బ్రహ్మానంద శివయోగి
బ్రహ్మానంద శివయోగి | |
|---|---|
| జననం | కరాట్ గోవింద మీనన్ 1852 ఆగస్టు 26 కొల్లెంగోడు, పాలక్కాడ్, బ్రిటిష్ ఇండియా |
| మరణం | 1929 సెప్టెంబరు 10 (వయసు: 77) |
| ఇతర నామములు | ఆలత్తూర్ శివయోగి, ఆలత్తూర్ స్వామి, సిద్ధ ముని, పురుష సింహం |
| వృత్తి | ఆధ్యాత్మిక గురువు, సంఘ సంస్కర్త |
కరాట్ గోవింద మీనన్ (1852 ఆగస్టు 26 – 1929 సెప్టెంబరు 10) ప్రస్తుత కేరళ రాష్ట్రానికి చెందిన భారతీయ సంఘ సంస్కర్త, నాస్తికుడు, రచయిత. ఇతను బ్రహ్మానంద శివయోగి గా సుపరిచితుడు. ఇతను 1918లో ఆనంద మహాసభను స్థాపించాడు. ఇతను ఆనందదర్శం లేదా ఆనందమతం ప్రతిపాదించాడు.[1] కేరళలో సంఘ సంస్కర్త, బ్రహ్మ సమాజ ప్రచారకుడు, సుగుణవర్ధిని ఉద్యమ స్థాపకుడు అయిన అయ్యతాన్ గోపాలన్, ఇతని ఆధ్యాత్మిక, సాహిత్య జ్ఞానాన్ని గుర్తించి "బ్రహ్మానంద స్వామిగళ్" అనే బిరుదును ఇచ్చాడు. స్వామి శివయోగికి మార్గదర్శకుడిగా ఉంటూ, మలబార్ బ్రహ్మసమాజ సభ్యులు, గోపాలన్ అభ్యర్థన మేరకు (బ్రహ్మసమాజ ప్రార్థనా సమావేశాలలో పాడేందుకు) బ్రహ్మసంకీర్తనం అనే కవితను రాసినందుకు గౌరవంగా, బ్రహ్మ సమాజం ద్వారా చేసిన విశేష సేవలకు గాను ఈ బిరుదు లభించింది. ఇతను 1891లో ఆలత్తూరులో సిద్ధాశ్రమాన్ని ప్రారంభించాడు. ఆనందం ఏ మానవ కార్యకలాపానికైనా గీటురాయి కావాలని ఇతను సిద్ధాంతీకరించాడు. ఇతను నాయకత్వం వహించిన ఉద్యమం కేరళ సంస్కరణ ఉద్యమంలో ముఖ్యమైన పాత్ర పోషించింది.
తొలినాటి జీవితం
[మార్చు] | ఈ విభాగంలో మూలాలను ఇవ్వలేదు. |
బ్రహ్మానంద శివయోగి 1852 ఆగస్టు 26న కేరళలోని పాలక్కాడ్ జిల్లాలో ఉన్న కొల్లెంగోడు అనే చిన్న గ్రామంలో జన్మించాడు. ఇతను వల్లెంగిలోని కున్నత్ రావుణ్న్యారత్‌కు చెందిన కున్హికృష్ణ మీనన్, "కరాట్" కుటుంబానికి చెందిన నాని అమ్మ దంపతులకు తొమ్మిదవ కుమారుడు. ఇతనికి తొమ్మిది మంది సోదరులు, ఒక సోదరి ఉన్నారు. బాల్యంలో బ్రహ్మానంద శివయోగిని గోవిందన్‌కుట్టి అని పిలిచేవారు. ఇతని తల్లి మతాచారాలను కచ్చితంగా పాటించే భక్తురాలైన నాయర్ మహిళ. మాతృస్వామ్య కుటుంబాల అప్పటి ఆచారం ప్రకారం ఇతను తన తల్లిదండ్రులతో కలిసి తన మాతృస్వామ్య ఇంట్లో నివసించాడు. తల్లిదండ్రులు, ఇతర కుటుంబ సభ్యులు సహజంగానే ఇతన్ని సంప్రదాయవాదం వైపు ప్రభావితం చేశారు. గోవిందన్‌కుట్టి ఒక నాయర్ బాలుడి సాంప్రదాయిక జీవితాన్ని పూర్తిగా అంగీకరించాడు. దేవాలయాలను సందర్శించేవాడు, దేవతలను పూజించేవాడు, ప్రార్థనలు, నైవేద్యాలు, ఇతర మతపరమైన ఆచారాలలో పాల్గొనేవాడు. ఇతన్ని సమీపంలోని పాఠశాల అయిన కొల్లెంగోడు బోర్డ్ ఎలిమెంటరీ స్కూల్‌కు పంపారు. ఆ కాలంలో కేరళలో విద్యా రంగంలో అనేక మార్పులు సంభవించాయి. కానీ మెజారిటీ ప్రజలకు ఆంగ్ల విద్య ప్రాముఖ్యత గురించి తెలియదు. సంస్కృత పండితులకు ఎక్కడైనా గౌరవం ఉండేది. ఆ భాషలో నైపుణ్యం సాధించడానికి విద్యార్థులు సాధారణంగా సంస్కృత పండితుల నివాసాలకు వెళ్లేవారు. సుప్రసిద్ధ పండితుడు పద్మనాభ శాస్త్రి గోవిందన్‌కుట్టికి మార్గనిర్దేశం చేసిన సంస్కృత గురువు. తండ్రి కున్హికృష్ణ మీనన్ తన కుమారుడిని సంస్కృతంలో ఉన్నత విద్య కోసం కూడల్లూర్ శాస్త్రికల్ వద్దకు పంపాడు. గురువు దగ్గర వ్యాకరణం, కవిత్వం, కావ్యశాస్త్రం అభ్యసించాడు. ఇతని గ్రహణ శక్తి అసాధారణంగా ఉండేది. ఈ సమయంలో తన కవితా ప్రతిభను కనబరిచాడు. అప్పటికే హిందూ గ్రంథాలు, తమిళ భాషలో ప్రావీణ్యం పొందాడు. ఇతని తొలి జీవితంలో, బాల్యంలో ఇతని తర్వాతి కాలపు హేతువాదం లేదా నాస్తికత్వ విశ్వాసాలకు సంబంధించిన ఎలాంటి సంకేతాలు లేదా అద్భుతాలు లేవు.
సంస్కృత విద్యాభ్యాసం పూర్తయిన తర్వాత, కరాట్ గోవింద మీనన్ ఎర్నాకులానికి వెళ్లి అక్కడ సంస్కృత ఉపాధ్యాయుడిగా చేరాడు. ఎర్నాకుళంలో ఇతని స్వల్పకాలిక నివాసం, విభిన్న సంస్కృతులు కలిగిన ఎంతో మంది వ్యక్తులతో పరిచయం ఇతని దృక్పథాన్ని విశాలం చేశాయి. డాక్టర్ అయ్యతాన్ గోపాలన్, బ్రహ్మ సమాజం బోధించిన విగ్రహారాధన వ్యతిరేకత, నాస్తిక సూత్రాల ద్వారా ఇతను బాగా ప్రభావితమయ్యాడు. అప్పటికే దేవుడు, మతం, సంప్రదాయం పట్ల ఇతని వైఖరి నెమ్మదిగా మారుతూ వస్తోంది.
