బి. పుట్టస్వామయ్య

బి. పుట్టస్వామయ్య
జననం	(1897-05-24)1897 మే 24 బెంగళూరు
మరణం	1984 January 25(1984-01-25) (వయసు: 86)
వృత్తి	పాత్రికేయుడు, సంపాదకుడు, నాటక రచయిత, సాహితీవేత్త

బి. పుట్టస్వామయ్య ( మే 24, 1897 - జనవరి 25, 1984) కన్నడ భాషలో బహుముఖ ప్రజ్ఞాశాలి. పాత్రికేయుడిగా, నాటక రచయితగా, నవలా రచయితగా ఇతడు చేసిన సేవలు ముఖ్యమైనవిగా పరిగణించబడతాయి.

జీవిత విశేషాలు

బి. పుట్టస్వామయ్య 'నాడవర్గళ్' గా ప్రసిద్ధి చెందాడు. కన్నడ నాడులో పత్రికోద్యమంలో పాంచజన్యగా, గొప్ప నవలా రచయితగా, ప్రఖ్యాత నాటక రచయితగా, ప్రఖ్యాత చలనచిత్ర కళాకారుడిగా అనేక విధాలుగా రాణించాడు. ఇతడు మే 24, 1897న జన్మించాడు.

పుట్టస్వామయ్య 9వ తరగతిలో ఉన్నప్పుడు, ఇతని తండ్రి బసప్ప మరణించాడు. ఇతని తల్లి మల్లమ్మ దిక్కుతోచని స్థితిలో ఉండి పోయింది. చిన్నప్పటి పుట్టస్వామయ్య చదువును వదులుకొని , ఉద్యోగాన్ని వెదుకుకోవలసి వచ్చింది.

పాత్రికేయుడిగా

అనేక ప్రైవేట్ సంస్థలలో పనిచేసిన తర్వాత, ఇతడు మైసూర్ నుండి ప్రచురితమయ్యే 'మైసూర్ స్టార్' అనే వారపత్రికకు బెంగళూరులో రిపోర్టర్‌గా పనిచేయడం ప్రారంభించాడు. 1925లో, నారాయణ శెట్టి సంపాదకత్వంలో ప్రచురితమయ్యే 'న్యూ మైసూర్' అనే వారపత్రికలో చేరాడు. ఐదు లేదా ఆరు సంవత్సరాలు అక్కడ పనిచేసిన తర్వాత, కొత్తగా పుట్టిన 'ఒక్కలిగ వార్తాపత్రిక'కి సంపాదకుడిగా నియమితుడైనాడు. తరువాత, ఇతడు 'జనవాణి' సంపాదకత్వాన్ని చేపట్టి, 'జనవాణి'ని ప్రజల్లో ప్రాచుర్యం పొందేలా చేశాడు. తరువాత, 'మాతృభూమి' వార్తాపత్రికలో కూడా పనిచేశాడు. కొంతకాలం, ఆయన 'ప్రతిభ' అనే సొంత వార్తాపత్రికను కూడా నడిపాడు.

పత్రికా సంపాదకుడిగా

ఆ విధంగా, అనేక ముఖ్యమైన వార్తాపత్రికలలో పనిచేసిన పుట్టస్వామయ్య, 'ప్రజావాణి'కి మొదటి సంపాదకుడయ్యాడు. 'ప్రజావాణి' ప్రజాదరణ పొందడానికి కారణం పుట్టస్వామయ్య దూరదృష్టి. ఇతడు ప్రారంభించిన శీర్షికలు, విభాగాలు, సంపాదకీయాలు వార్తాపత్రిక యొక్క శ్రేయస్సుకు దారితీశాయి. తరువాత, ఇతడు 'జన్మభూమి' సంపాదకుడయ్యాడు. జన్మభూమి మూసివేయబడిన తర్వాత, జర్నలిజంను వదులుకుని నాటకాలు, నవలల వైపు మొగ్గు చూపాడు.

