వికీపీడియా:వాడుకరులకు సూచనలు/సైట్ నోటీసులు

సైట్ నోటీసులు

వికీపీడియాలో ఏ పేజీలోనైనా పైన వికీపీడియా సందర్శకులందరికీ కనిపించేలా పెట్టే నోటీసులను సైట్ నోటీసులంటారు. సాధరణంగా ఒక నిర్ణీత కాలావధిలో జరిగే కార్యక్రమాల గురించి వాడుకరులకు, పాఠకులకూ తెలిపేందుకు ఈ నోటీసులను వాడతారు. ఉదాహరణకు ఏదైనా పోటీ, లేదా ఎడిటథాన్ వంటివి. ఈ నోటీసుల్లో రకరకాలున్నాయి - లాగినైన వాడుకరులకు మాత్రమే కనిపించే నోటీసులు, అజ్ఞాతలకు మాత్రమే కనిపించేవి, ఒక భౌగోళిక ప్రాంతంలో మాత్రమే కనిపించేవి, వీక్షణ జాబితాలో కనిపించేవి, నేరుగా మెటా నుండి వచ్చే కేంద్రీయ నోటీసు వగైరాలు. ఈ విభాగంలో ప్రస్తుతం మనం మొదటి రెండింటి గురించి తెలుసుకుందాం.

లాగినైన వాడుకరులకు మాత్రమే కనీంచే నోటీసులను మీడియావికీ:Sitenotice పేజీలో రాస్తాం. ఇక్కడ చేర్చిన నోటీసులు లాగినైన వాడుకరులందరికీ ప్రతి పేజీలోనూ పైన కనిపిస్తాయి. ఆ నోటీసుకు పక్కనే [ఈ నోటీసును తొలగించు] అనే లింకు కనిపిస్తుంది. దాన్ని నొక్కితే ఈ నోటీసును కనబడకుండా చెయ్యవచ్చు. అలా తొలగించిన నోటీసును మళ్ళీ కనబడేలా చెయ్యాలని ఎవరైనా వాడుకరి అనుకుంటే, ఆ వాడుకరి తన బ్రౌజరులో "dismissSiteNotice" అనే కుకీని తీసెయ్యాల్సి ఉంటుంది. ఉదాహరణకు, క్రోమ్ బ్రౌజరులో ఇది chrome://settings/cookies/detail?site=te.wikipedia.org అనే చోట, మైక్రోసాఫ్ట్ ఎడ్జ్ బ్రౌజరులో edge://settings/cookies/detail?site=te.wikipedia.org వద్దా ఉంటుంది.

కానీ, ఈ నోటీసును అందరికీ - తొలగించిన వాడుకరులతో సహా - కనబడేలా చెయ్యాలంటే ఒక కేంద్రీయ పద్ధతి ఉంది. అదేంటంటే, మీడియావికీ:Sitenotice id అనే పేజీకి వెళ్ళి, అక్కడ ఉన్న అంకెకు 1 కలిపి ప్రచురించడమే (అక్కడ 1 అని ఉంటే దాన్ని 2 చెయ్యాలన్నమాట). దాంతో ఈ నోటీసు అందరికీ, కనబడకుండా చేసిన వారితో సహా, కనిపిస్తుంది. మీడియావికీ:Sitenotice లో కొత్తగా ఒక సైటు నోటీసును చేర్చినపుడు ఈ పని తప్పక చెయ్యాలి.

ఈ సైటు నోటీసు అజ్ఞాతలకు కనిపించదని చెప్పుకున్నాం గదా.. వారికి నోటీసులను చూపించాలంటే వేరే నోటీసు పేజీ ఉంది - మీడియావికీ:Anonnotice. ఇక్కడ రాసిన నోటీసు అజ్ఞాతలకు అన్ని పేజీల్లోనూ కనిపిస్తుంది. దీన్ని తొలగించడం అనేది ఉండదు.

ఒక గమనిక: ఈ నోటీసులను సాధారణంగా ఒక పరిమిత కాలానికి మాత్రమే పెడుతూంటాం కాబట్టి, ఆ వ్యవధి పూర్తి కాగానే నోటీసును తీసెయ్యడం మరచిపోకూడదు.