గ్రామం

వికీపీడియా నుండి
ఇక్కడికి గెంతు: మార్గసూచీ, వెతుకు
ఆంధ్రప్రదేశ్‌లోని ఒక గ్రామంలో దృశ్యాలు
ఇంగ్లాండ్‌లోకాసిల్ కూంబ్ గ్రామంలో ప్రధావ వీధి, విల్‌షైర్ ప్రాంతంలో

గ్రామం (Village) లేదా పల్లె అనేది కొన్ని నివాసాల సముదాయం. ఇది నగరం లేదా పట్టణం కంటే చిన్నది. గూడెం (Hamlet) కంటే పెద్దది[1].

మనిషి సంఘజీవి కనుక ఇతరులతో అవసరాలను అనుసరించి దగ్గరగా జీవించుటకు కొందరు ఒకే చోట లేదా ఒకే ప్రాంతమును కేంద్రముగా చేసుకొని వారి వారి నివాసాలను ఏర్పాటు చేసుకోగా ఏర్పడునది ఒక గ్రామమవును. గ్రామాలు వాటి మధ్య వ్యాపార సంబంద కార్యకలాపాలు నెరపేందుకు వాటి కూడలిగా కొన్ని పట్టణాలు ఏర్పడతాయి. ఆయా పట్టాణాలను కేంద్రీకృతం చేసుకొని దగ్గర దగ్గరలో గ్రామాలు అభివృద్ది చెందుతాయి. ఎక్కువ గ్రామాలు శాశ్వతంగా ప్రజలు నివాసం ఉండేవి. కాని కొన్ని గ్రామాలు తాత్కాలికం కావచ్చును. అలాగే ఎక్కువ గ్రామాలలో ఇండ్లు దగ్గర దగ్గరగా ఉంటాయి. కాని కొన్ని గ్రామాలలో ఇండ్లు దూర దూరంగా ఉండవచ్చును[2].


చారిత్రికంగా వ్యవసాయం గ్రామాల ఏర్పాటుకు పట్టుకొమ్మ కాని కొన్ని గ్రామాలు ఇతర వృత్తులు ఆధారంగా ఏర్పడ్డాయి. రాజకీయ, పరిపాలనా ప్రయోజనాల కారణంగానూ, పారిశ్రామిక విప్లవం అనంతరం పరిశ్రమలు విస్తరించడం వలనా అనేక గ్రామాలు పట్టణాలుగానూ, నగరాలుగానూ వృద్ధి చెందాయి.

ప్రపంచ వ్యాప్తంగా లక్షలాది గ్రామాలు ఉన్నందున వీటిలో ఎంతో వైవిద్యం ఉంది. కనుక గ్రామం అంటే ఇలా ఉంటుంది అని చెప్పడం కష్టం. షుమారుగా 10 నుండి 1000 వరకు కుటుంబాలు ఉండే గ్రామాలు ఎక్కువగా ఉంటాయి. 2001 జనాభా లెక్కల ప్రకారం భారత దేశంలో మొత్తం 6,38,365 గ్రామాలు (నిర్జన గ్రామాలతో కలిపి) ఉన్నాయి[3]. అధికంగా గ్రామాలలో నివాసాలు అక్కడి అవసరాలను బట్టి ఉంటాయి.

  • రక్షణ అవుసరమైన చోట (దొంగల భయం వంటివి ఉన్నట్లయితే) నివాసాలు దగ్గర దగ్గరగా ఉంటాయి.
  • అక్కడి వాతావరణాన్ని బట్టి, అక్కడ దొరికే వస్తువులను బట్టి నివాసాల నిర్మాణం జరుగుతుంది. ఉదాహరణకు కేరళలో వర్షాలను తట్టుకొనే ఇళ్ళు, హిమాచల్ ప్రదేశ్‌లో హిమపాతాన్ని తట్టుకొనేవిధంగా నిర్మించిన ఇళ్ళు కొండలపై దూరదూరంగా ఉంటాయి. రాజస్థాన్ ఎడారిలో ఇళ్ళలో కలప కంటే మట్టి వినియోగం ఎక్కువ.
  • అక్కడి వృత్తులు కూడా ఇళ్ళ నిర్మాణాన్ని, ప్రజల జీవనాన్ని బాగా ప్రభావితం చేస్తాయి.
  • దగ్గరలో ఉండే నగరాల వనరులు, అవసరాలు, వాణిజ్య సంబంధాలు గ్రామ జీవనంపై గణనీయమైన ప్రభావం కలిగి ఉంటాయి. ఉదాహరణకు నగరం దగ్గరలో ఉన్న గ్రామాలలో పాల ఉత్పత్తికి, కూరగాయల పెంపకానికి మంచి ప్రోత్సాహం లభిస్తుంది.

