పాబ్లో ఎస్కోబార్

వికీపీడియా నుండి
Jump to navigation Jump to search
పాబ్లో ఎస్కోబార్
1977లో మెడలిన్ కంట్రోల్ ఏజెన్సీ తీసిన పాబ్లో ఎస్కోబార్ ఫోటో.
జననం. పాబ్లో ఎమిలియో ఎస్కోబార్ గవిరియా
(1949-12-01) 1949 డిసెంబరు 1
రియోనెగ్రో, కొలంబియా
మరణం 1993 డిసెంబరు 2 (1993-12-02)(వయసు 44)
మెడలిన్, కొలంబియా
నేరాలు మాదక ద్రవ్యాల అక్రమ రవాణా, అమ్మకాలు, హత్యలు, బాంబింగ్, లంచాలు, రాకెట్ నిర్వహణ
జరిమానా 5 సంవత్సరాలు జైలుశిక్ష[1]
వృత్తి మెడలిన్ కార్టెల్ అనే స్మగ్లింగ్ వ్యవస్థ వ్యవస్థాపకుడు, రాజకీయ నాయకుడు
జీవిత భాగస్వామి మరియా విక్టోరియో (1976–1993; అతని మరణం వరకూ)
పిల్లలు
  • సెబాస్టియన్ మరోక్వీన్ (1977)
  • మనుయెలా ఎస్కోబార్ (1984)

పాబ్లో ఎమిలియో ఎస్కోబార్ గావిరియా (1949 డిసెంబరు 1 - 1993 డిసెంబరు 2) కొలంబియాకు చెందిన మత్తుపదార్థాల అక్రమవ్యాపారి, నార్కో తీవ్రవాది. అతను అత్యున్నత స్థితిలో ఉన్నప్పుడు అమెరికాకు అక్రమ రవాణా అయిన కొకైన్‌లో 80 శాతం అతని ముఠానే అక్రమంగా రవాణా చేసేది, ఏటా 21.9 బిలియన్ డాలర్లు వ్యక్తిగత ఆదాయంగా సంపాదించేవాడు. అతన్ని కొకైన్ రాజు (కింగ్ ఆఫ్ కొకైన్) అని అంటారు, చరిత్రలోకెల్లా అత్యంత ధనికుడైన నేరస్తుడిగా పేరొందాడు. 1990ల్లో ఏటా 30 బిలియన్ అమెరికన్ డాలర్లు సంపాదించేవాడు,[2] తద్వారా అతను అత్యున్నత దశలో ఉన్నప్పుడు ప్రపంచంలోకెల్లా అత్యంత ధనికుల్లో ఒకడయ్యాడు.[3][4]

కొలంబియా ప్రాంతంలోని రియోనెగ్రోలో జన్మించిన ఎస్కోబార్, దగ్గరలోని మెడెలిన్‌లో పెరిగాడు. యూనివర్శిడాడ్ ఆటోనామా లాటినోఅమెరికనా ఆఫ్ మెడెలిన్‌లో కొద్దికాలం పాటు చదువుకున్నా, డిగ్రీ లేకుండా విశ్వవిద్యాలయం నుంచి బయటకు వచ్చేశాడు; నేర కార్యకలాపాల్లో పాల్గొనడం ప్రారంభించి క్రమేపీ తప్పుడు బ్రాండ్ సిగరెట్లు, ఫేక్ లాటరీ టిక్కెట్లూ అమ్మసాగాడు, మోటారుసైకిల్ దొంగతనంలోనూ పాల్గొన్నాడు. 1970ల్లో పలువురు కాంట్రాబ్రాండ్ అక్రమరవాణాదారుల కోసం పనిచేయడం ప్రారంభించాడు, తరచుగా జనాన్ని కిడ్నాప్ చేసి డబ్బు సంపాదించడమూ చేసేవాడు.1975లో యునైటెడ్ స్టేట్స్‌లో తొలి అక్రమరవాణా మార్గాన్ని ఏర్పరిచి, పౌడర్ కొకైన్ తానే అమ్మడం మొదలుపెట్టాడు. మాదక ద్రవ్యాల వ్యాపారంలో అతను వేగంగా విస్తరిస్తూ పోయాడు, ఇదే సమయంలో కొకైన్‌కు అమెరికా వ్యాప్తంగా డిమాండ్ పెరగడంతో అతనికి లాభించింది. 1980ల నాటికి నెలనెలా 70 నుంచి 80 టన్నుల కొకైన్ కొలంబియా నుంచి యుఎస్‌కి రవాణా చేసేవాడని అంచనా. అతని డ్రగ్ నెట్‌వర్కును సాధారణంగా మెడెలిన్ కార్టెల్ అని పిలుస్తారు. ఈ మెడెలిన్ కార్టెల్‌కి దాని పోటీ కార్టెల్‌లతో జాతీయంగా, అంతర్జాతీయంగా స్పర్థ ఉండేది, దాని కారణంగా హత్యాకాండ, పోలీసు అధికారులు, న్యాయమూర్తులు, స్థానికులు, ప్రముఖ రాజకీయనాయకుల హత్యలు వంటివి చేసేవారు.

1982లో ఎస్కోబార్ లిబరల్ ఆల్టర్నేటివ్ ఉద్యమం కింద కొలంబియా ఛాంబర్ ఆఫ్ రిప్రజెంటేటివ్స్‌కి ప్రత్యామ్నాయ సభ్యునిగా ఎస్కోబార్ ఎన్నికయ్యాడు. ఈ అధికారం ఉపయోగించి పశ్చిమ కొలంబియాలో ఫుట్‌బాల్ మైదానాలు, ఇళ్ళు నిర్మించి ఇచ్చాడు, దాంతో ఆ పట్టణాల స్థానికుల్లో అతనికి మంచి ప్రాచుర్యం లభించింది. కొలంబియా ప్రపంచ హత్యా రాజధానిగా పేరుగాంచింది, ఎస్కోబార్‌కు కొలంబియన్, అమెరికన్ ప్రభుత్వాలు బాగా వ్యతిరేకమయ్యాయి.[5] 1993లో ఎస్కోబార్‌ని అతని 44వ పుట్టినరోజుకు ఒకరోజు తర్వాత స్వంత పట్టణంలో కొలంబియన్ నేషనల్ పోలీసులు కాల్చిచంపారు.

