షర్మిలారెడ్డి
| వై. ఎస్. షర్మిల | |||
 | |||
24వ అధ్యక్షురాలు, ఆంధ్రప్రదేశ్ కాంగ్రెస్ కమిటీ (ఏపీ పీసీసీ) | |||
| అధికారంలో ఉన్న వ్యక్తి | |||
| అధికార ప్రారంభం 2024 జనవరి 16 | |||
| ముందు | గిడుగు రుద్రరాజు | ||
|---|---|---|---|
అధ్యక్షురాలు, వైఎస్ఆర్ తెలంగాణ పార్టీ | |||
| పదవీ కాలం 2021 జులై 8 – 2024 జనవరి 4 | |||
వ్యక్తిగత వివరాలు |
|||
| జననం | 1980 డిసెంబర్ 17 పులివెందుల, ఆంధ్రప్రదేశ్, భారతదేశం | ||
| రాజకీయ పార్టీ | కాంగ్రెస్ పార్టీ (2024-ప్రస్తుతం) | ||
| ఇతర రాజకీయ పార్టీలు | యువజన శ్రామిక రైతు కాంగ్రెస్ పార్టీ (2011-2021) వైఎస్ఆర్ తెలంగాణ పార్టీ (2021-2024) | ||
| సంతానం | 2 | ||
| నివాసం | హైదరాబాద్, తెలంగాణ, భారతదేశం | ||
వైఎస్ షర్మిల రెడ్డి (జననం: 1980 డిసెంబర్ 17) ఆంధ్రప్రదేశ్ దివంగత ముఖ్యమంత్రి వై.ఎస్. రాజశేఖరరెడ్డి కుమార్తె మరియు ప్రస్తుత ఆంధ్రప్రదేశ్ కాంగ్రెస్ కమిటీ (ఏపీ పీసీసీ) అధ్యక్షురాలు. 2012 - 2013 సంవత్సరాల కాలంలో వైయస్సార్ కాంగ్రెస్ పార్టీ ప్రచారంలో భాగంగా రాష్ట్ర వ్యాప్త పాదయాత్ర చేసింది. ఈ పాదయాత్రకు "మరో ప్రజా ప్రస్థానం" అనే పేరు పెట్టారు. ఆ తర్వాత 2021లో తెలంగాణలో రాజకీయ పార్టీ స్థాపించి, అనంతరం 2024లో కాంగ్రెస్ పార్టీలో చేరారు.
వ్యక్తిగత జీవితం
[మార్చు]షర్మిల తండ్రి ఆంధ్రప్రదేశ్ రాష్ట్ర దివంగత ముఖ్యమంత్రి రాజశేఖరరెడ్డి, తల్లి వైకాపా పార్టీ మాజీ గౌరవ అధ్యక్షురాలు వై.ఎస్.విజయమ్మ. ఆంధ్రప్రదేశ్ మాజీ ముఖ్యమంత్రి, వైకాపా పార్టీ స్థాపకుడు జగన్మోహన్ రెడ్డికి ఈమె చెల్లెలు. షర్మిలారెడ్డి భర్త పేరు అనిల్ కుమార్. వీరికి ఇద్దరు పిల్లలు (ఒక అబ్బాయి, ఒక అమ్మాయి). షర్మిలకు అనిల్ తో ద్వితీయ వివాహం జరిగింది. మొదటి వివాహం మేనమామ ప్రతాప్ రెడ్డితో జరిగింది.
రాజకీయ జీవితం
[మార్చు]అన్న వై.యస్. జగన్మోహన్ రెడ్డి స్థాపించిన వై.యస్.ఆర్. కాంగ్రెస్ పార్టీ తరపున తల్లి విజయమ్మతో పాటు జూన్ 12, 2012 నుంచి జరుగుతున్న ఉపఎన్నికలలో అధికారికంగా ప్రచారం నిర్వహిస్తూ ఆమె తొలిసారిగా ప్రజాజీవితంలోకి వచ్చింది. ఆస్తుల కేసులో జగన్‌ను అరెస్టు చేయగా, పార్టీ అభ్యర్థి కొండా సురేఖ తరపున ఆమె ప్రచారంలో పాల్గొనడం ద్వారా ఆమె ప్రత్యక్ష రాజకీయ జీవితం మొదలైనది. అంతకుముందు ఆమె అనేక క్రైస్తవ మత ప్రచార సభలలో పాల్గొని ప్రసంగించారు.
వైఎస్ఆర్ తెలంగాణ పార్టీ (2021-2024)
[మార్చు]ఆంధ్రప్రదేశ్ రాష్ట్ర విభజన అనంతరం, 2021 జూలై 8న తెలంగాణ రాష్ట్రంలో షర్మిల 'వైఎస్ఆర్ తెలంగాణ పార్టీ' (YSRTP) ని స్థాపించారు. తెలంగాణలో నిరుద్యోగ సమస్యలు, రైతుల సమస్యలపై పోరాడుతూ సుదీర్ఘ పాదయాత్రలు, దీక్షలు చేశారు.
