Jump to content

ముహమ్మద్ ఆలీ

లంకెలను మార్చు
వికీపీడియా నుండి
ముహమ్మద్ అలీ
1967 లో ముహమ్మద్ ఆలీ
గణాంకాలు
ఇతర పేర్లుది గ్రేటెస్ట్
ది పీపుల్స్ ఛాంపియన్
ది లూస్విల్లే లిప్
బరువు విభాగంహెవీ వెయిట్
ఎత్తు6 ft 3 in (1.91 m)
Reach80 in (203 cm)
జననము(1942-01-17)1942 జనవరి 17
లూస్విల్లే, కెంటకీ, అమెరికా
మరణము2016 జూన్ 3(2016-06-03) (వయసు: 74)
ఫీనిక్స్, ఆరిజోనా, అమెరికా
StanceOrthodox
బాక్సింగ్ రికార్డ్
పాల్గొన్న పోరాటాలు61
విజయాలు56
నాకౌట్ విజయాలు37
పరాజయాలు5
డ్రా లు0
No contests0
Medal record
పురుషుల బాక్సింగ్
Representing the USA
Summer Olympics
Gold medal – first place 1960 రోమ్ లైట్ హెవీ వెయిట్

మహమ్మద్ అలీ విశ్వ విఖ్యాత బాక్సర్. మూడు సార్లు హెవీవెయిట్ బాక్సింగ్ ప్రపంచ విజేతగా నిలిచిన శక్తిశాలి. ఇతని అసలు పేరు క్లాషియస్ క్లే. నల్లజాతివారి హక్కుల కోసం పోరాడిన మాల్కం ఎక్స్ స్ఫూర్తితో ఇస్లాం మతాన్ని స్వీకరించి తనపేరును మార్చుకున్నాడు. పన్నెండేళ్ళ వయసు నుంచే బాక్సింగ్ ను అభ్యసించడం ప్రారంభించాడు. ఈయన చేసిన కఠోరమైన అభ్యాసం వలన దాదాపు ఇరవై ఏళ్ళ పాటు బాక్సింగ్ పోటీల్లో పాల్గొన్నా భారీ గాయాలు కాకుండా కాపాడుకోగలిగాడు. వ్యక్తిగతంగా క్రమశిక్షణ పాటించేవాడు. బాక్సింగ్ ను ఒక తపస్సులా భావించేవాడు. మద్యానికి, మహిళలకు దూరంగా ఉండేవాడు. పద్దెనిమిదేళ్ళ వయసులో ఒలంపిక్ క్రీడల్లో స్వర్ణపతకం సాధించాడు. బాక్సింగ్ ద్వారా తన జీవితకాలంలో సుమారు అరవై మిలియన్ డాలర్లు దాకా సంపాదించగలిగాడు. 1967లో అమెరికా వియత్నాంపై చేసిన యుద్ధాన్ని వ్యతిరేకించి జైలు పాలయ్యాడు. హెవీ వెయిట్ ఛాంపియన్ హోదాను కోల్పోయాడు. అయినప్పటికీ తన రాజకీయ అభిప్రాయాలు మార్చుకోలేదు. జైలు నుంచి తిరిగివచ్చి మళ్ళీ బాక్సింగ్ పోటీల్లో పాల్గొన్నాడు. రెండు సార్లు ప్రయత్నించి 1974లో మళ్ళీ ఆ టైటిల్ ని చేజిక్కించుకున్నాడు. ఎన్ని విజయాలు సాధించినా అమెరికాలో ఆలీ కొంత వివక్షతను కూడా ఎదుర్కొన్నాడు. వయసు మీరిన తర్వాత ఆయనకు పార్కిన్‌సన్స్ వ్యాధి వచ్చింది. అంతటి అనారోగ్యంలో కూడా 1996 లో జరిగిన వేసవి ఒలంపిక్ క్రీడల్లో వణుకుతున్న చేతితోనే కాగడా వెలిగించాడు. ఇతని కూతురు లైలా అలీ కూడా మహిళా విభాగంలో ప్రపంచ విజేత. ఇతను కొన్ని చిత్రాలలో కూడా నటించాడు.

