గురువు (జ్యోతిషం)

Member of నవగ్రహాలు
గురువు
దేవతలా గురువు , Jupiter
దేవనాగరి	बृहस्पति
నివాసం	దేవలోకం
మంత్రం	ఓం బృహస్పతయే నమః
Day	గురువారం
భర్త / భార్య	తార
పిల్లలు	భారద్వాజ , కచ, కేసరి
వాహనం	ఏనుగు
తండ్రి	అంగీరసుడు

గురువు దేవ గురువు. ఇతడు సద్బ్రాహ్మణుడు. గురువుకు బృహస్పతి అనేది ఇతడికి ఉన్న నామాలలో ఒకటి.ఇతడికి వాచస్పతి, దేవేజ్యుడు, ఆంగీరస, జీవ అనే ఇతర నామాలు ఉన్నాయి. ఆది వారంతో మొదలయ్యే వారాలలో గురువుది అయిదవ స్థానం. అందుకే దానిని బృహస్పతి వారం అని కూడా అంటారు. అత్యంత శక్తి వంతమైన గ్రహం. పురుష గ్రహం, అధి దేవత బ్రహ్మ, రుచులలో తీపికి రుచి కారకుడు, వయసు ముప్పై, ప్రకృతి కఫ ప్రకృతి, హేమంత ఋతువుకు అధిపతి, తత్వం ఆకాశ తత్వం, దిక్కు ఈశాన్య దిక్కును సూచిస్తాడు. లోహములలో బంగారమును, రత్నములలో పుష్యరాగమును సూచిస్తాడు. గురువు లగ్నంలో దిక్బలం కలిగి ఉంటాడు. గోదావరి వింధ్య పర్వత నడుమ ఉన్న భూమికి గురువు అధిపతి. గురువు పునర్వసు, విశాఖ, పూర్వాభద్ర నక్షత్రములకు అధిపతి. అంటే పునర్వసు, విశాఖ, పూర్వాభద్ర నక్షత్ర జాతకులకు గురుదశ ప్రారంభ దశ. గురువు కటక రాశిలో ఉచ్ఛ స్థితిని, మకర రాశిలో నీచ స్థితిని పొందుతాడు. గురువు ధనస్సు రాశికి, మీనరాశికి ఆధిపత్యం వహిస్తాడు. గురువుకు మిత్రులు రవి, చంద్ర, కుజులు. శత్రువులు బుధ, శుక్రులు. సముడు శని. గురుదశ పదహారు సంవత్సరాలు. స్వభావం మృదు స్వభావం, సత్వగుణం, శుభ గ్రహం, జీవులు ద్విపాదులు, స్థానం ధనాగారం, అత్మాధికారత్వం జ్ఞానం, ధాతువు కొవ్వు, కుటుంబ సభ్యులు పుత్రుడు, గృహ స్థానం పూజ గది, ధన స్థానము, కాల బలం పగలు, స్థాన బలం లగ్నం, కాల ఆధిపత్యం మాసము, దిక్బలం తూర్పు, వర్ణం పసుపు వర్ణం, రాశిలో ఉండే కాలం ఒక సంవత్సరం, సమిధ రావి, మూలిక రావి అరటి వేరు, గోత్రము అంగీరస, వేదము ఋగ్వేదము, అవతారం వామనుడు.

రూపం

గురువుది స్థూల శరీరం, కపిల వర్ణ కనూలు, కపిల వర్ణ వెండ్రుకలు, పీతవర్ణ శరీర కాంతి కలవాడు. నాలుగు భుజములు కలిగి చేతులలో దండము, కమండలం, రుద్రాక్షమాల ధరించి ఉంటాడు. గురువు పీతాంబర ధారి, వాహనము ఏనుగు. గురువు భార్య తార, తండ్రి అంగీరసుడు, తల్లి ప్రజాపతి మారీచి పుత్రిక అయిన సురూప.

