వడపళని అందవర్ ఆలయం
| వడపళని ఆండవర్ ఆలయం | |
|---|---|
 | |
  చెన్నైలో స్థానం | |
| భౌగోళికం | |
| భౌగోళికాంశాలు | 13°03′10″N 80°12′49″E / 13.05278°N 80.21361°E |
| దేశం | భారతదేశం |
| రాష్ట్రం | తమిళనాడు |
| జిల్లా | చెన్నై |
| ప్రదేశం | వడపళని |
| ఎత్తు | 55 m (180 ft) |
| సంస్కృతి | |
| దైవం | వడపళని ఆండవర్ (మురుగన్ దేవుడు) |
| వాస్తుశైలి | |
| నిర్మాణ శైలులు | ద్రావిడ శైలి వాస్తుశిల్పం |
| చరిత్ర, నిర్వహణ | |
| నిర్మించిన తేదీ | 1865 |
వడపళని ఆండవర్ ఆలయం ఒక హిందూ ఆలయం, ఇది మురుగన్ కు అంకితం చేయబడింది. ఈ ఆలయం భారతదేశంలోని తమిళనాడు రాష్ట్రం, చెన్నై నగరంలోని వడపళని ప్రాంతంలో ఉంది.[1] ఈ ఆలయం 1920లలో పునరుద్ధరించబడింది, ఆ కాలంలో ఒక రాజగోపురం నిర్మించబడింది. సినిమా రంగానికి చెందిన ప్రముఖుల ఆశ్రయంతో ఈ ఆలయానికి విశేష ప్రాచుర్యం లభించిందని విశ్వసించబడుతోంది.[2]
చరిత్ర
[మార్చు]ఈ ఆలయం ప్రారంభంలో మురుగన్ దేవునికి అంకితుడైన అన్నస్వామి నాయకర్ తన ఇంట్లో ఒక గుడిసెలో దేవుని చిత్రాన్ని ఉంచి పూజలు చేసేవాడు. ఆ గుడిసె ఉన్న స్థలంలోనే సుమారు 1890లో ఈ ఆలయం నిర్మించబడింది. అన్నస్వామి నాయకర్ ఈ ఆలయ స్థాపకుడు, మొదటి పూజారి. వడపళని ఆలయం అరుగ్వాక్కు (దైవ వాక్కు), భవిష్యత్తు చెప్పే శక్తి కారణంగా ప్రసిద్ధి చెందింది. అన్నస్వామి నాయకర్ పలికిన మాటలు నిజమవుతాయని భక్తులు విశ్వసించేవారు. విద్య, పరీక్షల్లో అపజయం, వివాహ సమస్యలు, వ్యాధులు, నిరుద్యోగం వంటి సమస్యలకు ఆయన దైవ వాక్కు సమాధానాలు ఇచ్చేదని నమ్మకం ఉంది. అన్నస్వామి నాయకర్ శిష్యుడైన రత్నస్వామి చెట్టియార్ ఈ సంప్రదాయాన్ని కొనసాగించాడు. అతనికీ అరుగ్వాక్కు చెప్పే దైవ శక్తి ఉందని విశ్వసించబడింది. 1920లో ఆలయం పునరుద్ధరించబడింది. గత శతాబ్ద కాలంగా లక్షలాది భక్తులు ఈ ఆలయాన్ని సందర్శిస్తున్నారు.
ఈ ఆలయాన్ని 19వ శతాబ్దం చివరలో మురుగన్ యొక్క పరమ భక్తుడైన అన్నస్వామి నాయకర్ నిర్మించారు. అతను మురుగన్ యొక్క గొప్ప భక్తుడు, ఒక చిన్న, గడ్డి కప్పుతో ఉన్న గుడిసెను నిర్మించి, అందులో మురుగన్ యొక్క చిత్రపటాన్ని ఉంచి పూజించడం ప్రారంభించాడు. తీవ్రమైన కడుపు జబ్బుతో బాధపడుతున్నప్పటికీ, అతను చెడు వాతావరణాన్ని, దొంగలను సైతం లెక్కచేయకుండా అన్ని మురుగన్ దేవాలయాలను సందర్శిస్తూ తీర్థయాత్ర చేశాడు. ఒక రోజు, ఒక సాధువు అతని కలలో కనిపించి, మురుగన్ పూజ కోసం అతని ఇంట్లోనే ఉన్నాడని చెప్పాడు. అన్నస్వామి నాయకర్ మురుగన్కు పూజలు చేయడం ప్రారంభించాడు, పళని సాధువు మాటపై, అతను తిరుత్తణిలోని మురుగన్ ఆలయంలో తన నాలుకను సమర్పించుకున్నాడు. అతని అనారోగ్యాలు మాయమయ్యాయి.
