కొండపాక

వికీపీడియా నుండి
ఇక్కడికి గెంతు: మార్గసూచీ, వెతుకు


కొండపాక
—  మండలం  —
మెదక్ జిల్లా పటములో కొండపాక మండలం యొక్క స్థానము
మెదక్ జిల్లా పటములో కొండపాక మండలం యొక్క స్థానము
కొండపాక is located in Telangana
కొండపాక
ఆంధ్రప్రదేశ్ పటములో కొండపాక యొక్క స్థానము
అక్షాంశరేఖాంశాలు: 17°58′N 78°51′E / 17.97°N 78.85°E / 17.97; 78.85
రాష్ట్రం ఆంధ్ర ప్రదేశ్
జిల్లా మెదక్
మండల కేంద్రము కొండపాక
గ్రామాలు 29
ప్రభుత్వము
 - మండలాధ్యక్షుడు
జనాభా (2011)
 - మొత్తం 48,592
 - పురుషులు 24,216
 - స్త్రీలు 24,376
అక్షరాస్యత (2011)
 - మొత్తం 46.59%
 - పురుషులు 60.29%
 - స్త్రీలు 32.75%
పిన్ కోడ్ {{{pincode}}}
కొండపాక
—  రెవిన్యూ గ్రామం  —
రాష్ట్రం తెలంగాణ
జిల్లా మెదక్
మండలం కొండపాక
ప్రభుత్వము
 - సర్పంచి
పిన్ కోడ్
ఎస్.టి.డి కోడ్

కొండపాక (ఆంగ్లం: Kondapak or Kondapaka), తెలంగాణ రాష్ట్రములోని మెదక్ జిల్లాకు చెందిన ఒక మండలము.

గ్రామ జనాభా[మార్చు]

జనాభా (2011) - మొత్తం 48,592 - పురుషులు 24,216 - స్త్రీలు 24,376

కొండపాక రుద్రేశ్వరాలయం[మార్చు]

శ్రీ రుద్రేశ్వరస్వామి ఆలయం 
-

కొండపాక గ్రామం చారిత్రిక ప్రశస్తి పొందిన గ్రామం. కాకతీయరాజ్యంలో సైనికులవిడిదిగా ప్రత్యేక స్థానంఉంది. దాదాపు 900 సంవత్సరాలక్రితం కొండపాకలో నిర్మితమైన శ్రీ రుద్రేశ్వర స్వామి ఆలయం అతి పురాతనమైనదిగా పేర్గాంచినది. క్రీ.శ.1094వ సంవత్సరంలో మొదటి కాకతీయరుద్రదేవుడు, తన పరిపాలనాకాలంలో,కాకతీయ సామ్రాజ్యం నలుదిశలా రుద్రేశ్వరస్వామికి పలు ఆలయాలను నిర్మింపజేశాడు. ఆ పరంపర లోనిదే ఈ కొండపాక రుద్రేశ్వరాలయం.[1]

శ్రీ రుద్రేశ్వరాలయ పునర్నిర్మాణం

మరుమాముల శ్రీరామ సిద్ధాంతిగారి కుమారులు, మనుమలు పలు సంవత్సరాలుగా ఆలయ పునరుద్ధరణ ఆకాం క్షించారు. గ్రామ పెద్దలు, మాజీ మంత్రివర్యులు కూడా కొంతమేర కృషి చేశారు. వారి ఆశయాలను సఫలీకృతం చేయడానికా అన్నట్టు శ్రీశ్రీశ్రీ మాధవానంద సరస్వతీ స్వాములవారి దివ్యాశీస్సులతో ఆలయ పునర్నిర్మాణం ప్రారంభమై, దివ్యమైన ఆలయంగా రూపుదిద్దుకొంది. ప్రతి నెలా మాసశివరాత్రినాడు మహాన్యాసపూర్వక శతరుద్రాభిషేకాలతో భక్తజనులందరికి కొంగుబంగారమైంది. జగద్గురు శృంగేరి భారతీతీర్థస్వామివారు, కంచికామకోటి పీఠాధీశ్వరులు జయేంద్ర సరస్వతీ స్వామివారు ఈ ఆలయాన్ని సందర్శించి వారి దివ్య సందేశాలను అందించారు. ఇదే ఆవరణలో కాకతీయులకాలం నాటి త్రికూటేశ్వరాలయం పునర్నిర్మాణానికి రాష్ట్ర ప్రభుత్వం 64 లక్షలు కేటాయించింది. శృంగేరి జగద్గురువులు భూమిపూజ చేయగా, పునర్నిర్మాణ పనులు పూర్తయి..ప్రతిష్ఠాపనకు సిద్ధమయింది.