తొలినాళ్ళ జీవితం[మార్చు]

ఎస్కోబార్ ఎదిగి, నేర జీవితాన్ని ప్రారంభించిన మెడెలిన్ నగరం.

పాబ్లో ఎమిలో ఎస్కోబార్ గెవెరియా 1949 డిసెంబరు 1న కొలంబియాలో రియోనెగ్రోలో జన్మించాడు. అబెల్ డె జీసస్ డారి ఎస్కోబార్ (1910-2001), హెమిల్డా దంపతులకు ఏడుగురు సంతానంలో మూడవ వాడు.[6][7] తండ్రి రైతు, తల్లి ప్రాథమిక ఉపాధ్యాయురాలు.[8] మెడెలిన్ అనే సమీప నగరంలో ఎస్కోబార్ పెరిగాడు. టీనేజి వయసులోనే నేరాలు చేయడం మొదలుపెట్టాడు, మొదట్లో సమాధి రాళ్ళు దొంగిలించి, స్థానిక స్మగ్లర్ల ద్వారా తిరిగి అమ్మేవాడు. అతని సోదరుడు రాబర్టో ఎస్కోబార్ దీన్ని తిరస్కరించాడు, ఈ సమాధి రాళ్ళు సమాధుల నిర్వహణకు డబ్బు ఇవ్వడం ఆపేసిన క్లెయింట్లకు సంబంధించినవారి సమాధి రాళ్ళు తీసి అమ్మేసే శ్మశానాల యజమానుల నుంచే చట్టబద్ధంగా దీన్ని తీసుకునేవారమనీ, తమ బంధువుకు వీటిని అమ్మే వ్యాపారం ఉండడంతో అతనికి అమ్మేవారమనీ చెప్తాడు.[9] ఎస్కోబార్ కుమారుడు సెబాస్టియన్ మారోక్విన్ ప్రకారం అతని తండ్రి నేరాలు ప్రారంభమైంది నకిలీ ఉన్నత పాఠశాల డిప్లమో సర్టిఫికెట్లు తయారుచేసి అమ్మడంతో మొదలైంది,[4] సాధారణంగా ఇవి యూనివర్శిడాడ్ అటానొమా లాటినోఅమెరికన్ ఆఫ్ మెడెలిన్ అనే విశ్వవిద్యాలయానికి చెందిన డిప్లొమోలు. ఈ విశ్వవిద్యాలయంలోనే ఎస్కోబార్ కొన్నాళ్ళు చదువుకున్నాడు.[10]

ఆస్కార్ బెనెల్ ఆగుయిర్ అనే వ్యక్తితో కలిసి ఎస్కోబార్ చిన్న చిన్న వీధి మోసాలు, నిషిద్ధ సిగరెట్లు అమ్మడం, తప్పుడు లాటరీ టిక్కెట్లు అంటగట్టడం, కార్ల దొంగతనం వంటి పలు నేరాలు చేసేవారు.[11] 1970ల తొలినాళ్ళలో మాదక ద్రవ్యాల వ్యాపారంలో దిగి అందులో ఎస్కోబార్ దొంగలా, బాడీగార్డులా పనిచేశాడు. మెడెలిన్ ఎగ్జిక్యూటివ్‌ని కిడ్నాప్ చేసి, విడుదల చేయడానికి లక్ష అమెరికన్ డాలర్లు సంపాదించాడు.[12] మెడెలిన్‌లో కార్యకలాపాలు చేస్తున్న ఆల్వారో ప్రీటో అన్న నిషిద్ధ వస్తువుల అక్రమ రవాణాదారు వద్ద పనిలో చేరాడు. ఎస్కోబార్ చిన్ననాటి నుంచి తనకు 22 ఏళ్ళ వయసు వచ్చేసరికి ఎలాగోలా పది లక్షల కొలంబియన్ డాలర్లు సంపాదించాలన్న కోరిక ఉండేది ఆ క్రమంలోనే ప్రీటో దగ్గర పనిచేయసాగాడు.[13] 26 ఏళ్ళు వచ్చేసరికి 100 మిలియన్ కొలంబియన్ డాలర్లు బ్యాంకులో డిపాజిట్ చేసి చాలా ప్రాచుర్యం పొందాడు, ఈ సొమ్ము 3 మిలియన్ అమెరికన్ డాలర్ల కన్నా ఎక్కువ.[14]

నేర జీవితం[మార్చు]

కొకైన్ పంపిణీ[మార్చు]

అంతర్జాతీయ మాదక ద్రవ్యాల మార్గాలు.

