జలభయం
జలభయం అంటే నీరంటే భయముండడం. ఈ భయం నీళ్ళు త్రాగడానికైనా ఉండవచ్చు, లేక నీటిలో మునిగిపోతామనే భయమైనా కావచ్చును.
రభస (రేబీస్) వ్యాధిలో జలభయం
[మార్చు]రభసవ్యాధిగ్రస్తులలో జలభయానికి కారణం ఉంటుంది. వీరు నీటిని గాని ఇతర ద్రవపదార్థాలను చూసేటప్పుడు, లేక తాగుటకు ప్రయత్నించినపుడు వీరి మ్రింగు కండరాలలోను, ఉదారవితానంలోను నొప్పితో కూడిన దుస్సంకోచాలు, వాంతిభావన కలుగుతాయి. ఆ నొప్పిని దుస్సంకోచాలను భరించలేకపోవుట వలన వీరికి జలభయం, ఆందోళన కలుగుతాయి. అందువలన వీరిని నీళ్ళు, ఇతర ద్రవాలను త్రాగమని బలవంతం చేయకూడదు. రభసవ్యాధిలో కలిగే జలభయాన్ని ఆంగ్లంలో ‘హైడ్రోఫోబియా’ గా వ్యవహరిస్తారు.
మానసిక జలభయం
[మార్చు]మరో జలభయం నీళ్ళలో మునిగిపోతామనుకొనే కారణం లేని మానసిక వికారము. వీరిలో నీళ్ళంటే విపరీతమైన భయం, ఆందోళన అవసరానికి మించి కలుగుతాయి. నిశ్చలంగా ఉన్న నీళ్ళకు, వాతావరణంలో మార్పులకు ప్రపంచంలో 2.-3%[1] ప్రజలకు భయం ఉంటుంది. నీళ్ళ కొలనులలో నీళ్ళకు, ప్రకృతిలో గల జలశయాలకు భయం, ఆందోళన కలిగి భౌతిక లక్షణాలు కలిగిస్తాయి[2]. మానసికంగా కలిగే జలభయాన్ని ఆంగ్లంలో ‘ఆక్వాఫోబియా’ గా వ్యవహరిస్తారు.
కారణాలు
[మార్చు]మునిగిపోతామనే సహజంగా కలిగే భయం, తల్లిదండ్రుల అతిజాగ్రత్త, నీళ్ళలో కలిగిన భయంకరమైన చేదు అనుభవం, నీళ్ళకు మానసికంగా అలవాటు పడలేకపోవడం, నీళ్ళంటే తొలగని అపనమ్మకం జలభయంకి కారణాలు. మానసికంగా కలిగే భయాలు కుటుంబాలలో కొనసాగుతుంటాయి[3]
లక్షణాలు
[మార్చు]మానసిక జలభయం కలిగినప్పుడు చాలా ఆందోళన, ఉక్కిరిబిక్కిరవడం, ముఖం ఎఱ్ఱబడడం, విపరీతంగా చెమటపోయడం, గుండెదడ, ఆయాసం,వాంతిభావన, కళ్ళుతిరగడం వణుకు,చలి, ఛాతిలో బిగుతు,ఛాతినొప్పి,నోటి తడి ఆరిపోవడం,గాభరా,చెవుల్లో గింగురు,గందరగోళం ఏమైనా కలుగవచ్చు[1]
మానసికంగా తూలిపోవడం స్పృహతప్పిపోతామనే భయం,చనిపోతామనే భయం కలుగవచ్చు
చికిత్స
[మార్చు]మానసిక జలభయం స్మృతివర్తన చికిత్స ( కాగ్నిటివ్ బిహేవియరల్ థిరపీ), సమ్మోహన చికిత్స (హిప్నోసిస్)[1] మెల్లమెల్లగా నీటికి అలవాటు చేయడం[1]వలన తగ్గే అవకాశం ఉంది. కొందఱికి ఆందోళన తగ్గించు మందులు, మానసిక క్రుంగుదల పోగొట్టు మందులు సహాయపడుతాయి.
మూలాలు
[మార్చు]- ↑ 1.0 1.1 1.2 1.3 "Aquaphobia (Fear of Water): Symptoms & Treatment". Cleveland Clinic (in ఇంగ్లీష్). Retrieved 2024-03-01.
- ↑ Murphy, Nicole (2022-10-27). "What is Aquaphobia?". CPD Online College (in బ్రిటిష్ ఇంగ్లీష్). Retrieved 2024-03-01.
- ↑ "Aquaphobia: Symptoms, Treatment, Definition, Hydrophobia, and More". Healthline (in ఇంగ్లీష్). 2018-03-12. Retrieved 2024-03-02.