గ్రామ విశేషాలు[మార్చు]

మెదక్‌ జిల్లాలో సిద్ధిపేట రెవిన్యూ డివిజన్‌లోని కొండపాక గ్రామం ఒక మండల కేంద్రం. ఈ గ్రామం సిద్ధిపేట నుండి సుమారు 17 కిలోమీటర్ల దూరంలో ఉంది. దీని పశ్చిమాన ‘రాముని గుట్టలు’ అనే కొండల వరుస ఉంది. ఈ కొండలపై ఒక రామాలయం ఉండడం విశేషం. కొండల ప్రక్కన వెలసిన గ్రామం ‘కొండప్రక్క’. బహుశా ఈ పేరే రానురాను ‘కొండపాక’గా పరిణామం చెంది ఉండవచ్చు.

నేటి గ్రామ జనాభా ఆరు వేలకు మించి ఉంటుంది. గ్రామం ఉత్తరపు అంచున కాకతీయుల కాలం నాటి రెండు ఆలయాలు శిథిలావస్థలో ఉన్నాయి. 1. రుద్రేశ్వరాలయం 2. త్రికూటేశ్వ రాలయం. ఈ రెండింటిలో రెండు శాసనాలున్నాయి. వీటి ప్రకారం, పై దేవాలయాలు 800 సంవత్సరాల క్రితం నిర్మింపబడ్డాయి. అంతకుముందే కొండపాక అనే పేరుతోనే ఈ గ్రామం సకల సౌభాగ్యాలతో స్థిరపడి ఉన్నదని స్పష్టమవుతోంది. కొండపాక గ్రామం యొక్క ప్రత్యేక సంఖ్య (7) ఏడు. ఏడు చిన్న చిన్న గ్రామాలు కలిసి ఈ గ్రామం ఏర్పడిందని ప్రతీతి!! అందుకే గ్రామ మధ్య ఏడు నాభిశిలలు (ఏడు బొడ్రాయిలు) నెలకొల్పబడి ఉన్నాయి. ఏడు చెరువులు, ఏడు ఆంజనేయ స్వామి దేవాలయాలు, ఏడు గుట్టలు ఈ గ్రామ ప్రత్యేకత!! బ్రతుకమ్మ పండుగ కూడా 7వ నాడే జరుపకోవడం ఈ గ్రామ సంపద్రాయం.

పోలీసు చర్యకు ముందు గ్రామ స్థితిగతులు[మార్చు]

పోలీసుచర్య (సెప్టెంబర్‌, 1948)కు ముందు ఈ గ్రామం చాలా కాలం నల్లగొండ జిల్లాలోని చేర్యాల తాలూకాలో అంత ర్భాగంగా ఉంది. నిజాం పాలనా కాలంలోనే జిల్లాల సరి హద్దులు మార్చబడినపుడు ఈ గ్రామాన్ని మెదక్‌ జిల్లాలోని సిద్ధిపేట తాలూకాకు మార్చబడింది. నిజాం పాలనా కాలంలో ఇక్కడ ‘‘సర్కార్‌ బంగ్లా’’ అనే పేర ఒక రెవెన్యూ వసూలు కేంద్రం నిర్మించబడింది. ఈ భవనం ఈనాటికీ చెక్కు చెదరలేదు. 1948కి ముందే గ్రామంలో రెండు పాఠశాలలు ఉండేవి. విద్యాబోధన ఉర్దూ మాధ్యమంలో ఉండేది. 1. బాలుర ప్రాథ మిక పాఠశాల (4వ తరగతి వరకు) 2. బాలికల ప్రాథమిక పాఠ శాల (3వ తరగతి వరకు) ‘‘పరదాలు కట్టబడిన ఎడ్లబండి’’పై బాలికలను పాఠశాలకు చేర్చే సదుపాయం ఆనాడే ఉండేది!!

