పోరిక బలరాం నాయక్

పోరిక బలరాం నాయక్
పదవీ కాలం జూన్ 2009, – మే 2014, రెండో సారి 2024 నుండి ప్రస్తుతము
ముందు	సీతారాం నాయక్
తరువాత	మాలోత్ కవిత
నియోజకవర్గం	మహబూబాబాద్ లోక్‌సభ నియోజకవర్గం
వ్యక్తిగత వివరాలు
జననం	(1964-06-06) 1964 జూన్ 6 మదనపల్లి, ములుగు మండలం, ములుగు జిల్లా, తెలంగాణ
జాతీయత	భారతీయుడు
రాజకీయ పార్టీ	భారత జాతీయ కాంగ్రెస్
జీవిత భాగస్వామి	తిరుపతమ్మ జూలై 17,1986 (వివాహం)
సంతానం	ఇద్దరు కుమారులు
నివాసం	బంజారాహిల్స్, హైదరాబాద్
పూర్వ విద్యార్థి	బి.ఏ. ఆంధ్రా విశ్వవిద్యాలయం, హైదరాబాద్
వృత్తి	సామాజిక వేత్త, రాజకీయ నాయకులు,
మతం	హిందూ

పోరిక బలరాం నాయక్ తెలంగాణ రాష్ట్రానికి చెందిన రాజకీయ నాయకుడు, 15,18వ పార్లమెంటు సభ్యుడు. భారత జాతీయ కాంగ్రెస్ తరపున మహబూబాబాద్ లోక్‌సభ నియోజకవర్గం నుండి ప్రాతినిధ్యం వహిస్తున్నాడు.

జననం - విద్యాభ్యాసం

బలరాం నాయక్ 1964, జూన్ 6న లక్ష్మణ్ నాయక్, లక్ష్మి (గ్రామీణ బంజారా కుటుంబం) దంపతులకు తెలంగాణ రాష్ట్రం, ములుగు జిల్లా, ములుగు మండలం లోని మదనపల్లి లో జన్మించాడు. హైదరాబాద్ లోని ఆంధ్రా విశ్వవిద్యాలయం నుండి బి.ఏ. చేశాడు.

వివాహం

1986, జూలై 17న తిరుపతమ్మతో వివాహం జరిగింది. వీరికి ఇద్దరు కుమారులు.

వృత్తి జీవితం

బలరాం నాయక్ 2009 లో రాజకీయాల్లోకి ప్రవేశించే ముందు, పోలీసు కానిస్టేబుల్ గా పనిచేశాడు. అటుతడువాత రియల్ ఎస్టేట్ వ్యాపారంలోకి ప్రవేశించాడు.

రాజకీయ జీవితం

2009లో ఉమ్మడి ఆంధ్రప్రదేశ్ రాష్ట్రంలో మహబూబాబాద్ లోక్‌సభ నియోజకవర్గం నుండి 15వ లోక్‌సభకు పోటిచేసి భారత కమ్యూనిస్టు పార్టీ అభ్యర్థి కుంజా శ్రీనివాసరావుపై 68.957 ఓట్ల మెజారిటీతో గెలుపొందాడు. లేబర్ కమిటీ సభ్యులుగా ఉన్నాడు. 2012 అక్టోబరులో మన్మోహన్ సింగ్ మంత్రివర్గంలో విదేశాంగ మంత్రిగా నియమించడ్డాడు.

2024లో మహబూబాబాద్ (ఎస్టీ) లోక్ సభ నియోజక వర్గం నుండి 18 వ లోక్ సభకు పోటి చేసిన కాంగ్రెస్ అభ్యర్థి పోరిక బలరాం నాయక్ బీఆర్ఎస్ పార్టీ అభ్యర్థి అయిన మాలోత్ కవిత పై 344,214 ఓట్ల మెజారిటితో గెలుపొందాడు.

సామాజిక, సాంస్కృతిక కార్యక్రమాలు

ఆంధ్రప్రదేశ్ రాష్ట్రంలో గిరిజన వ్యక్తుల సంక్షేమ అభ్యున్నతికి కృషి చేశాడు. వృద్ధులకు, జబ్బుపడిన వ్యక్తులకు ఆశ్రయం అందించడానికి వృద్ధాశ్రమ ఏర్పాటు వంటి సామాజిక కార్యక్రమాలలో పాల్గొన్నాడు.