వికీపీడియా:కొత్తవారికి సహాయం/అవసరమైన వనరులు/వికీపీడియా ఎవరి స్వంతం

ఇందులో రెండు విషయాలు ఇమిడి ఉన్నాయి. ఒకటి - వెబ్‌సైట్ ఎవరిది? రెండు - వికీపీడియా వ్యాసాలు ఎవరివి? ఇవి రెండూ కాక మరో ప్రశ్న అదనంగా వస్తుంది - దీన్ని ఎవరు నిర్వహిస్తారు?

వెబ్‌సైట్‌ ఎవరి స్వంతమన్న ప్రశ్నకి వద్దాం.

వికీమీడియా ఫౌండేషన్ అన్న లాభాపేక్ష రహిత సంస్థ వికీపీడియా సాంకేతిక ఫ్రేమ్‌వర్కుకి మద్దతునిస్తుంది.
వికీపీడియా సోదర ప్రాజెక్టులైన వికీసోర్సు (స్వేచ్ఛా గ్రంథాలయం), వికీడేటా (స్వేచ్ఛా డేటా నిధి), వికీమీడియా కామన్సు (స్వేచ్ఛా మీడియా నిధి) వంటివాటికి కూడా సాంకేతిక మద్దతునిస్తుంది.
వీటన్నిటి డొమైన్ పేర్లూ ఆ సంస్థ పేరిటే నమోదై ఉన్నాయి. అయితే వికీపీడియాలో వ్యాసాలు, వికీపీడియా నిర్వహణ వికీమీడియా ఫౌండేషన్ స్వంతం కాదు.

వికీపీడియాలో వ్యాసాలు ఎవరి స్వంతం?

వికీపీడియాలో వ్యాసాలు ఎవరి స్వంతమూ కాదు. అదొక విధంగా చెప్పాలంటే ప్రపంచ ప్రజలందరి ఉమ్మడి ఆస్తి.
ఈ వ్యాసాలను ఎందరో వికీపీడియన్లు రూపొందించారు, రూపొందిస్తూంటారు. వీటిని రాసేప్పుడే వాటిపై తమకున్న కాపీహక్కులను క్రియేటివ్ కామన్స్ అట్రిబ్యూషన్-షేర్ అలైక్ అన్న ఓ లైసెన్సులో విడుదల చేస్తారు.
- అంటే మరేం కాదు - తాము రాసేది ఎవరైనా ముందుగా అనుమతి అక్కరలేకుండా ఇదే లైసెన్సులో ప్రచురిస్తూ వాడుకోవచ్చనీ, తమ పేరును ప్రస్తావించాల్సిన చోట విడిగా తమ పేరు అక్కరలేదనీ వికీపీడియా నుంచి అని రాస్తే చాలనీ చెప్పడమన్నమాట.
వికీపీడియన్లు ఈ మొత్తం వ్యాసాలను ప్రపంచానికి కానుకగా అందిస్తున్నారు. ఇవి అందరి స్వంతమూను, అలానే ఎవరో ఒక్కరి స్వంతమూ కాదు.
ఇదిలా ఉండగా, వికీపీడియన్లు వికీపీడియాలో చేసే రచనలపై వారికి ఇంకా హక్కులు ఉంటాయి. తమ స్వంతమైన ఈ రచనలను తమకు నచ్చినట్టు వాడుకోవడంలో వికీపీడియా లైసెన్సులు వారికి అడ్డుపడవు.

దీన్ని ఎవరు నిర్వహిస్తారు?

5 మూల స్తంభాలను అనుసరించి వికీపీడియా సముదాయం దీన్ని నిర్వహిస్తుంది.
ఆ ఐదు మూలస్తంభాలను సందర్భానికి తగ్గట్టు అన్వయించుకుంటూ వివిధ పాలసీలు, మార్గదర్శకాలు తయారుచేసుకుని అమలుచేస్తారు.
ఆ పాలసీలు, మార్గదర్శకాల్లో వికీపీడియాలో ఎలాంటి సమాచారం ఉండాలి? ఏమేమి ఉండకూడదు? ఎవరైనా ఉద్దేశపూర్వకంగా, పదేపదే తప్పుడు సమాచారం చేరుస్తూంటే వారిపై ఏ చర్యలు తీసుకోవాలి? వంటి అనేకానేక నిర్వహణా వ్యవహారాలపై స్పష్టత ఉంటుంది.
వాటిని రూపొందించేదీ, అమలుచేసేదీ కూడా వికీపీడియా సముదాయమే, అంటే వికీపీడియన్లు ఉమ్మడిగా నిర్వహిస్తారు.