గ్రామాల పేర్లు[మార్చు]

పేర్లలో ఉన్న పదాలను ఆధారంగా చేసుకుని తెలుగువారి గ్రామనామాలను నాలుగు విధాలుగా విభజించవచ్చు.

  • తెలుగువారి గ్రామాల పేర్లు సాధారణంగా రెండు పదాలతో ఏర్పడుతుంటాయి. ఉదాహరణగా తీసుకుంటే కంచుమర్రు (కంచు, మర్రు), పాలమూరు (పాలము, ఊరు), గండికోట (గండి, కోట) వంటివి ఎన్నో ఉన్నాయి.
  • ఒక పదంతో ఏర్పడిన పేర్లు కూడా ఉన్నాయి. ఉదా: అత్తిలి, దర్శి, తడ, కంభం.
  • పేరులో మూడు పదాలు ఉన్న గ్రామాలు ఉన్నాయి. ఉదా: దొంగల గన్న వరం (దొంగల, గన్న, వరం), తూర్పు లంక పల్లి (తూర్పు, లంక, పల్లి).
  • నాలుగు పదాలతో కూడిన పేర్లున్న గ్రామాలు. ఉదా: నీళ్ళు లేని తిమ్మా పురం.

ఒకే పేరుతో ఉన్న గ్రామాలు తప్పితే ఇతర గ్రామాల పేర్లన్నిటిలోనూ ఉండే ఆఖరి పదం (suffix)రెండు, మూడు, నాల్గు పదాలున్న గ్రామాల్లోనైనా సాధారణంగా గ్రామాన్ని వర్గీకరించడంలో ఉపయోగపడుతూంటాయి. వైవిధ్యభరితమైన పేర్లు ఎన్నో ఈ ఉత్తర పదంలో కనిపిస్తాయి. కొండ (నీరుకొండ), గుండం (మోక్షగుండం), మంద (ఆవులమంద), చెరువు (మేళ్ళచెరువు), బయలు (గుర్రాలబయలు), గుంట (త్రోవగుంట), తోట (మల్లెతోట), కాలువ (కాటిగాని కాలువ), కట్టుబడి (అధ్వాన్నం నారాయణ కట్టుబడి), వనం (తులసివనం), కొండ్రలు(చేబ్రోలు వీరప్పకొండ్రలు), త్రోవ (తలుపులమ్మత్రోవ), శాత్తు (పరమశాత్తు), నరవ (బెడుదుల నరవ), కాణి (వరగాణి), కుంట (యాతాలకుంట), కటకం (ధాన్యకటకం), ఏరు (పాలేరు), రాల (దుగ్గిరాల), ముక్కల (నిడుముక్కల), అంకి (పోరంకి), మడుగు (గుండ్లమడుగు), బండ ( గాజులబండ), వంపు (నదివంపు), తిప్ప (నాగాయతిప్ప), రాయి (విజయరాయి), గడ్డ (పులిగడ్డ), సముద్రం (తిమ్మసముద్రం), రేవు (వాడరేవు), కోట (దేవరకోట), పట్టు (పూతలపట్టు), మడక (పూడిమడక), వాడ (విజయవాడ), లంక (కృష్ణలంక), మెట్ట (దిగువమెట్ట), మామిడి (దొరమామిడి), వరం (గన్నవరం), దరి (పెన్నదరి), కడప (దేవునికడప), పెంట (వనిపెంట), వాకిలి (యాటవాకిలి), దొరువు (జల్లుల దొరువు) వంటివి అసంఖ్యాకమైన ఉత్తరపదాల జాబితాలో కొన్ని.
