గుత్తికొండ రామబ్రహ్మం

వికీపీడియా నుండి
Jump to navigation Jump to search
గుత్తికొండ రామబ్రహ్మం
జననంగుత్తికొండ రామబ్రహ్మం
1915
గుంటూరు జిల్లా మోపర్రు
ప్రసిద్ధిస్వాతంత్ర్య సమర యోధుడు. నిస్వార్ధసేవాతత్పరుడు
పిల్లలుడా. రవీంద్రనాథ్
తండ్రిసుబ్బయ్య,
తల్లిగోవిందమ్మ

గుత్తికొండ రామబ్రహ్మం గుంటూరు జిల్లా మోపర్రు గ్రామములో సుబ్బయ్య, గోవిందమ్మ దంపతులకు 1915లో జన్మించాడు. స్వాతంత్ర్య సమర యోధుడు. నిస్వార్ధసేవాతత్పరుడు[1].

రామబ్రహ్మం కల్లూరి చంద్రమౌళి గారి శిష్యుడు. 1929లో గాంధీజీ మోపర్రు గ్రామము వచ్చాడు. 14 ఏళ్ళ ప్రాయములో గాంధీజీ ఉపన్యాసము విన్న రామబ్రహ్మం చదువుకు స్వస్తి చెప్పి ప్రజా జీవితానికి అంకితమయ్యాడు. సామాన్య ప్రజానీకములో సామాజిక స్పృహ పెంచేందుకు గ్రంథాలయాన్ని స్థాపించాడు. మోదుకూరు గ్రామములో జరిగిన సత్యాగ్రహములో పాల్గొన్నందుకు మూడు నెలల జైలు, 300 రూపాయల జరిమానా విధించబడింది. రామబ్రహ్మం రాజమండ్రి జైలుకు తరలింపబడ్డాడు. జరిమానా చెల్లించడానికి నిరాకరిస్తే ఇంట్లోని ధాన్యం జప్తు చేయబడింది. గ్రామ పారిశుధ్య అవసరాన్ని గుర్తించి యువకులను చేరదీసి వీధులు ఊడ్చుట, మురికి గుంటలు పూడ్చుట మున్నగు పనులు చేసేవాడు. వ్యవసాయ కూలీలకు కనీస వేతనాలు ఇప్పించేవాడు.

'గ్రామ పత్రిక' అనే వ్రాత పత్రిక నిర్వహించి గ్రామీణులలో చైతన్యం కలిగించాడు. రాత్రి బడులు నిర్వహించి పలువురిని అక్షరాస్యులను చేశాడు. వితంతు వివాహాలు ప్రోత్సహించాడు. దళితులతో సహపంక్తి భోజనాలు చేయించేవాడు. అందరూ ఒకే బావి నుండి నీరు తోడుకునే ఏర్పాటు చేశాడు. ఈ పనులు ఆ రోజుల్లో పెద్ద సంచలనము కలిగించాయి. 1948లో జయప్రకాశ్ నారాయణ్‌ను తన గ్రామము పిలిపించి వికాస కార్యక్రమాలకై ధనదానం చేశాడు. వినోబా భావే భూదాన ఉద్యమానికి తన వాటా 60 సెంట్ల భూమిని దానం చేశాడు. స్వాతంత్రోద్యమములో జైలుకి వెళ్ళిన వారికిచ్చే భూమి తీసుకోవడానికి నిరాకరించాడు. సమర యోధుల పింఛను పేద విద్యార్థులకు ఇచ్చేవాడు. గోరా గారి ఆధ్వర్యములో హైదరాబాదు పబ్లిక్ గార్డెన్సులో పూల మొక్కలు పీకి కూరగాయల మొక్కలు పాతి 30 రోజులు జైలు శిక్ష అనుభవంచాడు. డా. వెంపటి సూర్యనారాయణ సహకారముతో గ్రామములో పలువురికి ఉచితముగా కంటి శుక్లాల శస్త్ర చికిత్సలు చేయించాడు.

అమెరికాలో ఉన్న తన కుమారుడు డా. రవీంద్రనాథ్ (తానా వ్యవస్థాపకుడు) చేయూతతో కోటి రూపాయలతో గ్రామములో పలు అభివృద్ధి కార్యక్రమాలు తన చేతిమీదుగా నిర్వహించాడు.

మూలాలు[మార్చు]

  1. గుంటూరు జిల్లా ఆణిముత్యాలు, గుత్తికొండ జవహర్ లాల్, కమల పబ్లికేషన్స్, హైదరాబాదు, 2009, పుట. 283