వికీపీడియా చర్చ:వికీప్రాజెక్టు/తెవికీ-ఐఐఐటి

ప్రాజెక్టు పేరు

User:Madu19, User:Sai kiranmai, User:సాయికిరణ్,User:Ramu ummadishetty గార్లకు , తెవికీ అనే ప్రాజెక్టు పేరు మరీ సాధారణంగా వుంది. మీ సంస్థతో జతచేస్తే అనగా వికీపీడియా:వికీప్రాజెక్టు/తెవికీ-ఐఐఐటీ అనిమారిస్తే మెరుగనుకుంటాను. --అర్జున (చర్చ) 06:30, 3 మార్చి 2020 (UTC)

User:Arjunaraoc గారు ప్రాజెక్ట్ పేరు మార్చబడినది ధన్యవాదాలు . 2020-03-03T12:12:46‎ Ramu ummadishetty

ప్రాజెక్టు పేజీల పునఃనిర్మాణం

వాడుకరి:Kasyap గారు, ప్రాజెక్టు పేజీలు దారిమార్పు లేకుండా ఉపపేజీలుగా చేసినప్పుడు, వాటికి ఇవ్వబడిన లింకులుకూడా మార్చాలి. లేకపోతే ఎర్రలింకులతో కనబడుతాయి. --అర్జున (చర్చ) 09:20, 24 ఫిబ్రవరి 2021 (UTC)

ఇంటర్న్ షిప్ లో భాగంగా అనువాదాలు

వాడుకరి:Kasyap గారు, ఆంగ్ల వ్యాస అనువాదాలు ఇంటర్న్ షిప్ లో భాగంగా చేస్తున్నామని పేర్కొన్నారు. దాని గురించి మరిన్ని వివరాలు, ఏ ఉపకరణం, వ్యాసాల ఎంపిక, నాణ్యత మదింపు లాంటి వాటిగురించి మరింత సమాచారం తెలియచేయగలరా?--అర్జున (చర్చ) 09:37, 24 ఫిబ్రవరి 2021 (UTC)

అర్జున గారు ప్రస్తుతం ఎలాంటి అనువాద ఉపకరణం ఇంటర్న్ షిప్ లో భాగంగా చెప్పటం లేదు tewiki.iiit.ac.in లొ ఈ పరికరాలు ఇంటిగ్రేట్ చెయలేదు . దీనికి రెండు కారణాలు 1) సహజంగా చేసే అనువాదాలను ప్రోత్సహించటం 2) అనువాద కృతక స్థాయిని తగ్గించటం , మేము కొంత మందికి అనువాద ఉపకరణాల గురించి చెప్పాము కానీ దాని ద్వారా చేసిన వ్యాసాల నాణ్యత అనుకున్న స్థాయిలో లేదు, ఇవి వికీపీడియా కీలక వ్యాసాలు (vital articles) మొత్తం 50,000 వరకు ఉన్నాయి అందులో దశల వారీగా వ్యాసముల జాబితా తగిన సూచనల తో ఇక్కడ ప్రచురించాము. ఇవి ఒక స్థాయికి చేరుకున్న తరువాత తెలుగు వికీపీడియా సభ్యుల అనుమతి , సహకారము తో తెలుగు వికీపీడియాలో చేర్చాలన్నది మా ప్రయత్నం Kasyap (చర్చ) 12:08, 25 ఫిబ్రవరి 2021 (UTC)

Kasyap గారు, మీ స్పందనకు ధన్యవాదాలు. మీ పద్ధతి పై నా అభిప్రాయాలు నిర్మొహమాటంగా తెలుపుతున్నాను.

మీ పద్ధతి గతంలో తెలుగు వికీపీడియా, లేక భారతదేశంలో వికీ కృషిని ప్రోత్సహించడానికి జరిగిన కార్యకలాపాలు, ప్రాజెక్టుల బలాలు, బలహీనతలు మదింపు చేసినదాని ఫలితంగా ఏర్పడినట్లుగా లేదు.

అనువాద ఉపకరణం వాడి వికీపీడియన్ల కృషి వేగవంతం అయిందని, వికీపీడియన్ల క్రియాశీలత పెరిగిందని అనువాద ఉపకరణం వివరణలో వుంటే, మీరు సహజంగా చేసే అనువాదాలు వాడడం, సాంకేతికాభివృద్ధికి వ్యతిరేకంగా వుందని నాకు అనిపిస్తున్నది. ఐఐఐటి నడుపుతున్న ప్రాజెక్టులో ఇలా జరగడం నాకు ఆశాభంగం కలిగించింది.

సహజంగా అనువాదాలు చేయటానికి అనువాదంలో డిప్లమా, లేక సర్టిఫికేట్ స్థాయి శిక్షణ గల వారే నాణ్యతగా చేయగలుగుతారు. మీరు అలాంటి స్థాయి శిక్షణ ఏ విధంగా అందిస్తున్నారు? దీనిని ఏ విధంగా వికీపీడియాలో కృషి చేద్దామన్నవారికి విస్తరించగలరు?

వేరే శాండ్ బాక్స్ లో మీరు తర్ఫీదు ఇచ్చి తరువాత తెవికీలో చేర్చటమనేది నా దృష్టిలో తప్పక విఫలమవుతుంది. వికీపనికి పారదర్శకత ముఖ్యం. వేరే శాండ్ బాక్స్ లో పనిచేయటం వలన ఆ పారదర్శకత వుండదు. వికీలో భిన్నాభిప్రాయాలకు గల స్వేచ్ఛతో ఏకాభిప్రాయం సాధించడం కష్టసాధ్యమైనందున మీ కృషి విజయవంతం అవుతుందని నాకు నమ్మకంలేదు.

కొత్త వాడుకరులు, అనువాద ఉపకరణం వాడి వారి వాడుకరి పేరుబరిలో ప్రయోగాత్మక అనువాదాన్ని ముద్రించి, సహసభ్యుల సమీక్షతో అభివృద్ధి చేసి, తరువాత ప్రధాన పేరుబరికి తరలించడం మంచిది. వాడుకరి పేరుబరిలో వ్యాసాన్ని అభివృద్ధి చేయడాన్ని, తెవికీలో ఏ అధికారి, నిర్వాహకుడు, సభ్యుడు వ్యతిరేకించలేరు. ఇలా చేయడంతో అనువాద ఉపకరణం డిబగ్గర్ సహాయంతో అనువాదకుడు ఎలా అనువాదం చేశాడో పేరాల వారీగా గమనించి తగు సూచనలు చేయటానికి ప్రాజెక్టు సభ్యులకే కాక, ఏ వికీపీడియన్ కైనా వీలుంది.

ఇక మీ లక్ష్యాలు, వ్యాసాల ఎంపిక గురించి. మీ లక్ష్యం నిర్ణయించడం కూడా గత 15 ఏళ్ళ తెవికీ చరిత్రను సరిగా అధ్యయనం చేసిన ఆధారంగా జరిగినట్లు లేదు. ఇతర వికీలో ఎక్కువ వ్యాసాలున్నాయి కాబట్టి తెవికీలో ఎక్కువ వ్యాసాలుండాలి అనే ప్రాథమిక అవగాహన తప్ప, వికీపీడియా వ్యాసాలకు వీక్షణలను పరిగణించనట్లు లేదు. ‘గంగిగోవు పాలు గరిటెడైనను చాలు.. కడివెడైననేమి ఖరము పాలు’. అన్న వేమన పద్యం తెలిపినట్లు, రాసి కాదు, వాసి ముఖ్యం. మెటావికీలో ఎవరో ప్రతి వికీలో ఉండవలసిన 50000 వ్యాసాల జాబితా పెట్టారని, అవి అనువాదం చేద్దామనుకోవటం మంచిది కాదు. తెవికీలో వీక్షణల ఆధారంగా తెవికీ ప్రస్తుత పరిస్థితిని మదింపు చెయ్యాలి. ఏ రంగాలలో తెలుగు చదువరులకు ఆసక్తి వున్నదో, వికీపీడియా పై అభిప్రాయ సర్వేలు నిర్వహించి తెలుసుకొని, ఆ ప్రాధాన్యతల ఆధారంగా జాబితా చేయాలి. గతంలో గూగుల్ అనువాద ప్రాజెక్టు ద్వారా భారతదేశంలో ఎక్కువ శోధనలు జరుగుతున్న అంశాల ఆధారంగా వికీపీడియా వ్యాసాలు అనువదించారు. కొత్త అనువాద పరికరానికి సహాయంగా 90 శాతంపైగా మానవీయ అనువాదన చేసినా ఆ వ్యాసాలు తొలగింపుకు గురి అయ్యాయి. ఆ సంస్థలు అనువాదంలో కొంతవరకు అనుభవమున్నవారినే నియమించి వుంటాయి అనుకుంటాను. అటువుంటివే తొలగింపుకు గురైనప్పుడు, అనువాద అనుభవం లేని కొత్త వారితో సహజ అనువాదం చేసే ప్రయత్నాలు విజయవంతం అవుతాయని నేను అనుకోవడంలేదు. ఒక వేళ ఐఐఐటి కొత్త అనువాద యంత్రం చేస్తున్నట్లైతే దానిని కూడా వికీపీడియా అనువాద ఉపకరణంతో జతచేసి, వాడుకరి పేజీలో అనువాదాన్ని ముద్రించడం ద్వారా పరీక్షించుకోవచ్చు, అభివృద్ధి పరచుకోవచ్చు.

నేను పైన తెలిపినవి ఆచరించడం కష్టమనిపిస్తే సులభంగా చేయదగినవి, వీ ప్రాజెక్టు సభ్యులు ప్రతిరోజు తెలుగు దినపత్రిక చదివి, వాటిలో ప్రముఖమైన విషయాలను వికీపీడియా వ్యాసాలుగా ప్రతిపాదించి, చర్చించి వాటిని జట్టు ఆమోదిస్తే, కొత్త వ్యాసంగా, లేక అనువాద వ్యాసంగా అభివృద్ధి చేయటం బాగుంటుంది.

వ్యాసాల ఎంపికలో శాస్త్ర సాంకేతిక వ్యాసాలు ప్రాధాన్యత తగ్గించడం మంచిది. తెలుగు సమాజంలో క్రమేపీ మాధ్యమంగా తెలుగు ప్రాధాన్యత తగ్గుతున్నది. అటువంటప్పుడు మనము ఉన్నత గణితం లేక ఇతర శాస్త్రాలు సంఖ్యాబలాన్ని పెంచడానికి ఉపయోగపడతాయే తప్ప, వాటికి వీక్షకులనుండి ఆదరణ వుండదు. వీక్షకులఆదరణ వుండకపోతే అవి మెరుగుపడవు.

మీ ప్రాజెక్టు కృషిలో ఇప్పటివరకు నాకు ఆసక్తిగా అనిపించిన విషయం గూగుల్ క్లాస్ రూమ్ తో వికీపీడియా పాఠాలు. అవి కోర్స్ఎరా లాంటి ఆన్లైన్ కోర్సుగా అభివృద్ధి చెందితే వికీపీడియన్లకు చాలా ఉపయోగంగా వుంటుంది.

