7G బృందావన్ కాలనీ

7G బృందావన్ కాలనీ
దర్శకత్వం	శ్రీ రాఘవ
రచన	శ్రీ రాఘవ
నిర్మాత	ఎ. ఎం. రత్నం
తారాగణం	రవి కృష్ణ సోనియా అగర్వాల్ సుమన్ శెట్టి
ఛాయాగ్రహణం	అరవింద్ కృష్ణ
సంగీతం	యువన్ శంకర్ రాజా
నిర్మాణ సంస్థ	శ్రీ సూర్య మూవీస్
విడుదల తేదీ	2004 అక్టోబరు 15 (2004-10-15)
సినిమా నిడివి	185 నిమిషాలు.
దేశం	భారతదేశం
భాష	తమిళం

7/జీ బృందావన్ కాలనీ (తమిళంలో 7/G Rainbow Colony) 2004లో విడుదలైన ఒక భారతీయ ప్రేమ కథా చిత్రం. ఈ చిత్రానికి సెల్వరాఘవన్ రచన, దర్శకత్వం వహించారు. ఈ సినిమాను ఒకే సమయంలో తెలుగు, తమిళ భాషల్లో చిత్రీకరించారు. ఇందులో నిర్మాత ఎ. ఎం. రత్నం కుమారుడు రవికృష్ణ కథానాయకుడిగా పరిచయం కాగా, సోనియా అగర్వాల్ కథానాయికగా నటించింది. యువన్ శంకర్ రాజా అందించిన సంగీతం ఈ చిత్రానికి ప్రధాన ఆకర్షణగా నిలిచింది. ఈ చిత్రంలోని పాటలు మంచి ప్రేక్షకాదరణ పొందాయి.

విడుదలైన సమయంలోనే విమర్శకుల ప్రశంసలు అందుకున్న ఈ చిత్రం బాక్సాఫీస్ వద్ద ఘనవిజయం సాధించింది. కాలక్రమేణా ఇది యువతలో విపరీతమైన ఆదరణ పొంది ఒక 'కల్ట్ క్లాసిక్'గా నిలిచింది.

ఈ సినిమాకు సీక్వెల్‌ను (పార్ట్-2) సెల్వరాఘవన్‌ నిర్మిస్తున్నారు.

కథ

రవి ఒక దిగువ మధ్యతరగతి కుటుంబానికి చెందిన యువకుడు. తన తండ్రి (చంద్రమోహన్), తల్లి (సుధ), చెల్లెలుతో కలిసి నివసిస్తుంటాడు. అతను ఎప్పుడూ తరగతులకు వెళ్ళకుండా, పరీక్షల్లో పాసవకుండా, గొడవల్లో తలదూర్చుతూ ఉంటుంటే తండ్రి అతన్ని పనికిరానివాడివని తిడుతూ ఉంటాడు. రవి కూడా తానంటే తండ్రికి ఇష్టం లేదని అతనితో గొడవపడుతూ ఇంట్లోంచి వెళ్ళిపోతానని బెదిరిస్తూ ఉంటాడు. ఇలా ఉండగా పక్కనే ఉన్న ఇంటికి ఒక హిందీ మాట్లాడే మార్వాడీ కుటుంబం రాకతో అతని జీవితం కొత్త మలుపు తిరుగుతుంది. రవి ఆ కుటుంబంలో ఉండే అందమైన అమ్మాయి అనిత (సోనియా అగర్వాల్) వైపు ఆకర్షితుడవుతాడు. అతను ఆమెతో చనువుగా ఉండాలని ప్రయత్నించినా ఆమె అతన్ని పట్టించుకోదు.

రవి ధైర్యం చేసి ఆ అమ్మాయిని తాను ప్రేమిస్తున్నానని చెబుతాడు. అందరూ తనను పురుగును చూసినట్లు చూస్తుంటే తాను కనీసం చూడ్డానికైనా నోచుకున్నానని చెబుతాడు. ఆమె తాను అతనికి సరైంది కాదని చెబుతుంది. దాంతో రవి ఆమెను మరిచిపోవడానికి ప్రయత్నిస్తానని చెబుతాడు. కానీ ఆమెను మరిచిపోలేక వెంట పడుతూనే ఉంటాడు. అనిత నెమ్మదిగా గమనించగా రవి తాను అనుకున్నంత పనికిరాని వాడేమీ కాదనీ, మోటార్ సైకిళ్ళు మరమ్మత్తు చేయడంలో అతనికి మంచి నైపుణ్యం ఉందని తెలుస్తుంది. అనిత అతన్ని హీరో హోండా షో రూం కి తీసుకెళ్ళి అతనికి ఉద్యోగం ఇప్పించమంటుంది. వాళ్ళు ఓ బైక్ ను బిగించగలిగితే ఉద్యోగం ఇస్తామంటారు. రవి మొదట్లో అందుకు ఒప్పుకోడు. దాంతో అనిత అతన్ని ప్రేమిస్తున్నాననీ వారిద్దరూ కలిసి ఉండాలంటే అతనికి ఏదో ఒక ఉద్యోగం కావలనీ చెబుతుంది. దాంతో అతను వాళ్ళు చెప్పిన పని చేసి అక్కడే ఉద్యోగం సంపాదిస్తాడు.