కాంగ్రెస్ పార్టీలో చేరిక
[మార్చు]ఆమె 2024 జనవరి 4న ఢిల్లీలో ఏఐసీసీ అధ్యక్షుడు మల్లికార్జున ఖర్గే, కాంగ్రెస్ అగ్రనేత రాహుల్ గాంధీ సమక్షంలో కాంగ్రెస్ పార్టీలో చేరారు. అదే సమయంలో తన వైఎస్ఆర్ తెలంగాణ పార్టీని కాంగ్రెస్‌లో విలీనం చేశారు.[1] వైఎస్ షర్మిల రాజకీయ అనుభవాన్ని గుర్తించిన కాంగ్రెస్ అధిష్ఠానం, జనవరి 16న ఆమెను ఆంధ్రప్రదేశ్ కాంగ్రెస్ కమిటీ (ఏపీ పీసీసీ) అధ్యక్షురాలిగా నియమించింది.[2]
అన్న జగన్మోహన్ రెడ్డితో విభేదాలు
[మార్చు]2021లో షర్మిల తెలంగాణలో వేరుగా రాజకీయ పార్టీ స్థాపించిన నాటినుంచే అన్న జగన్మోహన్ రెడ్డితో ఆమెకు రాజకీయంగా విభేదాలు పొడసూపాయి. 2024లో ఆమె కాంగ్రెస్ పార్టీలో చేరి ఏపీ పీసీసీ అధ్యక్షురాలిగా బాధ్యతలు చేపట్టిన తర్వాత, రాజకీయ ప్రత్యర్థిగా మారి తన సోదరుడి విధానాలను తీవ్రంగా విమర్శించడం ప్రారంభించారు.
కుటుంబ ఆస్తుల వివాదం: రాజకీయ విభేదాలతో పాటుగా, వీరిద్దరి మధ్య తీవ్రస్థాయిలో కుటుంబ ఆస్తుల వివాదం కూడా 2024 సెప్టెంబర్ నెలలో బహిర్గతమైంది. సరస్వతీ పవర్ అండ్ ఇండస్ట్రీస్, భారతీ సిమెంట్స్ వంటి కుటుంబ వ్యాపారాల్లో వాటాల పంపిణీ గురించి వీరి మధ్య వివాదం నెలకొంది. తండ్రి వై.ఎస్. రాజశేఖరరెడ్డి ఆశయాల ప్రకారం నలుగురు మనవళ్లకు సమానంగా దక్కాల్సిన వాటాలను ఇవ్వకుండా జాప్యం చేస్తున్నారని, 2019లో జరిగిన ఒక అవగాహనా ఒప్పందం (MoU) ను ఉల్లంఘిస్తున్నారని షర్మిల ఆరోపించారు. కాగా, నిబంధనలకు విరుద్ధంగా సరస్వతీ పవర్ షేర్లను షర్మిల, వారి తల్లి విజయమ్మ తమ పేర్ల మీదికి బదిలీ చేసుకున్నారని ఆరోపిస్తూ సెప్టెంబర్ 2024లో జగన్మోహన్ రెడ్డి జాతీయ కంపెనీ లా ట్రిబ్యునల్ (NCLT) లో పిటిషన్ వేశారు. ఈ వివాదంలో తల్లి విజయమ్మ తన కుమార్తె షర్మిలకే మద్దతుగా నిలుస్తూ ఒక బహిరంగ లేఖ విడుదల చేశారు.
మరో ప్రజాప్రస్థానం
[మార్చు]వైయస్సారు కాంగ్రెసు అధ్యక్షుడు అయిన జగన్‌మోహన్‌రెడ్డిని అక్రమాస్తుల కేసులో సీబీఐ ఉపఎన్నికల ముందే అరెస్టు చేసింది. ఈ నేపథ్యంలో పార్టీని ప్రజలకు మరింత చేరువగా తీసుకెళ్లే ప్రయత్నంగా, పార్టీ శ్రేణుల్లో ఉత్సాహం నింపి బలోపేతం చేయు దిశగా షర్మిల మరో ప్రజా ప్రస్థానం పేరు మీద పాదయాత్రను 18 అక్టోబర్ 2012న ప్రారంభించారు. తన పాదయాత్రను తన తండ్రి దివంగత రాజశేఖరరెడ్డి సమాధి (ఇడుపులపాయ) నుండి ప్రారంభించింది. పాదయాత్రలో షర్మిలకు డిసెంబర్ 17న గాయం అవటం వలన తాత్కాలికంగా పాదయాత్రను నిలిపివేసింది. ఆమె కాలికి అపోలో ఆసుపత్రిలో ఆపరేషన్ చేసి, ఆరు వారాలపాటు విశ్రాంతి తీసుకొనవలసినదిగా వైద్యులు సలహా ఇచ్చారు. ఆమె స్వస్థత పొందిన తరువాత ఫిబ్రవరి 6, 2013 నుండి మళ్ళీ పాదయాత్ర ఆరంభించింది. ఈ పాదయాత్ర ఇచ్ఛాపురం వరకు కొనసాగి ఆగస్టు 4, ఆదివారం నాడు ముగిసినది.
