బెంగుళూరు

కర్నాటక శాసనసభా భవనం విధానసౌధ.

?బెంగుళూరు కర్ణాటక • భారతదేశం
బెంగుళూరు
అక్షాంశరేఖాంశాలు: 12.970214, 77.56029
కాలాంశం	భాప్రాకా (గ్రీ.కా+5:30)
విస్తీర్ణం • ఎత్తు	741 కి.మీ² (286 sq mi) • 920 మీ (3,018 అడుగులు)
జిల్లా(లు)	బెంగుళూరు పట్టణ జిల్లా
జనాభా • జనసాంద్రత	52,80,000 (3rd) (2007) • 7,126/కి.మీ² (18,456/చ.మై)
మేయర్	ముంతాజ్ బేగం
కోడులు • పిన్‌కోడు • టెలిఫోను • UN/LOCODE • వాహనం	• 560 0xx • +91-(0)80 • IN BLR • KA-01; KA-02; KA-03; KA-04; KA-05; KA-41; KA-51; KA-53

బెంగుళూరు భారతదేశంలోని మహా నగరాలలో ఒకటి. ఇది కర్ణాటక రాష్ట్రానికి రాజధాని. బెంగుళూరును "హరిత నగరము"(ఆంగ్లములో "గ్రీన్ సిటీ")అని కూడా అంటారు. ఇక్కడ వృక్షాలు అధికంగా ఉండటం వలన దానికాపేరు వచ్చింది. ప్రస్తుతము వివిధ అభివృద్ధి కార్యక్రమముల వలన పెద్ద సంఖ్య లో వృక్షాలు తొలగించటం జరుగుతున్నది. తద్వారా ఈ నగరము లో కాలక్రమేణ వాతావరణం లో వేడి బాగా పెరిగిపోతోంది.ఇక్కడ అధికంగా సరస్సులుండటం వలన దీనిని "సరస్సుల నగరము" అని కూడా అంటారు. బెంగుళూరు భారత దేశంలో సాఫ్ట్‌వేర్‌ కార్యకలాపాలకు కేంద్రం. అందుకే దీనిని "సిలికాన్ వ్యాలీ ఆఫ్ ఇండియా" అంటారు.

1537 వరకు పలు దక్షిణ భారత రాజ వంశీకులు బెంగుళూరుని పాలించారు. విజయనగర సామ్రాజ్యమునకు చెందిన కెంపె గౌడఅను పాలకుడు మొట్ట మొదటి సారిగా ఇక్కడ మట్టితో ఒక కోటని నిర్మించినాడు. అదే ఇప్పటి ఆధునిక నగరానికి పునాది. కాలక్రమేణా మరాఠాలు, ముఘల్ ల చేతుల నుండి మైసూరు రాజ్యం క్రిందకు వచ్చినది. బ్రిటీషు వారికి కంటోన్మెంటుగా, మైసూరు రాజ్యంలో ఒక ముఖ్య పట్టణంగా బెంగుళూరు కొనసాగినది. 1947లో భారతదేశానికి స్వాతంత్ర్యం సిధ్ధించిన తర్వాత మైసూరు రాజ్యానికి కేంద్రంగా నిర్ధారింపబడి, 1956లో కొత్తగా ఏర్పడ్డ కర్ణాటక రాష్ట్రానికి రాజధానిగా విలసిల్లినది. 83 బిలియను డాలర్ల జీడీపీ తో భారతదేశానికి స్థూల దేశీయోత్పత్తి సంపాదించే మొదటి 15 నగరాలలో 4వ స్థానాన్ని కైవసం చేసుకొన్నది.

కళాశాలలు, పరిశోధనా సంస్థలు, భారీ పరిశ్రమలు, సాంకేతిక సంస్థలు, విమానయాన సంస్థలు, టెలికమ్యూనికేషన్స్ మరియు రక్షణా దళాలకు బెంగళూరు కేంద్రం.

పుట్టుక

కన్నడం లో దీని అసలు పేరు బెంగళూరు. ఇటీవలే కర్ణాటక ప్రభుత్వం ఇక నుంచి అన్ని ప్రభుత్వ కార్యకలాపాలకు ఈ పేరునే వాడాలని నిర్ణయించింది. ఒక యుధ్ధ వీరుని జ్ఞాపకార్థం పశ్చిమ గంగ వంశీయులు 9 వ శతాబ్దంలో వీరగల్లు అనే ఒక శిలాఫలకం (ವೀರಗಲ್ಲು) చెక్కించిన దాఖలాలు కలవు. 890 వ సంవత్సరంలో బేగూరు కోసం యుధ్ధం జరిగినది అని దాని పై రాసి ఉన్నది.