దానికి అనుగుణంగా వడవన్నూరులోని ముక్కిల్ మరుతూర్ కు చెందిన తావుకుట్టి అమ్మను వివాహం చేసుకున్నాడు. తన సొంత కుటుంబాన్ని చూసుకోవాల్సి రావడంతో కాలికట్ నేటివ్ హైస్కూల్‌లో (ప్రస్తుతం గణపత్ హైస్కూల్ అని పిలుస్తారు) సంస్కృత మున్షీగా తన వృత్తిని ప్రారంభించాడు. కోజికోడ్‌లో నివాసం ఇతని జీవితంలో ఒక మలుపు. ఆ సమయంలో సమాజ సంస్కరణల కోసం డాక్టర్ అయ్యతాన్ గోపాలన్ నేతృత్వంలో బ్రహ్మ సమాజ శాఖ ఒకటి కోజికోడ్‌లో పనిచేసేది. డాక్టర్ అయ్యతాన్ గోపాలన్ ఆ కాలంలో కేరళలో గొప్ప సంఘ సంస్కర్త. బ్రహ్మసమాజంలో నిర్వహించిన చర్చల్లో గోవింద మీనన్ పాల్గొన్నాడు. బ్రహ్మసమాజాన్ని తరచుగా సందర్శించేవాడు, డాక్టర్ గోపాలన్, మలబార్ బ్రహ్మసమాజ సభ్యుల అభ్యర్థన మేరకు బ్రహ్మసంకీర్తనం అనే పుస్తకాన్ని రాశాడు. డాక్టర్ అయ్యతాన్ గోపాలన్ ఇతని ఆధ్యాత్మిక, సాహిత్య జ్ఞానాన్ని గుర్తించి "బ్రహ్మానంద స్వామి"గా సత్కరించాడు. వారి ప్రసంగాలను వినే అవకాశం ఇతనికి లభించింది. ఇది సహజంగా ఇతని జ్ఞానాన్ని సుసంపన్నం చేసింది. విగ్రహారాధన పద్ధతిని వారు తిరస్కరించడం ఇతనిని గణనీయంగా ప్రభావితం చేసింది. కాలికట్‌లో ఉన్న సమయంలో ఇతను ఆంగ్లంలో కూడా ప్రావీణ్యం పొందాడు. కులం అనేది అత్యంత హానికరమైన, అవాంఛిత సామాజిక వ్యవస్థ అని తెలుసుకున్నాడు. నెమ్మదిగా సాంప్రదాయిక హిందూ సమాజం నుండి బయటపడ్డాడు. తాత్విక పరంగా హిందూ మతం నుండి దూరమయ్యాడు. కాలికట్ పాఠశాలకు రాజీనామా చేసి ఆలత్తూరులోని బోర్డ్ మిడిల్ స్కూల్‌లో సంస్కృత మున్షీగా చేరాడు. అప్పటికి "బ్రహ్మానంద స్వామిగళ్" అనే పేరుతో విస్తృతంగా గుర్తింపు పొందాడు.
సంఘ సంస్కరణ కార్యకలాపాలు
[మార్చు] | ఈ విభాగంలో మూలాలను ఇవ్వలేదు. |
క్రమంగా రాజయోగ సాధన ప్రారంభించాడు. ఈ సమయంలో సన్యాస జీవితాన్ని, వస్త్రధారణను పూర్తిగా స్వీకరించాడు. ఆలత్తూరులోని తన నివాసానికి సిద్ధాశ్రమం అని పేరు పెట్టుకున్నాడు. శివయోగి 1907లో ఉపాధ్యాయ వృత్తిని మానివేసి, తన ఆధ్యాత్మిక లక్ష్యానికి సంబంధించిన కార్యకలాపాల కోసం పూర్తిగా అంకితమయ్యాడు. 1907లో ఆలత్తూరులో సిద్ధాశ్రమం అనే ఆధ్యాత్మిక సంస్థను స్థాపించాడు. ఆలత్తూరులో స్థిరపడిన తర్వాత బ్రహ్మానంద శివయోగి విప్లవాత్మక కార్యకలాపాలు వేగవంతమయ్యాయి. ఆనందమతాన్ని (ఆనంద మతం) ప్రారంభించి, ఆనందమతం ఆదర్శాలను ప్రచారం చేయడానికి కేరళలోని కొన్ని ప్రాంతాల్లో పర్యటించాడు, సామాజిక-మత వ్యతిరేక ఆచారాలకు వ్యతిరేకంగా నిరంతరం పోరాడాడు. భార్య తావుకుట్టిఅమ్మ ఇతని నిజమైన శిష్యురాలిగా మారి యోగినిమాత అనే బిరుదు పొందింది.