పై అభిప్రాయాలు కటువుగా అనిపిస్తే క్షమించండి. వాటిని పరిశీలించి చర్చించి ప్రాజెక్టును ముందుకుతీసుకెళ్లాలని కోరుకుంటున్నాను. --అర్జున (చర్చ) 23:14, 25 ఫిబ్రవరి 2021 (UTC)

అర్జున గారు మేము అనువాద ఉపకరణాలు ఇంటర్న్ షిప్ వికిశిక్షణలో మాత్రం వాడటం లేదు, ఎందుకంటే వారిలో సహజ సామర్ధ్యానికి మేము ప్రాముఖ్యత ఇచ్చాము, తెలుగు వికీపీడియా భాషా పరమైన సాంకేతిక ఉపకరణాల అభివృద్ధి , సామర్ధ్య పరీక్షలు ఇంటర్నేషనల్ ఇన్స్టిట్యూట్ అఫ్ ఇన్ఫర్మేషన్ టెక్నాలజీ హైదరాబాద్ లొ ఎన్నో జరుగు తున్నాయి, ఇప్పటికే కొన్ని ఉపయోగిస్తున్నాము, ఇండిక్ వికీ ప్రాజెక్టు లో భాగంగా అవగాహన పెంచే కార్యక్రమాలు, బోధన వనరులు , కొత్త వాడు కరుల సంఖ్యను అభివృద్ధి చేయటం, అనువాద పరికరాలు, నిఘంటువులు, భాష అనువర్తనాలు తయారు చేయటం మొదలైనవి ఉన్నాయి, శాస్త్ర , సాంకేతిక అంశాల వ్యాసాలు , ముఖ్యమైన వ్యాసాలు అందరికీ అందుబాటులో ఉండాలి అన్న లక్ష్యం తో పనిచేస్తున్నాం , వీటికోసం WMF సభ్యులు , తోటి వికీపీడియన్ల సూచనలు కూడా తీసుకొంటున్నాము, ఇతర భాషలలో ఉన్న గణాంకాలు , వాటి అభివృద్ధి , అందులో ఉన్న ఇతర భారతీయ భాషల వ్యాసాల నాణ్యత మీద , క్రియాశీల వాడు కరులు వారు, కొత్తగా రాసున్న వ్యాసాల మీద , ఇతర ప్రపంచ భాషలతో పోలిస్తే భారతదేశంలో ఎందుకు తక్కువ వ్యాసాలు ఉన్నాయన్న అంశం మీద , యాంత్రిక అనువాదాల , బాట్ ద్వారా చేరిన వ్యాసాల మీద మీద మాకు కొంచెం అవగాహన ఉన్నది, అంతేకాక స్ట్రాటజీ విషయంలో CIS A2K , ఇలాంటి వాటినుండి నేర్చుకొంటున్నాము కూడా ! , ప్రస్తుతం ఉన్న వికీపీడియా వ్యాసాలకు వీక్షణ ప్రధానంగా కాకుండా ఎలాంటి విషయాలు తెలుగు వారికి అందుబాటులో ఉండాలి అన్న అంశం మీద ప్రధాన మైన దృష్టి పెట్టాము, మా వద్ద నేర్చుకొంటున్న వారికి ఇవి మాత్రమే రాయాలి అని సూచనలు చేయటం లేదు వీలయితే సాండ్ బాక్స్ లో ఇటీవలి వ్యాసముల జాబితా చూడగలరు , ఇందులో కీలక వ్యాసాలు అన్నది ఒక సూచన మాత్రమే , మీరు సూచించిన అంశాలు మా బృందం దృష్టికి తీసుకువస్తాను Kasyap (చర్చ) 09:06, 26 ఫిబ్రవరి 2021 (UTC)

ప్రాజెక్టు పేజీ సవరణలు

వాడుకరి:Kasyap గారు, చొరవతీసుకొని ప్రాజెక్టు పేజీలో కొన్ని సవరణలు చేశాను. వాటిని మరింత మెరుగుచేయడానికి అవసరమనుకుంటే నేను చేసిన సవరణలు రద్దుచేసైనా ప్రయత్నించండి. --అర్జున (చర్చ) 09:43, 24 ఫిబ్రవరి 2021 (UTC)

అనువాదాల విషయంలో ప్రాజెక్టు సభ్యులకు విజ్ఞప్తి

తెవికీ-ఐఐఐటి ప్రాజెక్టు సభ్యులైన Dollyrajupslp Kasyap, Nskjnv.indicwiki, Adithya.indicwiki, Mohanakrishnaindicwiki, Swethaindicwiki, Sujini.indicwiki, Nikhil.indicwiki మరియు ప్రాజెక్టుకు అనుబందాన్ని సూచించే నిర్దిష్టమైన పేరుతో పనిచేయని ఇతర సభ్యులకు విజ్ఞప్తి. మీరు తెలుగు వికీపీడియాలో కృషి చేయటం ద్వారా తెలుగు వికీపీడియా అభివృద్ధికి తోడ్పడుతున్నందులకు ధన్యవాదాలు. ఇప్పటికే మీ ప్రాజెక్టు గురించి పై విభాగంలో కొన్ని వ్యాఖ్యలు చేశాను. అవి మీరు గమనించారనుకుంటాను. మీరు చేస్తున్న కొన్ని రచనలను పరిశీలించిన పిదప, మీ కృషితో తెలుగు వికీపీడియా వేగంగా అభివృద్ధి జరగటానికి కొన్ని సూచనలు చేయదలచుకున్నాను.

1. మీలో చాలామంది శాస్త్ర సాంకేతిక అంశాలపై వ్యాసాలు అనువాదాలు నేరుగానో, లేక మీ వాడుకరిపేజీకి ప్రయోగశాల ఉపపేజీగానో చేయటం గమనించాను. తెవికీలో ఇప్పటికి అనువాద వ్యాసాల గురించిన చర్చలను గమనిస్తే, అనువాద వ్యాసాల కృషిలో చాలాదోషాలకు అవకాశమున్నదని, శాస్త్ర సాంకేతికాంశాల వ్యాసాల అనువాదాలు ఇంకా ఎక్కువ దోషపూరితంగా వుండే అవకాశం ఎక్కువ అని తెలుసుకున్నారనుకుంటాను. కావున తొలి అనువాదాలు సాధారణ అంశాల గురించి చేయడం మంచిది.
2. మీలో చాలా మంది అనువాదం తెవికీలో కాక, ఇతర చోట్ల అనువాద ఉపకరణాలను ఉపయోగించో లేక నేరుగానో చేసి తెవికీలో ప్రధానపేరుబరిలోనో లేకు వాడుకరిపేజీకి ఉపపేజీయైన ప్రయోగశాలపేరుతో ముద్రిస్తున్నారు. ఇది ఆయా వ్యాసాల అభివృద్ధికి, మీరు తెవికీ గురించి మరింతగా నేర్చుకొనటానికి సహకరించదు. మీరు నేరుగా అనువాదం చేస్తుంటే, ఇప్పటికే కొంతమంది వికీ సభ్యులు చేస్తున్నట్లు తొలిగా ఆంగ్ల వ్యాసాన్ని మీ వాడుకరిపేజీకి ఉపపేజీగా వున్న అనువాద వ్యాసపేరుతో నకలు చేయండి. సారాంశంలో ఆంగ్ల వికీ వ్యాస రూపానికి శాశ్వతలింకు తెలపండి. ఆ తరువాత ఒక్కొక్క విభాగం అనువదించండి. అనువదించదలచని భాగాలు తొలగించండి. ఆ ఆనువాద సమీక్షకై మీ ప్రాజెక్టు సభ్యులను, ఇతర వికీపీడియన్లను కోరండి. ఇది {{సహాయం కావాలి}} మూస చర్చాపేజీలో చేర్చడం ద్వారా అందరి దృష్టికి తీసుకొనిపోవచ్చు. సమీక్షలో స్పందనలననుసరించి వ్యాసాన్ని అభివృద్ధి చేయండి. ఆ తరువాత, వ్యాసాన్ని ప్రధాన పేరుబరికి దారిమార్పు లేకుండా తరలించండి.
3. మీ అనువాద కృషి వేగంగాను, అనువాదంలో దోషాలు వికీసాంకేతికాలకు సంబంధించి దోషాలు పెద్దగా లేకుండాలంటే విషయ అనువాద ఉపకరణం వాడి తొలి అనువాద రూపాన్ని వాడుకరిపేజీకి ఉపపేజీగా ముద్రించి, ఆ తదుపరి ఇంతకు ముందు అంశంలో తెలిపినట్లు అభివృద్ధి చేయటం మంచిది. అనువాదంలో యాంత్రిక అనువాదం స్థాయి పై నియంత్రణ ని తొలగించాలని చేసిన ప్రతిపాదనను కొంతమంది వ్యతిరేకిస్తున్నారని, మీరు వెనక్కుదగ్గ నవసరంలేదు. వికీ అంటేనే స్వేచ్ఛగా కృషి చేయగలగటం, సమష్ఠిగా సహకరించి అభివృద్ధి చేయగలగటమని తెలుసుకోండి. ప్రతిపాదనను స్వాగతించినవారు చాలా మంది వున్నారని నియంత్రణా విధానంపై జరిగిన వోటు ప్రక్రియ పరిశీలిస్తే తెలుస్తుంది. ప్రస్తుత నియంత్రణ స్థాయి అధిగమించడానికి చిట్కాతో పాటు, అనువాద వ్యాసాల నాణ్యత మెరుగవటానికి చేసిన సూచనలు గమనించి ఆచరించండి.

మీకేదైనా సందేహాలుంటే, మీ వ్యాసాల సమీక్షలకు సహకారం కావలసి వస్తే, ఆయా వ్యాసాల చర్చాపేజీలో, లేక మీ వాడుకరిపేజీలో, లేక ఈ పేజీలో చర్చలు చేయండి. మీ కృషి మరింత సమర్ధంగా, వేగంగా జరిగి తెవికీ అభివృద్ధికి దోహదపడాలని కోరుతూ.--అర్జున (చర్చ) 06:23, 28 ఫిబ్రవరి 2021 (UTC)

నమస్కారం అర్జున గారు, మీరు అనువాద వ్యాసాల విషయంలో సూచించిన అంశాలు తెలుగు వికీలో మేము మరింత మెరుగైన వ్యాసాలు రాయడానికి సహకరిస్తాయని భావిస్తున్నాను. నేను వికీలో చేస్తున్న వ్యాస కృషికి indicwiki ప్రాజెక్టుకి ఏ సంబంధంలేదు. ఇప్పుడు నేను ఆ ప్రాజెక్టులో సభ్యున్ని కూడా కాదు. నా వాడుకరి పేరు మార్పుకి వికీలో దరఖాస్తు చేసుకున్నాను. నేను రాసే వ్యాసాలకి సంబందించిన విషయాలు నేరుగా నా వాడుకరి పేజీలో రాయగలరు, ధన్యవాదాలు. Nskjnv (చర్చ) 07:22, 28 ఫిబ్రవరి 2021 (UTC)

Nskjnv గారు, మీ స్పందనకు ధన్యవాదాలు.--అర్జున (చర్చ) 11:49, 2 మార్చి 2021 (UTC)

అర్జున గారు ఇప్పుడు Nskjnv.indicwiki,Mohanakrishnaindicwiki,Swethaindicwiki,Sujini.indicwiki, ఇప్పుడు ప్రాజెక్టు సభ్యులు గారు Adithya.indicwiki కొంత విరామం తీ సుకున్నారు , ప్రస్తుతం Nikhil.indicwiki ఒక్కరే ప్రాజెక్టులో కొనసాగుతున్నారు Kasyap (చర్చ) 05:55, 1 మార్చి 2021 (UTC)

Kasyap గారు, మీ స్పందనకు ధన్యవాదాలు.--అర్జున (చర్చ) 11:49, 2 మార్చి 2021 (UTC)

ఐఐఐటి వారి తెవికీ ప్రాజెక్టు - సముదాయ చర్చ

సమావేశానికి సంబంధించిన ప్రాజెక్టు వారి ఎజెండా: రెండు పక్షాల మధ్య చర్చలు జరపడం, వివిధ అంశాల మీద సందేహ నివృత్తి, పరస్పర సహకారాన్ని బలోపేతం చేయడం. మిగిలిన వారు వారి ఎజెండా ఇక్కడ ఇక్కడ చేర్చగలరు. --2021-11-30T14:48:09‎ Kasyap

వ్యాసాలను చేర్చే ప్రతిపాదన

@Po.indicwiki గారు, వందలకొద్దీ వ్యాసాలు చేర్చి, వాటిపై అభిప్రాయాలు చెప్పమనడం ఏమంత ఉపయోగమైన పని కాదు. తెవికీలో బాగా క్రియాశీలంగా వుండేవారు సుమారు 20 మంది మాత్రమే, అందులో చర్చలకు చురుకుగా స్పందించేవారు నలుగురు ఐదుగురు మాత్రమే. కావున మీ నమూనా వ్యాసాలలో ఒక విభాగాన్ని ఎంపిక చేసి, సంబంధించిన వ్యాసాలలో ఐదింటిని పేర్కొని, వాటిని ఎలా తయారు చేశారో, ఏ విధంగా నాణ్యత నియంత్రణ చేశారో వివరించి, తెవికీ లో చేర్చటంవలన ప్రాజెక్టు ఏ విధంగా లాభపడుతుందో వివరించి వాటిపై అభిప్రాయాలను కోరండి. తెవికీలో సభ్యుల క్రియాశీలత, ప్రాధాన్యతలు గురించి వికీపీడియా:2021 సమీక్ష, వికీపీడియా:2022 ప్రాధాన్యతలు చూడండి. అలాగే గతంలో వ్యాసాల సంఖ్యను పెంచాలన్న ప్రయత్నాలపై సంబంధించిన ప్రాజెక్టు కూడా పరిశీలించండి. -- అర్జున (చర్చ) 00:58, 30 మార్చి 2022 (UTC)