పేర్లలో ఈ ఉత్తరపదాలు రావడానికి భౌగోళికమైన కారణాలు ఉంటాయి. కటకం అన్న పదం అడవిలోని పల్లెను సూచించే పదం. కొండత్రోవలోని పల్లెను నరవ అంటారు. వాగులు వంకల పక్కన ఉండి, ఏమాత్రం వరదలు వచ్చినా మునిగిపోయే ఊళ్లను పూడి అంటారు. బయలు-మేతకు వదిలే స్థలం, పాలెం- ప్రాంత పాలెగాడి నివాసస్థలం, గడ్డ-ఏటి ఒడ్డున ఎత్తైన భూభాగం, లంక-నదీమధ్యలోని విశాల భూభాగం అని అర్థాలు వస్తాయి. ఈ పేర్లు గల పలు గ్రామాలకు ఆయా నైసర్గిక స్థితి ఉండడం ప్రాచీన గ్రామనామాలను భౌగోళిక స్థితిగతుల అంచనాతో పెట్టినట్టు సూచిస్తోంది.
గ్రామనామాల్లోని ప్రథమభాగంలోని పదాల్లో కూడా ఎంతో వైవిధ్యం కనిపిస్తుంది. వ్యక్తులు, కులాలు, వృత్తులు, భౌగోళిక స్థితిగతులు, వృక్షజాతులు, జంతుజాతుల పేర్లే కాక పలు విశేషణాలు కూడా చోటుచేసుకుంటాయి. వ్యక్తుల పేర్లతో-జంగారెడ్డిగూడెం, రాజమహేంద్రవరం, మహబూబ్‌నగర్, హైదరాబాద్ తదితర జనావాసాలు, కులాల పేర్లతో బ్రాహ్మణ చెరువు, బోయగూడెం, రెడ్డిపాలెం, మేదరమెట్ల వంటి ఊళ్ళు, వృక్షజాలంతో ఆకుతీగల పాడు, చింతపల్లి, మర్రివలస, కోరుమామిడి, తాడిపత్రి వంటి గ్రామాలు, సింగరేణి, గొర్రెకుంట, పిల్లిగెడ్డ, ఉడతలపల్లి వంటి జంతుసంబంధమైన పేర్లున్న గ్రామాలు కొన్ని ఉదాహరణలు. భౌగోళిక స్థితిగతులు ప్రతిబింబించేలా కొండపల్లి, బండమీదిపల్లి వంటివాటి పేర్లు ఉన్నాయి. సుప్రసిద్ధిపొందిన ఓరుగల్లు పట్టణం పేరుకు అర్థం ఒక(ఒరు) రాయి(గల్లు) అన్నది కూడా పట్టణపు భూగోళిక స్థితినే సూచిస్తోంది. అయినంపూడి, అయినవిల్లి పేర్లలోని అయిన శబ్దానికి నదివంపు తిరిగే ప్రదేశంలో దానికి అభిముఖంగా వున్న ప్రదేశమని అర్థం. అలంపురం, రణక్షేత్రం వంటి గ్రామాల్లో ప్రసిద్ధయుద్ధాలు జరగడం వల్ల ఆ పేర్లు వచ్చాయి. విజయవాడ, విజయనగరం నగరాల్లో విజయ శబ్దం విశేషణంగా వచ్చింది. ఒకే పేరుతో దగ్గర ప్రాంతంలోనే రెండు గ్రామాలు ఉన్నప్పుడు అయోమయాన్ని నివారించేందుకు ముందు విశేషణాలు వచ్చి చేరుతాయి. చిన తాడేపల్లి-పెద తాడేపల్లి, చిన అమిరం-పెద అమిరం వంటి జంటలు అలా ఏర్పడ్డవే. వ్యక్తుల నామాలు గ్రామాలకు పెట్టుకోవడానికి కూడా వివిధ కారణాలు ఉంటాయి. హైదరాబాద్ నగరాన్ని నిర్మించిన కులీకుతుబ్ షా తాను ప్రేమించి పెళ్ళిచేసుకున్న హైదర్‌మహల్ పేరుమీదుగా హైదరాబాద్ అనీ నగరానికి పేరుపెట్టారు. తెలుగుచాళుక్యులలో ఒకరి బిరుదైన సర్వసిద్ధి మీద గౌరవంతో ఆ పేరుతో గ్రామం ఏర్పడింది. గ్రామనామాలలో వున్న వైవిధ్యభరితమైన, సూక్ష్మమైన అంశాలు మానవ సాంఘికచరిత్రకు ఆధారాలుగా నిలుస్తాయని అధ్యయనకారులు పేర్కొన్నారు. [4]

