంగా తన కాళ్ళమీద నిలబడాలని వ్యాపారం చేస్తుంటుంది కానీ అతి కష్టమ్మీద నెట్టుకొస్తుంటుంది. ఒక వైపు తల్లిదండ్రులు చూస్తున్న పెళ్ళి సంబంధాలు కూడా ఏదో ఒక కారణంతో తిరగ్గొడుతూ ఉంటుంది. రామ్ అమెరికాలో ఎమ్మెస్ చదివి వచ్చి రాజకీయాల్లోకి వెళ్ళాలనుకుంటూ ఉంటాడు. చిన్నప్పుడే తల్లిదండ్రులు చనిపోతే అమ్మమ్మ, మామయ్య దగ్గర పెరుగుతాడు. మరదలు రాజీ అంటే రాముకి అభిమానం. కానీ మేనల్లుడు ఉద్యోగం లేకుండా తిరుగుతున్నాడని అతనికి పిల్లనివ్వడానికి మేనమామ అంగీకరించడు. రాజీకి ఐపీఎస్ అధికారి అయిన రవీంద్రతో పెళ్ళి నిశ్చయం అవుతుంది. రాజీ కూడా బావను కాదని రవీంద్ర వైపే మొగ్గు చూపుతుంది. అందరూ కలిసి పడవలో గోదావరి నది మీద భద్రాచలం ప్రయాణమవుతారు. పెళ్ళి సంబంధం కుదరకపోవడంతో సీత కూడా అదే పడవలో బయలు దేరుతుంది. అక్కడ రాము పద్ధతిని చూసి అతన్ని అభిమానించడం మొదలుపెడుతుంది. రాజీ మీద అతనికున్న అభిమానాన్ని తెలుసుకుంటుంది కానీ అతని వ్యక్తిత్వానికి ఆమె సరిపోదని, తానే అతన్ని ప్రేమించడం మొదలు పెడుతుంది. కొన్ని పరిస్థితుల్లో రవీంద్ర ధోరణిని గమనించిన రాజీ, మళ్ళీ రామునే పెళ్ళి చేసుకోవాలనుకుంటుంది. రాము ఒప్పుకుంటున్నట్లుగా నటించి సీతను తాను ఒక చోటుకి తీసుకురమ్మని చెబుతాడు. కానీ రాము మాత్రం అక్కడికి రాడు. రాజీ రవీంద్రనే పెళ్ళి చేసుకుంటానని మనసు మార్చుకుంటుంది. సీత మాత్రం రాము మనసులో తాను లేనని తెలుసుకుని తిరిగి హైదరాబాదు వెళ్ళిపోతుంది. రాము సీత పడవలో మరిచిపోయిన డైరీ చదివి ఆమె తనను ప్రేమించిన విషయం తెలుసుకుని ఆమె ఇంటికి వెళ్ళి తన ప్రేమను వ్యక్తం చేయడంతో కథ సుఖాంతం అవుతుంది.