నాటక రచయితగా

బి. పుట్టస్వామయ్య గొప్ప కీర్తిని పొందిన రంగం నాటక విభాగం. కన్నడ నాటక చరిత్రలో పుట్టస్వామయ్య ఒక విప్లవకారుడు. రామాయణ, మహాభారతాల నుండి విషయాలను ఎంచుకుని వినూత్న నాటకాలను సృష్టించాడు. ఇతని వేలాది నాటకాల ప్రదర్శనలు భారీ విజయాన్ని సాధించి ప్రజలను విప్లవాత్మకంగా మార్చాయి. పుట్టస్వామయ్య నాటకాలు 'కురుక్షేత్ర', 'దశావతారం' 'సంపూర్ణ రామాయణం' కన్నడ ప్రజలకు సుపరిచితమైనవి . ఈ నాటకాలు అనేకసార్లు పునర్ముద్రించబడటమే కాకుండా వందల సార్లు వేదికపై ప్రదర్శించబడటం ఆ నాటకాల ప్రజాదరణకు నిదర్శనం. 'కురుక్షేత్రం', 'దశావతార', సంపూర్ణ రామాయణం, 'అక్కమహాదేవి', 'షాజహాన్‌', 'గౌతమబుద్ధ', 'చిరకుమారసభ', 'యాజ్ఞసేని', 'సతీతులసి', 'ప్రచండ చాణక్య', 'అభినేత్రి', 'చంగలియ బలిదాన', 'శ్రీదుర్గ', 'బబ్రువాహన', 'బిడుగడెయ బిచ్చుగత్తి', 'రాణి', 'తారకవధే', 'ఇవానల్ల' వంటి పౌరాణిక, చారిత్రక, సాంఘిక నాటకాలతో సహా ఇరవైకి పైగా జనరంజక నాటకాలు రచించాడు.

"పద్యం వధ్యం గద్యం హృద్యం" అనే కవితా నినాదానికి అనుగుణంగా, అప్పుడప్పుడు సంగీతంతో, ఎక్కువగా గద్య రూపంలో నాటకాలు రాసిన వారిలో బి. పుట్టస్వామయ్య అగ్రగామి. ఈ విషయంలో, నాటక ప్రపంచానికి ఇతడు చేసిన సేవ ప్రత్యేకమైనది. నాటక ప్రదర్శనలలో ఇతని 'కురుక్షేత్రం' రికార్డు సృష్టించింది. ఒకే నాటక రచయిత ఇన్ని నాటకాలు ఇంతటి అద్భుతమైన విజయాన్ని సాధించడం మొత్తం దేశంలోనే అరుదు.

నవలలు

బి. పుట్టస్వామయ్య జర్నలిజంలో చాలా అనుభవం సంపాదించాడు. నవలా రచనలో దిగడానికి ముందు నాటకరంగంలో తన అదృష్టాన్ని ప్రయత్నించాడు. ఇతని తొలి నవల 'రూపలేఖ' 1953లో ప్రచురితమైంది. 'అభిసారికే', 'సుధామయి', 'మల్లమ్మన పవాడ', 'రత్నహార', 'చాళుక్య తైలప', 'తేజస్విని', 'నాట్య మోహిని', 'ప్రభుదేవ', 'ఉదయరవి ', 'రాజ్యపాల ', 'కళ్యాణేశ్వర', ' నాగబంధ ', 'ముగియద కనసు ', ' క్రాంతి కల్యాణ ', 'హూవు కావు' మొదలైన నవలలు వ్రాశాడు.

పురస్కారాలు

1965లో ఇతడు రాసిన 'క్రాంతి కళ్యాణ' కేంద్ర సాహిత్య అకాడమీ అవార్డును అందుకుంది. అదే సంవత్సరం రాష్ట్ర సాహిత్య అకాడమీ అవార్డును కూడా అందుకున్నాడు. 1978లో సంగీత నాటక అకాడమీ ఫెలోషిప్ అందుకున్నాడు.

మరణం

ఇతని పేరు "పుట్ట"స్వామయ్య ఐనా ఇతడు "దొడ్డ" కీర్తినే గడించాడు. పాత్రికేయుడు, సినిమా రచయిత, దర్శకుడు, నవలాకారుడు, కథారచయిత, సమాజ సేవకుడు అయిన పుట్టస్వామయ్య జనవరి 25, 1984 న మరణించాడు.