ఆంధ్రప్రదేశ్ లో గ్రామపాలన[మార్చు]

పూర్వం కరణం మునసబు పటేల్ పట్వారీ లు వారి సొంత గ్రామాల్లోనే ఉండి పాలన నడిపేవారు.1985 లో వీరిని తీసేసి గ్రామపాలనాధికారుల్ని (వి.ఏ.వో ) ప్రవేశపెట్టారు.పంచాయతీల నుంచి రెవెన్యూ వ్యవస్థను వేరు చేసిన నేపథ్యంలో 2007 ఫిబ్రవరి నుంచి వీఆర్వోల విధానం అమలులోకి వచ్చింది. జనాభా ప్రాతిపదికన వారిని నియమించారు. 5000 జనాభా ఉంటే ఒకరు, 5 వేల నుంచి 10,000 మంది వరకు ఉంటే ఇద్దరు, పది వేల నుంచి పదిహేను వేల మంది ఉంటే ముగ్గురు చొప్పున గ్రామ రెవిన్యూ అధికారి వీ.ఆర్.వో లు ఉండడానికి అనుమతి ఇచ్చారు. కానీ పంచాయతీ కార్యదర్శులను వీఆర్వోలుగా తీసుకున్న సమయంలో 'ఎక్కడి వారు అక్కడే' అన్న పద్ధతిలో వారిని ఉంచేశారు. ఫలితంగా కొన్ని చోట్ల ఉండవలిసిన వారికంటే ఎక్కువ మంది ఉంటే.. ఇంకొన్ని చోట్ల అసలే లేకుండాపోయారు. ఈ అసమానత కారణంగా ప్రజలకేగాక పాలనపరంగా కూడా ఇబ్బందులు ఎదురవుతున్నాయి.ఎవరినీ సొంత గ్రామానికి బదిలీ చేసేది లేదు.ఆయా జిల్లాల్లో ఖాళీగా ఉన్న వీఆర్వో ఉద్యోగాల భర్తీ సంబంధిత జిల్లా ఎంపిక కమిటీ (డీఎస్‌సీ) చేస్తుంది.. కొన్ని గ్రామాలను కలిపి ఒక సమూహం (క్లస్టర్)గా ఏర్పాటుచేశారు. రాష్ట్రంలో 12,397 క్లస్టర్లు ఉండగా 17,008 వీఆర్వోలు అవసరం. ప్రస్తుతం సుమారు 14,800 మంది వీఆర్వోలే ఉన్నారురాష్ట్రంలోని 21,943 గ్రామ పంచాయతీలను పరిపాలనా సౌలభ్యం కోసం 12,397 క్లస్టర్లుగా ఏర్పాటు చేసింది. 5 వేల జనాభా ఉన్న ఒకటి లేదా రెండు మూడు పంచాయతీలను కలిపి ఒక క్లస్టరుగా గుర్తించారు. ప్రతి క్లస్టర్‌కు ఒక కార్యదర్శి ఉండాలి. ప్రతి పంచాయతీ క్లస్టర్ 5 కిలోమీటర్ల పరిధిలో ఉండాలి. ఒక కార్యదర్శికి ఒక పెద్ద పంచాయతీ లేదా ఏడు చిన్నపంచాయతీల బాధ్యతలను అప్పగించారు. ఏజెన్సీ ప్రాంతంలో గ్రామ కార్యదర్శి ని కలవాలంటే 40-50 కిలోమీటర్లు ప్రజలు పయనించాలి. అడవుల మధ్యలో ఉన్న చిన్నపంచాయతీలకు వెళ్లాలంటే సరైన రవాణా సౌకర్యంలేదు. కనీసం గ్రామానికి ఒకరుండాలంటే పూర్వంలాగానే పంచాయతీ రెవిన్యూశాఖలను ఏకంచెయ్యాలి.మన రాష్ట్రంలో 1127 రెవిన్యూ మండలాలు,1094 మండలపరిషత్తులు,21943 గ్రామపంచాయితీలు,28124 రెవిన్యూ గ్రామాలు,26614 నివాసితగ్రామాలు,1510 నివాసులులేనిగ్రామాలు ఉన్నాయి.

