వంఛినాథన్

వికీపీడియా నుండి
Jump to navigation Jump to search
వంఛినాథన్ గౌరవార్దం వంఛి మనియాచ్ఛిలో ఒక నేమ్‌ బోర్డుకు అతడి పేరు పెట్టబడింది

వంఛినాథన్ (తమిళం: வாஞ்சிநாதன்) (1886 - జూన్ 17, 1911), వంచి అని అందరికీ తెలిసినవాడు ఒక భారతీయ తమిళ స్వాతంత్ర్య కార్యకర్త. ఇతడు తిరునల్వేలి కలెక్టర్ ఆషెని కాల్చి చంపి, తర్వాత అరెస్టును తప్పించుకోవడానికి ఆత్మహత్య చేసుకున్నందుకు గాను ప్రజల హృదయాల్లో నిలిచిపోయాడు.

వ్యక్తిగత జీవితం[మార్చు]

వంఛినాథన్ 1886లో సెంకోట్టయ్‌లో రఘుపతి అయ్యర్, రుక్మిణి అమ్మాళ్ దంపతులకు జన్మించాడు. ఇతడి అసలు పేరు శంకరన్. ఇతడు సెంకోట్టయ్‌లో పాఠశాల చదువు పూర్తి చేశాడు, తిరువనంతపురంలో మూలం తిరుణాల్ మహారాజా కాలేజీలో ఎం.ఎ పట్టా పుచ్చుకున్నాడు.. కళాశాలలో ఉండగానే, ఇతడు పొన్నామల్‌ని పెళ్లాడాడు, విలాసవంతమైన ప్రభుత్వోద్యోగాన్ని సంపాదించాడు.

స్వాతంత్ర్యోద్యమం[మార్చు]

1911 జూన్ 17న వంచి తిరునల్వేలి జిల్లా కలెక్టర్ ఆషెని హత్య చేశాడు, ఇతడిని అందరూ కలెక్టర్ దొర అని పిలిచేవారు. మద్రాసు వైపు ఆషె ప్రయాణిస్తున్న రైలు మనియాచి స్టేషన్‌లో ఆగినప్పుడు ఇతడు ఆషెని అతి సమీపం నుండి కాల్చి చంపాడు. తరువాత ఇతడు ఆత్మహత్య చేసుకున్నాడు. అప్పటినుంచి రైల్వే స్టేషన్‌కి వంచి మనియాఛి అని పేరు పెట్టారు.

ఆ రోజున, ఆషె తిరునల్వేలి జంక్షన్‌లో మనియాచి మెయిల్‌లో 9.30 గంటలకు రైలు ఎక్కాడు. తనతో పాటు అతడి భార్య మేరీ లిలియన్ పాటర్సన్ కూడా ఉంది, కొద్ది రోజుల క్రితమే ఆమె ఐర్లండ్ నుంచి వచ్చింది. వీరిద్దరూ 1898 ఏప్రిల్ 6న బరంపురంలో వివాహమాడారు, ఆషే కంటే మేరీ ఒక సంవత్సరం పెద్దది. కోడైకెనాల్‌లో ఒక అద్దె బంగాళాలో ఉంటున్న తమ నలుగురు పిల్లలు మోలీ, అర్థర్, షెలియా, హెర్బర్ట్‌లను చూసేందుకు వారు మార్గమధ్యంలో ఉన్నారు. ఉదయం 10.38 గంటలకు రైలు మనియాఛిలో నిలిపివేయబడింది. సిలోన్ బోట్ మెయిల్ 10.48 గంటలకు రావలసి ఉంది. బోట్ మెయిల్ రాకకోసం ఎదురుచూస్తూ ఫస్ట్ క్లాస్ బోగీలో ఆషే దంపతులు ఎదురెదురుగా కూర్చుని ఉన్నారు, కురచ జుట్టుతో నీటుగా తయారైన ఒక వ్యక్తి, ధోవతి ధరించిన మరొక యువకుడు బోగీని సమీపించారు. ఇద్దరిలో మొదటి వ్యక్తి బోగీలోకి ఎక్కాడు, బెల్జియం తయారీ బ్రౌనింగ్ ఆటోమేటిక్ పిస్టల్‌ని బయటకు లాగాడు. దాంట్లోంచి తూటా ఆషె గుండెలోకి దూసుకెళ్లింది, అతడు కుప్పగూలాడు. పిస్టల్ పేలిన శబ్దం హోరుగాలిలో కలిసిపోయింది.

