అన్నారం హజ్రత్ సయ్యద్ యాకూబ్ షావళి దర్గా

అన్నారం హజ్రత్ సయ్యద్ యాకూబ్ షావళి దర్గా
పేరు
ప్రధాన పేరు :	అన్నారం హజ్రత్ సయ్యద్ యాకూబ్ షావళి దర్గా
ప్రదేశం
దేశం:	భారత దేశం
రాష్ట్రం:	తెలంగాణ
జిల్లా:	వరంగల్ జిల్లా
ప్రదేశం:	పర్వతగిరి మండలం, అన్నారం గ్రామం.
ఆలయ వివరాలు
ప్రధాన దైవం:	యాకూబ్ షావళి
నిర్మాణ శైలి, సంస్కృతి
వాస్తు శిల్ప శైలి :	ముస్లీం

అన్నారం హజ్రత్ సయ్యద్ యాకూబ్ షావళి దర్గా తెలంగాణ రాష్ట్రంలోని వరంగల్ జిల్లా, పర్వతగిరి మండలం, అన్నారం షరీఫ్ గ్రామంలో ఉన్న ఒక ప్రసిద్ధ సూఫీ దర్గా. ఈ దర్గాకు దాదాపు వెయ్యేండ్లకు పైగా చరిత్ర ఉందని భక్తుల నమ్మకం.

ప్రదేశం

ఈ దర్గా హైదరాబాద్ నుండి వరంగల్ మార్గంలో (144 కి.మీ.), అక్కడ నుండి పర్వతగిరి (38 కి.మీ.), పర్వతగిరి నుండి అన్నారం షరీఫ్ (10 కి.మీ.) దూరంలో ఉంది.

చరిత్ర

కథనం ప్రకారం హజ్రత్ సయ్యద్ యాకూబ్ షావళి అరబ్ దేశం నుండి భారతదేశానికి వలస వచ్చారని ప్రతీతి. ఆయనకు గుంషా వళి, బోలే షావళి అనే సోదరులు, మహబూబీయమ్మ అనే సోదరి, గౌస్‌ఫాత్ అనే గురువు ఉన్నారు.

యాకూబ్ షావళి తన ఆస్తిని పేదలకు దానధర్మాలు చేసి, దేశాటన చేస్తూ అన్నారం గ్రామానికి చేరుకున్నారు. కొందరు వ్యక్తుల భౌతిక దాడుల నుండి తప్పుకునేందుకు గ్రామంలోని ఒక చెరువు తూములోకి వెళ్ళి మాయమయ్యారని, అనంతరం స్థానికుడి కలలో ప్రత్యక్షమై దర్గా నిర్మించమని కోరడంతో గ్రామస్థులు ఈ దర్గాను నిర్మించారని స్థానిక కథనం.

విశేషాలు, నమ్మకాలు

• మానసిక ప్రశాంతత: ఈ దర్గాను భక్తులు ఒక మానసిక చికిత్సాలయంగా భావిస్తారు. తీవ్ర మానసిక రుగ్మతలతో బాధపడేవారు ఇక్కడికి వచ్చి ప్రార్థిస్తే నయమవుతుందని విశ్వసిస్తారు.
• కందూరు మొక్కులు: భక్తులు తమ కోరికలు నెరవేరితే "కందూరు" (యాట కందూరు లేదా కోడి కందూరు) మొక్కుబడి చెల్లిస్తారు. జంతు బలి ఇచ్చిన అనంతరం దర్గాలోని ముజావర్లకు నైవేద్యం సమర్పిస్తారు.
• ఉర్సు / గంధం ఉత్సవం: ప్రతి సంవత్సరం ఇక్కడ 'గంధం ఉత్సవం' (ఉర్సు) మూడు రోజుల పాటు ఘనంగా జరుగుతుంది. తెలంగాణతో పాటు పొరుగు రాష్ట్రాల నుండి లక్షలాది మంది భక్తులు ఈ వేడుకలలో పాల్గొంటారు. ప్రతి వారం శుక్రవారం, ఆదివారాల్లో భక్తుల రద్దీ ఎక్కువగా ఉంటుంది.