చరిత్ర

పశ్చిమ గంగ వంశీకులు కొన్ని శతాబ్దాల పాటు పరిపాలించిన తరువాత క్రీ.శ 1024 సంవత్సరంలో చోళ రాజులు చేజిక్కించుకున్నారు. తరువాత 1070 లో అధికారం చాళుక్య చోళుల చేతుల్లోకి మారింది. 1116 లో హోయసలులు చోళ రాజులను ఓడించి ఈ నగరాన్ని తమ హస్తగతం చేసుకున్నారు.

భౌగోళిక పరిస్థితులు మరియు వాతావరణం

బెంగళూరు కర్ణాటక లో ఆగ్నేయ దిశగా, మైసూరు పీఠభూమి మధ్య భాగంలో ఉంటుంది.

16వ శతాబ్దంలో కెంపె గౌడ-1 నగరంలో మంచినీటి అవసరాల కోసం అనేక సరస్సులు తవ్వించాడు. ప్రస్తుతం నగరంలో 80% నీటి అవసరాలు కావేరి జలాల వల్లనే తీరుతున్నాయి. మిగతా 20% తిప్పగొండనహళ్ళి మరియు అర్కావతి నదిపై నిర్మించబడ్డ హేసరగట్ట రిజర్వాయర్ వల్ల తీరుతున్నాయి.

ఆదాయ వనరులు

భారత దేశపు సిలికాన్ వ్యాలీగా పిలువబడే బెంగళూరు ప్రధానంగా అనేక సాఫ్ట్వేర్ సంస్థలకు నిలయం. దాదాపు ప్రపంచంలో ప్రసిద్ధి గాంచిన సాఫ్ట్వేర్ సంస్థలన్నీ ఈ నగరంలో తమ కార్యాలయాలను ఏర్పాటు చేసి ఉన్నాయి. అంతేకాక భారతదేశంలోకెల్లా అత్యంత వేగంగా అభివృద్ధి చెందుతున్న మహానగరం.

రవాణా సౌకర్యాలు

రోడ్డు

బెంగుళూరు జాతీయ రహదారి 7 పై ఉంది. కర్ణాటక రోడ్డు రవాణా సంస్థ 6,918 బస్సులను 6,352 రూట్లలో నడుపుతూ రాష్ట్రంలోని ఇతరప్రదేశాలకు మరియు ఇతర రాష్ట్రాలకు నడుపుతుంది. మెజెస్టిక్ బస్సు స్టాండ్ అని పిలువబడే కెంపెగౌడ బస్సు స్టేషన్ నుండి చాలావరకు బస్సులు నడుస్తాయి. ప్రధానంగా తమిళనాడు, ఆంధ్రప్రదేశ్ లకు నడిపే బస్సులు శాంతి నగర్ బస్సు స్టేషన్, మైసూరు రోడ్ లోని శాటిలైట్ బస్సు స్టేషన్, బైయప్పనహళ్లి బస్సుస్టేషన్ లనుండి బయలుదేరతాయి ప్రతిరోజు 1,000 వాహనాలు బెంగుళూరు ప్రాంతీయ రవాణా సంస్థలలో నమోదవుతున్నాయి. 38.8 లక్ష వాహనాలు 11,000 కెమీ రహదారి పొడుగుపై ప్రయాణిస్తుంటాయి.

రైలు

బెంగుళూరు సిటీ, యశ్వంతపూర్ కృష్ణరాజపురము ప్రధాన రైల్వే కేంద్రాలు.

విమాన

అంతర్జాతీయ ప్రయాణికుల అవసరాలను తీర్చడం కోసం అత్యంత అధునాతన సౌకర్యాలతో మే 24, 2008 న బెంగళూరు అంతర్జాతీయ విమానాశ్రయం ప్రారంభమైంది. ఎయిర్ దక్కన్ మరియు కింగ్‌ఫిషర్ ఎయిర్ లైన్స్ ప్రధాన కార్యాలయాలు బెంగళూరులోనే ఉన్నాయి.

