శశిలేఖ (పత్రిక)

శశిలేఖ

సంపాదకులు	నేలటూరి పార్థసారథి అయ్యంగారు
తరచుదనం	వారపత్రిక ద్వైవారపత్రిక దినపత్రిక
స్థాపకులు	గట్టుపల్లి శేషాచార్యులు
మొదటి సంచిక	1894
ఆఖరి సంచిక	1956
దేశం	భారతదేశం
కేంద్రస్థానం	మద్రాసు

శశిలేఖ తెలుగు ప్రాంతాల ఏకీకరణకు పోరాడిన తొలి పత్రిక. 1894 జూన్‌లో గట్టుపల్లి శేషాచార్యులు మద్రాను నుంచి దీన్ని ప్రారంభించాడు. ఇది వారపత్రికగా మొదలై, కొంతకాలం ద్వైవారపత్రికగా నడిచి, ఆ తరువాత దినపత్రికగా మారింది. నేలటూరు పార్ధసారథి అయ్యంగారు దీనికి సంపాదకుడు. బోయరు యుద్ధసమయంలో దీనికి మంచి ఆదరణ లభించింది. తెలుగు పాఠకులకు యుద్ధవార్తలను అందించింది. ప్రత్యేక ఆంధ్రరాష్ట్ర ఉద్యమానికి బాసటగా నిలిచింది. ఆ రోజుల్లో ఇంగ్లీషులో వెలువడుతూండే మద్రాసు స్టాండర్డ్‌ పత్రికకు ఇది తెలుగు కాపీ అని భావించేవారు. ద్వైవార పత్రికగా ఉండగా దీని సర్క్యులేషను 550 కాపీలు. ఈ పత్రిక 1956 వరకు నడిచి ఆగిపోయింది.

శశిలేఖ గ్రాంథిక భాషకు అనుకూలంగా ఉండేది. కన్యాశుల్కం నాటకాన్ని గ్రాంథిక భాషలో రాయనందుకు అది గర్హించింది.

ఈ పత్రిక గురించి దాన్ని సమకాలికురాలైన వైజయంతి పత్రిక 1894 జూలై సంచికలో ఇలా రాసింది: “శశిలేఖ నాబరగు నాంధ్ర వార్తాపత్రిక యీ చెన్నపురిన వారమున కొక్కసారి ప్రకటితంబగుచున్నది. సర్వజన సమాదరణీయంబులగు విశేషంబులును ఘనత చెందిన హిందువుల చరిత్రంబులును జనులకు దెలియ దగిన వృత్తాంతబులుం యిప్పత్రిక చెలువొందుచున్నది.”