ఒక్కో వర్గానికి మేము రూపొందించిన వ్యాసాల సంఖ్య వేలల్లో ఉండడం వల్ల కనీసం మచ్చుకు 50 వ్యాసాలు సముచితంగా ఉంటుందని భావించి నా ప్రయోగశాల లో చేర్చడం జరిగినది. మీ సూచనలు, ఇంకా ఇతర సభ్యుల సూచనలు పరిగణనలోకి తీసుకుని ఈ వారాంతంలో రచ్చబండ లో ఎంపిక చేసిన కొన్ని వ్యాసాలను మాత్రమే ఉదాహరిస్తూ సభ్యుల అభిప్రాయం కోరుతాం--Po.indicwiki (చర్చ) 09:33, 30 మార్చి 2022 (UTC)

నమూనా వ్యాసాలపై పురోగతి లేమి - తదనంతర చర్చ ఫలితాలపై నిర్ణయాలు

ఐఐఐటి ఇండిక్ వికీ ప్రాజెక్టు నమూనా వ్యాసాలు - పరిశీలనకు పేరిట కొన్ని నమూనా వ్యాసాలను వికీపీడియా పేరుబరిలో చేర్చామని, వాటిని పరీశిలించి సూచనలు అందిస్తే మిగిలిన 'వేలాది' వ్యాసాలను ఆ ప్రకారం సవరించి అందుబాటులోకి తెస్తామని ఐఐఐటీ హైదరాబాద్ వారు ప్రకటించిన వెంటనే తెలుగు వికీపీడియన్ చదువరి గారు స్పందించి 24 గంటలలోగా ఒక చెక్ లిస్టు వారికి ఇచ్చి ఒక విధానాన్ని ప్రతిపాదించారు. కొన్నిరోజులు వేచిచూసి ఆ చెక్ లిస్టు ఉపయోగించి తమ వ్యాసాలను పరిశీలించుకొమ్మని, ఆపైన తెవికీలో ప్రచురిస్తే తాము తదుపరి పరిశీలన చేయగలమని ఒక పద్ధతి చేశారు. ఏడు నెలలు గడిచినా ఐఐఐటీ హైదరాబాద్ వారి ఇండిక్ వికీ ప్రాజెక్టు నుంచి ఎవ్వరూ ఈ విషయం మీద కనీసం అక్నాలెడ్జ్‌మెంట్ కూడా లేకుండా వదిలివేయడంతో నేను "ఐఐఐటీ వారి నమూనా వ్యాసాలకు తెవికీ ఇచ్చిన సూచనలపై పురోగతి ఏమిటి?" అని వారిని ప్రశ్నిస్తూ రచ్చబండలో చర్చ లేవదీశాను.

చర్చ ఫలితం

దానిపై ఐఐఐటీ హైదరాబాద్ వారి ప్రాజెక్టు కో-ఆర్డినేటర్ అయిన @Kasyap గారు ప్రతిస్పందించారు, దానిపై @Chaduvari, @యర్రా రామారావు గార్లు చర్చ చేశారు. కశ్యప్ గారు చెప్పినదానికి సారాంశం ఇదీ:

• "ప్రస్తుతానికి మరికొన్ని వర్గాల నమూనా వ్యాసాలు చేర్చే పక్రియ వాయిదా వేసుకొన్నాం" అనీ, "ఐఐఐటీ తెవికీ సాండ్ బాక్సు లో మేము తయారు చేసిన సుమారు పది లక్షల వ్యాసాలకు వికీ డేటా, ఇంటర్ వికీలింకుల వంటివి చేర్చటానికి పరిశోధనలు జరుగుతున్నాయి" అనీ, "తగు సమయం అవసరం కాబట్టి తదనుగుణంగా కార్యాచరణ ప్రకటిస్తామనీ" తేల్చారు. "మా సౌండ్ బాక్స్ లో ఉన్న వనరులను ఏ వికీపీడియన్ అయినా స్వేచ్చగా తీసుకుని అభివృద్ధి చేసి తెలుగు వికీలో చేర్చవచ్చు" అని మాత్రం సూచించారు.
• "వివిధ దశలలో ఉన్న 10 లక్షల వ్యాసాలను తెవికీ సాండ్ బాక్సు లో చూడవచ్చు" అని కూడా సూచించారు. అంటే పదిలక్షల పైచిలుకు "వ్యాసాలు" తమ వెబ్‌సైట్‌లో ఉన్నాయని వారు చెప్తున్న సంగతి. అవి ఏ దశలో అయినా ఉండవచ్చని కూడా వారు సూచిస్తున్నారు. దాదాపుగా ఇంక ఈ వ్యాసాలను చెక్‌లిస్టు ఆధారితంగా మెరుగుపరిచి మనకు చూపించడం కానీ, వీటిని తెలుగు వికీపీడియాలోకి చేర్చడం కానీ ఎప్పుడు జరుగుతుందో ఆయన ఇప్పుడే చెప్పలేరు. ఎప్పుడు చెప్పగలరో కూడా చెప్పడం కష్టం.
• ఇక తెలుగు వికీపీడియన్లకు ధన్యవాదాలు చెప్పారు, ఈ అంశాలపై "అనుభవం నిధులు ఇస్తున్న ప్రభుత్వం వారికి" తెలియజేస్తున్నామన్నారు.

నిర్ణయం

దీనిని కొంచెం విశ్లేషిస్తే మనకు అర్థమయ్యే విషయాలు ఏమంటే:

10 లక్షల పైచిలుకు వ్యాసాలు వారి సాండ్ బాక్సులో ఉన్నాయి. ఇవి వివిధ దశల్లో ఉన్నాయని చెప్తున్నారు. ఆ దశలేమిటో ఎన్నెన్ని వ్యాసాలు ఏయే దశలో ఉన్నాయో మనకు చెప్పలేదు. చెప్తారని కూడా మనం వేచి ఉండడం అనవసరం అని తేలుతోంది. ఇక వాళ్ళు ఇప్పుడప్పుడే నమూనా వ్యాసాలు చేర్చడం కూడా చేయరని, ఇక దానిపై ఎప్పుడు పనిచేస్తారో చెప్పలేరని కూడా తేలుతోంది. స్థూలంగా చూస్తే - కశ్యప్ గారు చెప్పేదాని ప్రకారం ఓ పదిలక్షల పైచిలుకు వ్యాసాలున్నాయి. అవి ఏ స్థితిలో ఉన్నాయో తెలియదు. కానీ, ఇవి పనికొచ్చేవే అయితే మనకు చాలా లాభం. ఐఐఐటీ హైదరాబాద్ వాళ్ళ స్పందనలు, పద్ధతులు మనకు నచ్చనంతమాత్రాన వ్యాసాలు బావుంటే తీసుకోబోమని ఏమీ లేదు కదా. కాబట్టి:

• ముందుగా ఇవి ఏమేరకు పనికొచ్చే వ్యాసాలో మనం తేల్చుకోవాలి. అందుకోసం మనం శాంపిల్ సర్వే చేయాలి. ఇలా చేయడానికి మనకు వాలంటీర్లు కావాలి, శాంపిల్ సర్వే కోసం ఒక విధానం కూడా కావాలి.
• దాని ఆధారంగా ఇవి పనికివచ్చే వ్యాసాలే అయితే ఏ విధంగా తెలుగు వికీపీడియాలోకి తీసుకురావాలన్నదానిపైనా, మనం ఎలా పనిచేయాలన్నదానిపైనా ఒక ప్రణాళిక ఏర్పాటుచేసుకోవాలి. ఒకవేళ వీటిపై పనిచేయడం అసాధ్యమైనా, చాలా లోతైన సమస్యలు ఉన్నా, ఇంకేమైనా కూడా ఒక సమగ్రమైన రిపోర్టు మనం తెలుగు వికీపీడియా కోసం తయారుచేసుకోవాలి.

ఇదీ నేను ప్రారంభించిన చర్చ ఆధారంగా వచ్చిన నిర్ణయం. దీనిపై తెలుగు వికీపీడియా స్వచ్ఛంద సభ్యులు తమ తమ అభిప్రాయాలు తెలియజేయగలరు. అలానే ఎవరెవరు పనిచేయడానికి ముందుకు వస్తారో కూడా తెలియజేయగలరు. పవన్ సంతోష్ (చర్చ) 15:23, 20 నవంబరు 2022 (UTC)

చర్చలో పాల్గొన్న అందరికీ ధన్యవాదములు,ప్రణాళికలకు సంబంధించి ఏదైనా ఇతర సమాచారం, ప్రాజెక్టు పేజీలో చేరుస్తాం, ఒక అభ్యర్ధన ఇప్పటి వరకు సూచించిన అంశాలతో పాటు దయచేసి సభ్యులు మీ వీలును బట్టీ పేర్కొన్న నమూనా వ్యాసాలలో నేరుగా సవరణలు చేయగలరు, మీ తోర్పాటు వలన డొమైన్ ల వారీగా స్పష్టమైన సవరణలకు వీలవుతుంది. ఇంకో విన్నపం నేను ప్రాజెక్టు కో-ఆర్డినేటర్ కాదు,సలహాదారుడిని (consultant). సముదాయ అనుసంధాన కర్త,ప్రొగ్రాం ఆఫీసర్ ప్రస్తుతం లేరు కాబట్టి నేను స్పందిస్తున్నాను.

--Kasyap (చర్చ) 16:55, 20 నవంబరు 2022 (UTC)

చర్చలో చదువరి అభిప్రాయాలు

రచ్చబండలో @Pavan santhosh.s గారు చర్చ మొదలుపెట్టిన తరువాత అక్కడ జరిగిన చర్చ, ఆ తరువాత ఇక్కడ జరిగిన చర్చ కూడా చూసాను. ఊరికే చర్చ జరపడం కాకుండా పవన్ గారు, @Kasyap గారు సూచించినట్టు ఐఐఐటి సర్వరు లోని పది లక్షల వ్యాసాల నాణ్యత స్థూలంగా ఎలా ఉందో కూడా చూడాలని నేను సంకల్పించాను.

ముందుగా ఇప్పటి వరకు జరిగిన చర్చను బట్టి, అసలు ఈ ప్రాజెక్టు పని జరుగుతోందా లేదా అనే విషయమై నాకు సందేహం కలుగుతోంది. ఎందుకంటే -

• పరిశీలన కోసం వ్యాసాలను 2022 ఏప్రిల్ 4 న పెట్టారు. అంటే ఇప్పటికి 7 నెలల పైన 16 రోజులు గడచిపోయాయి.
• ఆ వెంటనే, ఆ వ్యాసాల్లో దోషాలున్నాయి, సరిచెయ్యాలి అని చెబుతూ ఈ చెక్‌లిస్టు ప్రకారం సవరించండి అని నేను 2022 ఏప్రిల్ 5 న ఒక చెక్‌లిస్టు రూపొందించి ఇచ్చాను. అది జరిగి 7 నెలల 15 రోజులైంది.
• ఇప్పటి వరకు ఆ వ్యాసాల్లో ఒక్క అక్షరం ముక్క కూడా మార్చలేదు. ఒక్క వాడుకరి కూడా వాటిపై పనిచెయ్యలేదు. అంతేకాదు..
• ఆ వ్యాసాలను చేర్చిన Po.indicwiki అనే వాడుకరి ఇక ఆ రోజు తరువాత తెవికీలో దిద్దుబాట్లు చెయ్యలేదు.
• అంతేకాదు, అంతకు ముందు చురుగ్గా ఉన్న Newwikiwave అనే మరొక వాడుకరి కూడా ప్రస్తుతం చురుగ్గా లేరు.
• చెక్‌లిస్టు ఇచ్చాక ఆర్నెల్లు గడిచాక ఇప్పటి పరిస్థితి ఏంటయ్యా అంటే - ఎక్కడ వేసిన గొంగళి అక్కడే ఉంది.
• "వికీ శిక్షణ ద్వారా నేర్చుకొన్నవారితో స్వచ్చందంగా ఈ అనువాద యంత్రాల వ్యాసాలు సరిదిద్దమన్న విజ్ఞప్తితో ఆశించిన ఫలితాలు రాలేదు" అని కశ్యప్ గారు చెప్పారు
• "సముదాయ అనుసంధాన కర్త,ప్రొగ్రాం ఆఫీసర్ ప్రస్తుతం లేరు " అని చెబుతున్నారు. సంధానకర్త బహుశా Po.indicwiki అయి ఉంటారు. ఆ వాడుకరి ఆర్నెల్ల నుండి లేరు. కొత్త సంధాన కర్త ఎప్పుడొస్తారో ఇక్కడ చెప్పలేదు.

