ఉట్నూరు కోట

ఉట్నూరు కోట
ఉట్నూరు, ఉట్నూరు మండలం, ఆదిలాబాదు జిల్లా, తెలంగాణ
రకము	కోట
స్థల సమాచారం
సాధారణ ప్రజలకు ప్రవేశానుమతి	అవును
స్థల చరిత్ర
కట్టిన సంవత్సరం	క్రీ.శ. 1309
కట్టించింది	గోండు రాజులు
వాడిన వస్తువులు	రాతి

ఉట్నూరు కోట తెలంగాణ రాష్ట్రం ఆదిలాబాదు జిల్లా ఉట్నూరు మండలంలోని ఉట్నూరు గ్రామంలో ఉన్న కోట. చుట్టూ అడవుల మధ్య ఎత్తయిన గుట్టల ప్రాంతంలో ఉన్న ఈ కోట గోండు రాజులకు ప్రధాన స్థావరంగా ఉండేది.

కోట చరిత్ర

ఉట్నూరులో కోటను గోండు రాజులు క్రీ.శ. 1309లో నిర్మించినట్లు చరిత్రకారులు చెబుతారు. ఆత్రం రాజ్‌గోండులతో పాటు సీతాగొంది రాజుల 700 యేండ్ల చరిత్రను తనలో దాచుకున్న ఈ ఖిల్లా గోండు నిర్మాణ శైలికి నిదర్శనంగా నిలుస్తున్నది.

కోట విశేషాలు

ఈ కోట చుట్టూ 8 అడుగుల లోతైన కందకం ఉండేదట. కోటకు తూర్పు భాగంలో ఉన్న ప్రధాన ప్రవేశ ద్వారం ఇప్పుడు శిథిలావస్తకు చేరుకుంది. కోట లోపల ప్రహరీ గోడలు, బురుజులు, ఇటుక సున్నంతో పటిష్ఠంగా నిర్మించారు. లోపలి ద్వారం పక్కగా ఎత్తయిన వేదికపై దర్బారు ఉండే చోటికి చేరుకోవడానికి గతంలో మెట్లుండేవి. వందల సంవత్సరాల కాలగమనంలో ఇవన్నీ శిథిలమైపోయాయి. ద్వారానికి ఎడమ పక్క అంతగా శిథిలం కాకుండా మిగిలిన అందమైన దిగుడు బావి ఉన్నది. ఇందులో నాటి రాజ కుటుంబానికి చెందిన స్త్రీలు స్నానం చేసి దుస్తులు మార్చుకునేందుకు వీలుగా గదులు నిర్మించి ఉన్నాయి. గోండుల వైభవానికి చిహ్నంగా నిలిచిన ఈ కోట నేడు శిథిల దశకు చేరుకుంది.