జీవితవిశేషాలు

[మార్చు]

ఇతడు 1942,జనవరి 17వ తేదీన కెంటకీలో జన్మించాడు. ఇతని అసలు పేరు కాసియస్ మార్సెలస్ క్లే జూనియర్. ఇతడు తన 12వ ఏట నుండి బాక్సింగ్ శిక్షణ పొందాడు. 1960లో రోమ్‌ ఒలింపిక్స్‌లో స్వర్ణపతకం సాధించడంతో అందరి దృష్టిని ఆకర్షించాడు. అదే సంవత్సరం ప్రొఫెషనల్‌గా మారి 21 సంవత్సరాల పాటు బాక్సింగ్‌లో తిరుగులేని విజయాలను సాధించాడు. ఇతడు 1964లో ఇస్లాం మతం స్వీకరించి తన పేరును ముహమ్మద్ అలీగా మార్చుకున్నాడు. తాను ఆచరించిన ధర్మం కోసం నేరుగా అమెరికా ప్రభుత్వంతోనే తలపడ్డాడు. అప్పటి నిబంధనల ప్రకారం ఆలీ కూడా సైన్యంలో చేరి వియత్నాం యుద్ధానికి వెళ్లాల్సి ఉండగా తాను నమ్మిన ఇస్లాం అమాయకులను చంపనీయదంటూ సైన్యంలో చేరడానికి వ్యతిరేకించాడు.దానితో అమెరికా ప్రభుత్వం అతని హెవీవెయిట్ టైటిల్స్ అన్నీ రద్దు చేసి అరెస్ట్ కూడా చేసి జైలుకు పంపింది. దీనిపై కోర్టులో పోరాటం తర్వాత ఇతడికి అనుకూలంగా తీర్పు వచ్చింది. ఇతడు 1964లో సోంజి రాయ్‌ను, 1967లో బెలిండా బాయ్డ్‌ను,1977లో వెరోనికా పోర్షేను వివాహం చేసుకుని వారికి విడాకులు ఇచ్చి 1986లో లోనీ విలియమ్స్‌ను నాలుగో వివాహం చేసుకున్నాడు. ఇతనికి తొమ్మిది మంది సంతానం. వీరిలో లైలా అలీ బాక్సర్ కాగా, హనా అలీ రచయిత్రిగా పేరు పొందింది.

సినిమాలలో

[మార్చు]

అలీ జీవితం ఓ సినిమాకథ లాంటిది. అందుకే ఆయనపై హాలీవుడ్‌లో ఎన్నో సినిమాలు వచ్చాయి. కొన్నిటిలో తనపాత్ర తానే ధరించడం విశేషం. 1977లో తీసిన గ్రేటెస్ట్‌లో అలీ తనపాత్ర తానే పోషించి మెప్పించాడు. 2001లో తీసిన అలీ సినిమాలో విల్‌స్మిత్ మహమ్మదలీ పాత్ర వేస్తే ఆస్కార్ నామినేషన్ దక్కింది. హోవర్డ్ ఫాస్ట్ నవల ఆధారంగా 1979లో తీసిన ఫ్రీడంరోడ్‌లో అలీయే హీరో. ఆటలో మెడల్స్ లాగే ఇంకా కొంచెం గట్టిగా పట్టుబడితే ఆస్కార్ కూడా వచ్చేదేమో అంటారు. కొన్ని సినిమాలు ఇండియాలో కూడా విడుదలై బాగానే ఆడాయి. అందుకే ఎలాగైనా బాక్సింగ్ లెజెండ్‌ను బాలీవుడ్ సినిమాల్లోకి దించాలనే ఆలోచనలు కూడా జరిగాయి. బాలీవుడ్ సూపర్‌స్టార్ అమితాబ్ బచ్చన్ 1980లలో లాస్ ఏంజిల్స్‌కు వెళ్లి మహమ్మద్ అలీని కలిశారు. ఆయన వెంట దర్శక నిర్మాత ప్రకాశ్ మెహ్రా కూడా ఉన్నారట. అలీని, తనను పెట్టి సినిమా తీయాలని మెహ్రా అనుకున్నారని బిగ్‌బీ ట్విట్టర్‌లో వెల్లడించారు. 1980లో ఇండియా వచ్చినప్పుడు చెన్నైలోని నెహ్రూ స్టేడియంలో ఎగ్జిబిషన్ ఫైట్ ఏర్పాటైంది. ఆ సందర్భంగా స్టేడియానికి వచ్చిన తమిళనాడు సినీ, పొలిటికల్ సూపర్‌స్టార్ ఎమ్జీ రామచంద్రన్‌తో అలీ చేతులు పైకెత్తినప్పుడు స్టేడియం హర్షధ్వానాలతో దద్దరిల్లడం చాలామంది ఇప్పటికీ గుర్తు చేసుకుంటారు.[1]

