ఆపద్బాంధవుడు

తెలుగు సినిమా*వేదిక

ఆపద్భాందవుడు
దర్శకత్వం	కె.విశ్వనాథ్
స్క్రీన్ ప్లే	కె.విశ్వనాథ్
కథ	కె.విశ్వనాథ్
నిర్మాత	ఏడిద నాగేశ్వరరావు
తారాగణం	చిరంజీవి, మీనాక్షి శేషాద్రి, జంధ్యాల
ఛాయాగ్రహణం	ఎ. విన్సెంట్, అజయన్ విన్సెంట్
కూర్పు	జి. జి. కృష్ణారావు
సంగీతం	ఎం.ఎం. కీరవాణి
నిర్మాణ సంస్థ	పూర్ణోదయా మూవీ క్రియేషన్స్
విడుదల తేదీ	1992 అక్టోబరు 9 (1992-10-09)
భాష	తెలుగు

ఆపద్బాంధవుడు, కె. విశ్వనాథ్ దర్శకత్వంలో 1992లో విడుదలైన ఒక తెలుగు సినిమా. ఇందులో చిరంజీవి, మీనాక్షి శేషాద్రి, జంధ్యాల ప్రధాన పాత్రలు పోషించారు. ఈ చిత్రాన్ని పూర్ణోదయ మూవీ క్రియేషన్స్ పతాకంపై ఏడిద నాగేశ్వరరావు నిర్మించాడు. ఎం. ఎం. కీరవాణి ఈ చిత్రానికి సంగీతం అందించాడు.

చిరంజీవి ఇందులో ఒక సున్నితమైన పాత్ర పోషించాడు. ఇది బాక్సాఫీసు వద్ద అంత విజయవంతం కాలేదు. అయితే మంచి కథాచిత్రంగా పేరు తెచ్చుకొంది. చిరంజీవికి ఈ సినిమాలో పాత్రకు నంది అవార్డు లభించింది.

చిత్ర కథ

మాధవుడు (చిరంజీవి) ఒక పల్లెలో పశువుల కాపరి. ఒక ఉపాధ్యాయుడి (జంధ్యాల) ఇంటికి నమ్మకమైన తోడు. ఉపాధ్యాయుని కూతురు హేమ (మీనాక్షి శేషాద్రి)కి మాధవుడు మంచి దోస్తు. మాధవుడు పశువులను కాస్తుంటాడు. నాటకాలలో వేషాలు కూడా వేస్తుంటాడు. హేమ తండ్రి మంచి కవి, కానీ కవిత్వానికి ఆదరణ లేనందున ఆతని కవిత్వాన్ని ప్రచురించలేకపోతాడు.

హేమ అక్క ఒక జమీందారి కుటుంబానికి కోడలుగా వెళుతుంది. ఆ వివాహానికి మాధవుడు వారికి తెలియకుండా కొంత సహాయం చేస్తాడు. తరువాత తన పశువులన్నింటినీ అమ్మేసి, జంధ్యాల కవితలను ముద్రింపజేస్తాడు. అతని అభిమానానికి సంతోషించి ఆ కవి తన రచనలకు మాధవున్ని కృతిభర్తగా చేస్తాడు.

గర్భవతిగా ఉన్న అక్కకు సాయంగా వెళ్ళిన హేమ బావ అత్యాచారానికి గురై పిచ్చిదైపోతుంది. ఆమెను కాపాడడానికి మాధవుడు పిచ్చివానిలా నటించి ఆమె ఉన్న పిచ్చాసుపత్రిలో చేరి ఎన్నో బాధలను సహిస్తాడు. పిచ్చి కుదిరిన హేమ తమ మధ్య అంతర్లీనంగా ఉన్న ప్రేమను గ్రహించి అతనిని పెళ్ళాడాలని కోరుకుంటుంది. తమ మధ్య ఉన్న అంతరాల కారణంగా మాధవుడు అది చాలా అనుచితమైనదని భావిస్తాడు. అయితే హేమను పెళ్ళి చేసుకోవాలనుకొన్న యువకుడు (శరత్ బాబు) వారి మధ్యనున్న ప్రేమను గ్రహించి వారిని ఒప్పిస్తాడు.

తారాగణం

• చిరంజీవి .... మాధవ
• జంధ్యాల .... స్కూల్ టీచర్ (హేమ తండ్రి) - జంధ్యాల ఈ ఒక్క సినిమాలోనే నటించాడు.
• మీనాక్షి శేషాద్రి .... హేమ
• శరత్ బాబు .... శ్రీపతి
• అల్లు రామలింగయ్య .... శ్రీపతి తండ్రి
• గీత .... లలిత
• నిర్మలమ్మ
• బ్రహ్మానందం
• కైకాల సత్యనారాయణ
• శిల్ప....... పిచ్చాసుపత్రిలో నర్సు
• కల్పనా రాయ్........ పిచ్చాసుపత్రిలో నర్సు
• సుత్తి వేలు
• విజయ చందర్...........బాబా
• ప్రసాద్ బాబు........పిచ్చాసుపత్రిలో గార్డు

పాటలు

• అతల వితల పాతాల (గాయకుడు: ఎస్.పి.బాలసుబ్రహ్మణ్యం)
• ఔరా, అమ్మక చెల్లా! బాపురే బ్రహ్మకు చెల్లా!!
• చుక్కల్లారా చూపుల్లారా ఎక్కడమ్మా జాబిల్లి 1
• చుక్కల్లారా చూపుల్లారా ఎక్కడమ్మా జాబిల్లి 2 (గాయకుడు: ఎస్.పి.బాలసుబ్రహ్మణ్యం)
• పువ్వు నవ్వే గువ్వ నవ్వే (గాయకుడు: ఎస్.పి.బాలసుబ్రహ్మణ్యం)
• ఒడి ఒడి ఓడియప్పా (గాయకుడు: ఎస్.పి.బాలసుబ్రహ్మణ్యం)