50 వ్యాసాల్లో రాసిన తప్పులనే, ఆర్నెల్లైనా సరిదిద్దుకోలేని ప్రాజెక్టు, 10 లక్షల వ్యాసాలను ఎలా నిర్వహిస్తోందో చూద్దామని అనుకున్నాను. ఈలోగా కశ్యప్ గారు జిల్లాల ప్రాజెక్టు కోసం మా ప్రాజెక్టు లోని పేజీలను వాడుకోండి అని రచ్చబండలో సలహా ఇచ్చారు. బాగుంది గదా అని ఆ పేజీలను వాడుకోవాలని చూసాను. కానీ ఆ పేజీలు మక్కికి మక్కి తెవికీ పేజీలను కాపీకొట్టి తయారుచేసారని, కొత్తగా సమాచారం ఏమీ చేర్చలేదనీ అర్థమైంది. దాని సంగతి రచ్చబండలో రాసాను కాబట్టి ఇక్కడ మళ్ళీ రాయను.

ఐఐఐటి వారి సైటుకు సంబంధించిన స్థూల గణాంకాలు ఇలా ఉన్నాయి. వీటిని వారి సైటుకే చెందిన ప్రత్యేక పేజీల నుండి తీసుకున్నాను.

• ఈ పది లక్షల వ్యాసాల్లో నాకు కనిపించిన వ్యాసాలు 8,22,553 వ్యాసాలే. మిగతావి ఎక్కడున్నాయో తెలియదు.
• ఈ పది లక్షల లేదా 8.22 లక్షల వ్యాసాల్లో 5 లక్షల 50 వేల పైచిలుకు వ్యాసాలు భారతదేశం లోని వివిధ రాష్ట్రాల్లోని గ్రామాల పేజీలే. ఒక్క ఉత్తర ప్రదేశ్ గ్రామాల పేజీలే 96,794 ఉన్నాయి. మధ్య ప్రదేశ్ గ్రామాలు 44,793, ఒడిశా గ్రామాలు 44,648, కర్ణాటక గ్రామాలు 21,591, రాజస్థాన్ 39,264, జార్ఖండ్ 26,349, పశ్చిమ బెంగాల్ 26,988, మహారాష్ట్ర 32,137, ఉత్తరాఖండ్ 15,296, అరుణాచల్ ప్రదేశ్ 5,421, బీహార్ 36,804, గుజరాత్ 17,106, అస్సాం 24,342, ఛత్తీస్‌గఢ్ 15,580, తమిళనాడు 15,280, మణిపూర్ 2,541, పంజాబ్ 11,731, హిమాచల్ ప్రదేశ్ 17,679, హర్యానా 6,633, మేఘాలయ 6,502, జమ్మూకాశ్మీర్ 6,427 పేజీలు ఉన్నాయి. ఇక ఆంధ్ర తెలంగాణ గ్రామాలు 27 వేల దాకా ఉంటై. మిగతా రాష్ట్రాల గ్రామాలు, పట్టణాల పేజీలను కూడా కలుపుకుంటే ఈ పేజీల సంఖ్య 6 లక్షలకు చేరుతుంది. అంటే దాదాపు 70% రెండు రాష్ట్రాలకు బయట ఉన్న గ్రామాల పేజీలే.
• మొత్తం పది లక్షల/8.22 లక్షల పేజీల్లో ఒకే ఒక్క కూర్పు కలిగిన వ్యాసాలు 5 లక్షల 43 వేల 121 ఉన్నాయి. అంటే యాంత్రిక అనువాదాన్ని ప్రచురించేసాక, ఇక ఆ పేజీలో మానవికంగా దిద్దుబాట్లు చెయ్యలేదన్నమాట. ఇది 66%
• 2 కూర్పులు కలిగిన వ్యాసాలు 1,36,787 (16.7%). మూడు, అంతకంటే ఎక్కువ కూర్పులు కలిగినవి 1,42,645 పేజీలు (17.3%) ఉన్నాయి.
• 1 కంటే ఎక్కువ కూర్పులున్న వ్యాసాల్లో మానవికంగా దిద్దుబాట్లు చేసి పాఠ్యాన్ని సవరించారు కాబోలు అని పొరపడకూడదు. వీటిలో అత్యధికం మళ్ళీమళ్ళీ దిగుమతి చేసుకున్నవే. ఎన్నిసార్లు దిగుమతి చేసుకుంటే అన్ని కూర్పులౌతాయి. ఉదాహరణకు పి వి సింధు వ్యాసంలో 8 కూర్పులున్నాయి. అవన్నీ కూడా దిగుమతులే. 2019 నుండి ఆ వ్యాసాన్ని 8 సార్లు దిగుమతి చేసారు. ఇలాంటివి నేను ర్యాండమ్‌గా ఒక 40 వ్యాసాల చరిత్రలు చూస్తే, అన్నీ ఇలాంటివే కనిపించాయి.
• మొత్తం వ్యాసాల్లో 6 లక్షల 10 వేల పైచిలుకు వ్యాసాలు అనాథ వ్యాసాలే - 74%. అంటే ఈ వ్యాసాలకు ఒక్కటి కూడా ఇన్‌కమింగు లింకు లేదు.
• కారు మోడళ్ళపై వ్యాసాలు 30,191 ఉన్నాయి.
• భారతదేశం లోని పాఠశాలలు 35,169 - పాఠశాలల డైరెక్టరీని తీసుకుని పేజీలు సృష్టించారు. బహుశా అన్నీ ప్రభుత్వ పాఠశాలలే. దాదాపు 99% తెలుగు రాష్ట్రాల్లోనివే.
• కథలు అనే వర్గంలో 15,378 వ్యాసాలున్నాయి. దాదాపుగా అవన్నీ రచయితల పేజీలే. నేను ఒక 50 దాకా పేజీలను చూసాను. అవన్నీ - అన్నీ కూడా - ఖాళీ పేజీలే. కథానిలయం సైటు నుండి తీసుకున్న రచనల జాబితాను కొన్ని పేజీల్లో పెట్టారు. ఒక్ఖ పేజీలో కూడా ఆ రచయిత గురించిన సమాచారం లేదు. ప్రముఖ రచయిత పేజీల్లోనూ అంతే!
• తెవికీ వార్తాపత్రికలు అనే వర్గంలో 14,060 పేజీలున్నాయి. "ఆంధ్ర" తో, "తెలుగు" తో పత్రికలేమీ కనబడలేదు. బహుశా తెలుగు పత్రికల పేజీలు లేవనుకుంటాను. ఉన్న పేజీల్లో నేను చూసిన పేజీలు దాదాపు 20. అవన్నీ మొలకలే.
• కొన్ని ఇతర పేరుబరులకు చెందిన (ఉదాహరణకు మూస) పేజీలను కూడా ప్రధాన బరి లోకి దిగుమతి చేసుకున్నారు. వాటి సంఖ్య ఎంతో తెలీదు గానీ ఈ 8 లక్షల వ్యాసాల్లో అవి కూడా కలిసి ఉన్నాయి.

వివిధ పేజీల్లో నేను చూసిన ఇతర వివరాలను, వాటి నాణ్యత గురించి తరువాత రాస్తాను.__చదువరి (చర్చ • రచనలు) 11:22, 21 నవంబరు 2022 (UTC)

మరొక్క విషయం - ఈ పేజీల్లో 35,000 పైచిలుకు దారిమార్పు పేజీలు కూడా ఉన్నాయి. అవి ఈ 8.22 లక్ష పేజీల్లో భాగమేనని అనుకుంటున్నాను. __ చదువరి (చర్చ • రచనలు) 00:33, 22 నవంబరు 2022 (UTC)

పరిశీలన వివరాలు

స్థూల పరిశీలన పూర్తయ్యాక, కొన్ని వర్గాలను తీసుకుని వాటిలోని పేజీలను సర్వే చేయదలచాను. తద్వారా ఆయా వర్గాల్లోని పేజీల నాణ్యతను కొంతవరకు అంచనా వేసుకోవచ్చు. అంటే కొన్ని గ్రామాల పేజీలను చూస్తే, 6 లక్షల గ్రామాల పేజీల నాణ్యతను అంచనా వేయవచ్చు.

ఐఐఐటీ వారి సర్వరు లోనీ 10/8.22 లక్షల పేజీలన్నిటినీ కూడా కింది వాటిలో ఏదో ఒక పద్ధతిలో తయారైనవే. వాటి లోని భాషను బట్టి, వాటి ఆకృతిని బట్టి, ఉదహరించిన మూలాలను బట్టీ చూస్తే తెలుస్తుంది.

• ఇంగ్లీషు వికీ లేదా వేరే ఇతర భాష వికీ నుండి యాంత్రిక అనువాదం
• వివిధ డేటాబేసుల నుండి డేటాను తీసుకుని, సాఫ్టువేరు ద్వారా ఆ దేటా నుండి వాక్యాలను తయారుచేసుకుని పేజీలను సృష్టించినవి. తెవికీ లోని గ్రామాల వ్యాసాల్లో చేర్చిన జనగణన డేటా ఆ విధంగా సృష్టించినదే. ఈ పని తెవికీ, రెండు తెలిఉగు రాష్ట్రాల గ్రామాల పేజీల కోసం 2016 లో చేసింది.
• తెవికీ నుండి నేరుగా దిగుమతి చేసుకోవడం
• నాలుగోది, నాకు స్పష్టంగా తెలీనిది - వికీమీడియా సైట్ల నుండీ కాకుండా (ఎన్వికీ వగైరా) బయటి సైట్ల పేజీలను యాంత్రికానువాదం చేసినవి. ఇది స్పష్టంగా తెలీదు గానీ నాకు ఆ సందేహం కలిగింది.

గ్రామాలు, ఇతర జనావాసాల పేజీలను చూసాను. ఈ పేజీలు సుమారు 6 లక్షలుంటాయి. ఇవన్నీ తెవికీలో పెట్టడం సముచితమా అనేది ఆలోచించాలి. ఎక్కడో మేఘాలయ రాష్ట్రంలో, మారుమూల, 50 మంది జనాభా ఉన్న గ్రామం గురించి తెలుగు వికీలో వ్యాసానికి ఎంత ప్రయోజనం ఉంటుంది? ఆసియా లోకెల్లా అత్యంత పరిశుభ్రమైన మావ్లిన్నాంగ్ అనే ఊరి గురించో చిర్రపుంజి గురించో రాయొచ్చు. అంతేగానీ ఇలా లక్షలాది గ్రామాలకు పేజీలు అవసరమా? పేజీలను సృష్టించడం, సంఖ్య కోసం బానే ఉంటది. వికీలో వ్యాసాల సంఖ్య పెరగడం మంచిదే.. కానీ డేటా దొరికింది గదా అని ప్రతి మారుమూల గ్రామానికి, ప్రతి ఔషధ మాలిక్యూలుకూ, ప్రతి కారు మోడలు వేరియంటుకూ ఒక పేఝీ పెడితే తయారైనవే ఈ పేజీలు. ఎంతలా అంటే పోర్ష్ సంస్థ తయారుచేసిన అన్నిరకాల కార్లకు ఎన్వికీలో 104 పేజీలుంటే (ఎన్వికీలో మొత్తం పేజీలు 65 లక్షలు), వీళ్ళు 521 పేజీలు తయారుచేసారు. వీటి వలన పేజీల సంఖ్య పెరుగుతుంది. ఇక్కడ సమస్య విషయ ప్రాముఖ్యత లేకపోవడం మాత్రమే కాదు, వీటి వలన తెవికీకి విలువ చేకూరుతుందా అనేది ప్రశ్న. భాషా దోషాలు, ఇతర దోషాలను సవరించిన తరువాతనైనా వీటిని తెవికీలో చేర్చవచ్చునా లేదా అనేది, వాడుకరులందరి అభిప్రాయాలను తీసుకుని సముదాయం నిర్ణయించాలి.