1975 మొదట్లో పాబ్లో పలుమార్లు కొలంబియా, పనామాల నడుమ అమెరికాలోకి మాదక ద్రవ్యాలు చేర్చే మార్గాల్లో విమాన ప్రయాణాలు చేసి తనదైన కొకైన్ అక్రమరవాణా మార్గాన్ని ఏర్పరుచుకున్నాడు. తర్వాత లేర్‌జెట్ సహా 15 పెద్ద విమానాలు, ఆరు హెలీకాఫ్టర్‌లు కొనుగోలు చేశాడు. వీటిని అక్రమరవాణాకు ఉపయోగించేవాడు.1976 మే నెలలో ఎస్కోబార్, అతని అనుచరులు భారీ ఎక్యుడార్ లోడ్‌తో మెడెలిన్ వస్తూండగా పోలీసులు అరెస్టు చేసి 15 కేజీల ఎక్యుడార్‌ను స్వాధీనం చేసుకున్నారు. మొదట్లో పాబ్లో ఈ కేసును విచారిస్తున్న మెడెలిన్ న్యాయమూర్తులకు లంచం ముట్టజెప్పి తప్పించుకుందామని ప్రయత్నించి, విఫలమయ్యాడు. అనేక నెలల పాటు కేసు నడుస్తూండగా అరెస్టు చేసిన ఇద్దరు ఆఫీసర్లను హత్యచేయమని తనవారికి ఆదేశించాడు, తర్వాత కేసు మూసివేశారు.[15]

అప్పటికి ఇతర నిషిద్ధ వస్తువుల వ్యాపారం మరీ ప్రమాదకరంగా మారడంతో పాబ్లో మాదక ద్రవ్యాల అక్రమ రవాణా ఎంచుకున్నాడని అతని కుమారుడు, జీవిత చరిత్రకారుడు రాబర్టో ఎస్కోబార్ పేర్కొన్నాడు. డ్రగ్ కార్టెళ్ళు అసలే లేకపోవడం, డ్రగ్ బారన్లు కొద్ది మంది మాత్రమే ఉండడం గమనించిన ఎస్కోబార్ ఇది ఇంతవరకూ ఎవరూ సరిగా ముట్టుకోని రంగం అని అర్థం చేసుకుని ఈ రంగాన్ని తనది చేసుకోవాలనుకున్నాడు. పెరూలో కోకైన్ పేస్టు కొని మెడలీన్‌లో దాన్ని శుద్ధి చేసి అమ్మేవాడు. మొట్టమొదటి సారిగా పెరూలో 14 కేజీల పేస్టును కొనుగోలు చేశాడు. తన నేర సామ్రాజ్య స్థాపనలో అది తొలి మెట్టు. తొలినాళ్ళలో పాత టైర్లలో పెట్టి కొకైన్ అక్రమంగా రవాణా చేసేవాడు. తీసుకుపోయిన పైలెట్‌కి ఒక్కొక్క ప్రయాణానికి 5 లక్షల అమెరికన్ డాలర్ల దాకా ఇచ్చేవాడు.[16]

ప్రాధాన్యత సంపాదించడం[మార్చు]

పాబ్లో ఎస్కోబార్, అతని అనుచరులు కలిసి పౌడర్ కొకైన్ తయారుచేసి అమ్మేవారు, దీన్నే యునైటెడ్ స్టేట్స్ మాదకద్రవ్యాల మార్కెట్ ద్వారా పంపిణీ చేసేవారు.

కొన్నాళ్ళకే అమెరికాలో కొకైన్ డిమాండ్ ఆకాశాన్ని తాకింది, ఎస్కోబార్ తన అక్రమరవాణా కార్యకలాపాలు, మార్గాలు, సౌత్ ఫ్లోరిడా, కాలిఫోర్నియా, ఇతర అమెరికా ప్రాంతాల్లో పంపిణీ నెట్‌వర్కులు మరింత వేగంగా పెంపొందించాడు. అతను, అతనితో పాటుగా కార్టెల్ ప్రారంభించిన కార్లోస్ లెహ్‌డెర్ కలిసి ఫ్లోరిడా తీరానికి 220 మైళ్ళ ఆగ్నేయంగా బహమాస్‌లోని నార్మన్స్ క్లే అన్న ద్వీపాన్ని ఈ పంపిణీ మార్గంలో కీలకమైన స్థానంగా రూపొందించుకున్నారు. ఇతని సోదరుడి సమాచారం ప్రకారం ఎస్కోబార్ నార్మన్స్ క్లే ద్వీపాన్ని కొనుగోలు చేయలేదు, లెహ్‌డర్ తానే స్వయంగా ఈ పనిచేశాడు. ఆ ద్వీపంలో విస్తరించిన భూమినంతా దాదాపు కొనేశారు, అందులో ఎయిర్‌స్ట్రిప్, ఓడరేవు, హోటల్, ఇళ్ళు, బోట్లు, విమానం వంటివి ఉండేవి. వారు తమ కొకైన్ భద్రపరచడానికి శీతల గోడౌను కూడా నిర్మించుకున్నారు.

1978 నుంచి 1982 వరకూ మెడెలిన్ కార్టెల్‌కి ఇదే ముఖ్యమైన అక్రమరవాణా మార్గంగా ఉండేది. ఈ మార్గం ద్వారా విపరీతమైన లాభాలు గడించిన ఎస్కోబార్ కొన్నాళ్ళకే ఆంటియోకియాలో 20 చదరపు కిలోమీటర్ల విస్తీర్ణంలోని భూమిని లక్షలాది డాలర్ల విలువకు కొనగలిగాడు, అక్కడ విలాసవంతమైన హసీండా నేపుల్స్ (అనువాదం- నేపుల్స్ ఎస్టేటు) నిర్మించుకున్నాడు. అతని విలాసవంతమైన ఇంటిలో ఒక జంతుప్రదర్శనశాల, ఒక సరస్సు, శిల్పాలతో కూడిన తోట, ప్రైవేట్ బుల్‌రింగ్ వంటి వినోదాలు ఉండేవి. ఇది అతను కుటుంబంతోనూ, కార్టెల్ సిబ్బందితోనూ వినోదించేందుకు ఏర్పాటుచేసుకున్నాడు.[17]

ఎస్కోబార్ నిర్మించుకున్న ప్రైవేట్ ఎస్టేట్ హసీండా నేపుల్స్‌లో ఆక్టోపస్ థీమ్ ఈతకొలను

