ఇంటర్నెట్

ఇంటర్నెట్ (ఆంగ్లం Internet) అనేది ప్రపంచవ్యాప్తంగా ఉన్న కంప్యూటర్లను కలిపే ఒక వ్యవస్థ. మరింత వివరంగా చెప్పాలంటే ఇంటర్నెట్ నెట్ వర్క్ లను కలిపే నెట్ వర్క్. ఈ వ్యవస్తలో ఉన్న కంప్యూటర్లు ఒకదానితో ఒకటి సంభాషించుకొనేటందుకు ఇంటర్నెట్ ప్రోటోకాల్ అనే నియమావళిని ఉపయోగిస్తారు. ఆంగ్లంలో Internet అని రాస్తున్నప్పుడు మొదటి అక్షరం అయిన "I"ని ఎల్లప్పుడు కేపిటల్ లెటర్ గానే రాయవలెను. ఇంటర్నెట్(Internet) అన్న మాటని తెలుగులో అంతర్జాలం అంటున్నారు .

ప్రాంతీయతని కలుపుతు అంతర్జాలంలోకి చేర్చుతున్న చిత్రం

తెలుగు పేరు

ఇంటర్నెట్ అనే ఇంగ్లీషు పదాన్ని అదే విధంగా తెలుగులో వాడుతున్నారు. కొంతమంది ఉత్సాహవంతులు తెలుగు పదాలను ప్రతిపాదించి వాడుతున్నారు. అలాంటి పదాల్లో ఒక పదం అంతర్జాలం .. ఇంటర్నెట్ అంటే ఏమిటో అర్ధం అవటానికి ఒక చిన్న ఉపమానం చెప్పుకోవచ్చు. ఒక పేటలో ఉన్న ఇళ్ళని కలుపుతూ ఒక వీధి ఉంటుంది. ఒక ఇంటి నుండి మరొక ఇంటికి వెళ్ళటానికి ఈ వీధి అవసరం. ఊళ్ళో ఉన్న పేటలన్నిటిని కలుపటానికి అల్లిబిల్లిగా అల్లుకుని ఊరు నిండా పెద్ద రహదారులు(రోడ్లు) ఉంటాయి. ఒక ఊరు నుండి మరొక ఊరుకి వెళ్ళటానికి ప్రాంతీయ రహదారులు ఉంటాయి. ఒక దేశం నుండి మరొక దేశం వెళ్ళటానికి సముద్రంలోనూ, ఆకాశంలోనూ 'అంతర్జాతీయ రహదారులు' ఉంటాయి. ఒక మేపు లో చూస్తే ఈ చిన్నవీధులు, రహదారులూ అన్ని ఒక జాలరివాడి వలలా కనిపిస్తాయి. ఇదే విధంగా ప్రపంచంలో ఉన్న కంప్యూటర్లు అన్నీ కూడ చిన్న చిన్న ప్రాంతీయ వలల లాగా, పెద్ద పెద్ద అంతర్జాతీయంగా అల్లుకుపోయిన వలల లాగా కనిపిస్తాయి కనుక వీటిని అంతర్జాలం అంటారు. ఈ అంతర్జాలాన్నే ఇంగ్లీషులో Internet(ఇంటర్నెట్) అంటారు.

తెలుగులోనూ డొమైన్‌ పేరు

ఇక నుంచి తెలుగులోనూ వెబ్‌సైట్‌ డొమైన్‌ పేరు రాసుకోవచ్చు. విదేశీ డొమైన్లపై లాభాపేక్షలేని సంస్థ 'ద ఇంటర్‌నెట్‌ కార్పొరేషన్‌ ఫర్‌ ఆసియాన్డ్‌ నేమ్స్‌ అండ్‌ నంబర్స్‌'(ఐసీఏఎన్‌ఎన్‌) భారత్‌కు చెందిన ఏడు భాషలకు ఆమోదం తెలిపింది. ఆంగ్లేతర భాషల్లోనూ డొమైన్ల పేర్లకు ఆహ్వానం పలికిన ఆ సంస్థ తెలుగు, హిందీ, తమిళం, బెంగాలీ, ఉర్దూ, గుజరాతీ, పంజాబీ బాషలనూ అనుమతించింది.(ఈనాడు3.11.2009)

చరిత్ర

ఇంటర్నెట్టు 1969వ సంవత్సరంలో అమెరికా భద్రతా విభాగమయిన "ఎడ్వాన్సెడ్ రీసెర్చ్ ప్రాజెక్ట్స్ ఏజెన్సీ ఆర్పా(ARPA)"లో సృస్టించబడినది. తరువాత 1990వ సంవత్సరంలో బ్రిటీషు శాస్త్రవేత్త అయిన "టిం బెర్నెర్స్ లీ" స్విట్జర్ల్యాండ్ లోని సెర్న్(CERN) వద్ద "వరల్డ్ వైడ్ వెబ్(www)"ను సృస్టించాడు. ప్రస్తుతం మనం ఇంటర్నెట్ సర్వీస్ ప్రొవైడర్(ISP)లకు కొంత రుసుము చెల్లించి మన కంప్యూటర్లను ఇంటర్నెట్టుకు అనుసంధానించవచ్చు.