ఈ వ్యాసాల్లోని లోపాలు వాటికి చెయ్యాల్సిన సవరణలు ఏంటంటే:

1. భాష: భాష కృతకంగా ఉండడం ఈ పేజీలలో సాధారణంగా ఉన్న లోపం. వ్యాకరణ యుక్తంగా ఉండకపోవడం/అసహజమైన వాక్యాలతో ఉండడం/అర్థం తెలీకుండా అయోమయంగా ఉండడం/కర్మణి వాక్యాల అనుచిత ప్రయోగం - ఇలాంటి అనేక దోషాలుంటాయి.
   • ఉదాహరణకు, బోకే వీవర్ అనే వ్యాసంలో ప్రవేశికలో ఉన్న వాక్యాలు చూడండి: "ఈ జాతులు ఇంతకు ముందు కేప్ వీవర్ (పి. కాపెన్సిస్) తో నిర్దిష్టంగా భావించబడ్డాయి,ప్లోసియస్ టెంపోరాలిస్ (బోకేజ్ వీవర్) అనేది వీవర్స్ & మితృల కుటుంబంలోని పక్షుల ప్రజాతిలో చేర్చబడింది. ఐ.యు.సి.ఎన్. ఈ జాతులను అంతరించిపోనట్లుగా వర్గీకరించింది. ఈ ఉపజాతులు ఏవీ జాబితా చేయబడలేదు. జాతుల జనాభా అభివృద్ధి స్థిరంగా ఇంకా శక్తివంతమైనదిగా వర్గీకరించబడింది.పక్షికి లాటిన్ పేరు(పాత) హైఫాంటోర్నిస్ టెంపోరాలిస్."
2. ఈ వ్యాసాల్లో వాడిన పేర్లు: ఇంగ్లీషు తదితర లిపుల్లో ఉన్న పేర్లను తెలుగు లోకి లిప్యంతరీకరణ చెయ్యడంలో చాలా లోపాలు కనిపించాయి. అన్నిటి కంటే ఘోరం, కొన్ని పేర్లను తెలుగు లోకి "అనువదించడం". సోహే అనే గ్రామాన్ని "అనువదించి" ఆ పేజీకి "అందువల్ల అతను" అని పేరు పెట్టడం ఒక ఉదాహరణ.
3. మొలక స్థాయి: చాలా వ్యాసాలు మొలక స్థాయి లోనే ఉన్నాయి.
4. సమాచార దోషాలు: చాలా పేజీల్లో సమాచారంలో కూడా దోషాలున్నాయి. వాటిని సవరించాలి.
5. వికీ పేజీలకు (వెబ్ పేజీలన్నిటికీ కూడా) ప్రాణాధారం లాంటి అంతర్గత లింకులు చాలా వ్యాసాలకు లేవు. దాదాపు 70% పేజీలు అనాథలే.

వివిధ రకాల పేజీల్లోని లోటుపాట్లు

కొన్ని పేజీల పేర్లు చూస్తే తెవికీ లోని మూసల పేర్ల లాగా అనిపించాయి.

• Icon
• If all
• If both
• If empty
• Location map
• Italic title
• MedalCount
• Medal

తెవికీ నుండో ఎన్వికీ నుండో మూసలను దిగుమతి చేసుకునేటపుడు వాటిని సరైన పేరుబరి లోకి దిగుమతి చేసుకోకుండా ప్రధానబరి లోకి దింపేసుకున్నట్టున్నారు. ఆ 8.22/పది లక్షల వ్యాసాల్లో ఈ మూసలు కూడా భాగం. అయితే అవి ఎన్నున్నాయో తెలియదు.

• ఔషధాలకు పేజీలు సృష్టించారు. వాటిలో మచ్చుకు కొన్ని చూసాను. వాటి పరిస్థితి ఇది:
  • L-హిస్టిడినోల్ ఫాస్ఫేట్
  • 1,4-బ్యూటానెడియోల్
  • [1]
  • [2]
  • [3]
  • [4]
  • NF-కప్పా బి డికోయ్-

పై ఔషధాల పేజీలన్నిటిలోనూ సమాచార పెట్టె, మూస తప్ప ఏమీ లేవు. అసలు ఈ వ్యాస విషయం దేనికి సంబంధించినది అని చెప్పేంత సమాచారం కూడా ఈ పేజీల్లో లేదు. మూలాల్లేవు - drugbank.com అనే సైటు నుండి డేటా తెచ్చి ఈ పేజీలను తయారుచేసారు. మొలక స్థాయిలో కూడా లేని వ్యాసాలివి. అసలివి విజ్ఞానసర్వస్వ వ్యాసాల్లాగా లేవు, క్విక్ రిఫరెన్సు గైడు లాగా, అది కూడా అరకొర సమాచారమిచ్చే గైడు లాగా ఉన్నాయి.

• ఇక, గ్రామాల పేజీల్లో సాధారణంగా కనిపించే దోషాలు - భౌగోళిక నిర్దేశాంకాలు తప్పుగా చూపించడం, దగ్గర లోని పట్టణం అని చెబుతూ ఎక్కడో వందల కిలోమీటర్ల దూరాన ఉన్న పట్టణాన్ని చూపించడం కొన్ని సందర్భాల్లో సుదూరంలో ఉన్న వేరే రాష్ట్రం లోని పట్టణాన్ని చూపించడం, లేదా పట్టణం పేరును తప్పుగా చూపించడం, లేదా సందిగ్ధంగా చూపించడం వంటివి.
  • అంకాపూర్ తెవికీ లోని వ్యాసానికి ఇది కాపీ పేస్టు
  • అంకా, నైజీరియా - ఖాళీ విభాగాలతో కూడుకుని ఉన్న ఈ వ్యాసం ఒక మొలక. ఇచ్చిన జనాభా సమాచారం తప్పు.
  • కంకర ఒకే ఒక్క వాక్యం, 7 ఖాళీ విభాగాలు
  • మధ్య ప్రదేశ్ లోని అంక్య కలాన్ కు దగ్గర్లోని పట్టణం తమిళనాడు లోని "అరియలూర్" అట. దాని పక్కనే ఉండే అంక్య కుర్ద్ కు దగ్గర్లోని పట్టణం <NA> అట!
  • అలాగే అంకోయ్ కు దగ్గర లోని పట్టణం బర్పాలి అని రాసారు. మ్యాపులో అది 350 కి.మీ. దూరంలో ఉంది. ఒకవేళ అదే పేరుతో వేరే పట్టణం దగ్గర్లో మరేదైనా ఉంటే దాన్ని వివరంగా సూచించాలి, అలా చెయ్యలేదు.
  • కర్ణాటక లోని అంకోనహళ్లి కి దగ్గర్లోని పట్టణం "డాడి బల్లాపూర్" అట. మ్యాపులో దొడ్డ బళ్ళాపుర అనే ఊరిని చూపిస్తోందే తప్ప డాడీ.. అనే ఊరిని చూపించలేదు.
  • అంగడి రాయిచూరు అనే గ్రామం గురించిన పేజీ ఇది. తెవికీలో అదే పేజీ ఇది. భాష కృతకంగా ఉండడం, డేటాను ఉన్నదున్నట్టుగా ప్రచురించడం వంటివి అలా ఉంచితే, దీనికి ఇచ్చిన భౌగోళిక నిర్దేశాంకాల ప్రకారం ఈ గ్రామాన్ని అసలు స్థలానికి 75 కిలోమీటర్ల దూరంలో చూపించారు.
  • కర్ణాటక లోని అంకుసదొడ్డి గ్రామానికి దగ్గర్లోని పట్టణం వెయ్యి కిలోమీటర్ల దూరం లోని "దౌండి లోహరా" పట్టణం అని రాసారు!
  • సిరిసిల్ల మండలం లోని అంకుసాపూర్ అనే గ్రామానికి మొలక పేజీ ఉంది. దాని తెవికీ పేజీని తొలగింపు కోసం ప్రతిపాదించిన సందర్భంలో దాన్ని కాపీ చేసి తమ సర్వరులో పెట్టుకున్నారు. (తదనంతర కాలంలో తెవికీలో ఆ పేజీని తొలగించారు).
  • కర్ణాటక లోని అంగజనహళ్ళి అనే గ్రామం "రమణగారు" అనే జిల్లాలో ఉందట. "అంగజనహళ్లి గ్రామానికి అతి దగ్గరగా ఉన్న పట్టణం, <NA>. ఇది గ్రామానికి 15.0 kilometres (9.32 mi) లో ఉన్నది." అని రాసారు.
  • ఇంకా ఘోరం ఏంటంటే జార్ఖండ్ రాష్ట్రంలో అందువల్ల అతను అనే ఊరు ఉందట! సోహే (Sohe) అనే ఊరు పేరుకు వాళ్ళు పెట్టిన పేజీ ఇది. ఊరి పేరును కూడా అనువదించి పారేసారు. ఈ పది లక్షల పేజీల్లోను అత్యధిక సంఖ్యలో ఉన్న గ్రామాల పేజీలకు మచ్చులివి. మెరుగైన యాంత్రికానువాదం అని చెప్పారు మనకు, చాలా ఘోరమైన యాంత్రికానువాదం ఇది.
• ఇక వ్యక్తుల పేజీలు చూస్తే
  • అ వెంకటరమణయ్య విషయ ప్రాముఖ్యత సంగతి తరవాత, కనీసం ఈ వ్యక్తి ఎవరో కూడా వివరం లేదు, వ్యాసంలో. ఈ వ్యాసాన్ని విస్తరిద్దామని ఎవరైనా భావించినా, అది ఎవరి గురించో కూడా తెలీని పరిస్థితి.
  • అంగే మెర్సీ జీన్ బాప్టిస్ట్ రెండే రెండు వాక్యాలున్న మొలక.
  • అండర్సన్ డేవిడ్ రోజాస్ మినా ఇదీ పై వ్యాసం లాగానే.
  • అంగేరి బాలసుబ్రహ్మణ్యం - ఒకే వాక్యం, 5 ఖాళీ విభాగాలున్న మొలక
  • Ramu ఉన్న కాస్త సమాచారం అంతా ఇంగ్లీషు లోనే ఉంది.
  • అందె నరసింహారావు ఒక వాక్యం, ఐదారు ఖాళీ విభాగాలు
  • అంజలి (నటి) సమాచారం ఉంది, కానీ మొత్తం అంతా తెవికీ నుండీ కాపీ పేస్టు
• రాగాల పేజీలు - వీటి ప్రవేశిక సరిగ్గా లేదు. అసలు పేజీ పేరు ప్రసక్తే వ్యాసంలో ఎక్కడా రాలేదు.
  • అరకులోయ రాగం, ఓఎస్డీ రాగం, అట్లిటపూడి రాగము, అడివాసు రాగము, ఇషవరసిద్ధి రాగము - ఇవన్నీ రాగాల పేర్లేనా? అనే సందేహం కలుగుతోంది. వ్యాసం చదివితే అందులో ఎక్కడా ఆ పేరు ప్రసక్తే లేదు.
  • పేజీల్లో ఇచ్చిన ఆరోహణ అవరోహణలు స రి గ మ ప ద ని ల్లో ఉండాల్సింది, ఇంగ్లీషులో ఇచ్చారు.
  • "లాంగి జన్యము" వంటి పద ప్రయోగాలున్నాయి. బహుశా ఏ రాగం నుండి పుట్టిందో చెప్పే సమాచారం అనుకుంటాను. దాన్ని వివరంగా రాయాలి.
• కార్ల మోడళ్ళ పేజీలను చూస్తే- ప్రతీ మోడలు వేరియంటుకూ పేజీ పెట్టారు. ఈ పేజీల్లో ఉన్న సమాచారంలో 1-2 శాతానికి మించి తేడాలుండవు. ఉదా: [5], [6], [7]
  • పేజీలో సగానికి పైగా - అవసరం లేని చోట కూడా - ఇంగ్లీషు పదాలే.
  • సమాచారంలో తప్పులు ఉన్నాయి.
    • టార్కును, అశ్వసామర్థ్యాన్నీ (హార్స్ పవర్) ఆర్.పి.ఎం లలో చూపించారు!
    • కారు తయారీదారు ఇచ్చిన డేటా పాయింట్ల ఆధారంగా తయారైన ఈ వ్యాసాల్లో డేటా లేని అంశాల వద్ద TBD (టు బి డిక్లేర్‌డ్ అని అర్థమేమో తెలీదు) అని రాసారు. ఉదాహరణకు - "ఈ కారు ఫ్రంట్ బ్రేక్ వ్యాసము(Diameter) 11.97 అంగుళాలు ఉండగా, మందం -TBD- అంగుళాలు ఉంది. ఈ కారు రియర్ బ్రేక్ వ్యాసము(Diameter) 11.77 అంగుళాలు ఉండగా, మందం -TBD- అంగుళాలు ఉంది."
    • "కారు కర్బ్-టు-కర్బ్ వ్యాసం(Diameter) 38.5 ఫీట్. అని రాసారు ఆ "వ్యాసం" దేనిదో అర్థమౌతోందా? నాకైతే కాలేదు.
• సినిమా వ్యాసాల్లోని ప్రధాన లోపం భాష. యాంత్రికానువాదాన్ని అలాగే ఉంచెయ్యడంతో భాష చాలా నిమ్న స్థాయిలో ఉంది. మచ్చుకు [8], [9], [10], [11] పేజీలను చూడవచ్చు.
• కొన్ని ఇతర ర్యాండమ్ పేజీల పరిస్థితి
  • * Reliance_Industries_Limited ఒక్క ముక్క సమాచారం లేదు. ఒకే ఒక్క నేవిగేషను మూస ఉంది - అది కూడా అంతా ఇంగ్లీషే, అన్నీ ఎర్ర లింకులే.
  • అంతరిక్ష నౌక తెవికీ నుండీ కాపీ పేస్టు
  • అంతరిక్ష శిథిలాలు పేజీ తెవికీ నుండి మక్కికి మక్కి కాపీ