ఒక సమయంలో నెలనెలా 70 నుంచి 80 టన్నుల కొకైన్ అమెరికాకు కొలంబియా నుంచి అక్రమరవాణా చేస్తున్నట్టు అంచనావేశారు.[18] 1980ల మధ్యకాలంలో ఎస్కోబార్ శక్తి, అధికారం శిఖరాన్ని అందుకున్నప్పుడు, మెడెలిన్ కార్టెల్ జెట్‌లైనర్స్ ద్వారా విమానానికి వచ్చి 11 టన్నుల చొప్పున అమెరికాకు రవాణా చేస్తూండేవారు. (ఎస్కోబార్ చేసిన అతిపెద్ద లోడ్ షిప్పింగ్ 23 వేల కేజీల కొకైన్ ఫిష్ పేస్టులో కలిపి చేసిన షిప్‌మెంట్, దీన్ని ఒక బోటులో పంపించాడు. ఈ విషయం అతని సోదరుడు రాసిన ఎస్కోబార్ పుస్తకంలో నిర్ధారితం) రాబర్టో ఎస్కోబార్ ప్రకారం, విమానాలతో పాటుగా పాబ్లో ఎస్కోబార్ భారీ లోడ్ పంపించడానికి రెండు చిన్న సబ్‌మెరైన్‌లను కూడా వినియోగించాడు.[19]

వ్యవస్థాపితమైన మాదకద్రవ్యాల నెట్‌వర్క్[మార్చు]

1982లో లిబరల్ ఆల్టర్నేటివ్ అనే చిన్న ఉద్యమంలో భాగంగా ఛాంబర్ ఆఫ్ రిప్రజెంటేటివ్స్ ఆఫ్ కొలంబియాకు ప్రత్యామ్నాయ సభ్యునిగా ఎస్కోబార్ ఎన్నికయ్యాడు, కానీ ప్రెసిడెన్షియల్ అభ్యర్థిగా లిబరల్ రెన్యువల్ ఉద్యమం మద్దతుతో పోటీచేసిన లూయీస్ కార్లోస్ గాలేన్ నుంచి తీవ్ర వ్యతిరేకత ఎదురుకావడంతో సభ్యత్వం వదులుకోవాల్సి వచ్చింది.[20][21] ఫెలిప్ గోన్జెలెజ్ స్పెయిన్ అధ్యక్షునిగా ప్రమాణస్వీకారం చేస్తున్నప్పుడు, ఆ కార్యక్రమానికి ఎస్కోబార్ కొలంబియన్ ప్రభుత్వ అధికారిక ప్రతినిధిగా కూడా హాజరయ్యాడు.[22]

అతని మాదకద్రవ్యాల వ్యవస్థ ప్రాచుర్యం పొందుతూండడంతో ఎస్కోబార్ అంతర్జాతీయంగా పేరుపొందాడు; అమెరికా, మెక్సికో, ప్యూర్టోరికో, డొమినికన్ రిపబ్లిక్, వెనుజులా, స్పెయిన్ దేశాల్లోకి ప్రవేశించే మాదకద్రవ్యాల్లో సింహభాగం మెడెలిన్ కార్టల్ నియంత్రణలో ఉండేది. ఉత్పత్తి చేసే పద్ధతి కూడా మారింది; అంతకుముందు బొలీవియా, పెరూ దేశాల్లో పండించిన కోకాతో తయారుచేస్తూండగా, ఈ దశలో కొలంబియా కోకా నుంచి ఉత్పత్తి జరిగేది. కొలంబియా కోకా నుంచి తయారైన కొకైన్ చుట్టుపక్కల దేశాల కోకా నుంచి ఉత్పత్తి అయ్యేదాని కన్నా ఎక్కువ నాణ్యత ఉన్నదన్న పేరు కూడా రావడం మొదలైంది. మరింత నాణ్యమైన, మరింత ఎక్కువ కొకైన్ కోసం డిమాండ్ పెరిగేకొద్దీ ఎస్కోబార్ తన అక్రమ వ్యాపారాన్ని విస్తరిస్తూ పోయాడు. బొలీవియన్ కొకైన్ కింగ్ అయిన రాబర్టో సూరెజ్ గోమేజ్‌తో కలిసి పనిచేయడం ప్రారంభించి ఉత్తర, దక్షిణ అమెరికాలు, ఐరోపా ఖండాల్లోని వివిధ దేశాలకు విస్తరించాడు, ఇతని అక్రమరవాణా సుదూరాన ఆసియా ఖండం వరకూ విస్తరించిందన్న పుకార్లూ ఉండేవి.

ప్యాలెస్ ఆఫ్ జస్టిస్ ముట్టడి[మార్చు]

1985 నాటి కొలంబియన్ సుప్రీంకోర్టు దాడి విషయంలో ఎస్కోబార్ నేరుగా బాధ్యుడని పలు పత్రికా ప్రచురణలు భావించాయి.

1985లో M-19 అనే ఉద్యమానికి సంబంధించిన వామపక్ష గెరిల్లాలు చేసిన కొలంబియన్ సుప్రీంకోర్టు ముట్టడి వెనుక ఎస్కోబార్ ఉన్నాడని ఆరోపణలు వచ్చాయి. యునైటెడ్ స్టేట్స్‌తో కొలంబియా నేరస్థుల అప్పగింత ఒప్పందపు రాజ్యాంగబద్ధతను అధ్యయనం చేసినందుకు నిరసనగా ఈ ముట్టడి జరిగింది, దీని ఫలితంగా కోర్టులోని న్యాయమూర్తుల్లో సగం మంది హత్యకు గురయ్యారు.[23] కొలంబియన్ ప్రభుత్వం ద్వారా అమెరికాకు నేరస్థుల అప్పగింత కింద బదిలీ అయ్యే ప్రమాదం ఉన్న లాస్ ఎక్స్ట్రాడిటబుల్స్ అన్న కొకైన్ అక్రమరవాణాదారుల బృందం గురించిన అన్ని పత్రాలూ, దస్త్రాలు M-19 వారు ప్యాలెస్ ముట్టడించి తగలబెట్టేందుకు కొకైన్ అక్రమరవాణాదారుల నుంచి డబ్బు అందుకున్నారు. ఈ లాస్ ఎక్స్ట్రాడిటబుల్స్ జాబితాలో ఎస్కోబార్ కూడా ఉన్నాడు. లాస్ ఎక్స్ట్రాడిటబుల్స్‌ను వారి నేరాల విచారణకు అమెరికాకు అప్పగించకుండా ప్రభుత్వం నుంచి హామీని వారి విడుదలకు ముడిపెట్టి రాయబారం మాట్లాడుకుందుకు కొందరిని బందీలుగా పట్టుకున్నారు.[24]