భారత దేశంలో గ్రామాలు[మార్చు]

ఉత్తర భారతదేశంలోని గ్రామం.
మధ్య భారతదేశంలోని గ్రామం.
దక్షణ భారతదేశంలోని గ్రామం.

"భారత దేశం ఆత్మ పల్లెలలో ఉన్నది" అని మహాత్మా గాంధీ అన్నాడు[5]. 2001 జనాభా లెక్కల ప్రకారం దేశంలో 74% గ్రామీణ జనాభా.దేశంలో మొత్తం 6,38,596 గ్రామాలున్నాయి.593,731 గ్రామాలలో ప్రజలు నివసిస్తున్నారు[6]. వీటిలో 2,36,004 గ్రామాలలో జనాభా 500 లోపే ఉంది. 3,976 గ్రామాల జనాభా 10,000 పైబడి ఉంది.

రాష్ట్రం / కేంద్ర పాలిత ప్రాంతం 1991లో గ్రామాలు 2001లో గ్రామాలు
మొత్తం దేశం 634,321 638,596
ఆంధ్రప్రదేశ్ 28124
జమ్ము, కాష్మీరు 6,705 6,652
హిమాచల్ ప్రదేశ్ 19,388 19,831
పంజాబ్ 12,795 12,729
చండీగఢ్ 25 24
ఉత్తరాంచల్ 16,623 16,805
హర్యానా 6,988 6,955
ఢిల్లీ 209 165
రాజస్థాన్ 39,810 41,353
ఉత్తర ప్రదేశ్ 107,327 107,440
బీహార్ 45,077 45,113
సిక్కిం 453 452
అరుణాచల్ ప్రదేశ్ 3,649 4,065
నాగాలాండ్ 1,225 1,315
మణిపూర్ 2,212 2,391
మిజోరామ్ 785 817
త్రిపుర 856 870
మేఘాలయ 5,629 6,023
అసోం 25,590 26,247
పశ్చిమ బెంగాల్ 40,889 40,783
ఝార్ఖండ్ 32,620 32,615
ఒరిస్సా 51,057 51,352
ఛత్తీస్‌గఢ్ 20,378 20,308
మధ్యప్రదేశ్ 55,842 55,392
గుజరాత్ 18,509 18,544
డామన్ డయ్యూ 23 26
దాద్రా నగర్‌హవేలీ 71 70
మహారాష్ట్ర 43,025 43,722
మధ్య ప్రదేశ్ 28,000 28,123
కర్ణాటక 29,193 29,483
గోవా 369 359
లక్షద్వీప్ 23 24
కేరళ 1,384 1,364
తమిళనాడు 16,780 16,317
పుదుచ్చేరి 264 92
అండమాన్ నికోబార్ దీవులు 547 547

ఇతర దేశాలలో గ్రామాలు[మార్చు]

ఫిలిప్పీన్స్

ఫిలిప్పీన్స్ నగర ప్రాంతాలలో "village" అన్న పదాన్ని ప్రైవేటుగా నిర్మించిన గృహ సముదాయానికి అధికంగా వాడుతారు (గేటెడ్ కమ్యూనిటీలు). ఒకప్పుడు బాగా స్థితిమంతులైన వారి గృహాల సముదాయాలుగా ఆవిర్భవించిన ఈ జీవన విధానం ఇప్పుడు మనీలా వంటి నగరాలలో సర్వ సాధారణమైంది.