గురువు కారకత్వం

ధనం,విద్య,పుత్రులు,జ్యేష్ట భ్రాత,దేహపుష్టి,బుద్ధి,అర్ధసంపద,యజ్ఞం,కీర్తి,గృహం,బంగారం,శస్త్రం,అశ్వం,మెదడు,జ్యోతిషం,వేదశాస్త్రం,శబ్ధశాస్త్రం, వాహనశాస్త్రం,ఆందోళికం,గంజం,యజ్ఞయాగాధి క్రతువులు,కర్మ,ఆచారం,ఛాందసం,సుజనత్వం,శాంతం,మంత్రిత్వం,ఐశ్వర్యం,బంధివృద్ధి,దయ, దాక్షిణ్యం,ధర్మం,దైవభక్తి,వస్త్రం,సత్యం,తర్కం,మీమాంస,సింహాసనం,వాగ్దోరిణి,పసుపురంగు,నృపసన్మానం,ధర్మం,వెండి,బ్రాహ్మణులు,జ్ఞానం, కోశాగారం,నవీనగృహం,బంధుసమూహం,సుబుద్ధి,ఉత్తరదిశ,కావ్యజ్ఞానం,నిక్షేపం,వైడూర్యం,ఊరువులు,అగ్నిమాంద్యం,దంతములు,వేదాంతజ్ఞానం, బ్రాహ్మణభక్తి,శ్రద్ధ,పాండిత్యం,బ్రాహ్మణవృత్తి,ఉపాద్యాయవృత్తి,ముద్రాధికారం,భాతృశుఖం,సంపత్తి,బహువిధ విద్వత్తు,వ్యాకరణం,రక్తం,పిత్తాశయం, రక్తనాళములు,ఉన్నత విద్యపై అధికారం,వాణిజ్య విషయములు,ధన విషయములు మొదలైనవి గురుగ్రహ కారకత్వాలు. ఆహార పదార్ధాలు నెయ్యి, నూనె, పాలు, వెన్నలకు కారకత్వం వహిస్తాడు. శనగలు, పనస కాయలు, దబ్బకాయలకు కారకత్వం వహిస్తాడు. పక్షులలూ పావురం, హంసలు జంతువులలో గుర్రములు, ఏనుగులకు, సింహములు వృక్షములలో వట వృక్షం కారకత్వం వహిస్తాడు. పుస్తకములు, కళాశాలలు, వైద్యులు, లాయర్లు, పూజారులు, ఫాదర్లు, బిషప్పులు, చర్చి మసీదు వంటి మత సంస్థలు, కరుణ, సంతోషం, పెట్టుబడులు, అభివృద్ధి, ఐశ్వర్యం, ఉపాసన, వీదేశీయులు, భవిష్యత్తు, బహుమతులు, ఆచారాలు బ్యాంకులు, ధనుర్విద్య, రేసులు, టైటిల్స్, నిజాయితీలను సూచిస్తాడు.

గురు ప్రభావం

గురు ప్రభావితులు స్థూలకాయం కలిగి మంచి ఆకారం కలిగి ఉంటారు. గురుగ్రహ ప్రభావితులకు ఆహారం, వస్త్రం వంటి జీవిత సౌఖ్యములు పుష్కలంగా ఉంటాయి. సంప్రదాయాల పట్ల గౌరవం, దైవభక్తి, పాండిత్యం, న్యాయ బుద్ధి, ధర్మనితరి, జ్ఞానం కలిగి ఉంటారు. చక్కని కంఠధ్వని, విశాల నేత్రాలు కలిగి ఉంటారు. విద్యావంతులై విద్యా సంస్థలతో సంబంధం కలిగి ఉంటారు. న్యాయశాస్త్ర అధ్యయనం, దేవాలయ వ్యవస్థ, విద్యా సంబదిత పదవులలో రాణిస్తారు.