వి.కె.గురుక్కల్ వాగ్ధాటిని చూసి అతనికి వాగ్భటానంద అని పేరు పెట్టింది బ్రహ్మానంద శివయోగియే. సంఘ సంస్కర్తగా బ్రహ్మానంద శివయోగి ఎప్పుడూ వేదికలెక్కి భారీ జనసమూహాలను ఉద్దేశించి ప్రసంగించలేదు. ప్రజలను చైతన్యపరచడం, మూఢనమ్మకాలు, అజ్ఞానం నుండి తమను తాము విముక్తులు చేసుకోవడం నేర్పించడమే ఇతని ప్రధాన ఉద్దేశం. సంస్కృత పండితుడైనప్పటికీ, సమాజంలో సామాన్యుల నిజమైన స్థితి గురించి వారికి అవగాహన కల్పించడానికి స్థానిక భాష అయిన సరళమైన మలయాళాన్ని ఇష్టపడ్డాడు. రాజయోగం పట్ల అవగాహన లేకపోవడం వల్లే మూఢనమ్మకాలు, దురాచారాలు సామాన్యులను ప్రభావితం చేశాయని బ్రహ్మానంద శివయోగి విశ్వసించాడు. మానవ జాతికి చెందిన అసలైన సార్వత్రిక మతం "ఆనందం" మాత్రమే అనే జ్ఞానంతో మతపరమైన శత్రుత్వం, కష్టాలకు ముగింపు పలకవచ్చని భావించాడు. శివయోగి ప్రత్యక్ష శిష్యులైన వి.కె.కొంబి అచ్చన్, శివరామకృష్ణ అయ్యర్, జి.కృష్ణ అయ్యర్, టి.కె.పి.ఆనందయోగి, సి.కన్నన్ నాయర్, సూర్యనారాయణ శర్మ, పి.ఎ.ఆనందన్, వాగ్భటానంద, ఎన్.కె.ఆనందన్, అడ్వకేట్ రామ వారియర్ నేతృత్వంలో శివయోగి సూత్రాల ప్రచారం మొదలైంది.
అన్ని పునరుజ్జీవనోద్యమ నాయకుల మాదిరిగానే, ఇతను విద్య ప్రాముఖ్యతను, ముఖ్యంగా మహిళా విద్యను నొక్కిచెప్పాడు. శివయోగి అనేక పండిత ప్రామాణిక గ్రంథాలను తెచ్చి చదివాడు. సంస్కృత గ్రంథాలను నేర్చుకుని అన్వయించాడు, తన భావజాలాన్ని హైలైట్ చేయడానికి, సుస్థిరం చేయడానికి ముఖ్యమైన పంక్తులను తీసుకున్నాడు. శాశ్వత ఆనందపు విజయం, నిజమైన ఆనందం అంటే మనశ్శాంతి, ప్రధానమైన విజయం అంటే మనస్సుపై విజయమే, అహింస అనేది ధర్మానికి ప్రధాన రూపం, యజ్ఞాలు వంటి ఆచారాలు అజ్ఞానాన్ని సృష్టిస్తాయి, ఆనందం సహజమైనది మొదలైన ప్రామాణిక సత్యాలను ఇతను ఉదాహరణలు, తర్కంతో నిరూపించాడు. ఇది గుడ్డిగా అనుసరించే సూత్రాలు, చర్యలను తిరస్కరించడానికి దారితీసింది, కొత్త ప్రగతిశీల ఆలోచనలు, సూత్రాల ఆవిర్భావానికి కారణమైంది. దాని ఆధారంగా కుల వ్యవస్థ, అంటరానితనం, విగ్రహారాధన, దేవాలయ ఆధారిత ఆచారాలు, జంతుబలి, మూఢనమ్మకాలు, సంస్థాగతమైన మతాన్ని వ్యతిరేకించారు. మనుషులంతా సమానమే అనే అవగాహన పెంపొందింది. హేతుబద్ధమైన మేధావిగా, పేద, నిర్లక్ష్యానికి గురైన, అజ్ఞాన సామాన్యుడిని రక్షించడానికి నిలబడ్డాడు. వారిని విశ్వ సోదరభావం వైపు నడిపించాడు.