శిఖరాయమానమైన స్థితిలో ఎస్కోబార్[మార్చు]

అతని కార్యకాలాపాలు శిఖరాయమానమైన స్థితిలో ఉండగా మెడెలిన్ కార్టెల్ రోజుకు 70 మిలియన్ అమెరికన్ డాలర్లు, అంటే దాదాపు సంవత్సరానికి 26 బిలియన్ అమెరికన్ డాలర్లు వచ్చేవి. రోజూ 50 మిలియన్ డాలర్లకు పైగా వ్యాపారం అమెరికాలోనే జరిగేది. కొకైన్ అక్రమరవాణా ద్వారా ఎస్కోబార్ సంపాదించిన డబ్బు ఎంత ఉండేదంటే, వారానికి వెయ్యి అమెరికన్ డాలర్లు కేవలం డబ్బుకట్టలు కట్టడానికి వాడే రబ్బర్ బ్యాండ్లు కొనడానికే ఖర్చయ్యేది, సొమ్ము అంతా వారి గోడౌన్లలో దాచేవారు. ఈ సొమ్ములో ఏడాదికి పదిశాతం గోడౌన్లలో చేరి, అందిన డబ్బును కొరికిపారేసే ఎలుకల వల్ల పాడైపోయేది.[13]

1989లో ఫోర్బ్స్ మ్యాగజైన్ ఎస్కోబార్ వ్యక్తిగత ఆస్తుల విలువ 3 బిలియన్ అమెరికన్ డాలర్లుగా అంచనావేసి, ప్రపంచవ్యాప్తంగా 227 మంది అత్యంత సంపన్న బిలియనీర్లలో ఒకడిగా లెక్కించింది.[25] ఈ కాలంలో అతని మెడెలిన్ కార్టల్ ప్రపంచవ్యాప్తంగా కొకైన్ మార్కెట్‌లో 80 శాతాన్ని నియంత్రిస్తూ ఉంది.[19][26][27] దక్షిణ అమెరికాలోని అత్యంత ప్రతిష్టాత్మకమైన ఫుట్‌బాల్ టోర్నమెంట్ అయిన కోపా లిబెర్టడరెస్‌ను 1989లో గెలుచుకున్న మెడెలిన్ నగరపు అట్లెటికో నేషినల్ క్లబ్ వెనుక ప్రధాన పెట్టుబడిదారు ఎస్కోబార్ అని సాధారణంగా నమ్మేవారు.[28]

ఎస్కోబార్‌ని అమెరికా, కొలంబియా ప్రభుత్వాలు శత్రువుగా చూస్తూన్న కాలంలో మెడిలిన్ నగరంలో చాలామంది, ప్రత్యేకించి పేదవారు, ఎస్కోబార్‌ని హీరోగా చూడసాగారు. అతను ప్రజాసంబంధాల విషయంలో చాలా సహజంగా, వారితో కలిసిపోతూ ఉండేవారు. కొలంబియాలోని పేదల్లో మంచి పేరు వచ్చే పలు కార్యక్రమాలు చేపట్టాడు. స్వతాహాగా క్రీడాభిమాని అయిన ఎస్కోబార్ ఫుట్‌బాల్ మైదానాలు, పలు ఆటలకు వీలైన క్రీడామైదానాలు నిర్మించడం, బాలల ఫుట్‌బాల్ జట్టులకు స్పాన్సర్ చేయడం వంటి పనులు చేశాడు.[13] పశ్చిమ కొలంబియాలో ఇళ్ళు, ఫుట్‌బాల్ మైదానాలు నిర్మించాడు, తద్వారా పేదల్లో మంచి పేరు సంపాదించాడు.[29][30][31] అతను చేసిన పలు ప్రయత్నాల వల్ల ఉన్నవారిని కొట్టి పేదవారికి పెట్టే రాబిన్ హుడ్ ఇమేజి లభించింది. తరచు ఇళ్ళ నిర్మాణాలు, పేదల్లో మంచిపేరు వచ్చే పలు కార్యకలాపాలు చేపట్టేవాడు. మెండలిన్‌లో పలుమార్లు కాపలా కాయడం, అధికారులకు అతని వివరాలు చెప్పకుండా దాచడం వంటి పనులతో స్వచ్ఛందంగా చాలామంది ఇతన్ని పోలీసులకు దొరకకుండా తప్పించారు. ఇతని కార్యకలాపాలు శిఖరాయమానంగా ఉండగా మెడెలిన్ మాత్రమే కాక ఇతర ప్రాంతాలకు కూడా చెందిన మాదకద్రవ్యాల రవాణాదారులు ఇతనికి తమ కొలంబియన్ కొకైన్ సంబంధిత లాభాల్లో 20 నుంచి 35 శాతం వాటాలు ఇచ్చేసేవారు, బదులుగా ఇతను విజయవంతంగా అమెరికాకు కొకైన్ సరఫరా జరగడానికి అవసరమైన చర్యలు తీసుకునేవాడు.[32]