ముగింపు

8 లక్షల పైచిలుకు వ్యాసాల్లో నేను చూసినవి చాలా కొద్ది మాత్రమే -సుమారు 200 ఉండవచ్చు. నేను చూడని మంచి వ్యాసాలు ఉంటే ఉండవచ్చు. ఆ కాసిని మెతుకులను పట్టి చూసాక, నేను గమనించినది -

ఈ ప్రాజెక్టు ద్వారా తయారైన వ్యాసాలు

• భాషా నాణ్యత పరంగా
• ఇచ్చిన సమాచార పరిమాణం పరంగా
• ఇచ్చిన సమాచారం లోని కచ్చితత్వం పరంగా

తెవికీ కోరుకునే ప్రమాణాల్లో లేవు. ఎక్కడైనా కొన్ని పేజీల్లో సమాచారం ఉన్నదనుకుంటే అవి తెవికీ నుండీ కాపీ పేస్టు. ఆ కాపీ పేస్టు వ్యాసాల్లోని నాణ్యత/నాణ్యత-లేమి తెవికీలో ఉన్నట్టే, అలాగే ఉంది. వాటిని ప్రాజెక్టులో మెరుగుపరచలేదు.

ఐఐఐటి వంటి ఉత్కృష్టమైన సంస్థ, నేచురల్ లాంగ్వేజి ప్రాసెసింగు, యాంత్రికానువాదాలు వంటి వాటిపై ఎంతో కృషి చేస్తున్న సంస్థ, వాటిని బోధిస్తున్న సంస్థ -చేపట్టిన ఈ ప్రాజెక్టు ఇలా సాగుతూండడం నిరాశ కలిగిస్తోంది. ఇది ఐఐఐటి-స్థాయి నాణ్యత కాదు. వాడుకరి:Kasyap గారి వంటి అనుభవజ్ఞుని కృషి ఫలించడం లేదే అని బాధ కలుగుతోంది. ఒక నలుగురు తెవికీ వాడుకరులు పూనుకుంటే ఇలాంటి వ్యాసాలను పుంఖానుపుంఖంగా- ఇంతకంటే చాలా మంచి నాణ్యతతో - సృష్టించవచ్చు.

గతంలో, గూగుల్ వికీ ప్రాజెక్టులో చాలా ఘోరమైన యాంత్రిక అనువాద వ్యాసాలను సృష్టించారు. ఆ తరువాత, ఆ వ్యాసాలను సరిదిద్దడానికి, అవి పోగా మిగతావాటిని తొలగించడానికీ మనకు దాదాపు పదేళ్ళు పట్టింది. ఇంకా కొన్ని అలాగే ఉన్నాయి కూడాను. అలాంటి నాసి రకం వ్యాసాలనే తెవికీలో ప్రచురించదలిస్తే, అత్యున్నత ఆశయంతో మొదలుపెట్టిన ఈ ప్రాజెక్టు నాణ్యత "ఆకాశంబున నుండి.." చందాన తయారౌతుంది.

కానీ.. శ్రమపడి తయారుచేసిన పది లక్షల పేజీలు అస్సలు పనికిరాకుండా పోతే ఎలా? ప్రభుత్వాలు విజ్ఞానసర్వస్వాల అభివృద్ధి కోసం ఈ ప్రాజెక్టుపై శ్రద్ధ పెట్టాయి. ఇప్పటికే ప్రభుత్వాలు వెచ్చించిన, ఇకపై వెచ్చించదలచిన ధనము, సమయమూ వృథా కాకుండా ఉండాలంటే, వారి కృషికి సాఫల్యత కలగాలంటే ఈ ప్రాజెక్టు వారు మరింత చిత్తశుద్ధితో పనిచెయ్యాలి.

1. ముందు ఈ వ్యాసాల్లోంచి "సంగీతం", "వ్యక్తులు", "సినిమాలు" వంటి కొన్ని వ్యాసాల పైననే దృష్టి పెట్టి (తెవికీలో ఈ సరికే లేని వ్యాసాలు), తెవికీ చెక్‌లిస్టుకు అనుగుణంగా తయారుచెయ్యాలి/మెరుగుపరచాలి.
2. వివిధ రాష్ట్రాల లోని గ్రామాలకు చెందిన వ్యాసాలను ఆయా రాష్ట్రాల స్థానిక భాషల్లోకి అనువదించి ఆయా భాషల వికీల్లో ప్రచురించేందుకు చొరవ తీసుకోవాలి. ఆ విధంగా ఆ 6 లక్షల వ్యాసాలకు ప్రయోజనం సిద్ధిస్తుంది.
3. యాంత్రిక అనువాదాల ప్రయోజనం కొంత మేరకే ఉంటుంది. ఆ తరువాత వాటిని మానవికంగా శుద్ధి చెయ్యాల్సిన అవసరం కచ్చితంగా ఉంది. అందుకు తగిన వనరులను సమకూర్చుకుని ఆ పనులు చెయ్యాలి. అలా చేసాకే వికీల్లో ప్రచురించాలి. మేం ఇలాగే చేసి ప్రచురిస్తాం, వాటిని మీరు సరిదిద్దుకోండి అనే ధోరణి ఫలితాల నివ్వదు.
4. వికీపీడియాలతో కలిసి సమన్వయం చేసుకుంటూ పనిచెయ్యాలి.

సముదాయ సభ్యులు కూడా ఈ ప్రాజెక్టును పరిశీలించి అభిప్రాయాలు సూచనలూ తెలియజేయవలసినదిగా కోరుతున్నాను. __చదువరి (చర్చ • రచనలు) 08:10, 22 నవంబరు 2022 (UTC)

@Chaduvari గారూ ధన్యవాదములు తెవికీ శాండ్ బాక్స్ మొదటి పేజీలోనే తెలుగు వికీపీడియా గురించి అవగాహన పొందుటకు ఐఐఐటి హైదరాబాద్ ఆధ్వర్యంలో ఏర్పాటు చేసిన ప్రయోగశాల అని సూచించాము, శిక్షణ కోసం తెలుగు వికీ నుండి ఇంపోర్టు చేసుకొన్న వ్యాసాలు కూడా ఉన్నాయ్, ఇది నిరంతరం జరుగుతూ ఉంటుంది, ఈ ప్రాజెక్టు లో భాగంగా చేసిన యాంత్రిక అనువాద వ్యాసాలకు ప్రత్యేకంగా తెవికీ అనేపేరుతో ప్రత్యేకంగా వర్గీకరించాము ఉదా తెవికీ సినిమాలు తెవికీ క్రికెట్ క్రీడాకారులు తెవికీ డిజిటల్ కెమెరాస్ , ఇలా వర్గీకరణ లేకుండా తెలుగు వికీపీడియా నుండి శిక్షణ కోసం చొప్పించిన వ్యాసాలు ఈ ప్రాజెక్టులో భాగమని మేము పేర్కొనలేదు, మీరు చూడవలసినది అంకాపూర్ కాదు అంకాపూర్_(నిజామాబాద్,_తెలంగాణ) , ఇందులో కొన్ని అనువాద దోషాలు API వలన జరిగి ఉండవచ్చు, ఇవి పూర్తిగా , దీనికి వలన వాడుక దారులు పొరపడకుండా పరిచయంలో ఇంగ్లీష్ పేరుకూడా ఇచ్చాము అందువలన అతను (Eng: Sohe, Hin: इसलिए वह) భారత దేశానికి చెందిన ఊరు. ఇది మనటు (Eng: manatu, Hin: मनातु) తహశీల్ పరిధి, పాలము (Eng: Palamu, Hin: पलमू) జిల్లా, ఝార్ఖండ్ (Eng: JHARKHAND, Hin: झरखंड़) రాష్ట్రంలో ఉన్నది ఇవి మానవికంగా శుద్ధి జరగలేదు అని ఆయా పేజీల చరిత్రలో చూడవచ్చు , ఆ 6 లక్షల వ్యాసాలకు సంబందించిన, ఇంకా ఈ ప్రాజెక్టులో చేసిన అనేక వ్యాసాల వర్గాల సమాచారం అందరికీ ఆందుబాటులో ఉచితంగా GIT హబ్ లో వనరులతో పాటు ఉన్నది, మేం ఇలాగే చేసి తెలుగు వికీపీడియాలో ప్రచురిస్తాం అని చెప్పలేదు, ఇవి పూర్తి అయ్యాయని చెప్పలేదు మీరు చెప్పినట్లు మానవికంగా శుద్ధి చెయ్యాల్సిన అవసరం కచ్చితంగా ఉంది, ఇవేమీ ఫైనల్ వర్షన్లు కావు, భారతదేశంలో ముఖ్య పట్టణానికి చాలా వరకు పేజీలు తెవికీ సాండ్ బాక్స్ లో ఉన్నాయి, వాటిని మూలంగా తీసుకోవచ్చు అని మాత్రం సూచించాము , వికీ వ్యాసాలు సవరించవచ్చు, ఎవరైన అభివృద్ధి చేయవచ్చు అన్న విషయం మీకు తెలియనికాదు. ఏది జరిగినా వికీపీడియాలతో కలిసి సమన్వయం చేసుకుంటూ మాత్రమే జరుగుతుంది. ఎంతో శ్రమతీసుకొని తెవికీ శాండ్ బాక్స్ లో వివిధ దశలలో ఉన్న వ్యాసాలకు మీ అభిప్రాయం చెప్పినందుకు మరొక్క సారి ధన్యవాదములు. Kasyap (చర్చ) 09:03, 22 నవంబరు 2022 (UTC)

@Kasyap గారూ, ఇప్పటి వరకూ "పది లక్షల వ్యాసాలు" అని చెబుతూ వచ్చారు. ఇప్పుడు, ఫలానా వర్గాలు మాత్రమే అని చెబుతున్నారు. మిగతావి "ఈ ప్రాజెక్టులో భాగమని మేము పేర్కొనలేదు" అని చెబుతున్నారు. మరి 10 లక్షలు అనేమాట రచ్చబండలో ఎందుకు చెప్పినట్టు? ప్రాజెక్టులో భాగమైనవి ఫలానా వర్గాలు మాత్రమే అని ముందే ఎందుకు చెప్పలేదు?

ఏది ఏమైనప్పటికీ, ప్రాజెక్టు పరిమాణం ఇప్పుడు సుమారు 1 లక్ష 9 వేలకు కుదించుకు పోయింది. సరే ఆ వర్గాలనే పరిశీలిద్దాం..

