బైబిలు మిషను

సుప్రసిద్ధ క్రైస్తవ మత ప్రబోధకులు ముంగమూరి దేవదాసు అయ్యగారు గుంటూరు జిల్లాలోని కాకాని అను గ్రామంలో స్థాపించిన ఒక తెలుగు క్రైస్తవ సంఘమే బైబిలు మిషను.

పరిచయం

బైబిలు మిషను ఆవిర్భావం గురించి కొన్ని మతాభిప్రాయములున్నవి. ముంగమూరి దేవదాసు అయ్యగారికి ది.వి 1938 జనవరి 31 సంవత్సరంలో ఏసు క్రీస్తు బైబిలు మిషనును బంగారపు అక్షరాలతో గాలిలో చూపించి, మునుపెన్నడూ లేని నూతన దైవ సన్నిధిని ప్రపంచానికి అందించమని ఆజ్ఞాపించారని, అందువలన దేవుడు తెలుగు ప్రజలకు దైవ సంబంధమైన నూతన సంస్కృతి, ఆధ్యాత్మిక అనుభవము, సహవాసాన్ని బైబిలు మిషను ద్వారా పరిచయం చేసారని క్రైస్తవమత ప్రబోధకులు చెబుతారు.

దేవదాసు అయ్యగారు దైవ జ్ఞానానికి, బైబిలు సారాంశం అంతటికి సరిపడు కీర్తనలు, పద్యాలు, భజనలు, అనేక మర్మములు గల దైవ సాహిత్యాన్ని తెలుగులో రచనలు చేసారు. ఆయన హిందూ దేశ ప్రతిభను, కళలను బ్రిటిష్, ఆమెరికన్ క్రిష్టియన్లకు, మిషనరీలకు, ప్రజలకు మన స్వాతంత్ర్యానికి ముందు, తర్వాత చాటి చెప్పారు. అంతేగాక భూలోకమంతటికి నిజమైన దైవ సందేశం అందించడానికి హిందూదేశము ప్రదానము అని, ఎక్కడా లేని దైవ భక్తి, ఆధ్యాత్మిక ఛింతన ఈ దేశంలోనే అని ఆనాటి విదేశీయులకు తన రచనల ద్వారాను, ముఖాముఖి ఛర్చల ద్వారా తెలియజేసారు. బైబిలు మిషను, ఆంధ్ర క్రైస్తవ కీర్తనలు సంగీత విలువలతో కర్ణాటిక, హిందూస్తానీ, కాపి రాగ తాళాలతో, పద్యాలు అందరికి సులువుగా అర్ధమయ్యే చందస్సుతో రచించారు.

ముంగమూరి దేవదాసు అయ్యగారు

ముంగమూరి దేవదాసు అయ్యగారు 1840 లో తూర్పు గోదావరి జిల్లా, కడియం మండలం జేగురుపాడు గ్రామంలో జన్మించారు. 120 సంవత్సరములు జీవించి, ఆయనకు ఊహ తెలిసినప్పటి నుండి ఆధ్యాత్మిక భావాలతో దైవ, మనుష్య మన్ననలను అందుకొన్నారు. ఈయన తన జీవితకాలములో సిరిని ముట్టలేదు, పరిశుద్ధ బ్రహ్మచారిగా, యోగిగా, ఋషిగానే యుండి దేవ సాన్నిధ్యాన్ని ప్రత్యక్షముగా చూడడమే కాక, తన అనుచరులకు రాజమండ్రికి చేరువలో గోకవరం మండలానికి చెందిన సూదికొండ మీద ఆ ప్రత్యక్షతను చూపించారు.

హిమాలయాలలోని కైలాస మహర్షి, సాధు సుందర్ సింగ్ లాంటి భక్తులతో ఆత్మీయంగా సంభాషించేవారు. ఈయన గుంటూరులోని, పెదకాకానిలో దైవ జ్ఞానము, సంపూర్ణ స్వస్థత, పరలోక అనుభవములతో తన పరిచర్యను కొనసాగించారు.

హిందూదేశ ప్రత్యక్షత

భూలోకమంతటికి సువార్త అందించడములో భారతదేశం ప్రధానమని దేవదాసు అయ్యగారు చెప్పారు. ఇతర దేశ సొమ్ము ఈ దేశ ఆధ్యాత్మికతకు అవసరం లేదు. సర్వేజన సుఖినోభవంతు, ఏ మతమును గాని, ఏ మనుష్యుని గాని ద్వేషించరాదు, దూషించరాదు. తెలియని విషయములు దేవునినడిగి తెలుసుకొనండి అని బోధించిన బైబిలు మిషనును ప్రపంచానికి చూపినపుడు, అందరికి సంపూర్ణ జీవితం లభిస్తుంది.