అరుణ్ యోగిరాజ్

అరుణ్ యోగిరాజ్
జననం	1983
జాతీయత	భారతీయుడు
వృత్తి	శిల్పి, కళాకారుడు
గుర్తించదగిన సేవలు	అయోధ్య రామ మందిరంలో రామ్ లల్లా విగ్రహం, కేదార్‌నాథ్‌లోని ఆది శంకరాచార్య విగ్రహం, మైసూర్ జిల్లాలోని చుంచనకట్టె వద్ద 21 అడుగుల ఎత్తైన హనుమాన్ విగ్రహం మొదలైనవి
జీవిత భాగస్వామి	విజేత
బంధువులు	సూర్యప్రకాష్ యోగిరాజ్ (సోదరుడు)
పురస్కారాలు	మైసూరు జిల్లా యంత్రాంగం ద్వారా రాజ్యోత్సవ అవార్డు కర్ణాటక ప్రభుత్వంచే జకనాచారి అవార్డు శిల్పుల సంఘం ద్వారా శిల్ప కౌస్తుభ సత్కారం
వెబ్‌సైటు	https://arunyogiraj.com/

అయోధ్య రామ మందిరంలోని రామ్ లల్లా

మైసూర్ రైల్వే స్టేషన్ ముందు ఏర్పాటుచేసిన అరుణ్ యోగిరాజ్ మలచిన విగ్రహాలు

అరుణ్ యోగిరాజ్, మైసూరుకు చెందిన భారతీయ శిల్పి. నేతాజీ సుభాష్ చంద్రబోస్ 125వ జయంతి సందర్భంగా న్యూఢిల్లీలోని ఇండియా గేట్ వద్ద అమర్ జవాన్ జ్యోతి వెనుక పందిరిలో ఏర్పాటు చేసిన సుభాష్ చంద్రబోస్ 30 అడుగుల విగ్రహాన్ని చెక్కిన ఆయన మంచి గుర్తింపు తెచ్చుకున్నాడు.

అయోధ్యలోని రామ మందిరంలో 2024 జనవరి 22న ప్రాణ ప్రతిష్ట కాబడిన బాల రాముడు (రామ్ లల్లా) దివ్య విగ్రహం రూపొందించి ఆయన మరింత ప్రాచుర్యంలోకి వచ్చాడు. ముదురు రంగు కృష్ణ‌శిల‌పై రామ్ ల‌ల్లా 51 అంగుళాల పొడవుతో 5 ఏళ్ల బాలుడిలా విల్లు, బాణం పట్టుకుని దర్శనమిస్తాడు.

నేపథ్యం

అరుణ్ యోగిరాజ్ కర్ణాటక రాష్ట్రంలోని మైసూరు నగరానికి చెందిన ఐదు తరాల శిల్పుల కుటుంబానికి చెందినవాడు. ఆయన తండ్రి యోగిరాజ్, తాత బసవన్నలు కూడా ప్రసిద్ధ శిల్పులు. ఎంబిఎ చదివిన ఆయన 2008 నుండి పూర్తి సమయం శిల్పకళకు కేటాయించడానికి ముందుగా ప్రైవేట్ కంపెనీలో చేరాడు.

అతని తండ్రి యోగిరాజ్ శిల్పి అక్టోబరు 2021లో మరణించాడు. అతనికి ఒక సోదరుడు, ఒక సోదరి ఉన్నారు. అతను విజేతను వివాహం చేసుకున్నాడు. శిల్పి కూడా అయిన అతని సోదరుడు సూర్యప్రకాష్ మైసూర్‌లో వారితో నివసిస్తున్నాడు.

అవార్డులు

ఆయన 2014లో భారత ప్రభుత్వంచే సౌత్ జోన్ యంగ్ ఆర్టిస్ట్ అవార్డును, మైసూరు జిల్లా పరిపాలన నుండి రాజ్యోత్సవ అవార్డును పొందాడు. 2021లో, ఆయన కర్ణాటక ప్రభుత్వ జకనాచారి అవార్డును అందుకున్నాడు. అలాగే, ఆయనను శిల్పుల సంఘం శిల్ప కౌస్తుభ పురస్కారంతో సత్కరించారు.