ఆనాటి పాఠశాల ప్రధానోపాధ్యాయుడే పోస్టాఫీసు నిర్వహించే వాడు. సుస్థిరమైన పారిశుధ్య పనులను పర్యవేక్షించేవాడు. ఉత్తర, ప్రత్యుత్తరాలలో సహకరించేవాడు. శుభకార్యాలలో గౌరవప్రదమైన వ్యక్తిగా పరిగణింపబడేవాడు. పోలీసు చర్యకు ముందు తెలంగాణ ప్రాంతంలో రజాకార్ల దురాగతలు, దుశ్చర్యలు మితిమీరి ఉండేవి. వారిని ఎదుర్కోవ డానికి గ్రామపెద్దలు, యువకులు కలసికట్టుగా ‘‘గ్రామ రక్షణ దళాలు’’గా ఏర్పడి, రాత్రులు కాపలాకాసేవారు. గ్రామ ప్రజలం దరూ కులాలకు అతీతంగా బంధుత్వాలు ఏర్పరచుకుని, వరుసలతో పలకరించుకోవడం ఇక్కడి తరతరాల సాంప్ర దాయం. ఈ అన్యోన్యత గ్రామాన్ని రక్షించుకోవడంలో, ప్రగతి పథంలో పయనించడంలో బాగా తోడ్పడింది. నేటికీ ఈ సుహృద్భావం కొనసాగడం ముదావహం!!

నిజాం పాలనా కాలంలో కొండపాక పోలీస్‌ పటేల్‌ పేరు దొమ్మాట రాజారాంరెడ్డి. ఇతనికి నిజాం నవాబు ఐదు రూపాయలు జరిమానా విధించే దండనాధికారం (థర్డ్ క్లాస్‌ మేజిస్ట్రియల్‌ పవర్‌) ఇచ్చారు. ఈ గౌరవం ఏ గ్రామ పటేలుకు ఆ రోజుల్లో లభించలేదు. స్వాతంత్ర సముపార్జనకు ముందే కొండపాక గ్రామం సంగీత సాహిత్యాలకు పుట్టినిల్లు. ‘కొండపాక పందిరి గుంజలు కూడా సంగీతం పాడేవి’ అనే ప్రతీతి ఉంది. బ్రహ్మశ్రీ మరుమాముల శ్రీరామ సిద్ధాంతిగారు ఆ రోజుల్లో సుమారు 200 గ్రామాలకు ఏకైక సిద్ధాంతిగా, పంచాంగకర్తగా, జ్యోతిశ్శాస్త్ర పండితుడుగా పేరుపొందిన మహనీయుడు. వారి పంచాంగాలు మెదక్‌, కరీంనగర్‌, వరంగల్‌, నల్లగొండ జిల్లాలతో పాటు రాజధాని హైదరాబాదు‌లో కూడా గౌరవప్రదంగా వినియోగించబడ్డాయి.

సంగీత రంగంలో కొండపాక విద్వాంసులు పలువురు దశదిశలా పేరు గడించారు. ఎన్‌సాన్‌పల్లె రాజయ్య (వయొ లిన్‌),రామేశ్వరం (హార్మోనియం-మురళి-ఘటం), రామచంద్రం (తబల), ఆగమయ్య (హార్మోనియం), సోమయ్య (ఢోక్‌), హరిదాసు రామన్న (గాత్రం) మొదలైనవారు సంగీత విద్వాం సుల్లో కొందరు. వీరు స్థానికంగా నిర్వహించిన హరికథలకు, పురాణ కాలక్షేపాలకు చక్కటి వాద్య సహకారం అందించేవారు. నల్లగొండ జిల్లాలో గల శ్రీ యాదగిరి లక్ష్మీనరసింహస్వామి వారి దేవస్థానంలో ఆస్థాన సంగీత విద్వాంసుడుగా రామేశ్వరం గారు చాలాకాలం కొనసాగారు. బ్రహ్మశ్రీ మరుమాముల శ్రీరామ సిద్ధాంతిగారి పెద్ద కుమారుడు బ్రహ్మశ్రీ సీతారామశర్మగారు. వీరు గొప్ప సాహిత్యవేత్త, వేదవేదాంగ పండితుడు. వ్యాకరణ శాస్త్రజ్ఞుడు. విద్వత్కవి, ఉభయ భాషాకోవిదుడు. యమక, శ్లేష ప్రయోగంలో నిష్ణాతుడు. వీరిని మించిన మేథావి. ఈనాటికీ ఆ గ్రామంలో జన్మించలేదు. గ్రామానికే ద్రోణాచార్యుడైన వీరిని కన్న కొండపాక ధన్యమైంది. వైదిక సంస్కారాన్ని తన జీవితానికి అన్వయించుకుని అందరికీ హితులుగా, పురోహితులుగా విరాజిల్లుతున్నారు బ్రహ్మశ్రీ జనార్దనశర్మగారు.