పూజా విధానం

గురువుని పూజించుటకు బంగారు ప్రతిమను వాడాలి. దధ్యోజనం, శనగలు నైవేద్యం చేయాలి. శివ సహస్ర నామావళి, గురువుకుఆధిదేవత బ్రహ్మ, ప్రత్యధి దేవత ఇంద్రుడు కనుక వీరిని ఆరాధించాలి. దోష నివారణకు పసుపు వర్ణ వస్త్రములను దక్షిణ తాంబూలముతో దానం చెయ్యాలి. గురు అష్టోత్తర నామావళి, దత్త చరిత్ర, బ్రహ్మంగారి చరిత్ర వంటి గురు చరిత్రలను పారాయణం చెయ్యాలి. గురువుకు ఇష్టమైన వ్రతం అనఘా వ్రతం. గురువుకు ప్రీతికరమైన రోజు అషాఢ పూర్ణిమ. ధరించ వలసిన మాలలు చందన మాల, పుష్యరాగ మాలలు. పంచ ముఖ రుద్రాక్షను ధరించ వచ్చు. బంగారం, పసుపు, శనగలు, పసుపు రంగు వస్త్రాలు దానం చెయ్యాలి. పసుపు రంగు పండ్లు, పసుపు రంగు పూలను పూజకు ఉపయోగించాలి. గ్రహశాంతికి చేయవలసిన జపం పదహారు వేలు. హోమముకు రావి చెట్టు పుల్లలను వాడాలి. గురువులను ఆరాధించుట, గురువు ఆలయాలను దర్శించుట, గురుదీక్షలను స్వీకరించుట వలన దోష నివారణ చేయవచ్చు.

గురును బృహస్పతి అని కూడా పిలుస్తారు. ఒక ప్రయోజన గ్రహం దేవతల గురువు. పురాణాల ప్రకారం బ్రహ్మచరిత, చరితదేవి దంపతుల కుమారుడైన అంగిరాస్ కు గురుదేవుడు జన్మించాడు. గురు (బృహస్పతి) గ్రహం ద్వాదశ చక్రాలను తిరిగి రావడానికి పుష్కర కాలం పన్నెండు సంవత్సరాలు పడుతుంది. ప్రతి రాశిలో ఒక సంవత్సరం పాటు ఈ రాశి ఉంటుంది. ఇది ఒక రాశి నుండి మరో రాశిలోకి ప్రవేశించడాన్ని లేదా కదలికను గురుపెయార్చి అంటారు.గురుపెయార్చి 2019 వల్ల ప్రయోజనాలివే.. లగ్నము నుండి 4, 7, 10వ స్థానాల్లో గురు ఉంటే, ఆ వ్యక్తికి సంపద పెరుగుతుందని, ధనలక్ష్మీ ఇంట్లో నివసిస్తుందని చెబుతారు. 12వ స్థానాన్ని కూడా గురు గరిష్ఠ స్థానం అని అంటారు. దీనివల్ల జాతక సంపన్న జీవితం లభిస్తుంది. వివాహం, పిల్లలు, అదృష్టం, సంపద, మొదలైన వాటికి గురువు బాధ్యత వహిస్తాడు. గురువు ఉన్నతమైన లేదా సొంత ఇంట్లో మంచి స్థితిలో ఉంటే, స్థానికుడు ప్రభావవంతమైన వ్యక్తి అవుతాడు. అన్ని ప్రయోజనాలు ఆనందాన్ని పొందుతాడు. వారు అసాధ్యమైన పనులను సాధ్యమైన రీతిలో చేస్తారు. ఒకవేళ గురు బలంగా లేకపోతే, వారు జీవితంలో ఎన్నో ఇబ్బందులు ఎదుర్కోవాల్సి ఉంటుంది. ద్రవ్య పరిస్థితులు అస్థిరంగా ఉంటాయి వారి జీవితంలో అడ్డంకులు కనిపిస్తాయి. ధనస్సు రాశి మీన రాశులకు గురు ప్రభువు. సూర్య చంద్రులను మినహాయించి మిగతా గ్రహాలన్నీ రెండు రాశులకు ప్రభువులే. జ్యోతిష శాస్త్రం ప్రకారం ఎవరైనా జీవితంలో సంతోషంగా ఉండాలన్నా, లేదా ప్రశాంతంగా జీవించాలన్న, విజయాలు సాధించాలన్నా, ఆర్థికంగా బలపడాలన్నా గురువు అనుగ్రహం చాలా అవసరం. ఇక గురు గ్రహం గురించి ఇప్పుడు టాపిక్ ఎందుకు వచ్చిందంటే 2019 మార్చి ఉదయం 3.11 గంటలకు గురుడు ధనస్సు రాశిలోకి ప్రవేశించాడు. ఈ విషయం అందిరికీ తెలిసిందే. తర్వాత 2019 ఏప్రిల్ 14న 5.55 గంటలకు అదే గురుడు వృశ్చిక రాశిలోకి ప్రవేశించనున్నాడు. దీని వల్ల ద్వాదశ రాశులపై గురుడి ప్రభావం పడనుంది. ఇాదంతా బాగానే ఉన్నా గురుడు ఇప్పటికే వృశ్చికరాశి ప్రవేశించి ఉన్నాడని, రేపు అనగా ఆగస్టు 29వ తేదీన ధనస్సు రాశిలోకి ప్రవేశిస్తున్నట్లు తెగ ప్రచారం జరుగుతోంది. ఇదంతా ఎంతవరకు నిజమనేది తెలియాల్సి ఉంది.