• తెవికీ పాఠశాలలు (20,995 పేజీలు): దీని గురించి ఈపాటికే రాసాను. అయితే ఇప్పుడు మీరు చూపిన వర్గం లోని వ్యాసాలను మళ్ళీ చూసాను. చాలా దోషాలున్నాయి. మానవికంగా సరిచెయ్యాలి. ఉదాహరణకు ఈ పేజీలు చూడండి: [12], [13], [14], [15], [16], [17]
• తెవికీ వాహనాలు (): దీని గురించి ఈపాటికే రాసాను.
• తెవికి కర్ణాటక సంగీత రాగాలు (): వీటి గురించి కూడా ఈపాటికే రాసాను. ప్రవేశికను మెరుగుపరచాలి.ఈ పేజీల్లో చాలా భాషా దోషాలున్నాయి. సవరించాలి.
• తెవికి నక్షత్రాలు: ఈ వ్యాసాల గురించి నేను గతంలో రచ్చబండలోనే రాసాను. సమాచారం తప్పు, లింకులు తప్పు, భాషాదోషాలున్నాయి, శైలీ దోషాలున్నాయి. రైట్ డిక్లనేషన్ అనే మాటే లేదు. విజ్ఞానసర్వస్వ వ్యాసాలు రాసేటపుడు సమాచర దోషాలు ఉండకూడదు. ఇలాంటి శాస్త్ర సాంకేతిక విషయాలు రాసేటపుడు మరింత జాగ్రత్తగా ఉండాలి. ఈ పేజీలను సమూలంగా సంస్కరించాల్సిన అవసరం ఇంది. ఉదాహరణలు చూడండి: [18], [19], [20], [21], [22]
• తెవికీ తోకచుక్కలు: ఈ పేజీలు నిజానికి గ్రహశకాలకు సంబంధించినవి. మేఘాలయ రాష్ట్రం లోని గ్రామాల పేజీలకు ఉన్న ప్రాముఖ్యతే ఈ గ్రహశకలాల వ్యాసాలకు ఉంది. పైగా ఈ వ్యాసాల్లోని పాఠ్యంలో గ్రహశకలాల నిర్వచనం వగైరాలను ప్రతి పేజీలోనూ రాసారు. అది వికీ శైలి కాదు. ఉదాహరణకు ఈ పాఠ్యం:

"సౌర మండలంలో గ్రహాల (Planet) మాదిరిగా సూర్యునిచుట్టూ వేగంగా తిరిగే చిన్న రాళ్ళ లాంటి వాటిని గ్రహశకలాలు (Asteroid) అంటారు. 1801 లో మొదటిసారిగా శాస్త్రవేత్తలు సెరిస్ అనే గ్రహశకలాన్ని గుర్తించారు. 2020 నాటికి సౌర మండలంలో సుమారు 10 లక్షలకు పైగా గ్రహశకలాలు ఉన్నాయని అంచనా.

వీటిని ధృవీకరించి వాటి గురించిన సమాచారం భద్రపరిచే బాధ్యత అంతర్జాతీయ ఖగోళ సంఘం (International Astronomical Union) నిర్వర్తిస్తుంది."

అంతరిక్షంలో ఉండే గ్రహాల కక్ష్యలో సూర్యునికి అన్నిటికంటే దగ్గర స్థానాన్ని పెరిహీలియాన్ (Perihelion), దూరపు స్థానాన్ని ఆఫీలియాన్ (Aphelion) అంటారు. గ్రహాలు వాటి కక్ష్యలో సూర్యునిచుట్టూ తిరగడాన్ని పరిభ్రమణం అంటారు. గ్రహాల కక్ష్యలు సాధారణంగా దీర్ఘవృత్త ఆకారంలో ఉంటాయి. వాటి పొడవును సూచించే రేఖని బృహదక్షం (Semi Major Axis) అంటారు. వికేంద్రత దీర్ఘవృత్తం వక్రతను నిర్ణయిస్తుంది. ఓ గ్రహం వికేంద్రత 0 నుంచి 1 పరిధిలో ఎంత తక్కువ ఉంటే దాని కక్ష్య ఆకారం అంత గుండ్రంగా, వృత్తానికి దగ్గరగా ఉన్నట్లు లెక్క. అలాగే కక్ష్య సమతలానికి భూమధ్యరేఖకు మధ్య ఏర్పడే కోణాన్ని ఇంక్లినేషన్ అంటారు."

ఇదే సమాచారం తేడా లేకుండా ప్రతి పేజీ లోనూ చేర్చారు. ఈ పాఠ్యాన్ని ఒక ప్రధాన పేజీ లోకి తరలించి ఆ నిర్దుష్ట గ్రహశకలానికి సంబంధించిన సమాచారాన్ని మాత్రమే దాని పేజీలో రాయాలి.

• తెవికీ డిజిటల్ కెమెరాస్: ఈ పేజీల పరిస్థితి కూడా పై వాటి లాగానే ఉంది. రిడండెంట్ పాఠ్యం, భాషాదోషాలు, ఆకృతి దోషాలు ఉన్నాయి. వాటిని సవరించాలి.

ప్రాజెక్టులో భాగాలని చెబుతున్న వర్గాల్లోని పేజీలను చూస్తే వాటిలో మానవికంగా సవరణలు చేసారని అనిపించడం లేదు.

ఇకపోతే అంకాపూర్/అంకాపూర్_(నిజామాబాద్,_తెలంగాణ) పేజీల గురించి - ఐఐఐటి వారు ఆంధ్ర, తెలంగాణ గ్రామాల, మండలాల పేజీలపై పనిచెయ్యకుండా ఉంటే సమయం ఆదా అవుతుంది. ఎందుకంటే తెవికీ లోని వ్యాసాలు

• అత్యంత తాజా సమాచారంతో ఉన్నాయి - పునర్వ్యవస్థీకరణకు ముందు, తరువాతి భౌగోళిక పరిస్థితులను వివరిస్తూ వీలైనంత సమగ్రంగా ఉన్నాయి.
• మెరుగైన భాషతో ఉన్నాయి
• మెరుగైన ఆకృతిలో ఉన్నాయి.

అయితే తెవికీ వ్యాసాలను మెరుగుపరచవలసిన అవసరం లేదని చెప్పడం నా ఉద్దేశం కాదు. మీరు వాటిని మెరుగుపరచాలని భావిస్తే, మీ ఉద్యోగులను నేరుగా తెవికీలోనే చెయ్యమనండి. లేదా తెవికీ గ్రామ వ్యాసాలను తాజాగా మళ్ళీ మీ సర్వరు లోకి దించుకుని వాటిని మెరుగుపరచండి. ఆ విధంగా తెవికీకి మేలు జరుగుతుంది.

ఈ సందర్భంలో ఒక మాట - తెలంగాణ జిల్లాల పునర్వ్యవస్థీకరణ జరిగాక జిల్లాలు మండలాల భౌగోళిక సరిహద్దులు మారాయి. ఈ విషయమై తెలంగాణ ప్రభుత్వం విడుదల చేసిన మెటాడేటా ఆధారంగా సాఫ్టువేరు వాడి మ్యాపులు తయారుచేసి తెవికీలో పెట్టాం. బహుశా ఈ కొత్త మ్యాపులు ప్రభుత్వం వద్ద తప్ప మరెక్కడా దొరకవు.

ఇకపోతే, వ్యాసాల నాణ్యతను మాత్రమే కాదు, తెవికీతో ఐఐఐటి ప్రాజెక్టు వారి సమన్వయాన్ని కూడా మెరుగుపరచుకోవాల్సిన అవసరం ఎంతైనా ఉంది అనే సంగతి "తెలుగు వికీపీడియా నుండి శిక్షణ కోసం చొప్పించిన వ్యాసాలు ఈ ప్రాజెక్టులో భాగమని మేము పేర్కొనలేదు" అనే వ్యాఖ్యను బట్టి తెలుస్తోంది. __ చదువరి (చర్చ • రచనలు) 10:21, 22 నవంబరు 2022 (UTC)

@Kasyap గారూ, తెలుగు వికీపీడియాకు, ఆమాటకు వస్తే భారతీయ భాషల వికీపీడియాలకు, ఈ ప్రాజెక్టు ఎంత ప్రాధాన్యత కలిగినదో మీరు అర్థం చేసుకుని మాట్లాడుతున్నట్టు నాకు అనిపించట్లేదు. కేంద్ర ప్రభుత్వం, తెలంగాణ రాష్ట్ర ప్రభుత్వం కూడా వనరుల రూపేణా, ప్రచారం రూపేణా ఈ ప్రాజెక్టు విషయంలో ఉత్సాహంగా సహకరించాయి. దీని నుంచి సత్ఫలితాలు వస్తే భారతీయ భాషల్లో వివిధ వికీపీడియాలకు కూడా ఇలాంటి ప్రాజెక్టులు, వనరులు ప్రభుత్వాలు అందించేందుకు ముందుకురావచ్చు. అందువల్లే ఐఐఐటీ-హైదరాబాద్ వారి ఇండిక్ వికీ ప్రాజెక్టు వారి నుంచి ఎన్ని నెలల నుంచి మా చర్చలకు ప్రతిస్పందన లేకపోయినా, ప్రతిస్పందించాల్సి వచ్చినప్పుడు ఒక్కోసారి ఒక్కో అంకె చెప్తున్నా వాలంటీర్లమై ఉండి కూడా మేం ఇంత పట్టుదలగా ప్రయత్నిస్తున్నాము.

ప్రాజెక్టు నుంచి వచ్చే వ్యాసాలు బావున్నట్టు అయితే తెలుగు వికీపీడియాలో ప్రచురిద్దామని మేం ఎంతగానో ప్రయత్నిస్తున్నాము. మా ప్రయత్నాన్ని సహృదయంతో అర్థం చేసుకోగలరు. దయచేసి ఈ కింది ప్రశ్నలకు సూటిగా, మీకు తెలిసినంతవరకూ స్పష్టంగా సమాధానం ఇస్తే మేం ముందుకువెళ్ళడానికి పనికివస్తుంది.

అసలు మొత్తం మీ ప్రాజెక్టులోని వ్యాసాలు ఎన్ని?

"ఇందులో వ్యాసాల సృష్టి ఒక భాగము అందులో భాగంగా వివిధ దశలలో ఉన్న 10 లక్షల వ్యాసాలను తెవికీ సాండ్ బాక్సు లో చూడవచ్చు ప్రాజెక్టు పూర్తి పని విధానం ఆధారంగా ప్రాజెక్టు మీద నిర్ణయం చేయండి" అని మీరే రచ్చబండలో అన్నారు. ఆ చర్చ మీద నేను నిర్ణయం తీసుకుంటూ "కశ్యప్ గారు చెప్పేదాని ప్రకారం ఓ పదిలక్షల పైచిలుకు వ్యాసాలున్నాయి. అవి ఏ స్థితిలో ఉన్నాయో తెలియదు. కానీ, ఇవి పనికొచ్చేవే అయితే మనకు చాలా లాభం. ఐఐఐటీ హైదరాబాద్ వాళ్ళ స్పందనలు, పద్ధతులు మనకు నచ్చనంతమాత్రాన వ్యాసాలు బావుంటే తీసుకోబోమని ఏమీ లేదు కదా." అని రాశాను. దానికి మీరు ప్రతిస్పందిస్తూ "చర్చలో పాల్గొన్న అందరికీ ధన్యవాదములు" చెప్పినప్పుడు అయినా ఆ పదిలక్షల వ్యాసాల గురించి మీరేమీ వ్యాఖ్యానించలేదు. ఇప్పుడు చదువరి గారు పరిశీలించాకా వచ్చి అవి ఇంకెందుకో పెట్టాము ప్రాజెక్టులో భాగం కాదంటున్నారు.

ఇంతకీ అసలు మొత్తం వ్యాసాలు పది లక్షలా? కాదా? అసలెన్ని? ఆ పదిలక్షల వ్యాసాలు అన్న అంకెకు ప్రాముఖ్యత ఏమీ లేకపోతే దాన్నెందుకు మొదట వాడారు? ప్రభుత్వానికి ఎన్ని ఉన్నాయని చెప్పారు? ఎందుకు అడుగుతున్నాను అంటే - మీరు పదిలక్షలు పనికొచ్చే వ్యాసాలు తయారుచేశామని ఏ నివేదికలో అయినా రాసినట్టు అయితే, భారతీయ భాషల వికీపీడియన్లకు పనికివచ్చే పదిలక్షల వ్యాసాలను వాడుకోవడం కూడా రాదని, వాళ్ళకు అభివృద్ధి చేసే ఉద్దేశం లేదని అపార్థం చేసుకునే అవకాశం కలుగుతుంది. అందువల్ల మీరు ఇప్పుడు స్పష్టం చెయ్యాలి.

