ఆయనే ఉంటే మంగలి ఎందుకు

పూర్వకాలంలో భర్త చనిపోయిన స్త్రీ బొట్టు, పూలు, ఆభరణాలను విసర్జించటంతో పాటు తలనీలాలను కూడా త్యజించవలసి వచ్చేది. అలాంటప్పుడు మంగలి అవసరం. ఐతే విధవరాండ్రు తరచు గుండు చేయించుకోవడానికి మంగలి వద్దకు వెళ్ళలేరు కదా? అందుకని ఎవరైనా మంగలి వద్దకు వెళ్ళేవారి ద్వారానో లేక అందుబాటులో ఉన్న చిన్నపిల్లల ద్వారానో మంగలికి కబురు చేసేవారు: ఇంటికి వచ్చి గుండు చేసి వెళ్ళమని. ఒకసారి ఒక విధవరాలు మంగలికి కబురు చేద్దామని చూస్తే అందుబాటులో ఎవరూ లేరట. అప్పుడామె "మా ఆయనే ఉన్నట్లైతే ఒకరితో పని లేకుండా తనే వెళ్ళి మంగలికి చెప్పివచ్చేవారు కదా?" అని వగచిందట - ఆయనే ఉన్నట్లైతే తనకు మంగలితో పనే ఉండేది కాదన్న విషయం మరచిపోయి!

ఇలా కార్య-కారణ సంబంధాన్ని మరచిపోయి ఆలోచించేటప్పుడు ఈ సామెతను వాడుతారు.