అంబటి భూమయ్యగారు, వారి కుమారుడు అంబటి ఎల్లయ్యగారు ప్రతి అమావాస్య, పౌర్ణమి రోజుల్లో చర్మవ్యాధు లకు దివ్యంగా పనిచేసే ఔషధాన్ని ఉచితంగా గత వంద సంవ త్సరాలుగా పంపిణీ చేస్తున్నారు. వేలాది రోగులు ఈ ఔషధంతో లాభపడ్డారు. ఈనాటికీ వారి వారసులు ఆ కార్యక్రమాన్ని కొనసాగిస్తున్నారు.

పోలీసుచర్య తరువాత కొండపాక ప్రగతి[మార్చు]

17.9.1948న పోలీసు చర్యద్వారా హైదరాబాదు‌ సంస్థానం భారత యూనియన్‌లో విలీనం చేయబడింది. కొండపాక గ్రామంలో శాంతి పరిరక్షణకై 1948 నుండి 1952 వరకు ప్రత్యేక సాయుధ పోలీసు బలగాలను ప్రభుత్వం ఏర్పాటు చేసింది. ఆ పోలీసు వారిలో కొందరు సాహితీప్రియులుండేవారు. సబ్‌ ఇన్‌స్పెక్టర్‌ ఒకరు గ్రామ విద్యావంతులతో కలసి ‘చిత్రా క్లబ్‌’, ‘చిత్రా గ్రంథాలయం’ ఏర్పాటుచేశారు. (చిత్ర ఆ పోలీసు అధికారి కూతురి పేరు.) మరుమాముల సీతారామశర్మగారి పర్యవేక్షణలో చాలాకాలం కొనసాగిన ఈ గ్రంథాలయం పలువురికి విద్యా జ్ఞానాన్ని అందజేసింది. హైదరాబాదు‌ రాష్ట్రం తొలి ముఖ్యమంత్రి బూర్గుల రామకృష్ణారావుగారి కాలంలో రాష్ట్రంలో సుస్థిరమైన గ్రామ పంచాయతీ వ్యవస్థ ఏర్పాటు చేయబడింది. కొండపాక గ్రామ ప్రథమ సర్పంచ్‌గా దొమ్మాట నర్సింహారెడ్డిగారు 20 సంవత్సరాలు ఈ పదవిలో కొనసాగిన స్థితప్రజ్ఞులు. దుద్దెడ నాన్‌ బ్లాక్‌ అధ్యక్షులు గాను, మెదక్‌ జిల్లా పరిషత్‌ కో-ఆప్షన్‌ సభ్యులుగాను, ప్రముఖ కాంగ్రెస్‌ వాదిగాను, జిల్లా స్థాయి నాయకులుగాను నర్సింహారెడ్డిగారు కీర్తిప్రతిష్ఠలు గడించారు. వీరి నాయకత్వంలోనే కొండపాక గ్రామం అంచెలంచెలుగా పురోభివృద్ధి సాధించింది. ప్రాథమిక పాఠశాలను, మాధ్యమిక పాఠశాలగాను; ఆ తదుపరి ఉన్నత పాఠశాలగాను మార్చడంలో వారు చేసిన కృషి ప్రశంసనీయం, ఆదర్శప్రాయం. వారి ప్రయత్నాలకు చేదోడు వాదోడుగా నిలిచిన ప్రముఖులు... దొమ్మాట రామకృష్ణారెడ్డి (ఆ రోజుల్లో ‘మజ్లిస్‌ తాలిం దేహి’ అంటే విద్యా కమిటీ అధ్యక్షులు), అనంతుల చక్రపాణి (నిజాం కాలంలో డిప్యూటీ తహశీల్దారుగా పనిచేశారు, అనంతుల రామనాథం (స్వాతంత్ర్య సమరయోధులు), కొండపాక అనంత రామ్‌రావ్‌ (పట్వారీ), దోడం బాలకిష్టయ్య (సాంస్కతిక కార్యక్రమాల ప్రోత్సాహకులు), దొమ్మాట నారాయణరెడ్డి (మెదక్‌ జిల్లాలో తొలి ఫస్ట్క్లాస్‌ కాంట్రాక్టర్‌), పేర్ల వీరమల్లయ్య, ముచ్చెర్ల రాజారాం, గుడాల రాజేశం, అంబటి ఎల్లయ్య, చిట్టి గాల్‌రెడ్డి, వడ్ల రాజారాం, దొమ్మాట మల్లారెడ్డి, దేవులపల్లి బలరాం, దేవులపల్లి రామయ్య, మంతెన బుచ్చయ్య, మంతెన నారాయణ, గజ్జె ఐలయ్యలతో పాటు ఆ రోజుల్లో పనిచేసిన ఇద్దరు ప్రధానోపాధ్యాయులు పి.వి. బ్రహ్మయ్య, మహ్మద్‌ జమీల్‌ అహ్మద్‌లు గ్రామ సర్పంచ్‌గారికి అండగా నిలచి విద్యాభివృద్ధికి కృషిచేసిన మహనీయులు. భూకైలాస్‌, శ్రీకృష్ణ రాయబారం, వీరాభిమన్యు నాటకాలను విద్యార్థులచే ప్రదర్శింపజేసి నిధులు సేకరించడంలో వీరి కృషి ప్రశంసనీయం.