ఏయే రాశి వారిపై గురుడి ఎలా ఉంటుందో ఓ లుక్కేద్దాం.. మేష రాశిపై గురుడి ప్రభావం అనుకూలంగా ఉంటుంది. మేషరాశి వారు వృత్తిపరంగా మంచి పేరు తెచ్చుకుంటారు. సమాజంలో కూడా వీరికి మంచి గుర్తింపు వస్తుంది. ఆధ్యాత్మిక క్షేత్రాలకు వెళ్లే అవకాశాలున్నాయి. వెళితే మంచిదని శాస్త్రం చెబుతుంది. వృషభరాశిలో గురుడు 8వ స్థానంలో ఉంటాడు. వీరు కూడా వృత్తిపరంగా ఎదుగతారు. ఈ రాశి వారు ప్రయత్నాలు ఎన్ని చేసినా నిరాశ చెందే అవకాశముంది. మీ ఆరోగ్యంపైనా ప్రభావం పడనుంది. మిథునరాశిపై గురు గ్రహం ఏడో స్థానంలో ఉండి అనుకూల ప్రభావం ఉంటుంది. ఈ రాశి వారు వ్యాపారంలో లేదా షేర్ మార్కెట్లో మీరు పెట్టే పెట్టుబడులు మంచి ఫలితాలను ఇస్తాయి. కర్కాటక రాశిపై గురుడు వ్యతిరేక ప్రభావం చూపుతాడు. ఇక్కడ గురువు ఆరో స్థానంలో ఉంటారు. ఈ రాశివారు కొంత అనారోగ్యానికు గురయ్యే అవకాశం ఉంది. మానసికంగానూ, శారీరకంగానూ ఈ రాశి వారు చాలా ఇబ్బందులను ఎదుర్కొంటారు. అరటి చెట్టుకు పూజ చేస్తే మంచి ఫలితాలుంటాయి. సింహరాశిలో గురుడు ఐదో స్థానంలో ఉంటారు. దీంతో ఈ రాశివారు ఆర్థికంగా బలపడతారు. వారు ఉండే రంగాల్లో అభివృద్ధి సాధిస్తారు. దీనివల్ల సమాజంలో కూడా వీరికి మంచి గుర్తింపు లభిస్తుంది. వాహనాలు కొనుగోలు చేసే అవకాశం ఉంది. కన్యరాశిలో గురువు నాలుగో స్థానంలో ఉంటాడు. ఈ రాశివారిపై గురుడి ప్రభావం ఉంటుంది. మీరు నమ్మే వ్యక్తులే మిమ్మల్ని మోసం చేస్తారు. మీ భావోద్వేగాలను దెబ్బ తీస్తారు. ఈ రాశి వారు ప్రపంచానికి దూరంగా, ప్రశాంతంగా, శాంతియుతంగా జీవితం గడపాలని భావిస్తారు. తులరాశిలో గురుడు మూడో స్థానంలో ఉంటాడు. వీరి పనులు రీత్యా నివసించే ప్రాంతం మారాల్సి ఉంటుంది. మీరు పసుపు లేదంటే లేదా చపాతీలు ఏదైనా సరే ఆవుకు హారంగా పెడితే మంచింది. వృశ్చికంపై గురుడు రెండో స్థానంలో ఉంటాడు. ఈ రాశిపైనా గురుగ్రహం ఉంటుంది. ఈ రాశి వారికి ఎక్కువగా అదృష్టం వరిస్తుంది. మీకు అన్ని విషయాల్లో కుటుంబం అండగా ఉంటుంది. ధనస్సు రాశిలో ప్రథమ స్థానంలో ఉంటాడు. దీంతో ఈ రాశివారిపై అనుకూల ప్రభావం ఉంటుంది. వైవాహిక జీవితంలో, ప్రేమ విషయంలో సంతోషంగా ఉన్నప్పటికీ ఆర్థికంగా ఇబ్బందులు ఎదుర్కొంటారు. మకరరాశిపై గురుడి ప్రభావం ఎక్కువగా ఉంటుంది. ఈ రాశివారి వైవాహిక జీవితం చాలా బాగుంటుంది. ఈ రాశివారు ఆధ్యాత్మికత క్షేత్రాలకు వెళ్తే మంచింది. గురుడు పదకొండో స్థానంలో ఉంటాడు. మీనరాశిపై గురుడు ప్రభావం చూపుతాడు. ఈ రాశి కుటుంబం ప్రశాంతంగా ఉంటుంది. ఈ రాశి వారు కూడా కాస్త ఇబ్బందులు పడే అవకాశాలు ఉన్నాయి.