కొలంబియన్ కార్టెల్స్ తమలో తాము ఆధిపత్యం కోసం చేసిన పోరాటాలు అత్యంత రక్తసిక్తమయ్యాయి. దీని ఫలితంగా 1991లో 25,100 హత్యలు, 1992లో 27,100 హత్యలతో కొలంబియా ప్రపంచ హత్యా రాజధానిగా నిలిచింది.[33] తన వద్ద పనిచేసే హిట్‌మెన్‌కి పోలీసు అధికారులను చంపడానికి ఎస్కోబార్ రివార్డులు ప్రకటించడంతో 600 మంది పోలీసు అధికారులు చనిపోయారు, ఇటువంటి చర్యలు కొలంబియాలో హత్యల నిష్పత్తి భారీగా పెంచేశాయి.[5]

లా కాటెడ్రల్ జైలు[మార్చు]

మాదకద్రవ్యాల కార్టెల్స్‌కు వ్యతిరేకంగా పనిచేసిన కొలంబియన్ రాజకీయ నాయకుడు, పాత్రికేయుడు లూయీస్ కార్లోస్ గాలాన్‌ను పదివేలమంది ఎదుట ప్రసంగిస్తున్న సమయంలో హత్యచేశారు. ఈ హత్య పాబ్లో ఎస్కోబార్ చేశాడని భావించారు. సీజర్ గావిరియా ప్రభుత్వం ఎస్కోబార్‌కీ, మాదకద్రవ్యాల కార్టెల్స్‌కీ వ్యతిరేకమైంది. క్రమంగా ప్రభుత్వం ఎస్కోబార్‌తో సంప్రదింపులు జరిపి ఎస్కోబార్ లొంగిపోయి, తన నేర కార్యకలాపాలు అన్నీ కట్టిపెట్టేస్తే అతనికి శిక్ష తగ్గించేట్టు, ఖైదీగా ఉన్నప్పుడు చట్టపరంగానే వ్యవహరించేట్టు అంగీకరింపజేశారు. అధికారులు, ప్రజాభిప్రాయం నుంచి వస్తూన్న ఒత్తిడికి దిగివచ్చి వరుస హింసాత్మక చర్యలకు ముగింపు పలుకుతూ 1991లో ఎస్కోబార్ కొలంబియన్ అధికారులకు లొంగిపోయాడు. ఇతను లొంగిపోయే ముందే కొలంబియన్ పౌరులను యునైటెడ్ స్టేట్స్‌కు నేరస్థుల అప్పగింత కింద బదిలీ చేయడాన్ని నిషేధిస్తూ కొత్తగా ఆమోదించిన 1991 నాటి కొలంబియన్ రాజ్యాంగం చట్టం చేసింది. ఎస్కోబార్, ఇతర మాదకద్రవ్యాల నేరసామ్రాజ్య నేతలు రాజ్యాంగ సభ సభ్యులను ప్రభావితం చేసి ఈ చట్టం రూపొందించారని అనుమానాలు వ్యక్తమయ్యాయి. ఫుట్‌బాల్ పిచ్, పెద్ద బొమ్మ ఇల్లు, జకుజ్జీ, జలపాతంతో కూడిన లా కాటెడ్రల్ అన్న విలాసవంతమైన స్వంత జైలు రూపొందించుకుని నిర్బంధాన్ని అనుభవించసాగాడు. ఎస్కోబార్ తన నేర కార్యకలాపాలను స్వంత జైలు నుంచే సాగిస్తున్నాడన్న వార్తలు పత్రికా మాధ్యమాల్లో రాసాగాయి, దాంతో ప్రభుత్వం 1992 జూలై 22న అతనిని సాధారణమైన జైలుకు తరలించాలని నిర్ణయించింది. ఎస్కోబార్ పలుకుబడి ఈ జైలు బదిలీ ప్రణాళిక ముందే తెలిసి, సకాలంలో తప్పించుకునే వీలు కల్పించింది. అలా తప్పించుకున్న ఎస్కోబార్ తన మిగిలిన జీవితాన్ని పోలీసుల నుంచి తప్పుకుంటూ గడిపాడు.[34][35]

కొలంబియన్, అమెరికన్ పోలీసుల వేట[మార్చు]

ఎస్కోబార్ నిర్బంధం నుంచి తప్పించుకున్నాకా అమెరికా ప్రత్యేక జాయింట్ ఆపరేషన్స్ కమాండ్, సెంట్రా స్పైక్ కలిసి ఇతన్ని వేటాడసాగాయి. వారు సెర్చ్ బ్లాక్ (అన్వేషణ కూటమి) అనే ప్రత్యేక కొలంబియన్ పోలీస్ టాస్క్‌ఫోర్స్‌కు శిక్షణ ఇచ్చారు. ఎస్కోబార్‌కీ, అమెరికా-కొలంబియా ప్రభుత్వాలకీ నడుమ ఘర్షణ అంతూపొంతూ లేకుండా సాగుతూ పోయింది. ఈలోగా బాహాటంగా ఎస్కోబార్‌ని పట్టుకునే ప్రయత్నాలకు మద్దతునిచ్చే అతని శత్రువుల సంఖ్యా పెరగసాగింది. లోస్ పెపెస్ (పాబ్లో ఎస్కోబార్ వల్ల హింసింపబడ్డ జనం అన్న పదబంధపు స్పానిష్ అనువాదానికి కుదింపబడ్డ రూపం) అన్న పేరుతో ఎస్కోబార్‌ని పట్టుకునే ప్రయత్నాలకు సహకరించే అతని శత్రువులతో ఒక నిఘాసంఘం ఏర్పాటైంది. ఈ నిఘా సంఘం కార్యకలాపాలకు కాలి కార్టెల్, కార్లోస్ కాస్టనో ఆధ్వర్యంలో సాగే సంప్రదాయవాదులైన పారామిలటరీల వంటి ఇతని ప్రత్యర్థులు, పూర్వ అనుచరులు ఆర్థికంగా సహాయం చేసేవారు. లాస్ పెపెస్ కార్యకలాపాలు ప్రతీకారం లక్ష్యంగా రక్తసిక్తంగా ఉండేవి. ఈ నిఘాసంఘం 300 మంది ఎస్కోబార్ సహచరులను, అతని న్యాయవాదిని, [36] బంధువులను హత్యచేశారు. మెడెలిన్ కార్టెల్ సంపాదించిన ఆస్తులు పెద్దమొత్తంలో నాశనం చేశారు.

