తరుణ్ భాస్కర్ దాస్యం
| తరుణ్ భాస్కర్ | |
|---|---|
| జననం | నవంబరు 5, 1988 చెన్నై |
| నివాసం | హైదరాబాదు |
| వృత్తి | సినీ దర్శకుడు |
| జీవిత భాగస్వామి | లత |
తరుణ్ భాస్కర్ దాస్యం ఒక తెలుగు సినిమా దర్శకుడు. 2016 లో విడుదలైన పెళ్ళి చూపులు అతని మొదటి సినిమా. ఈ సినిమాకు ఉత్తమ ప్రాంతీయ చిత్రంగానే కాక ఉత్తమ మాటల రచయితగా కూడా అతనికి జాతీయ పురస్కారం దక్కింది.[1]
వ్యక్తిగత జీవితం[మార్చు]
తరుణ్ భాస్కర్ తండ్రి స్వస్థలం వరంగల్. తల్లి స్వస్థలం తిరుపతి. చెన్నైలో పుట్టాడు. హైదరాబాదులో పెరిగాడు. ఇతని భార్య పేరు లత. ఆమె స్వస్థలం చిత్తూరు. ఆమె కొన్ని యాడ్ ఫిల్మ్స్ చేసింది.
వృత్తి[మార్చు]
మొదటి నుంచి తరుణ్ కు సినిమాల మీద ఆసక్తి ఉండేది. లఘు చిత్రాలను రూపకల్పన చేయడంతో మొదలు పెట్టాడు. మొదటగా తల్లి రాసిన ఓ కవితను ఓ లఘు చిత్రంలా తీసి ఐఐటీ మద్రాసులో జరుగుతున్న సారంగ్ అనే ఉత్సవాల కోసం పంపాడు. అక్కడ దానికి బహుమతి వచ్చింది. అదే ఉత్సాహంతో జర్నీ, సెరెండిపిటీ, మినిట్స్‌ టు మిడ్‌నైట్‌, అనుకోకుండా, సైన్మా లాంటి లఘు చిత్రాలను రూపొందించాడు. వీటిలో కొన్ని కేన్స్ ఫిల్మ్ ఫెస్టివల్, ఇంఫాల్ ఫిల్మ్ ఫెస్టివల్ లాంటి చిత్రోత్సవాలకు ఎంపికయ్యాయి. జునూన్ అనే సినిమాకు పీపుల్స్ చాయిస్ అవార్డు వచ్చింది. అనుకోకుండా అనే సినిమా యూట్యూబులో అత్యధికులు వీక్షించారు. సైన్మాకి కూడా పలు పురస్కారాలు దక్కాయి. ఈ సినిమా చూసిన మంచు లక్ష్మి తనతో ఓ చిత్రానికి పనిచేయమని కోరింది. ఆ సినిమా స్క్రిప్టు పని జరుగుతున్న సమయంలో తరుణ్ తండ్రి మరణించడంతో అది వాయిదా పడింది. తరువాత పెళ్ళి చూపులు సినిమాతో దర్శకుడిగా పరిచయమయ్యాడు. ఈ సినిమాలో కథా నాయకుడైన విజయ్ దేవరకొండ తరుణ్ ముందు నుంచి స్నేహితుడు కావడంతో ఆ పరిచయంతో నిర్మాత రాజ్ కందుకూరిని కలిసి అవకాశాన్ని చేజిక్కించుకున్నాడు. తన మొదటి సినిమాకే జాతీయ పురస్కారాన్ని సొంతం చేసుకున్నాడు.
మూలాలు[మార్చు]
- ↑ "మాటలు మురిపించి... ప్రతిభ పరిమళించి!". eenadu.net. హైదరాబాదు: ఈనాడు. Archived from the original on 15 April 2017. Retrieved 15 April 2017.