గ్రామ పాఠశాలను 1950-51లో ఐదవ తరగతి, 51-52లో ఆరవ తరగతి, 52-53లో ఏడవ తరగతి, 58-59లో ఎనిమిదవ తరగతి, 59-60లో తొమ్మిదవ తరగతి, 60-61లో పదవ తరగతి అంచెలంచెలుగా ప్రారంభించ బడ్డాయి. సర్పంచ్‌ కృషి ఫలితంగా పాఠశాలకి ఐదు గదుల భవనం నిర్మితమయ్యి 1956లో ఆనాటి హైదరాబాదు‌ రాష్ట్ర ముఖ్యమంత్రి బూర్గుల రామకృష్ణారావు గారిచే ప్రారంభించబడింది. ఇది కొండపాక గ్రామ చరిత్రలో ఒక మధుర జ్ఞాపిక. తరువాత కాలంలో అదనంగా మరో ఆరు గదులు, ప్రయోగశాల ప్రహరీగోడల నిర్మాణం జరిగాయి. జిల్లాలోనే ఆదర్శవంతమైన ఉన్నత పాఠశాలగా పేరుపొందింది.

దొమ్మాట నరసింహారెడ్డిగారి కాలంలోనే హైదరాబాదు‌-సిద్ధి పేట రహదారి నుండి గ్రామం వరకు అప్రోచ్‌ రోడ్డు వేయబడి బస్సు సదుపాయం సమకూర్చబడింది. గ్రామం మధ్యలో ఉన్న బురుజుపై ట్యాంకులు బిగించి రక్షిత మంచినీటి సదుపాయం ఏర్పరచబడింది. గ్రామ పంచాయతీ భవనం కూడా వీరి కాలంలోనే నిర్మించారు.

దొమ్మాట నరసింహారెడ్డిగారి వారసులుగా బైరు బాల్‌రెడ్డి, పోతుగంటి వెంకటరెడ్డి, కీ।।శే।। అంబటి సత్యనారాయణ, శ్రీమతి అనంతుల శారద, జడ్‌పిటిసి శ్రీమతి ఏర్పుల భూలక్ష్మి, మండల పరిషత్‌ అధ్యక్షుడు బొద్దుల కనకయ్య, వారివారి పదవీ కాలాల్లో గ్రామాభివృద్ధికై శక్తిమేరకు కృషి చేశారు. ప్రాథమిక పాఠశాల భవనం, వసతి గృహాలు, డ్వాక్రా భవనం, మురికి కాల్వల నిర్మాణం, సిమెంటు రోడ్లు వీరి కాలంలోనే క్రమక్రమంగా సాధించబడ్డాయి. 2006లో ఎన్నుకోబడిన ఎంపిపి శ్రీమతి శారద, ఎంపిటిసి శ్రీమతి డి.లక్ష్మి, సర్పంచ్‌ శ్రీ బైరు రామకృష్ణారెడ్డి అదే బాటలో పయనించి గ్రామ సౌభాగ్యానికి కృషి చేశారు.