తైవాన్

తైవాన్‌లో నగరాలలో ఉపభాగాలను గ్రామాలు లేదా tsuen (村) అని వ్యవహరిస్తారు (ఇవి గ్రామీణ ప్రాంతాలలో ఉంటే). అదే గ్రామాలు నగరాలలో ఉంటే వాటిని (鄉) li (里 లేదా 鎮) అని అంటారు..

వియత్నాం

లాంగ్ ("làng")̲ అనబడే వియత్నాం గ్రామం వారి సమాజంలో మౌలికమైన యూనిట్. ఆసియాలోని పలు గ్రామాలవలె వియత్నాం గ్రామాలు అధికంగా వ్యవసాయాధారితమైనవి. సాధారణంగా ప్రతి వియత్నాం గ్రామానికి ఒక మెయిన్ గేటు (వెదురు గడలతో చేసినది -"lũy tre"), ఒక కమ్యూనిటీ హాలు ("đình làng" ఇక్కడ ఆ వూరి దేవత "thành hoàng" పూజింపబడుతాడు) ఉంటాయి. వూరి వరి పొలం ("đồng lúa"), గుడి ("chùa") కూడా సాధారణం. దాదాపుగా ఒక వూరిలో వారందరూ రక్త సంబంధీకులై ఉండే అవకాశం ఉంది. గ్రామాల సంప్రదాయాలు వియత్నాం సమాజంలో (ప్రభుత్వ చట్టాలకంటే కూడా) బలమైనవి. "రాజుగారి శాసనం పల్లె పద్ధతులకు లొంగి ఉంటుంది" ("Phép vua thua lệ làng") అనేది వారి నానుడి. గ్రామంలో ప్రతి వ్యక్తీ తన మరణానంతరం ఆ గ్రామంలోనే ఖననం చేయబడాలని కోరుకుంటాడు.

ఐరోపాలో

స్లావిక్ దేశాలు బోస్నియా-హెర్జ్‌గొవీనియా, బల్గేరియామ క్రొవేటియా, మేసిడోనియా, రష్యా, సెర్బియా, ఉక్రెయిన్ వంటి "స్లావిక్" దేశాలలో సెలో (Selo) అనే స్లావిక్ భాషాపదాన్ని గ్రామంకు వాడుతారు.

Typical house in a Russian village (derevnya)

1926-1989 మధ్యకాలంలో రష్యాలో గ్రామీణ జనాభా 76 మిలియన్ల నుండి 39 మిలియన్లకు తగ్గింది. ప్రజలు నగర ప్రాంతాలకు తరలి పోవడం ఇందుకు ముఖ్య కారణం. 1930-37 మధ్య కాలంలో కరువు కారణంగా 14 మిలియన్ పేద గ్రామీణులు మరణించారని అంచనా[7].

చాలా మటుకు రష్యాలోని గ్రామాలు 200 లేదా అంతకంటే తక్కువ జనాభాను కలిగి ఉంటాయి. ఇలాంటి చిన్న చిన్న గ్రామాల్లోని ప్రజలే వలస వెళ్తుంటారు. ఉదాహరణకు 1959లో దాదాపు 50% గ్రామీణ జనాభా రష్యాలో 500 కంటే తక్కువ జనాభా కలిగిన గ్రామాల్లో నివాసం ఉండేది, ఇప్పుడు ఆ సంఖ్య 1/3 వంతు కంటే తక్కువగా ఉంటుంది. 1960లు మరియు 70లలో అధికారులు వ్యవసాయదారులను అతిచిన్న గ్రామాల నుండి కొంచెం పెద్ద గ్రామాలకు తీసుకునివెళ్ళి ఉపాధి కల్పించేవారు[8].