ఒక రోజు ఆయన దక్షిణ పళని ఆలయ దర్శనం పూర్తి చేసి మెట్ల దిగి వస్తుండగా, మురుగన్ అందమైన చిత్రపటం ఆయన దృష్టిని ఆకర్షించింది. దానిని కొనుగోలు చేయడానికి ఆయన వద్ద డబ్బు లేదు. తరువాత రోజు ఆ దుకాణదారు అన్నస్వామి ఇంటికి వచ్చి ఆ చిత్రాన్ని అందించాడు. మురుగన్ తన కలలో వచ్చి ఆ చిత్రాన్ని అన్నస్వామికి ఇవ్వమని చెప్పాడని తెలిపాడు. అన్నస్వామి ఆ చిత్రాన్ని చెన్నైకి తీసుకువచ్చి తన కుటుంబాన్ని వేరే చోటికి తరలించాడు. ఆ తరువాత ఆయనలో ఒక దైవశక్తి ప్రవేశించి పూజల సమయంలో సత్యవాక్యాలు పలుకుతూ భక్తుల సమస్యలను పరిష్కరించడం ప్రారంభించింది. ఆయన శిష్యుడు రత్నస్వామి చెట్టియార్ ఆలయ నిర్మాణానికి అంగీకరించాడు.
అన్నస్వామి నాయకర్ ఆలయ నిర్మాణాన్ని పర్యవేక్షించగా, రత్నస్వామి చెట్టియార్ పళనియండవర్ పవిత్ర విగ్రహ నిర్మాణాన్ని ఏర్పాటు చేశాడు. 1865లో ఆలయ నిర్మాణం ప్రారంభమైంది. ఒక రోజు అన్నస్వామి నాయకర్ దైవసాన్నిధ్యం పొందాడు. తరువాత ఆయన కలలో రత్నస్వామికి దర్శనమిచ్చి తన స్థానాన్ని స్వీకరించమని చెప్పాడు. రత్నస్వామి భక్తుల సమస్యలను ఉన్మాదావస్థలో పరిష్కరించే సంప్రదాయాన్ని కొనసాగించాడు. ఆలయ నిర్మాణం పూర్తయింది. పళనియండవర్ విగ్రహ ప్రతిష్ఠ జరిగింది, కుంభాభిషేకం నిర్వహించబడింది. భక్తుల సమర్పణలు ఆలయ పూజలు, నిర్వహణకు ఉపయోగించబడ్డాయి.
రత్నస్వామి చెట్టియార్ భక్తులను ఈ ఆలయాన్ని వడపళని ఆలయం అని పిలవమని కోరాడు. ఆయన తరువాత దైవసాన్నిధ్యం పొందాడు. ఆయన తరువాత మురుగన్కు అంకితుడైన భాగ్యలింగం ఈ సేవలను కొనసాగించాడు. అతను అరుగ్వాక్కు సంప్రదాయం, పూజలను కొనసాగించాడు.
వడపళని మురుగన్ ఆలయ నిర్మాణ శైలి
[మార్చు]ఈ ఆలయం దక్షిణ భారతీయ ఆలయాల సంప్రదాయ శైలిలో నిర్మించబడింది. ప్రవేశద్వారంలోని రాజగోపురంపై స్కంద పురాణానికి సంబంధించిన ఘట్టాలను ప్రతిబింబించే అనేక స్తుక్కోలు (శిల్పాలు) ఉన్నాయి. మూలవర్ (ప్రధాన దేవత) పళని ఆలయ విగ్రహాన్ని పోలి ఉండి నిలువైన భంగిమలో దర్శనమిస్తాడు.