కొండపాక ఆణిముత్యం మదన్‌మోహన్‌[మార్చు]

కొండపాక గ్రామం రాష్ట్రస్థాయి, దేశస్థాయి నేతలకు జన్మనిచ్చిన మహాతల్లి. అనంతుల మదన్‌మోహన్‌ గారు ఈ నేలపై ఎదిగిన మాణిక్యాలలో ఒకరు. రాష్ట్ర మంత్రివర్యులుగా, ఎఐసిసి సభ్యులుగా, ఇందిరాగాంధీగారి ఆంతరంగిక అనుచరులుగా వీరు చాలాకాలం కొనసాగినవారు. వీరి కృషి ఫలితంగా, వీరే విరాళంగా ఇచ్చిన రెండెకరాల భూమిలో ప్రాథమిక ఆరోగ్య కేంద్రం ఏర్పరచబడి, ఆ తరువాత కాలంలో శాశ్వత భవనం, ప్రహరీగోడ నిర్మించబడ్డాయి. స్థానిక విద్యావంతులు, యువకులు, చాలాకాలం నిర్వహించిన ‘ప్రగతి పఠనాలయా’న్ని ‘శాఖా గ్రంథాలయం’గా మార్చడంలో వీరి కృషి మరువరానిది. మదన్‌మోహన్‌గారి వల్ల కొండపాక గ్రామానికి రాష్ట్ర స్థాయిలో మంచి గుర్తింపు వచ్చింది. 1985-89 మధ్య కాలంలో దొమ్మాట శాసనసభ్యులుగా కొనసాగిన శ్రీ దొమ్మాట రామచంద్రారెడ్డి ఈ గ్రామాన్ని మండల కేంద్రంగా ఏర్పాటుచేసి, బలహీనవర్గాల అభ్యున్నతికి ఎనలేని సేవచేశారు.

కొండపాక పూర్వ విద్యార్థుల సంఘం[మార్చు]

KONDAPAKA OLD STUDENTS ASSOCIATION (KOSA) కొండపాక పాఠశాలల్లో గత 70 సంవత్సరాలుగా విద్యాభ్యాసం చేసిన పూర్వ విద్యార్థులు 2001 అక్టోబర్‌లో ‘కోసా’ను ఏర్పాటు చేసుకున్నారు. అటెండర్‌ నుండి అమాత్య వరకు వివిధ రంగాలలో స్థిరపడిన సుమారు 600 విద్యావంతులతో ఏర్పడిన పూర్వ విద్యార్థుల సంఘం ఈ క్రింది ప్రగతి కార్యక్రమాలను నిర్వహిస్తున్నది. ‘హరిత భారతి’ అనే సంస్థను స్థాపించి ఉచిత బోధనాలయం ద్వారా పదవ తరగతి ఇంటర్‌ విద్యార్థులకు గత ఐదు సంవత్స రాలుగా పునశ్చరణ తరగతులు నిర్వహిస్తున్నారు. దాతల నుండి విరాళాలు సేకరించి పేద విద్యార్థులకు బోధనోపకరణాలు, నోట్‌ పుస్తకాలు సమకూరుస్తున్నారు. విద్యనభ్యసిస్తున్న విద్యార్థులు స్థానిక వైద్యశాల ఆవరణలో సుమారు 500 చెట్లు పెంచారు. గ్రామంలో పచ్చదనాన్ని వృద్ధి చేస్తున్నారు. కాకతీయుల కాలం నాటి శ్రీ రుద్రేశ్వరాలయం, త్రికూటేశ్వర ఆలయాల పునర్నిర్మాణంలో హృదయపూర్వక సహకారం అందిస్తున్నారు.గ్రామం మధ్య నెలకొని ఉన్న శ్రీ సీతారామచంద్రస్వామి దేవాలయ పునరుద్ధరణ, ప్రాంగణ విస్తరణ, దుకాణ సము దాయాల నిర్మాణం ‘కోసా’ చేపట్టబడ్డ కార్యక్రమాలు. 2005లో ధ్వజ ప్రతిష్ఠను ‘కోసా’ విజయవంతం చేసింది.