9 నెలలకు పైగా కొనసాగిన ఈ పాదయాత్ర 14 జిల్లాల గుండా జరిగింది. 116 నియోజకవర్గాల మీదుగా సాగింది. ఇందులో 9 కార్పొరేషన్లు, 45 మున్సిపాలిటీలు, 195 మండలాలు ఉన్నాయి. ఈ యాత్ర 2250 గ్రామాలను తాకుతూ సాగింది. మొత్తం యాత్రలో 190 గ్రామ ప్రాంతాలలో రచ్చబండను నిర్వహించడం జరిగింది. 152 ప్రదేశాలలో భారీ స్థాయిలో జరిగిన జనసభలలో ప్రసంగించడం జరిగింది. ఈ పాదయాత్రలో దాదాపు కోటిమందికి పైగా జనాలను షర్మిల ప్రత్యక్షంగా కలిసినట్లు అంచనా.
షర్మిల పాదయాత్ర జరిపిన జిల్లాలు: 1. వైఎస్ఆర్ కడప, 2. అనంతపురం, 3. కర్నూలు, 4. మహబూబ్ నగర్, 5. రంగారెడ్డి, 6. నల్గొండ, 7. గుంటూరు, 8. కృష్ణా, 9. ఖమ్మం, 10. పశ్చిమ గోదావరి, 11. తూర్పు గోదావరి, 12. విశాఖపట్నం, 13. విజయనగరం, 14. శ్రీకాకుళం.
మొత్తం పాదయాత్ర జరిపిన దూరం 3,112 కి.మీ. ప్రపంచంలో ఇంత దూరం పాదయాత్ర జరిపిన మొట్టమొదటి మహిళగా షర్మిల గుర్తింపు పొందారు.
మరో ప్రజా ప్రస్థాన యాత్రా విశేషాలు
| ప్రస్థానం (కి.మీ) | ప్రదేశం | నియోజక వర్గం | జిల్లా |
| తొలిఅడుగు | ఇడుపులపాయ | పులివెందుల | వైఎస్ఆర్ కడప |
| 500 | జూలకల్ | అలంపూర్ | మహబూబ్ నగర్ |
| 1000 | కొండప్రోలు తండా | మిర్యాలగూడ | నల్గొండ |
| 1500 | పెడన | పెడన | కృష్ణా |
| 2000 | రావికంపాడు | చింతలపూడి | పశ్చిమ గోదావరి |
| 2500 | కాకరాపల్లి | తుని | తూర్పు గోదావరి |
| 3000 | ధనుపురం | పాతపట్నం | శ్రీకాకుళం |
| 3112 | ఇచ్ఛాపురం | ఇచ్ఛాపురం | శ్రీకాకుళం |
మరో ప్రస్థానం ముగింపు చిహ్నం 'విజయప్రస్థానం'
[మార్చు]గతంలో వై.ఎస్. రాజశేఖరరెడ్డి ప్రతిపక్ష నాయకుడిగా ఉన్నప్పుడు చేవెల్ల నుండి 68 రోజుల పాటు 1,473 కి.మీ పాదయాత్ర చేసి, ఇచ్ఛాపురంలో ముగించిన సందర్భంగా అక్కడ 'విజయవాటిక' స్మారక స్తూపాన్ని నిర్మించారు. ఆ స్తూపానికి ఎదురుగానే షర్మిల తన మరో ప్రజాప్రస్థానం ముగింపు చిహ్నంగా విజయ ప్రస్థానం ను నిర్మించి, ఆవిష్కరించారు.
ఇవి కూడా చూడండి
[మార్చు]వంశవృక్షం
[మార్చు]మూలాలు
[మార్చు]- ↑ Eenadu (4 January 2024). "కాంగ్రెస్‌లో చేరిన వైఎస్ షర్మిల". Archived from the original on 4 January 2024. Retrieved 4 January 2024.
- ↑ V6 Velugu (16 January 2024). "ఏపీ పీసీసీ చీఫ్ గా వైఎస్ షర్మిల". Archived from the original on 16 January 2024. Retrieved 16 January 2024.
{{cite news}}: CS1 maint: numeric names: authors list (link)
బయటి లింకులు
[మార్చు]