ఆలయ ప్రాంగణంలో వరసిద్ధి వినాయకుడు, చొక్కనాథర్, మీనాక్షి అమ్మన్, కాళీ, భైరవుడు, వల్లి, దేవయానితో కూడిన షణ్ముగుడు వంటి అనేక సన్నిధులు ఉన్నాయి. అంతర్గత ప్రాకారంలో దక్షిణామూర్తి, చండికేశ్వరుడు, మహాలక్ష్మి తదితరుల కోష్ఠాలు దర్శనమిస్తాయి. అంగారకుడికి (కుజ గ్రహం) ప్రత్యేక ఆలయం ఉంది; అక్కడ పాలక దేవత మురుగన్.
తూర్పు దిశలో ఉన్న గోపురంపై 108 భరతనాట్య నృత్య ముద్రలు చెక్కబడి ఉన్నాయి. ఈ గోపురం ఎత్తు 40.8 మీటర్లు. ఆలయంలో వివాహాలు నిర్వహించడానికి, ధార్మిక ప్రవచనాలు చేయడానికి విశాలమైన మండపం ఉంది.
మురుగన్ దేవునికి బంగారు రథం నిర్మించబడింది. ఆలయానికి ఎదురుగా ఆలయ కుంట ఉంది. తల వృక్షం అత్తి చెట్టు. సంతానం కోసం భక్తులు ఆ చెట్టుకు చిన్న ఊయలలను కడతారు.
వడపళని మురుగన్ ఆలయ ప్రాముఖ్యత
[మార్చు]పళని ఆలయానికి యాత్ర చేయలేని వారు తమ సమర్పణలతో వడపళని ఆలయాన్ని దర్శిస్తే సరిపోతుందని ఇక్కడ బలమైన విశ్వాసం ఉంది. దక్షిణ పళనిలో ఎలా కృప లభిస్తుందో, అదే విధంగా పళనియండవర్ ఇక్కడ కూడా భక్తులపై కృప చూపుతాడని నమ్మకం. ఈ పవిత్ర ఆలయ దైవశక్తి భక్తుల అన్ని సమస్యలను పరిష్కరిస్తుందని వారు విశ్వసిస్తారు.
ఈ ఆలయంలో మాత్రమే మురుగన్ దేవుడు పాదరక్షలు ధరించిన రూపంలో దర్శనమిస్తాడు. ఇది అహంకార త్యాగానికి ప్రతీక. భక్తులను సాయం చేయడానికి తక్షణమే సిద్ధంగా ఉన్నాడని సూచించేలా ఎడమ కాలు ముందుకు ఉంచిన నిలువైన భంగిమలో దర్శనమిస్తాడు.
భక్తులు వెండి, బంగారాన్ని కానుకలుగా సమర్పిస్తారు. కొందరు నాలుకను గుచ్చుకోవడం, తల ముండనం చేయించడం, చెవులు చీల్చుకోవడం, చీరలు సమర్పించడం చేస్తారు. ప్రత్యేక ప్రార్థనగా పాల్కవడి, పుష్పకవడి తీసుకుంటారు. జీవిత సమస్యలకు సమాధానాలు లభిస్తాయని నమ్మకంతో ఈ ఆలయం ప్రసిద్ధి చెందింది. వివాహానికి శుభప్రదమైన స్థలంగా భావించబడే ఈ ఆలయంలో సంవత్సరానికి సుమారు 7,000 వివాహాలు జరుగుతాయి.
ఇతర విషయాలు
[మార్చు]ఈ ఆలయాన్ని తమిళనాడు ప్రభుత్వంకి చెందిన హిందూ మత, ధార్మిక దానాల శాఖ నిర్వహిస్తుంది, పరిపాలిస్తుంది.[3][ఆధారం యివ్వలేదు]
మూలాలు
[మార్చు]- ↑ Subburaj, V (1 December 2006). Tourist Guide to Chennai. Sura Books. pp. 14–. ISBN 978-81-7478-040-9.
- ↑ King, Anthony D. (1984). Buildings and Society: Essays on the Social Development of the Built Environment. Routledge & Kegan Paul. pp. 143–. ISBN 978-0-7102-0234-5.
- ↑ Hindu Religious and Charitable Endowments Act, 1959
బాహ్య లింకులు
[మార్చు]