కాల్చిన తర్వాత హంతకుడు ఫ్లాట్‌ఫాం గుండా పరుగెత్తి ఒక మరుగుదొడ్డిలో దాక్కున్నాడు. కాస్సేపటి తర్వాత అతడు చనిపోయి ఉండటం కనిపించింది, నోట్లో తనకు తానుగా కాల్చుకున్నాడు. తన జేబులో కింది విధంగా రాసిన ఉత్తరం కనిపించింది:

"ఇంగ్లండ్ మ్లేచ్ఛులు మన దేశాన్నే కైవసం చేసుకున్నారు, హిందువుల సనాతన ధర్మాన్ని తొక్కివేసి నాశనం చేశారు. ప్రతి భారతీయుడు ఇంగ్లీషువారిని పారదోలి స్వరాజ్యం పొందడానికి, సనాతన ధర్మాన్ని పునరుద్ధరించడానికి ప్రయత్నిస్తున్నాడు. మన శ్రీరాముడు, శివాజీ, కృష్ణుడు, గురు గోవింద్, అర్జునుడు అన్ని ధర్మాలను కాపాడటానికి ఈ నేలను పాలించారు, ఈ పవిత్ర భూమిలో వీళ్లు, గోమాంస భక్షకుడైన మ్లేచ్చుడు జార్జ్ V పట్టాభిషేక ఏర్పాట్లను నిర్వహిస్తున్నారు. బ్రిటిష్ రాజు జార్జ్ V మన దేశంలోకి అడుగుపెట్టగానే చంపేందుకు మూడువేల మంది మద్రాసీలు ప్రతిజ్ఞ చేశారు. మా ఉద్దేశ్యాలను నలుగురికీ తెలుపడానికి, సంస్థలో అతి చిన్నవాడినైన నేను ఈ రోజు ఈ పని చేశాను. హిందూస్తాన్‌లోని ప్రతి ఒక్కరూ దీన్ని తన విధిగా భావించాలి.

సంతకం/- R. వంఛి అయ్యర్, సెంకోట్ట్"

ఈ ఉత్తరంలోని విషయాలు ఈ హత్య కేవలం రాజకీయపరమైనదని సూచించాయి, ఈ హత్యను ప్రజలు పూర్తిగా సమర్థించారు. జరుగనున్న బ్రిటిష్ రాజు పట్టాభిషేకం పట్ల నిరసన తెలుపడానికి ఈ హత్యా పథకాన్ని రచించారు. [1]

వంఛి వరాహనేరి వెంకటేశ సుబ్రహ్మణ్య అయ్యర్‌కి సన్నిహిత మిత్రుడు (సాధారణంగా ఈ పేరును V.V.S.అయ్యర్ లేదా వ.వె.సు అయ్యర్ అని కుదిస్తారు), ఇతడు బ్రిటిష్ వారిని ఓడించడానికి ఆయుధాల కోసం ప్రయత్నిస్తున్న మరొక స్వాతంత్ర్య యోధుడు. పథకాన్ని పరిపూర్ణరీతిలో అమలు చేయడానికి ఇతడు వంఛినాథన్‌కి శిక్షణ ఇచ్చాడు.[2]వీరు భారతమాత సమితికి చెందినవారు. [3]

తమిళనాడు ప్రభుత్వం ఈ అమరుడి జన్మస్థలం సెంకోట్టయ్‌లో స్మారకస్థూపం నిర్మించాలని నిర్ణయించింది.[4]

అప్రముఖ విషయాలు[మార్చు]

కప్పలొట్టియ తమిళన్ అనే సినిమాలో నటుడు బాలాజీ వంచినాథన్ పాత్ర పోషించాడు. శివాజీ గణేషన్ వంచియప్పన్ పాత్రను పోషించాడు.యు. చిదంబరం

సూచనలు[మార్చు]

బాహ్య లింకులు[మార్చు]