రవి తండ్రి కూడా కొడుకు ప్రయోజకుడయ్యాడని సంతోషిస్తాడు. ఎప్పుడూ తిడుతూ ఉండే తాను కొడుకు ఎదురుగా పొగడకుండా చాటుగా అతని తల్లి వద్ద కొడుకు గొప్పతనాన్ని ప్రశంసిస్తాడు. అప్పటి దాకా తండ్రంటే ద్వేషం ఉన్న రవి తన పట్ల తండ్రికున్న ప్రేమను తెలుసుకుంటాడు. కానీ అనిత, రవితో సన్నిహితంగా ఉండటం చూసిన అనిత తల్లి వారిద్దరి పెళ్ళికి ససేమిరా ఒప్పుకోనంటుంది. రవి తండ్రి కూడా ఆమెకు సర్దిచెప్పాలని చూస్తాడు. అనిత తండ్రి వ్యాపారం దెబ్బతిన్నందువల్ల మరో హిందీ కుటుంబం వారికి సహాయం చేసిందనీ వాళ్ళ అబ్బాయికి తమ అమ్మాయినిచ్చి పెళ్ళి చేయాలని చెబుతుంది. అనిత ఇంట్లోంచి తప్పించుకుని రవితో కలిసి ఓ హోటల్ కి వెళుతుంది.

అక్కడ అనిత రవి తనను ప్రేమించినందుకు జీవితాంతం బాధ పడకుండా ఉండాలనీ, తనకు తల్లిదండ్రులు చూసిన సంబంధం చేసుకునే ముందు రవితో ఒక రాత్రి గడపాలనుందనీ చెబుతుంది. రవి మొదట ఆశ్చర్యపోయినా అందుకు అంగీకరించి ఆ రాత్రి వారిద్దరూ ఒక్కటవుతారు. కానీ ఉదయం లేవగానే రవి అనితతోనే జీవితాంతం కలిసి ఉండాలనుకున్నట్లు చెబుతాడు. దాంతో అనిత తనను కేవలం శారీరక సుఖం కోసమే అలా అడుగుతున్నాడని వాదిస్తుంది. అలా కోపంలో విసురుగా హోటల్ రూములో నుంచి బయటకు వచ్చి రోడ్డు దాటుతుండగా ఓ లారీ కిందపడి మరణిస్తుంది. రవి కూడా ఆత్మహత్య చేసుకోవాలని వాహనాలకు అడ్డంగా పరిగెడతాడు కానీ అందరూ అతన్ని తిడుతూ వెళ్ళిపోతారు. అప్పట్నుంచి అతను ఆమె ఊహల్లోనే బతుకుతుండటంతో కథ ముగుస్తుంది.

తారాగణం

• సుదీప
• రవికృష్ణ - రవి
• సోనియా అగర్వాల్ - అనిత
• సుమన్ శెట్టి - లక్ష్మీ నారాయణ
• చంద్రమోహన్ - రవి తండ్రి
• సుధ - రవి తల్లి
• సుదీప పింకీ - అను (రవి చెల్లెలు)
• సవితా ప్రభునే - అనిత తల్లి
• మనోరమ - అతిథి పాత్రలో

పాటలు

ఈ చిత్రానికి యువన్ శంకర్ రాజా సంగీతాన్ని సమకూర్చారు. పాటలు మంచి ప్రేక్షకాదరణ పొంది సినిమా విజయానికి దోహదపడ్డాయి. ఈ సినిమా కోసం యువన్ 40 మంది సంగీతకారులతో కూడిన ఆర్కెస్ట్రాతో ఒక నెల పాటు పనిచేశారు.

పాటల జాబితా (తెలుగు)

సం.	పాట	గాయకులు	పాట నిడివి
1.	"తలచి తలచి చూస్తే (ఫీమేల్)"	శ్రేయా ఘోషల్‌	4:37
2.	"కలలు కనే కాలా లు"	హరీష్ రాఘవేంద్ర, శ్రీమతుమిత	5:31
3.	"మేం వయసుకు వచ్చాం"	యువన్ శంకర్ రాజా, ఉన్నికృష్ణన్	5:06
4.	"మ్యూజిక్ ఆఫ్ జాయ్"	ఇన్‌స్ట్రుమెంటల్	3:53
5.	"కన్నుల బాసలు తెలియవులే"	కార్తీక్	5:50
6.	"ఇది రణరంగమా"	హరీష్ రాఘవేంద్ర	3:08
7.	"తలచి తలచి చూశా (మేల్)"	కె.కె	4:16
మొత్తం నిడివి:			41:55

బయటి లింకులు

• ఐ.ఎమ్.డి.బి. లో 7/జీ బృందావన్ కాలనీ