నటీనటులు
[మార్చు]- సుమంత్ ... రామ్
- కమలినీ ముఖర్జీ ... సీతా మహాలక్ష్మి
- నీతూ చంద్ర ... రాజి
- కమల్ కామరాజు ... రవి
- సి.వి.ఎల్.నరసింహారావు .. సీతా మహాలక్ష్మి తండ్రి
- మధుమణి .. సీతా మహాలక్ష్మి తల్లి
- తనికెళ్ళ భరణి ... కెప్టెన్ చింతామణి
- శివ ... చిన్నా
- కరాటే కల్యాణి ... పుల్లట్ల పుల్లమ్మ
నిర్మాణం
[మార్చు]శేఖర్ కమ్ముల తన రెండో సినిమా ఆనంద్ చిత్రీకరిస్తున్న సమయంలోనే గోదావరి చిత్రానికి అంకురార్పణ జరిగింది. ఆ చిత్ర కథ విన్న కథానాయిక కమలినీ ముఖర్జీ ఆ సినిమాలో కూడా తానే ప్రధాన పాత్ర పోషిస్తానని అడిగింది. ఆనంద్ విడుదల తర్వాత చూద్దామని శేఖర్ బదులిచ్చాడు. ఆనంద్ విజయం సాధించిన తర్వాత గోదావరి స్క్రిప్టును సిద్ధం చేసుకున్నాడు శేఖర్. పవన్ కళ్యాణ్, మహేష్ బాబు, గోపీచంద్ లో ఎవరినైనా కథానాయకుడిగా అనుకున్నాడు కానీ ఆ సమయానికి వాళ్ళ తేదీలు అందుబాటులో లేకపోవడంతో సుమంత్ కి ఈ అవకాశం దక్కింది. సిద్ధార్థ్ ని కూడా కథానాయకుడి పాత్ర కోసం సంప్రదించారు కానీ కథానాయికకు ప్రాధాన్యం ఎక్కువ ఉందనుకున్న సిద్ధార్థ్ అవకాశాన్ని వదులుకున్నాడు.[1] వేరే కథానాయిక కోసం చూస్తుంటే శేఖర్ తో పరిచయం ఉన్నవారు కమలినీ అయితేనే బాగుంటుందని సూచించడంతో ఆమెకే ఈ అవకాశం దక్కింది.[2]
ఈ సినిమాలో కోటిగాడు అనే కుక్కకు దర్శకుడు శేఖర్ కమ్ముల గాత్రదానం చేయడం విశేషం.[1]
పురస్కారాలు
[మార్చు]| సంవత్సరం | అవార్డు | విభాగము | లబ్ధిదారుడు | ఫలితం |
|---|---|---|---|---|
| 2006 | నంది పురస్కారాలు[3] | ద్వితీయ ఉత్తమ చిత్రం | జి.వి.జ్.రాజు | గెలుపు |
| 2006 | నంది పురస్కారాలు | ఉత్తమ దర్శకులు | శేఖర్ కమ్ముల | గెలుపు |
| 2006 | నంది పురస్కారాలు | ఉత్తమ ఛాయాగ్రహణం | విజయ్ సి. కుమార్ | గెలుపు |
| 2006 | నంది పురస్కారాలు | ఉత్తమ సంగీత దర్శకుడు | కె. ఎం. రాధాకృష్ణన్ | గెలుపు |
| 2006 | నంది పురస్కారాలు | ఉత్తమ నేపథ్య గాయని | ఉపద్రష్ట సునీత | గెలుపు |
పాటలు
[మార్చు]- ఉప్పొంగెలే గోదావరి, ఎస్. పి. బాలసుబ్రహ్మణ్యం, రచన: వేటూరి.
- మనసా వాచా , చిత్ర, ఉన్ని కృష్ణన్ , రచన: వేటూరి
- తిప్పల తప్పులు , శ్రేయా ఘోషల్ , రచన: వేటూరి
- మనసా గెలుపు , శంకర మహదేవన్, చిత్ర, కె. ఎం.రాధా కృష్ణ , వేటూరి సుందర రామమూర్తి.
- అందంగా లేనా , సునీత , రచన: వేటూరి.
- రామ చక్కని సీతకు, గాయత్రి , రచన : వేటూరి సుందర రామమూర్తి .
మూలాలు
[మార్చు]- ↑ 1.0 1.1 "Godavari: 'గోదావరి'.. అలా మిస్ చేసుకున్న సిద్ధార్థ్". EENADU. Retrieved 2025-07-06.
- ↑ "Godavari: 18 ఏళ్ల 'గోదావరి'.. సుమంత్కు ముందు అనుకున్న హీరోలెవరంటే?". EENADU. Retrieved 2024-05-19.
- ↑ "Nandi Awards 2006 Winners List". Archived from the original on 2018-02-04. Retrieved 2018-01-20.