ఇప్పటికిప్పుడు మేం ప్రచురించుకోదగ్గ వ్యాసాలు ఎన్ని? అవి ఏవి?

చదువరి గారు ఏడు నెలల క్రితం మీ నమూనా వ్యాసాలు పరిశీలించి మీకొక చెక్ లిస్టు ఇచ్చారు. గత వారం నేను వాటి మీద మీరేం పనిచేశారని ప్రశ్నిస్తే "చెక్ లిస్టు లో సూచించిన మార్పులు చాలా వరకూ మేము ప్రతిపాదించిన నమూనా వ్యాసాలలో ఉన్నవే" అని మీరే రచ్చబండ సాక్షిగా అన్నారు. మీ వాక్యం చదివాకా నాకు అర్థమైనది ఇది:

• కనీసం కొన్ని వ్యాసాలనైనా మీరు "చెక్ లిస్టు" ఆధారంగా పరిశీలించి చూశారనీ, ఇప్పటికిప్పుడు ప్రచురణకు పనికివస్తాయని మీరు నమ్ముతున్నారని

ఒకవేళ అలాగైతే, మీ దగ్గర ఉన్న లక్షలాది లేక వేలాది లేక వందలాది వ్యాసాల్లో ఎన్ని వ్యాసాలు ఇప్పుడు తెలుగు వికీపీడియాలో ప్రచురించుకోవడానికి పనికివస్తాయని మీ విశ్వాసం? అవి లక్ష అయినా - ఓకే, పదివేలు అయినా ఓకే, వెయ్యి అయినా సంతోషమే, చివరకు వంద, పది, రెండు వ్యాసాలైనా ఫర్వాలేదు. దయచేసి " వికీ వ్యాసాలు సవరించవచ్చు, ఎవరైన అభివృద్ధి చేయవచ్చు అన్న విషయం మీకు తెలియనికాదు " అని మీరు ఇంతకుముందు తెలియజెప్పిన ధోరణిలో వాదనకు దిగవద్దని మనవి. "చెక్ లిస్టు" ఇచ్చింది ముందుగా చెక్ చేయడానికే. కాబట్టి, చెక్ లిస్టుకు అనుగుణంగా ఒక్క వ్యాసం ఉన్నా, వెయ్యి వ్యాసాలు ఉన్నా చెప్పండి. పనికివచ్చే వ్యాసం ఒక్క వ్యాసం ఉన్నా కూడా మీ వెబ్సైట్లోనే మగ్గిపోవాల్సిన అవసరం లేనే లేదు. తెలుగు ప్రజలందరికీ ఉపయోగపడేలాగా తెలుగు వికీపీడియాలో సగర్వంగా ప్రచురిద్దాం. అలా ప్రచురించడం మీ లక్ష్యాలకు భిన్నమేమీ కాదని నా నమ్మకం. అవునా?

ఇంతకీ, అలా సంసిద్ధంగా (చెక్ లిస్టు ప్రకారం) ఉన్న వ్యాసాలు ఎన్ని ఉన్నాయి? ఎక్కడ ఉన్నాయి? పవన్ సంతోష్ (చర్చ) 11:33, 22 నవంబరు 2022 (UTC)

ఇక్కడ నేను ప్రాజెక్టు లో భాగం కాదు అన్నది తెలుగు వికీపీడియా నుండి ఇంపోర్ట్ చేసిన 79 వేల వ్యాసాలు, మిగిలిన వ్యాసాలు ప్రాజెక్టు లో తయారు అయినవే ! ఈ మధ్య ఒక లక్షన్నర కు పైన వ్యాసాలు కొన్ని సాంకేతిక కారణాల వలన తొలగించినవి త్వరలో చేరుస్తాం, ఉదాహరణకు అంకాపూర్ వ్యాసం తీసుకొంటే 2006 లో బాటు ద్వారా తయారు అయిన వ్యాసం ఇప్పటి స్థాయికి రావటానికి 18 సంవత్సరాల సమయం 11 వికీపీడియన్, బాట్ ల కృషి అవసరం అయింది, సాంకేతికతతో ఐదు లక్షల పైన ఊళ్ల వ్యాసాలకు కొన్ని వారాల్లో నే అది సాధ్యం అయింది అయితే యాంత్రిక సృష్టి పరిధులు తెలిసినవే,ప్రస్తుతం సార్వత్రిక వికీ నియమాల అనుగుణంగా సాధ్యా సాధ్యాలు పరిశీలించి వ్యాసాలు తీర్చిదిద్దే పని జరుగుతున్నది, @Chaduvari గారు @Pavan santhosh.s గారు సూచించిన ప్రత్యేకమైయిన చెక్ లిస్టు ప్రకారం ప్రకారం వ్యాసాలు అభివృద్ధి చేసి ఎంపిక చేసే కార్యక్రమం మిగిలిన సభ్యులతో కలసి నిర్ణయంచాలి, దానికి అనుగుణంగా తెలుగు వికీపీడియా సముదాయం నిర్ణయం చేయవచ్చు. ప్రాజెక్టు పూర్తి పని విధానం అంటే ఇది ఒక్కటే ప్రాజెక్టు లక్ష్యం కాదు అని అర్ధం చేసుకోగలరు తెవికీ-ఐఐఐటి ప్రాజెక్టు ఉద్దేశంలో పేర్కొన్నట్లు గా లక్ష్యాలు, వ్యాసాల నాణ్యతను అభివృద్ధి చేసేందుకు అవసరమైన వనరులను సమకూర్చడం అందులో యాంత్రిక సృష్టిద్వారా జరిపిన వ్యాసాల ద్వారా వికీపీడియాలో రాసే ఉత్పాదకతను వేగవంతం చేసేందుకు దోహదపడే సాంకేతికతను అభివృద్ధి చేసి అందించడం ,వికీ శిక్షణ ఇవ్వడం ఇలాంటి అంశాలు కొనసాగుతున్నాయి. Kasyap (చర్చ) 14:06, 22 నవంబరు 2022 (UTC)

@Kasyap: నేను అడిగిన ప్రశ్నలు సూటిగా ఉన్నాయి. అంకెలు, లింకులు అడుగుతున్నాను నేను. పైగా హెడ్డింగ్ పెట్టి అడిగాను. మీరు అవి తప్పించేసి ఇంకేవేవో మాట్లాడుతున్నారు. సాంకేతిక సంస్థలో ఒక ప్రాజెక్టు తరఫున మాట్లాడుతున్నారు మీరు. కాబట్టి, మెట్రిక్స్, ఎవిడెన్స్ ఇచ్చి నోట్స్/కామెంట్స్/కాంటెక్స్ట్ చెప్పడం ఐఐఐటీ-హైదరాబాద్ వారికి శోభస్కరంగా ఉంటుంది. అంతే తప్ప, మెట్రిక్స్ దాటవేసి రాస్తే ఉపయోగం ఉండదు. మీ సౌకర్యం కోసం మళ్ళీ అడుగుతున్నాను ఈ రెండు ప్రశ్నలకు మట్టుకే సమాధానం చెప్పండి:

• అసలు మొత్తం మీ ప్రాజెక్టులోని వ్యాసాలు ఎన్ని?: మీ తీసివేతలు, భాగాహారాలు చేసుకున్నాకా మొత్తం ఎన్ని ఉన్నాయి ఈ ప్రాజెక్టులో వ్యాసాలు ఇప్పుడు. వాటికి లింకులు ఏమిటి?
• ఇప్పటికిప్పుడు మేం ప్రచురించుకోదగ్గ వ్యాసాలు ఎన్ని? అవి ఏవి?: చెక్ లిస్టు మీకు ఇచ్చి ఏడు నెలలు గడిచింది. మొదట్లో మీరు అందులోని అంశాలపై, ఆ పద్ధతిపై అభిప్రాయం, భేదాభిప్రాయం చెప్పేందుకు, మార్చేందుకు వీలు కూడా కల్పించారు. ఇప్పుడు, ఆ చెక్ లిస్టు ప్రకారం తగినంత నాణ్యంగా ఉండి ఇప్పటికిప్పుడు మేం ప్రచురించుకోదగ్గ వ్యాసాలు ఎన్ని ఉన్నాయి? కనీసం ఒక ఐదో పదో ఉన్నా ఫర్లేదు. ఎన్ని ఉన్నాయో చెప్పండి. అవేమిటో లింకులు ఇవ్వండి.

ఇంతే నేను మిమ్మల్ని కోరుతున్నది. పవన్ సంతోష్ (చర్చ) 06:08, 23 నవంబరు 2022 (UTC)

@Kasyap: సమాధానం చెప్పేది ఉంటే త్వరగా చెప్పండి. లేకుంటే లేదని చెప్పండి. నేను చర్చ ముగించనున్నాను. పవన్ సంతోష్ (చర్చ) 12:25, 27 నవంబరు 2022 (UTC)

రచ్చబండలో మీరు నమూనా వ్యాసాలకు పురోగతి మీద అడిగిన ప్రశ్నకు సమాధానంగా జరుగుతున్న పనితోపాటు , సంబంధిత లింకులు పేర్కొన సంగతి, వాటిమీద సభ్యులు చేస్తున్న చర్చలు గమనించగలరు, ప్రాజెక్టు పరిధుల మేరకు వ్యాసాల అభివృద్ధి కార్యక్రమం పురోగతిలో ఉన్నది, ఇప్పుడే ఇతిమిద్దంగా చెప్పలేము. ధన్యవాదములు. Kasyap (చర్చ) 07:25, 28 నవంబరు 2022 (UTC)

ఐఐఐటీ వారి ప్రాజెక్టు విషయంలో జరిగిన చర్చోపర్చల తర్వాత, వారి వెబ్సైటును పరిశీలించిన తర్వాత మొత్తానికి తేలిన విషయం ఏమిటంటే-

• ఇంత కాలంగా మీరు చేశామని చెప్పుకుంటున్న ప్రాజెక్టు ద్వారా తెలుగు వికీపీడియాలో ప్రచురించుకోవడానికి పనికివచ్చే వ్యాసం ఒక్కటి కూడా లేదు.
• అసలు మొత్తం మీ ప్రాజెక్టులోని వ్యాసాలు మొదట పదిలక్షలని అక్షరాలా మీచేత్తో మీరే రచ్చబండలో రాశారు. ఆ పదిలక్షల వ్యాసాల్లోంచి నమూనా పరిశీలన చెయ్యమని సభ్యులకు సూచిస్తే చదువరి గారు అక్కడ పదిలక్షలు లేవనీ, ఉన్నవి కూడా అస్సలు ఏ మాత్రమూ వ్యాసం అన్న స్థాయికి దగ్గరగా లేదని తేల్చిన తర్వాత - అబ్బే అవి పదిలక్షలు కాదు, నా ఉద్దేశం మీకు అర్థం కాలేదు అన్నారు. ఇప్పుడు నేను సరేనయ్యా అసలు ఎన్ని ఉన్నాయి మీ మొత్తం వ్యాసాలు మీరే చెప్పండి అంటే ఇతిమిద్దంగా చెప్పలేము అని తేల్చారు.
• అంటే ఏమిటన్నమాట. మేం రంగంలోకి దిగి పరీశీలన మొదలుపెట్టకపోతే అక్కడ పదిలక్షలున్నాయని చెప్పేసుకుంటారు. పత్రికల్లో, పెద్ద పెద్ద కాన్ఫరెన్సుల్లో తెలుగు వికీపీడియా 70-80 వేల వ్యాసాలే చేసింది. మేం ఇరగదీసి లక్షలాది వ్యాసాలు చేరుస్తామని బాహాటంగా ప్రచారం చేసుకుంటారు. మాబోటిగాళ్ళు ముందుకువచ్చి నిగ్గుతేలిస్తే "ఏదీ ఇదమిత్థంగా చెప్పలేము" అని తప్పుకోజూస్తారు.

కొండను తవ్వి ఎలుకను పట్టారని సామెత. ఇక్కడ జరిగింది ఏమిటంటే - కొండను తవ్వుతున్నామని ప్రచారం చేసుకున్నారు, ఎలుకను కూడా పట్టలేదు. పవన్ సంతోష్ (చర్చ) 06:05, 2 డిసెంబరు 2022 (UTC)