నగరం వెలుపల రవాణా సౌకర్యం

బస్సు

ఎసి బస్సులు ప్రారంభించిన నగర రవాణా సంస్థలలో ప్రథమస్థానం బిఎమ్టిసి కి దక్కింది. బెంగుళూరు మెట్రోపాలిటన్ ట్రాన్స్పోర్ట్ కార్పోరేషన్ (BMTC) చేనడపబడే బస్సులు నగరంలో ప్రధాన రవాణా సౌకర్యం. బస్సులో టిక్కెట్టు,రోజువారీ బస్సుపాసు కొనే సదుపాయం వుంది. విమానాశ్రయానికి మరియు ఇతరప్రదేశాలకు శీతలీకరణ బస్సులు కూడా నడుపుతారు.

మెట్రో రైలు

నమ్మ మెట్రోగా చెప్పుకునే బెంగుళూరు మెట్రో రైలు అక్టోబర్ 20 2011 నుండి మహాత్మా గాంధీ రోడ్-బయ్యప్పనహళ్ళి మార్గంలో మొదలయింది. ఇది పూర్తిగా విస్తరిస్తే, బెంగుళూరును నిలువు-అడ్డంగా గీత గీస్తే వచ్చే స్థానాలన్నిటినీ కలుపుతుంది.

ఇతర

మూడు చక్రాల ఆటో రిక్షాలు రవాణాలో ప్రముఖ పాత్ర వహిస్తాయి. ముగ్గురు వరకు ప్రయాణించగల వీటికి మీటరు ప్రకారం రుసుం చెల్లించాలి. టేక్సీలు అనగా సిటీ టేక్సీలు ఫోన్ ద్వారా ఏర్పాటు చేసుకోవచ్చు. వీటి ఖరీదు అటో కంటె ఎక్కువ.

సంస్కృతి మరియు సాంప్రదాయాలు

బెంగళూరు భారతదేశపు ఉద్యానవనాల నగరంగా ప్రసిద్ధి గాంచింది. ఎటు చూసినా కనిపించే పచ్చదనం, ఉద్యానవనాలు సందర్శకులకు నేత్రానందం కలిగిస్తాయి. లాల్ బాగ్, కబ్బన్ పార్క్ లు ప్రముఖ ఉద్యానవనాలు. బెంగళూరులో వాతావరణం ఆహ్లాదకరంగా ఉంటుంది.

ఇక్కడ దసరా ఉత్సవాలు అత్యంత వైభవంగా నిర్వహించబడతాయి.

తెలుగు సంస్థలు

దాదాపు 12 పైగా తెలుగు సాంస్కృతిక సంస్థలు ఉన్నాయి. అప్పుడప్పుడు తెలుగు కార్యక్రమాలు నిర్వహిస్తాయి. వాటిలో కొన్ని.

• తెలుగు విజ్ఞాన సమితి
• బెంగుళూరు తెలుగు సంఘం

క్రీడలు

క్రికెట్ ఇక్కడ బాగా ప్రజాదరణ పొందిన క్రీడ. భారత క్రికెట్ దిగ్గజాలైన గుండప్ప విశ్వనాధ్, అనిల్ కుంబ్లే, రాహుల్ ద్రవిడ్, జవగళ్ శ్రీనాథ్ బెంగళూరు కు చెందిన వారే.

విద్య

1909 లో ఇక్కడ ప్రారంభించిన ఇండియన్ ఇన్‌స్టిట్యూట్ ఆఫ్ సైన్స్ భారతదేశంలోనే అత్యున్నత ప్రమాణాలు కలిగిన పరిశోధనా కేంద్రాలలో ఒకటి. ఇంకా ఇండియన్ ఇన్‌స్టిట్యూట్ ఆఫ్ మేనేజ్‌మెంట్, మానసిక ఆరోగ్య కేంద్రమైన నేషనల్ ఇన్‌స్టిట్యూట్ ఆఫ్ మెంటల్ హెల్త్ అండ్ న్యూరో సైన్సెస్ (నిమ్‌హాన్స్) మొదలైనని ప్రధాన విద్యా సంస్థలు.

షాపింగ్ మాల్ లు

• గరుడ మాల్, ఎం.జీ రోడ్
• బెంగుళూరు సెంట్రల్, ఎం.జీ రోడ్
• మంత్రి మాల్
• రాయల్ మీనాక్షి మాల్, బన్నేరు ఘట్ట రోడ్
• ది ఫోరం మాల్, కోరమంగళ ఇంకా వైట్ ఫీల్డ్
• గోపాలన్ మాల్, మైసూర్ రోడ్
• గోపాలన్ ఆర్కేడ్, రాజరాజేశ్వరి నగర్
• బిగ్ బజార్
• సిగ్మా మాల్
• కాస్మోస్, వైట్ ఫీల్డ్
• ఇనార్బిట్ (హైపర్ సిటీ), వైట్ ఫీల్డ్
• యూబీ సిటీ
• ఫీనిక్స్ మాల్, వైట్ ఫీల్డ్
• ఒరాయన్ మాల్, మల్లేశ్వరం