గోచారములోగురువు

1.

కొన్ని విశేషములు

• కారకత్వము:-

1. వృత్తులు :- గురు బలంతో న్యాయవాదులు, న్యాయ మూర్తులు, బోధకులు, ఉపాధ్యాయులు, సామాజిక రచయితలు, మత ప్రవక్తలు, పురోహితులు, మత ప్రచారకులు, ఉన్నత ప్రభుత్వ పదవులు వహిస్తారు. గురువు రవి చంద్రులతో కలిసిన బ్యాంకులు, అధ్యక్షులు, మేయర్, కౌన్సిలర్లు, పార్లమెంటు సభ్యులు, మేనేజరు, మేనేజింగు డైరెక్టర్లు అయ్యే అవకాశం ఉంది. గురు బుధులు కలిసిన విదేశీ భాషలు, ఎగుమతులు దిగుమతులు, సివిల్ ఇంజనీరింగ్ వంటి వృత్తులను సూచించును.
2. వ్యాధులు :- మధుమేహం, కాలేయము, ప్రేగులకు సంబంధించిన వ్యాధులు, బోదకాలు, చెమట, నీరు చేరటం, నిస్సంతానం, కాన్సర్ వంటి వ్యాధులు.గురువు చంద్రుడితో కలిసిన గర్భాశయ వ్యాధులు, శుక్రుడితో కలిసిన మధుమేహం, విచిత్రమైన కోరికలు, రవితో కలిసిన కొలెస్ట్రాల్, మూత్ర పిండ వ్యాధులు, అతిమూత్ర వ్యాధి, పసిరిికలు, కామెర్లు వంటి వ్యాదులను సూచించును.
3. గురువు అంగీరస నామ సంవత్సరము వైశాఖ శుద్ధ ఏకాదశీ గురు వారం ఉత్తర ఫల్గుణీ నక్షత్రం నాడు అంగీరస సురూపలకు పుత్రుడుగా జన్మించాడు.

• క్షేత్రము.

1. స్వక్షేత్రము :- ధనుస్సు, మీనము.
2. ఉచ్ఛ క్షేత్రము :- కర్కాటకము.
3. శత్రుక్షేత్రము :- మిథునము, కన్య,
4. మిత్రక్షేత్రము :- మేషము, వృషభము, సింహము.
5. సమక్క్షేత్రము :- వృషభము, తుల.
6. నీచక్షేత్రము :- మకరము.
7. మూలత్రికోణ క్షేత్రము :- ధనుస్సు
8. గోచార రీత్యా శుభస్థానాలు :- 2,5,7,9,11.
9. గోచారరీత్యా అశుభస్థానములు:-1,3,4,6,8,12.

• గ్రహాలు

1. మిత్ర గ్రహాలు :- సూర్యుడు, కుజుడు.
2. శత్రు గ్రహాలు :- బుధుడు.
3. సమ గ్రహాలు :- శని, శుక్రుడు.
4. వ్యధా గ్రహము :- చంద్రుడు.
5. నైసర్గిక బలగ్రహము :- శుక్రుడు.

• గృహ స్వభావము.