ఇంటర్నెట్ ఆడ్రస్

ఇంటర్నెట్ కు అనుసంధానమైన ప్రతీ కంప్యూటరూ ఒక సంఖ్యను కలిగి ఉంటుంది. దీన్నే ఐపి(ఇంటర్నెట్ ప్రోటో కాల్ ) అడ్రసు అని వ్యవహరిస్తారు. ఇంటర్నెట్ లో ఒక కంప్యూటర్ నుంచి మరొక కంప్యూటర్ కు సందేశాలు ఈ అడ్రసు ఆధారంగానే పంపబడతాయి.

ఐపి అడ్రసుకు ఉదాహరణ:

• 192.168.0.167
• 203.178.193.23

ఇంటర్నెట్ లో మనకు లభించే సేవలు

రహదారులు ఉండబట్టి మనకి రవాణా సౌకర్యాలు లభించినట్లే, ఇంటర్నెటు ఉండటం వల్ల మనకి అనేకమైన సౌకర్యాలు, సేవలు (services) లభిస్తున్నాయి. రహదారురహదారులు వెంబడి టపాలు బట్వాడా చేసినట్లే అంతర్జాలం మీద బట్వాడా అయే టపాలని ఈ-టపా లేక ఈ-మెయిలు అంటారు. ఇక్కడ ఈ అనే అక్షరం ఇంగ్లీషులో Electronic అనే మాటకి సంక్షిప్తం. కావలిస్తే దీనిని తెలుగులో విద్యుత్-టపా లేదా వి-టపా అనొచ్చు.

రహదారులు ఉండబట్టే మనం ఇరుగు పొరుగులకి వెళ్ళి బాతాఖానీ కొట్టి రాటానికి వీలయింది. అలాగే ఈ విద్యుత్‌ రహదారిని ఉపయోగించి, ఇల్లు వదలి బయటక్లి వెళ్ళకుండా బాతాఖానీ కొట్టొచ్చు. ఈ బాతాఖానీనే ఇంగ్లీషులో చాటింగ్ (Chatting) అంటారు.

రహదారులు ఉండబట్టే ఆ రహదారురహదారులు వెంబడి గ్రంధాలయానికి వెళ్ళి పుస్తకాలు, పత్రికలు చదవటానికి సానుకూలం అయింది. అదే విధంగా ఈ విద్యుత్ రహదారి వెంబడి మనం ప్రపంచం అంతా తిరిగి బహిరంగంగా ఉన్న గ్రంధాలయాలే కాకుండా ఇంటింటా ఉన్న సొంత గ్రంధాలయాలని కూడ దర్శించి విషయ సేకరణ చెయ్యవచ్చు. ఇలా ప్రపంచ వ్యాప్తంగా ఉన్న జ్ఞాన సంపదనే 'వరల్డ్ వైడ్ వెబ్' అంటారు.

వరల్డ్ వైడ్ వెబ్ ఇంటర్నెటులో అత్యధికంగా ఉపయోగించే సేవ. ఇందులో వెబ్ సైట్సు, బ్లాగులు, మొదలయిన ఎన్నో పేజీలు మనకు అందుబాటులో ఉంటాయి. ఈ సమాచారాన్ని మనం వాడుకనేందుకు వాడే సాఫ్టువేర్ అనువర్తనాన్ని బ్రౌజర్ లేదా విహరిణి అంటారు. అంతెందుకు మీరు ఇప్పుడు చదువుతున్న వికీపిడియా కూడా వరల్డ్ వైడ్ వెబ్ లో బాగమే. వరల్డ్ వైడ్ వెబ్ ను పలకటానికి సులువుగా ఉంటుందని వెబ్ అని పిలుస్తుంటారు.