హోటళ్ళు

• నందిని
• భగిని
• అడిగాస్
• సుఖ్ సాగర్
• కామత్
• నందన
• నాగార్జున

మాధ్యమాలు

బెంగుళూరు లో మొట్టమొదటి సారిగా 1840 లో ప్రింటింగ్ ప్రెస్ ను నెలకొల్పడం జరిగింది. 1955 నవంబర్ 2 న బెంగళూరులో ఆకాశవాణి రేడియో కేంద్రాన్ని ప్రారంభించింది.

దర్శనీయ స్థలాలు

• ఇస్కాన్ టెంపుల్

బెంగుళూరులోని ఇస్కాన్ వారిచే నిర్మించబడిన కృష్ణుని గుడి

బెంగుళూరులోని ఇస్కాన్ 1987 సెప్టెంబర్లో ఒక చిన్న అద్దె ఇంట్లో ప్రారంభమయినది. మధు పండిట్ దాస గారి అధ్యక్షతన భూమికై ప్రభుత్వానికి దరఖాస్తు పెట్టుకొనగా ప్రస్తుతం గుడి ఉన్న ప్రాంతంలో 11 ఎకరాల స్థలం కేటాయించినారు. అలా కేటాయించిన స్థలంలో 1990 - 1997ల మధ్యలో గుడి కట్టడం పూర్తి అయినది. అలా పూర్తయిన గుడి అప్పటి రాష్ట్రపతి, డా.శంకర దయాళ్ శర్మ చేతుల మీదుగా 1997 మే 31న ప్రారంభమయినది.

ఇక్కడ బంగారు పూతతో ఉన్న ద్వజస్థంభం, 56 అడుగుల ఎత్తుతో ప్రపంచంలోనే ఎత్తయినది. అంతేకాక 36 x 18 చదరపు అడుగుల వైశాల్యం కలిగిన బంగారు పూత కలిగిన గోపురం ప్రపంచంలోనే అతి పెద్దది. ఈ గుడి బెంగుళూరులో రాజాజినగర్‌ అనే ప్రాంతములో ఉన్నది.ఆక్కడకు వెళ్ళటానికి, మెజస్టిక్‌ (బెంగుళూరు రైల్వే స్టేషను,బస్సు స్టాండు గల ప్రాంతం)నుండి సిటీ బస్సులు కలవు.

• శివ మందిరం

ప్రపంచంలో అతి ఎత్తైన శివుని విగ్రహం ఇచట ఉంది. ఇది బెంగుళూరు విమానాశ్రయం రహదారిపై మురుగేశ్ పాల్య ప్రాంతములో కలదు. ఈ విగ్రహం ఎత్తు 65 అడుగులు. అంతేగాకుండా ఇచట ద్వాదశ జ్యోతిర్లింగాలు కూడా కలవు.

• పెద గణేష మందిరం

అతి పెద్ద గణపతి శిలా విగ్రహం ఇక్కడ ఉంది. ఇది ఏక శిలా విగ్రహము. బెంగుళూరు దక్షిణ ప్రాంతము లొ బసవన గుడి ప్రక్కన వున్నది. బెంగుళూరు సందర్శకులు ఇక్కడికి కూడా వస్తుంటారు.

బసవన్నగుడి, బెంగళూరులో గల నంది దేవాలయం.

• బనశంకరి మందిరం
• వాసవీ మందిరం
• దొడ్డ బసవన్న దేవాలయం
• దొడ్డ గణపతి దేవాలయం
• కొటే వెంకటేశ్వర మందిరం
• టిప్పు సుల్తాన్ సమ్మర్ ప్యాలెస్

టిప్పుసుల్తాన్ విశ్రాంతి మందిరము

• లాల్‌బాగ్ ఉద్యానవనము
• కబ్బన్ పార్క్ ఉద్యానవనము
• కర్ణాటక విధాన సౌధ (శాసనసభ)
• విశ్వేశ్వరయ్య సైన్స్ మ్యూజియం
• ప్లానిటోరియం
• అక్వేరియం
• యమ్.జి. రోడ్
• ఫోరం మాల్
• గరుడ మాల్
• ఇండియన్ ఇన్‌స్టిట్యూట్ ఆఫ్ సైన్స్
• ఇండియన్ ఇన్‌స్టిట్యూట్ ఆఫ్ మేనేజ్మెంట్