1. స్వభావము :- శుభుడు.
2. ఇతరనామాలు :- శుభుడు, జీవ, అంగీరస, వాచస్పతి, దేవేజ్యుడు.
3. లింగము :- పురుష.
4. జాతి :- బ్రాహ్మణ.
5. వర్ణము : - లేత పసుపు పచ్చ.
6. తత్వము :- ఆకాశతత్వము.
7. గుణము :- సత్వగుణము.
8. రుచి :- తీయన.
9. గ్రహోదయము :- ఉభయ.
10. జీవులు :- ద్విపాద.
11. గ్రహస్థానము ధనాగారము.
12. ఆధిపత్య దిక్కు :- ఈశాన్యము.
13. జలభాగము :- జల.
14. ఆత్మాధికారము :- జ్ఞానము.
15. పాలనాశక్తులు :- మంత్రి.
16. శరీరధాతువు :- కొవ్వు.
17. లోహము :- బంగారము.

• కాలము.

1. కాలబలము :- పగలు, లగ్నము.
2. ఆధిపత్యకాలము :- మాసము.
3. దిన చలనము :- 4 నుండి 5 నిమిషాలు.
4. రాశి సంచార కాలము :- 1 సంవత్సర కాలము.
5. రాశిలో ఫలము ఇచ్చు భాగము మధ్య భాగము.
6. ఋతువు :- హేమంతము
7. దిగ్బలము :- తూర్పు.

• రూపము.

1. సూచించు ఎత్తు :- పొడుగు.
2. వయసు :- ముప్పై సంవత్సరాలు.
3. ప్రాంతము :- గోదావరి నుండి వింధ్య ప్రాంతాలు.

• కారకత్వము.

1. కుటుంబసభ్యులు :- పుత్రులు.
2. గ్రహ వర్గము :- గురువు, పూజగది.
3. గ్రుహ భాగము :- ధనము దాచు ప్రదేశము.
4. అవయవములు:- కాలేయము, చిన్న ప్రేవులు.
5. సూచించు వ్యాధులు :- కాన్సర్లు, వ్రణములు, కామెర్లు, కాలేయమునకు సంబంధించిిన అవయవములు.
6. గ్రహదశకాలము :- 16 సంవత్సరాలు.
7. జీవనకారకత్వము :- భాగ్యకారకుడు.
8. సంబంధిత నక్షత్రములు :- పునర్వసు, విశాఖ, పూర్వాభాద్ర.
9. వృక్షము:- వట వృక్షము.
10. ధాన్యము :- .సెనగలు
11. పండ్లు :- పనస, తీయగుమ్మడి.
12. పక్షులు:- హంస, పావురము.
13. జంతువులు :- సింహము, ఏనుగు.
14. ద్రవ్యములు :- పసుపు.
15. ములిక :- అరటి, రావి వేరు.
16. వస్త్రము :- వాడిన వస్త్రము.

• దైవీకము

1. దేవవర్గము :- వైష్ణవ.
2. గోత్రము:-అంగీరస.
3. వేదము :- ఋగ్వేదము.
4. అవతారము :- వామనావతారము.
5. రూపము :- రాగి జుట్టు, గచ్చ కళ్ళు, రుద్రాక్షమాలధారణ, కమండల ధారణ.
6. గ్రహారూఢ వాహనము :- సింహము.
7. పూజలు, ఆరాధనలు.
8. గ్రహపూజకు వాడవలసిన లోహము :- బంగారము.
9. నైవేద్యము :- దధ్యోదనము.
10. అధిష్ఠాన దేవత :- బ్రహ్మ.
11. అధిదేవత :- బ్రహ్మ.
12. ప్రత్యధిదేవత :- ఇంద్రుడు.
13. పండుగలు:- గురుపౌర్ణమి, బ్రహ్మంగారి ఆరాధన.
14. ప్రసాదములు:- సెనగలు, లడ్లు.
15. దక్షిణ :- వస్త్రములు.
16. ప్రీతికరమైన తిథి :- (ఆషాఢ)గురుపూర్ణిమ.
17. వ్రతము :- అనఘావ్రతము.
18. పారాయణ గ్రంథము:- బ్రహ్మంగారి చరిత్ర.
19. అష్టోత్తరము :- గురుగ్రహ అష్టోత్తరము.
20. సహస్రనామము :- శివ సహస్రము.
21. జపసంఖ్య:- 16000.
22. దీక్ష:- బ్రహ్మంగారి దీక్ష.
23. ధరించవలసిన మాల:- చందన మాల.
24. సమిధ :- రావి.