స్వామి శివయోగి తన 77వ ఏట 1929 సెప్టెంబరు 10న మరణించాడు.
స్వామి రాసిన పుస్తకాలు
[మార్చు]మలయాళంలో
[మార్చు]- శివయోగ రహస్యం – 1895
- స్త్రీ విద్యా పోషిణి – 1899
- సిద్ధానుభూతి – 1903
- మోక్షప్రదీపం – 1905
- ఆనందకల్పద్రుమం – 1905
- ఆనంద సూత్రం – 1910
- రాజయోగ పరస్యం – 1916
- విగ్రహారాధన ఖండనం – 1916
- ఆనంద విమానం – 1916
- ఆనందమత పరస్యం – 1919
- ఆనందకుమ్మి – 1920
- ఆనంద గానం – 1923
- ఆనందదర్శం – 1927
- ఆనందదర్శం – 1928
- జ్ఞానకుమ్మి
- పిళ్ళాతలోలిప్పు
(ఈ పుస్తకాలలో ఎక్కువ భాగం ఆంగ్లం, హిందీ, తమిళ భాషల్లో అనువాదాలు అందుబాటులో ఉన్నాయి.)
స్వామి గురించిన పుస్తకాలు
[మార్చు]- కె. భీమన్ నాయర్ రాసిన బ్రహ్మానంద శివయోగి జీవిత చరిత్ర "అసత్యతిల్ నిన్ను సత్యతిలేక్కు" (అసత్యం నుండి సత్యం వైపు)
- ఎ.కె. నాయర్ రాసిన బయోగ్రఫీ ఆఫ్ బ్రహ్మానంద స్వామి శివయోగి
- పవనన్ రాసిన బ్రహ్మానంద స్వామి శివయోగి
- పి.వి. గోపాలకృష్ణన్ రాసిన బ్రహ్మానంద స్వామి శివయోగి అండ్ హిజ్ సెలెక్టెడ్ వర్క్స్
ఇవి కూడా చూడండి
[మార్చు]- రావు సాహిబ్ డాక్టర్ అయ్యతాన్ గోపాలన్
- వాగ్భటానంద
- మితవాది కృష్ణన్
- మూర్కోత్ కుమారన్
- నారాయణ గురు
- పద్మనాభన్ పల్పు
- కుమారన్ ఆసన్
- అయ్యంకాళి
- అయ్యా వైకుండర్
- పండిట్ కరుప్పన్
మూలాలు
[మార్చు]- ↑ Journal of Indian history, University of Kerela Press, 2001, p. 270.
గ్రంథ పట్టిక
[మార్చు]- బ్రహ్మానంద స్వామి శివయోగి - పవనన్ (సాంస్కృతిక ప్రచురణల విభాగం, కేరళ ప్రభుత్వం, తిరువనంతపురం -14, కేరళ)
- కేరళ నవోత్థానం - ఒరు మార్క్సిస్ట్ వీక్షణం - పి. గోవిందపిళ్ళై (చింతా పబ్లిషర్స్, తిరువనంతపురం-695001)
- సారగ్రాహి మాసపత్రిక - వివిధ సంచికలు