ఇతర దేశాలో లాగానే రష్యా గ్రామాలలో నివాసం ఉండేవారు అధికంగా వ్యవసాయం మీద ఆధారపడుతారు. ఎక్కువ మంది తమ ఆహారాన్ని తామే ఉత్పత్తి చేసుకొంటారు. ధనికులైన పట్టణ వాసుల రెండవ విశ్రాంతి గృహాలు ఎక్కువగా ఉన్న కొన్ని గ్రామాలు డచా సెటిల్‌మెంటులుగా ఆవిర్భవిస్తుంటాయి.


దక్షిణ రష్యాలోను, ఉక్రెయిన్‌లోను అధికంగా ఉన్న కొస్సాక్ జనుల జీవనం అక్కడి సారవంతమైన నేల వలన మిగిలిన ప్రాంతాల జీవనం కంటే భిన్నంగా ఉండేది. మిగిలిన ప్రాంతాలలో బలంగా ఉన్న భూస్వామి అధిపత్యం ఇక్కడ ఉండేది కాదు. కనుక వీరు సెర్ఫ్ విధానానికి లోబడేవారు కాదు. చిన్న చిన్నరైతులు తమ స్వంత పొలం 'ఖుతూర్'లో నివాసం ఉండేవారు. కాకస్ పర్వత శ్రేణుల ప్రాంతాలలోని అధికంగా ముస్లిమ్ జనాభా ఆవాసాలను ఆల్ లేదా ఇదెల్ ఉరల్ అంటారు.

యునైటెడ్ కింగ్‌డమ్

ఇంగ్లాండ్‌లో ఎక్కువగా పల్లపు మైదాన ప్రాంతాలలో గ్రామాలు ఉన్నాయి. సాధారణంగా'గూడెం'(hamlet)లో చర్చి ఉండదు. గ్రామం (village)లో చర్చి ఉంటుంది. గ్రామం అని (పట్టణఁ కాదని) చెప్పడానికి ముఖ్యమైన లక్షణాలు - (1) వ్యవసాయ మార్కెట్ ఉండదు (2) టౌన్ హాల్, మేయర్ వంటి వ్యవస్థలు ఉండవు (3) హద్దులలో పచ్చని ప్రాంతాలు (పొలాల వంటివి) ఉంఠాయి (4) దగ్గరలోని పట్టణం లేదా నగరానికి ఈ గ్రామంపై ఏ విధమైన అధికారిక అజమాయిషీ ఉండదు. - అయితే ఈ లక్షణాలు చాలావరకు ఈ మధ్యకాలంలో మారుతున్నాయి.

ఫ్రాన్స్

ఫ్రాన్స్‌లోని గ్రామాలు కూడా పైన చెప్పిన ఇంగ్లాండ్ గ్రామాల లక్షణాలు కలిగి ఉంటాయి.

నెదర్లాండ్స్

ఆహార పదార్ధాల ఉత్పత్తి అధికంగా ఉన్న జిల్లాలలోని గ్రామాలు అధికంగా కృత్రిమమైన గుట్టలు (terps) పైని నిర్మించబడ్డాయి. (దేశంలో ఇవి పల్లపు ప్రాంతాలు గనుక). తరువాత "డైక్" నిర్మాణాలు వచ్చినాక ఈ విధానం మారింది..


లెబనాన్

ఎక్కువ గ్రామాలు పర్వతమయ ప్రాంతాలలో ఉన్నాయి. ఎక్కువ గ్రామాల పేర్లుఅరామిక్ భాష ఆధారంగా ఏర్పడినాయి. 18వ శతాబ్దం వరకు ఈ భాష లెబనాన్ పర్వత ప్రాంతంలో వాడబడేది[9]. ఎక్కువ గ్రామాలు " కదా (kadaa)" అనబడే జిల్లాలలోని ఉప విభాగాలు.


పసిఫిక్ దీవులు

పసిఫిక్ దీవులలోని చిన్న చిన్న జనావాసాలను (బయటి నుండి వచ్చిన) ఇంగ్లీషువారు గ్రామం అనేవారు. కొన్ని గ్రామాలు చాలా పెద్దవైనా పేరు మాత్రం అలాగే ఉంది. ఉదాహరణకు గ్వామ్ గ్రామం జనాభా 40,000 పైబడి ఉంది.