• గ్రహశాంతికి చేయవలసినది.

1. రత్నము:- పుష్యరాగము.
2. రుద్రాక్ష:- పంచముఖి
3. దానము చేయవలసిన ద్రవ్యములు: పసుపు వన్నె వస్త్రములు, పసుపు, బంగారము.
4. గ్రహాసనము:- దీర్ఘచతురస్రము.
5. గ్రహ సంఖ్య:- 3.
6. గ్రహదృష్టి:- 5,7,9.
7. వారము:- గురువారము.
8. గ్రహబల ఫలితము :- సమాజములో గౌరవము, ధనలాభము.
9. గ్రహ బలహీన ఫలితము:- ధననష్టము, పరువు నష్టము.
10. తండ్రి :- అంగీరసుడు.
11. తల్లి:- సురూప.
12. భ్రార్య:- తార.
13. ఛందస్సు:- త్రిష్టుప్

ద్వాదశస్థానాలలో గురువు

• లగ్నంలో గురువు ఉన్న జాతకుడు అదృష్టవంతుడు, సౌందర్యవంతుడు, నిర్భయుడు, సంతానవంతుడు, చీరంజీవి ఔతాడు.
• ద్వితీయ స్థానమున గురువు ఉన్న జాతకుడు స్వచ్ఛమైన వాక్కులు కలవాడు, భోజనప్రియుడు, సుందరవదనుడు, ధనవంతుడు, విద్యావంతుడు ఔతాడు.
• తృతీయ స్థానమున గురువు ఉన్న జాతకుడు కష్టజీవి, అమర్యాదస్తుడు, ఖ్యాతి కలిగిన సోదరవర్గం ఉన్నవాడు, పాపకార్యములు చేయువాడు మాయావి ఔతాడు.
• చతుర్ధ స్థానమున గురువు ఉన్న జాతకుడు సుఖజీవి, తల్లి, సేవకులు, భార్యా పుత్రులు, బంధువులతో కలిసి జీవించు వాడు, సంపద్వైభవం కలవాడు ఔతాడు.
• పంచమస్థానమున గురువు ఉన్న జాతకుడు పుత్రుల వలన క్లేశములు అనుభవిస్తాడు. మేధావి, మంత్రి పదవిని అలంకరించు వాడు ఔతాడు.
• షష్టమ స్థానమున గురువు ఉన్న జాతకుడు నిరుత్సాహి, అగౌరవములు పొందువాడు, శతృనాశకుడు, మంత్రభినివేశనం కలవాడు ఔతాడు.
• సప్తమమున గురువు ఉన్న జాతకుడుఊతి ఉదారుడు, మంచి కళత్రం కలవాడు, మంచి పుత్రులను కలిగినవాడు, వినయసంపన్నుడు ఔతాడు.
• అష్టమ స్థానమున గురువు ఉన్న జాతకుడు కడుబీదవాడు, అతి తక్కువ సంపాదనా పరుడు, పాపి, చిరంజీవి ఔతాడు.
• నవమస్థానమున గురువు ఉన్న జాతకుడు ఖ్యాతి వహించిన మంత్రిగానూ, సంతతి కలవాడు, ఐశ్వర్యం కలవాడు, పవిత్రకార్యములందు అనురక్తుడై ఉంటాడు. ఉంటాడు.
• దశమ స్థానమున గురువు ఉన్న జాతకుడు రుజువర్తనుడు, పవిత్రకార్యములు చేసి ప్రఖ్యాతి చెందు వాడు, బహుధనవంతుడు, రాజమిత్రుడు ఔతాడు.
• ఏకాదశ స్థానమున గురువు ఉన్న జాతకుడు ధనవంతుడు, నిర్భయుడు, వాహనములు కలవాడు, చిరంజీవి, అల్పసంతానవంతుడు ఔతాడు.
• దశమస్థానమున గురువు ఉన్న జాతకుడు ఇతరులచేత అసహ్యించుకొనబడువాడు, అసంగతములు పలుకువాడు, అప్రమత్తుడు, పాపము చేయువాడు, అలసట పొందువాడు ఔతాడు.