నల్లపాటి వెంకటరామయ్య

నల్లపాటి వెంకటరామయ్య (మార్చి 1, 1901 - జూన్ 28, 1983) ఆంధ్ర రాష్ట్ర ప్రథమ శాసనసభ స్పీకర్.

జననం

నరసరావుపేట సమీపములోని జొన్నలగడ్డ గ్రామములో అంకమ్మ, కోటమ్మ దంపతులకు 1901, మార్చి 1 న జన్మించాడు. ఈయన ఆంధ్ర రాష్ట్ర ప్రథమ శాసనసభ స్పీకర్.

విద్య

నరసరావుపేటలో ఎస్ ఎస్ యల్ సి, గుంటూరులో ఇంటర్ పూర్తి చేశాడు. మద్రాసులోని పచ్చయప్ప కళాశాలలో బిఏ పట్టభద్రుడయ్యాడు. వినుకొండ రెవెన్యూ ఆఫీసులో గుమాస్తాగా చేరి బ్రిటిష్ వారి కొలువులో ఇమడలేక ఉద్యోగము వదిలివేశాడు. తిరిగి మద్రాసు వెళ్ళి న్యాయశాస్త్రము అభ్యసించి న్యాయవాది అయ్యాడు.

వృత్తి, రాజకీయము

1929లో నరసరావుపేటలో న్యాయవృత్తి చేపట్టాడు. 1932లో తాలూకా బోర్డు అధ్యక్షునిగా ఎన్నికయ్యాడు. ఆంధ్ర విశ్వకళా పరిషత్ సెనేట్ సభ్యునిగా విశేష సేవలందించాడు. 1952లో మొట్టమొదటి సార్వత్రిక ఎన్నికలలో నరసరావుపేట శాసనసభ స్థానమునుండి ఎన్నికయ్యాడు. 1953 అక్టోబరు 1న ఆంధ్ర రాష్ట్రము ఏర్పడి ప్రకాశం ముఖ్యమంత్రిగా నియమితుడయ్యాడు. 1953 నవంబరు 23న వెంకటరామయ్య సభాపతిగా ఎన్నికయ్యాడు. 25 సంవత్సరాలు న్యాయవాద వృత్తిలో కొనసాగిన వెంకటరామయ్య శాసనసభను కూడా న్యాయబద్ధముగా నడిపాడు. 1955 నుండి 1962 వరకు శాసనసభ సభ్యునిగా కొనసాగాడు. 1962లో రాజకీయాలనుండి వైదొలగి 1978 వరకూ న్యాయవాద వృత్తి కొనసాగించాడు.

మరణం

1983, జూన్ 28 న స్వగృహములో మరణించాడు.