న్యూజిలాండ్

సంప్రదాయిక మావొరీ గ్రామం ఉదాహరణ పా. కొండపైన రక్షితమైన గ్రామం. నిర్మాణానికి అధికంగా దూలాళు వాడుతారు.

ఆస్ట్రేలియా

ఆస్ట్రేలియాలో విలేజెస్ అనబడే చిన్న చిన్న జనావాసాలు అధికంగా ప్లాన్ చేయబడినవి. ఇవి పదవీ విరమణ చేసిన వారికి, వ్యాపారానికి, యాత్రికులకు - ఇలా ప్రత్యేక అవసరాలకు నిర్మించబడ్డాయి.

అర్జెంటీనా

ఎక్కువ గ్రామాలు పర్వతాలలో ఉన్నాయి. కొన్ని గ్రామాలు పర్యాటకులను ఆకర్షించడానికి అధికంగా ప్రసిద్ధం. ఉదాహరణ: లా కుంబ్రసిటా, విల్లా ట్రఫుల్, లా కుంబ్రె

యునైటెడ్ స్టేట్స్


అమెరికా లోని 20 రాష్ట్రాలలో [10] విలేజ్ (village) అనే పదాన్ని ప్రభుత్వం ద్వారా ఏర్పాటు చేయబడిన ఇన్‌కార్పొరేటెడ్ మునిసిపల్ గవర్నమెంట్ పాలనా వ్యవస్థ కలిగిన జనావాసాలను సూచించడానికి వాడుతారు. వివిధ రాష్ట్రాలలో 'గ్రామం' అన్న పదం జనసంఖ్య కంటే అక్కడి పాలనా వ్యవస్థను బట్టి వర్తించబడుతుంది. న్యూయార్క్ వంటి నగరాలలో ఒక గ్రామాంలోని ప్రజలు గ్రామానికి, నగరానికి కూడా చెందుతారు. అక్కడ నివసించేవారు గ్రామానికీ, నగరానికీ కూడా పన్నులు చెల్లిస్తారు. రెండింటి ఎన్నికలలోనూ వోటు వేస్తారు.

ఇవి కూడా చూడండి[మార్చు]

మూలాలు[మార్చు]

  1. http://www.answers.com/village&r=67
  2. http://www.google.co.uk/search?hl=en&safe=off&q=%22transient+villages%22&btnG=Search&meta=
  3. భారతీయ జన గణన వారి సమాచారం
  4. తెలుగువారి ఊళ్ల పేర్లు – ఇంటి పేర్లు:యార్లగడ్డ బాలగంగాధరరావు:తెలుగు పలుకు: 2013 తానా సమావేశాల ప్రత్యేక సంచిక
  5. http://www.pibbng.kar.nic.in/feature1.pdf
  6. http://www.censusindia.net/results/2001census_data_index.html
  7. Robert Conquest (1986) The Harvest of Sorrow: Soviet Collectivization and the Terror-Famine. Oxford University Press. ISBN 0-19-505180-7.
  8. "Российское село в демографическом измерении" (Rural Russia measured demographically) (Russian). ఈ క్రింది పట్టిక రష్యా జనాభా లెక్కలను సూచిస్తుంది:
    Census year 1959 1970 1979 1989 2002
    Total number of rural localities in Russia 294,059 216,845 177,047 152,922 155,289
    Of them, with population 1 to 10 persons 41,493 25,895 23,855 30,170 47,089
    Of them, with population 11 to 200 persons 186,437 132,515 105,112 80,663 68,807
  9. http://almashriq.hiof.no/lebanon/400/410/412/elies_project/glimse_of_yesterday.html
  10. http://www.websters-online-dictionary.org/definition/english/vi/village.html#Definitions

బయటి లింకులు[మార్చు]

"http://te.wikipedia.org/w/index.php?title=గ్రామం&oldid=1079842" నుండి వెలికితీశారు