సెర్చ్ బ్లాక్ సభ్యులు, కొలంబియన్, యునైటెడ్ స్టేట్స్ ఇంటిలిజెన్స్ ఏజెన్సీలు ఎస్కోబార్‌ను పట్టుకునే ప్రయత్నాలలో అయితే లోస్ పెపెస్‌తో కుమ్మక్కు అవడం కానీ, ఒక్కోసారి సెర్చ్ బ్లాక్‌లా, ఒక్కోసారి లోస్ పెపెస్‌ పేరిట తమ తమ పనులు చేపట్టేవారు. మిగిలిన ఎస్కోబార్ సహచరులను, స్నేహితులను అణచివేయడానికి, దెబ్బతీయడానికి ఈ సమన్వయ పద్ధతిలో లోస్ పెపెస్ వారికి సమాచారాన్ని అందించేవారన్న ఆరోపణలు ఉన్నాయి, అయితే ఒక్కోసారి సెర్చ్ బ్లాక్ సభ్యులు నేరుగా లోస్ పెపెస్ హత్యాకాండల్లోనూ పాల్గోవడమూ ఉండేది.[30][page needed] లాస్ పెపెస్ నాయకుల్లో ఒకరైన డీగో మూరిలో బెజరనో (డాన్ బెర్నాగా ప్రసిద్ధుడు) మొదట్లో మెడెలిన్ కార్టెల్ సభ్యునిగా ఉండేవాడు, తర్వాత మాదకద్రవ్యాల రవాణా మార్గపు నాయకుడైనాడు, క్రమేపీ లాస్ పెపెస్‌లో చేరి, ఆ తర్వాత కొలంబియా స్వీయ రక్షణ వ్యవస్థలో బలమైన భాగానికి నాయకుడయ్యాడు.

మరణం[మార్చు]

1993 డిసెంబరు 2న ఎస్కోబార్ మృతదేహం ముందు సంబరాలు జరుపుకుంటున్న సెర్చ్ బ్లాక్ సభ్యులు. వందల మిలియన్ డాలర్ల ఖర్చుతో 16 నెలల పాటు సాగిన వేట ఇతని మరణంతో ముగిసింది.
ఇటాగుయ్‌లో మాంటె సాక్రో శ్మశానంలో ఎస్కోబార్, అతని కుటుంబ సభ్యుల సమాధి

లా కాటెడ్రల్ నుంచి తప్పించుకున్న 16 నెలల తర్వాత సెర్చ్ బ్లాక్‌ నుంచి తప్పించుకోవాలన్న ప్రయత్నాల మధ్య 1993 డిసెంబరు 2న జరిగిన కాల్పుల్లో పాబ్లో ఎస్కోబార్ చనిపోయాడు.[37] బ్రిగేడియర్ హ్యూగో మార్టినెజ్ నేతృత్వంలోని కొలంబియన్ ఎలక్ట్రానిక్ నిఘాదళం [38] ఇతని రేడియోటెలిఫోన్ ప్రసారాలను రేడియో ట్రైలిటరేషన్ సాంకేతికత ఉపయోగించి జాడలుపట్టి లాస్ ఓలివాస్ అనే మెడెలిన్ మధ్యతరగతి ప్రాంతంలో వెతికిపట్టుకున్నారు. ఎస్కోబార్, అతని అంగరక్షకుడు అల్వారో డె జెసుస్ ఆగుడెలో (అలియాస్ ఎల్ లిమోన్) లకు, అధికారులకు నడుమ కాల్పులు జరిగాయి. ఒకదాన్నొకటి అంటుకున్న ఇళ్ళ కప్పుల మీద ఇద్దరూ పరుగులు పెడుతూ వెనుక సందుకు చేరి తప్పించుకునే ప్రయత్నం చేశారు, కానీ ఇద్దరినీ వెంబడిస్తున్న కొలంబియన్ జాతీయ పోలీసు అధికారులు కాల్చిచంపారు.[39] ఎస్కోబార్ కాళ్ళు, మొండెం మీద బుల్లెట్ గాయాలయ్యాయి, చెవి నుంచి తలలోకి పోయిన బుల్లెట్ ప్రాణం తీసింది.

చెవి లోంచి పోయిన బుల్లెట్ షాట్ ఎవరు కాల్చారన్న విషయం నిర్ధారితం కాలేదు, అలానే ఈ గన్ షాట్ కాల్పుల సమయంలోనే తగిలిందా లేక తర్వాత పట్టుకుని కాల్చారా అన్న విషయమూ స్పష్టం కాలేదు, ఈ విషయం మీద పలు ఊహాగానాలు ఉన్నాయి. కొందరు ఎస్కోబార్ బంధువులు అతను ఆత్మహత్య చేసుకున్నాడని నమ్ముతారు.[40] అతని ఇద్దరు సోదరులు రాబర్టో ఎస్కోబార్, ఫెర్నాండో సాంకెజ్ ఆరెలనో తనను తానే చెవిలోంచి తలలోకి కాల్చుకున్నాడని నమ్ముతున్నారు. ఈ అంశం మీద ఒక వాంగ్మూలంలో వారిద్దరూ పాబ్లో "ఆత్మహత్య చేసుకున్నాడు, అంతేకాని కాల్చిచంపితే చావలేదు. వాళ్లందరూ అతని వెనుక పడిన సంవత్సరాల కాలంలో ప్రతీరోజూ మాతో తననే గనుక చుట్టుముడితే, వేరే దారి లేదని తేలితే నన్ను నేనే చెవిలోంచి కాల్చుకుంటానని చెప్పేవాడు" అన్నారు.[41][page needed]