బాక్సింగ్ ప్రస్థానము

[మార్చు]

12వ ఏట బాక్సింగ్ లో శిక్షణ ప్రారంభించిన అలీ, 22 ఏళ్లకే ప్రపంచ హెవీ వెయిట్ ఛాంపియన్ గా ఎదిగారు. 1964లో దిగ్గజ బాక్సర్ సోనీలిస్టన్ పై గెలుపుతో ప్రపంచ ఛాంపియన్ గా మహ్మద్ అలీ నిలిచారు. తర్వాత ఇస్లాం మతం స్వీకరించి మహ్మద్ అలీగా పేరు మార్చుకున్నారు. 1967లోనూ హెవీవెయిట్ టైటిల్ సొంతం చేసుకున్నారు. 1964, 1974, 1978ల్లో ప్రపంచ హెవీవెయిట్ ఛాంపియన్ గా నిలిచారు.గొప్ప ఛాంపియన్ గా, మానవతావాదిగా పేరొందినప్పటికీ ఆయన కెరీర్ వివాదాస్పదంగా కొనసాగింది. 1967లో అమెరికా-వియత్నాం యుద్ధ సమయంలో అలీని అమెరికా ఆర్మీలో పనిచేయడానికి ఎంపిక చేశారు. కానీ, ఆర్మీ ఆఫర్ ను అలీ తిరస్కరించారు. శక్తివంతమైన అమెరికా కోసం పేద ప్రజలపై పోరాడనని తేల్చి చెప్పారు. మరికొన్ని వివాదాలతో అలీ బాక్సింగ్ టైటిల్ వదులుకున్నారు. ఐదేళ్ల జైలుశిక్ష కూడా అనుభవించారు.

న్యాయ పోరాటం తర్వాత తిరిగి బాక్సింగ్ రింగ్ లోకి దిగిన మహ్మద్ అలీ 1974లో ఫ్రేజియర్ పై గెలుపొంది ఛాంపియన్ షిప్ సొంతం చేసుకున్నారు. ప్రపంచ ఛాంపియన్ షిప్ తో పాటు మరెన్నో పోటీల్లో అద్భుత విజయాలు సాధించారు. తన బాక్సింగ్ కెరీర్ లో ఐదుసార్లు మాత్రమే మహ్మద్ అలీ ఓటమి చవిచూశారు.[2]

మరణం

[మార్చు]

ఇతడు పార్కిన్సన్స్, శ్వాసకోశ వ్యాధులతో బాధపడుతూ 2016, జూన్ 4వ తేదీన అమెరికాలోని ఫీనిక్స్ నగరంలో ఒక ఆసుపత్రిలో చికిత్స పొందుతూ మరణించాడు.[5]

మూలాలు

[మార్చు]
  1. ↑ "మహాబలి నిష్క్రమణ". Archived from the original on 2016-06-06. Retrieved 2016-06-06.
  2. ↑ "'ది గ్రేటెస్ట్' అలీ కన్నుమూత". Archived from the original on 2016-06-04. Retrieved 2016-06-06.
  3. ↑ "Muhammad Ali – Boxer". Boxrec.com. Archived from the original on 2015-04-01. Retrieved September 5, 2011.
  4. ↑ Steen, Rob (October 29, 2006). "Obituary: Trevor Berbick". The Guardian. UK. Retrieved September 25, 2011.
  5. ↑ "సాక్షి దినపత్రిక, 5 జూన్,2016, 16వ పేజీ ఫోకస్". Archived from the original on 2016-06-08. Retrieved 2016-06-05.

బయటి లింకులు

[మార్చు]
"https://te.wikipedia.org/w/index.php?title=ముహమ్మద్_ఆలీ&oldid=4141535" నుండి వెలికితీశారు