వెబ్ తరువాత ఇంటర్నెటులో ఈ-మెయిల్ అత్యధికంగా ఉపయోగించబడే సేవ. మన పోస్టలు సేవకు మల్లేనే ఇందులో మనము ఉత్తరాలు వాటికి ప్రత్యుత్తరాలు పంపించుకోవచ్చు. కాకపోతే ఇక్కడ మనకు కాగితం అవసరంలేదు. కేవలం సమాచారం ఉంటే చాలు. చాటింగ్ లేదా ఇన్స్టెంట్ మెసేజింగ్ కూడా ఈ-మెయిల్ వంటిదే, కానీ సమాచారమును మరింత తొందరగా చేరవేస్తుంది, కాకపోతే కొద్ది సమాచారమును మాత్రమే పంపించగలము.

పోర్టల్

రకరకాలసేవలను అందించే ప్రత్యేక వెబ్సైటులను పోర్టల్ అంటారు. ఇవి తెలుగు భాషలో లభ్యమవుతున్నాయి

భిన్నాభిప్రయాలు

అయితే కొన్ని దేశాలలో ప్రభుత్వాలు ఇంటర్నెటు ఒక్క చెడ్డ వ్యవస్థ అనే అభిప్రాయం కలిగి ఉన్నాయి. అవి ఇంటర్నెటులోని కొన్ని భాగాలను తమ దేశాలలో ప్రజలు వాడుకోకుండా అడ్డుకుంటున్నాయి. ఉదాహరణకు, చైనాలో ప్రజలు ఎవరు కూడా మీరు చదువుతున్న ఈ వికీపిడియాను చదవలేరు, మార్పులు కూడా చేయలేరు. అంతేకాదు కొంతమంది తల్లితండ్రులు తమ పిల్లలకు ఇంటర్నెటు చాలా కీడు చేస్తుందని భావిస్తుంటారు.

ఇంటర్నెట్ వల్ల కలిగే నష్టాలు

• ప్రమాదకరమైన సైట్లకు వెళ్ళినట్లయితే, మీ కంప్యూటరుకు వైరస్ సోకి చెడిపోయే ప్రమాదం ఉంది. '
• అంతర్జాలంలో ఇంకా సమర్ధమయిన monitoring systems లేవు. కనుక చిన్నపిల్లలు పెద్దలకు మాత్రమె ఉద్దేశించిన సైట్లకు వెళ్ళినట్లయితే వారి మనసులమీద దుష్ప్రభావం పడే అవకాసం ఉంది.

ఇంటర్‌నెట్‌తో మతిమరపు దూరం

పెద్ద వయసులో తలెత్తే మతిమరపు వ్యాధి (డిమెన్షియా) వృద్ధులందరినీ వేధిస్తుంటుంది. దీని బారిన పడకుండా దూరంగా ఉండాలంటే.. తరచూ ఇంటర్‌నెట్ ప్రపంచంలో విహరించాలని నిపుణులు సూచిస్తున్నారు. వృద్ధులు ఇంటర్‌నెట్ బ్రౌజింగ్ చేయటం వల్ల మెదడులో చురుకుదనం పెరుగుతుందని,మెదడు చురుకుదనాన్ని ప్రేరేపించటంలో పుస్తకాలు చదవటం వంటి అలవాటుకన్నా ఇంటర్‌నెట్ ఎక్కువ ప్రభావం చూపిస్తుందనీ, ఆ ప్రభావం దీర్ఘకాలంపాటు ఉండిపోతుందని ,చదివేటప్పుడు అంతగా ప్రేరేపితం కాని న్యూరల్ సర్క్యూట్లు.. నెట్‌బ్రౌజింగ్ సమయంలో చురుగ్గా మారుతున్నట్లు కొంతమంది వృద్ధుల మెదళ్లను స్కానింగ్ చేసి పరిశోధకులు గుర్తించారు.(ఈనాడు19.10.2009)

బయటి లింకులు

• -అధికారిక వెబ్సైటు :[ లింక్]
• "10 Years that changed the world" — Wired looks back at the evolution of the Internet over last 10 years
• Berkman Center for Internet and Society at Harvard
• CBC Digital Archives—Inventing the Internet Age
• How the Internet Came to Be
• Internet Explained
• Global Internet Traffic Report
• The Internet Society History Page
• RFC 801, planning the TCP/IP switchover
• Archive CBC Video Circa 1990 about the Internet
• "The beginners guide to the internet."
• "Warriors of the net - A movie about the internet."
• "History of Nova Scotia-First on the Net"
• European Future Internet Portal
• Preparing Europe’s digital future - i2010 Mid-Term Review
• Ringmar, Erik. A Blogger's Manifesto: Free Speech and Censorship in the Age of the Internet (London: Anthem Press, 2007).