గుడాల సుశీల-ఆగయ్య స్మారక జూనియర్‌ కళాశాల[మార్చు]

సుమారు ఆరు సంవత్సరాల క్రితం ఆంధప్రదేశ్‌ ప్రభుత్వం వారు మండల కేంద్రమైన కొండపాకలో ప్రభుత్వ జూనియర్‌ కళాశాలను ఏర్పరిచారు. ప్రముఖ వ్యాపారవేత్త, స్థానికులు శ్రీ గుడాల ఆగయ్యగారు కళాశాలకు తన దివంగత ధర్మపత్ని సుశీల పేరున ఐదు లక్షల రూపాయల విరాళం ప్రకటించారు. ప్రభుత్వం వారు ఈ విరాళాన్ని స్వాగతించి జూనియర్‌ కళాశా లను గుడాల సుశీల-ఆగయ్య మెమోరియల్‌ ప్రభుత్వ జూనియర్‌ కళాశాల - కొండపాకగా నామకరణం చేశారు.

2004 వరకు మంత్రివర్యులుగా ఉన్న శ్రీ చెరుకు ముత్యంరెడ్డిగారి చొరవతో రాజీవ్‌ రహదారిపై ఐదెకరాల కొండపాక శివారు భూమిలో సుమారు 40 లక్షల విలువచేసే జూనియర్‌ కళాశాల భవన సముదాయం, ప్రహరీగోడ నిర్మించారు. 14, 15, 16 అక్టోబర్‌, 2006లో స్థానిక రుద్రేశ్వరాలయ ప్రాంగణంలోనే బ్రహ్మశ్రీ శ్రీరామ సిద్ధాంతిగారి శతజయంతి ఉత్సవాలు జరిగాయి.

సకలజనుల సమ్మె[మార్చు]

ప్రత్యేక తెలంగాణ రాష్ట్రం ధ్యేయంగా సెప్టెంబరు 13, 2011 నుంచి అక్టోబరు 23, 2011 వరకు మండలంలోని ప్రభుత్వోద్యోగులందరూ విధులను నిర్వహించక 42 రోజులపాటు సకలజనుల సమ్మెలో పాల్గొన్నారు. మండలంలోని విద్యాసంస్థలు, ప్రభుత్వ కార్యాలయాలు అన్నీ మూతపడ్డాయి

మండలంలోని గ్రామాలు[మార్చు]

మూలాలు[మార్చు]

  1. ఈనాడు మెదక్, 14 అక్టోబరు 2013. 9వ పేజీ


Medak.jpg

మెదక్ జిల్లా మండలాలు

మనూరు | కంగిటి | కల్హేరు | నారాయణఖేడ్ | రేగోడు | శంకరంపేట (ఎ) | ఆళ్ళదుర్గ | టేక్మల్ | పాపన్నపేట | కుల్చారం | మెదక్ | శంకరంపేట (ఆర్) | రామాయంపేట | దుబ్బాక | మీర్‌దొడ్డి | సిద్దిపేట | చిన్న కోడూరు | నంగనూరు | కొండపాక | జగ్దేవ్ పూర్ | గజ్వేల్ | దౌలతాబాదు | చేగుంట | యెల్దుర్తి | కౌడిపల్లి | ఆందోళ్‌ | రైకోడ్‌ | న్యాల్కల్ | ఝారసంగం | జహీరాబాద్ | కోహిర్‌ | మునుపల్లి | పుల్కల్లు | సదాశివపేట | కొండాపూర్‌ | సంగారెడ్డి | పటాన్ చెరువు | రామచంద్రాపురం | జిన్నారం | హథ్నూర | నర్సాపూర్ | శివంపేట | తూప్రాన్ | వర్గల్‌ | ములుగు

"https://te.wikipedia.org/w/index.php?title=కొండపాక&oldid=1970953" నుండి వెలికితీశారు