గంగారత్నం

జవ్వాది గంగారత్నం
జననం	గంగారత్నం 1893 గంగలకుర్రు అగ్రహారం, తూర్పు గోదావరి జిల్లా
మరణం	2001 సెప్టెంబరు ఈదూరు
వృత్తి	రంగస్థల నటి , చలనచిత్ర నటి
మతం	హిందూ మతం
భార్య / భర్త	జవ్వాది వెంకటరత్నం
పిల్లలు	ఇద్దరు కుమార్తెలు, ఒక కుమారుడు

రైతుబిడ్డ సినిమాలో గంగారత్నం, వేదాంతం రాఘవయ్య, సుందరమ్మ

గంగారత్నం ప్రముఖ రంగస్థల, సినిమా నటీమణి. ఈమె గయ్యాళి మహిళ పాత్రలు ధరించి ప్రేక్షకులను మెప్పించింది.

జీవిత విశేషాలు

ఈమె విశ్వబ్రాహ్మణ కుటుంబంలో 1893లో తూర్పు గోదావరి జిల్లా, అంబాజీపేట మండలం, గంగలకుర్రు గ్రామంలో జన్మించింది. బాల్యంలోనే ఈమెకు జవ్వాది వెంకటరత్నంతో వివాహం జరిగింది. ఈమెకు 16 సంవత్సరాల వయసు ఉన్నప్పుడే ఈమె భర్త మరణించాడు. ఫలితంగా ఈమె జీవనోపాధి కోసం 17 సంవత్సరాల పిన్నవయసులోనే నాటకాలలో వేషం వేయడం ప్రారంభించింది. 1936లో సినిమా రంగప్రవేశం చేసింది. ఈమె తొంభై సంవత్సరాల వయసు వరకు నటజీవితాన్ని కొనసాగించింది. ఈమెకు ఒక కుమారుడు, ఇద్దరు కుమార్తెలు ఉన్నారు. ఈమె చివరి దశలో పేదరికాన్ని అనుభవిస్తూ 2001లో తన 108వ యేట మరణించింది.

నాటకరంగం

జీవనోపాధి కోసం అతి పిన్నవయసులోనే నాటకాలు వేయడం ప్రారంభించిన గంగారత్నం ముఖ్యంగా హరిశ్చంద్ర నాటకంలో కలహకంఠిగా, చింతామణి నాటకంలో శ్రీహరిగా పాత్రలు ధరించింది. చింతామణి నాటకంలో శ్రీహరి పాత్ర పోషించాలంటే ఒక్క గంగారత్నమే దానికి సమర్థురాలనే పేరు గడించింది. విద్యుత్ దీపాలు లేని ఆ రోజుల్లో, దివిటీల వెలుగులో దీపాల కాంతిలో నాటక ప్రదర్శనలు నిర్వహించే రోజులలో కూడా ఈమె అధ్భుతంగా నటించి పేరు సంపాదించుకుంది. ఆ రోజుల్లో రంగస్థలంపై ఉద్దండులైన యడవల్లి సూర్యనారాయణ, గోవిందరాజుల సుబ్బారావు, స్థానం నరసింహారావు, ఉప్పులూరి సంజీవరావు, నెల్లూరు నాగరాజు మొదలైనవారితో నటించింది. ఈమె 1936- 1985 మధ్యకాలంలో సినిమాలలో నటించింది. సినిమాలలో నటించడం మానివేసిన తరువాత మళ్ళీ నాటకరంగంలో పునఃప్రవేశం చేసి సుమారు 20 సంవత్సరాలు అనేక పౌరాణిక, సాంఘిక నాటకాలలో నటించింది.

సినిమా రంగం

ఈమె క్రమంగా నాటకాల నుండి చలనచిత్ర రంగంలోనికి ప్రవేశించింది. కాకినాడకు చెందిన కొమ్మారెడ్డి నాగేశ్వరరావు 1936లో నిర్మించిన ప్రేమవిజయం అనే సాంఘిక చలనచిత్రంలో తొలిసారిగా నటించింది. తరువాత ఈమె అనేక ప్రఖ్యాత చలన చిత్రాలలో నటించి మంచి పేరు సంపాదించింది. ఈమె నటించిన చివరి చిత్రం శ్రీవారి శోభనం. ఈమె గయ్యాళి పాత్రలను అతి సహజంగా పోషించి మంచి పేరు సంపాదించుకున్నది. ఈమె పోషించిన గయ్యాళి పాత్రలు తరువాతి తరం నటి సూర్యకాంతానికి ఆదర్శ ప్రాయం అయ్యాయి.

నటించిన చిత్రాలు

• 1936 ప్రేమవిజయం
• 1936 సతీ తులసి
• 1937 కనకతార
• 1938 మాలపిల్ల
• 1939 రైతుబిడ్డ
• 1941 తెనాలి రామకృష్ణ
• 1946 ఇది మా కథ
• 1947 పల్నాటి యుద్ధం
• 1947 యోగివేమన
• 1949 కీలుగుర్రం
• 1951 మల్లీశ్వరి
• 1952 ప్రియురాలు
• 1953 పక్కింటి అమ్మాయి
• 1955 అర్ధాంగి
• 1955 శ్రీకృష్ణ తులాభారం
• 1983 నెలవంక ... రహీం తల్లి
• 1985 శ్రీవారి శోభనం