మూలాలు[మార్చు]

  1. David Hutt (25 September 2014). "Heroes and Villains: Pablo Escobar". Archived from the original on 3 February 2015. 
  2. "Pablo Escobar". celebritynetworth.com. February 2016. 
  3. "10 facts reveal the absurdity of Pablo Escobar's wealth". businessinsider.com. February 2016. 
  4. 4.0 4.1 Page 469, Pablo Escobar, My Father. Escobar, Juan Pablo. St. Martin's Press, New York. 2014.
  5. 5.0 5.1 Karl Penhaul (9 May 2003). "Drug kingpin's killer seeks Colombia office". Boston Globe. 
  6. "Abel de Jesús Escobar Echeverri". Geni. 
  7. "Hermilda Gaviria Berrío". Geni. 
  8. Marcela Grajales. "Pablo Escobar". Accents Magazine. Kean University. Retrieved 13 February 2010. 
  9. "Escobar Seventh Richest Man in the World in 1990". Richest Person.org. Archived from the original on 6 December 2010. Retrieved 13 February 2010. 
  10. Salazar, Alonso. "Pablo Escobar, h el patrón del mal (La parábola de Pablo)". Google Livres. Penguin Random House Grupo Editorial USA, 2012. Retrieved 11 February 2015. 
  11. J.D. Rockefeller (17 March 2016). Cocaine King Pablo Escobar: Crimes and Drug Dealings. J.D. Rockefeller. pp. 3–. ISBN 978-1-5306-1889-7. 
  12. "Colombian Druglord Trying To Turn Wealth Into Respect". Orlando Sentinel. 10 March 1991. Retrieved 16 March 2011. 
  13. 13.0 13.1 13.2 Escobar, Roberto (2009). The Accountant's Story: Inside the Violent World of the Medellín Cartel. Grand Central Publishing. 
  14. Page 74, Pablo Escobar, My Father. Escobar, Juan Pablo. St. Martin's Press, New York. 2014.
  15. "Pablo Escobar – The Medellin Cartel". Medellintraveler.com. Archived from the original on 16 October 2007. Retrieved 16 March 2011. 
  16. "Amazing story of how Pablo Escobar came to be the richest crook in history". Daily Record. Scotland. 16 March 2009. Retrieved 16 March 2011. 
  17. "The godfather of cocaine". Frontline. WGBH. 
  18. JOHN., BASELMANS, (2016). DRUGS. [S.l.]: LULU COM. ISBN 9781326843250. OCLC 982503721. 
  19. 19.0 19.1 "Pablo Escobar Gaviria – English Biography – Articles and Notes". ColombiaLink.com. Archived from the original on 8 November 2006. Retrieved 16 March 2011. 
  20. Page 116, Pablo Escobar, My Father. Escobar, Juan Pablo. St. Martin's Press, New York. 2014.
  21. Tiempo, Casa Editorial El. "SANTOFIMIO RECOMENDÓ MATAR A LUIS CARLOS GALÁN: POPEYE". El Tiempo. 
  22. J.D. Rockefeller 2016, chpt. 5.
  23. "Cali Colombia nacional Pablo Escobar financió la toma del Palacio de Justicia Escobar financió toma del Palacio de Justicia". El Pais. 
  24. Jhon Jairo Velásquez (obtained 21 October 2014)
  25. "Japan's Tsutsumi Still Tops Forbes' Richest List". Los Angeles Times. Associated Press. 10 July 1989. Retrieved 22 February 2012. 
  26. "Pablo Emilio Escobar 1949 – 1993 9 Billion USD – The business of crime – 5 'success' stories". MSN. 17 January 2011. Archived from the original on 14 July 2011. Retrieved 16 March 2011. 
  27. Meade, Teresa A. (2008). A history of modern Latin America, 1800 – 2000. Oxford: Blackwell. p. 302. ISBN 1-4051-2050-9. Retrieved 6 October 2011. 
  28. Davison, Phil. "The Road to Italy: In the Shadow of the Drug Barons". The Independent 20 May 1990. Lexis-Nexis Academic. 8 October 2009
  29. "GARCÍA HERREROS CAUSA CONFUSIÓN". El Tiempo. 
  30. 30.0 30.1 Mark Bowden (2001). Killing Pablo: The Hunt For The World's Greatest Outlaw. New York: Atlantic Monthly Press. 
  31. J.D. Rockefeller 2016, p. 5.
  32. Baselmans 2016, p. 97.
  33. "Colombia 1993 Chapter II: The Violence Phenomenon". Archived from the original on 25 July 2011. 
  34. Treaster, Joseph B. (23 July 1992). "Colombian Drug Baron Escapes Luxurious Prison After Gunfight". The New York Times. p. 1. Retrieved 21 July 2011. 
  35. "Escobar escape humiliates Colombian leaders". 
  36. "Angry Over Blast, Colombia Vigilantes Kill Escobar Lawyer". "Angry Over Blast, Colombia Vigilantes Kill Escobar Lawyer". Los Angeles Times, 17 April 1993
  37. "Colombia Drug Lord Escobar Dies in Shootout".  LA Times, 3 December 1993
  38. Interview with Hugo Martinez – the man who 'got' Pablo Escobar D. Streatfeild. November 2000.మూస:Unreliable source?
  39. "Decline of the Medellín Cartel and the Rise of the Cali Mafia". U.S. Drug Enforcement Administration. Archived from the original on 18 January 2006. Retrieved 13 February 2010. 
  40. Video of Escobar's exhumation లో వీడియో (in Spanish)
  41. Roberts, Kenneth. (2007). Zero Hour: Killing of the Cocaine King.

ఆధార గ్రంథాలు[మార్చు]