స్వాతిముత్యం

తెలుగు సినిమా*వేదిక

స్వాతి ముత్యం
స్వాతి ముత్యం సినిమా పోస్టర్
దర్శకత్వం	కె. విశ్వనాథ్
స్క్రీన్ ప్లే	కె. విశ్వనాథ్
కథ	కె. విశ్వనాథ్
నిర్మాత	ఏడిద నాగేశ్వరరావు
తారాగణం	కమల్ హాసన్ రాధిక గొల్లపూడి మారుతీరావు జె.వి. సోమయాజులు శరత్ బాబు
ఛాయాగ్రహణం	ఎమ్.వి.రఘు
కూర్పు	జి. జి. కృష్ణారావు
సంగీతం	ఇళయరాజా
విడుదల తేదీ	1986 మార్చి 13 (1986-03-13)
సినిమా నిడివి	181 నిమిషాలు
దేశం	భారతదేశం
భాష	తెలుగు

స్వాతి ముత్యం 1986 లో కె. విశ్వనాథ్ దర్శకత్వంలో విడుదలైన ఒక అద్భుతమైన తెలుగు కుటుంబ కథా చిత్రం. ఇందులో కమల్ హాసన్, రాధిక ప్రధాన పాత్రల్లో నటించగా, పూర్ణోదయా మూవీ క్రియేషన్స్ పతాకంపై ఏడిద నాగేశ్వరరావు ఈ చిత్రాన్ని నిర్మించారు. ఇళయరాజా సంగీతం అందించారు. అమాయకుడైన ఒక యువకుడు, కష్టాల్లో ఉన్న ఒక వితంతువును పెళ్ళి చేసుకుని ఆమెకు ఎలా అండగా నిలిచాడు అనే ఇతివృత్తంతో ఈ సినిమా తెరకెక్కింది.

ఈ చిత్రం ఘన విజయం సాధించడమే కాకుండా, విమర్శకుల ప్రశంసలు అందుకుంది. 1986లో ఉత్తమ విదేశీ భాషా చిత్రం విభాగంలో 59వ ఆస్కార్ అవార్డులకు భారతదేశం తరపున అధికారిక ప్రవేశం (Official Entry) పొందింది. అలాగే తాష్కెంట్, మాస్కో అంతర్జాతీయ చలనచిత్రోత్సవాలలో కూడా ఈ చిత్రం ప్రదర్శించబడింది.

కథ

సినిమా అంతా ఫ్లాష్ బ్యాక్ లో నడుస్తుంది. శివయ్య (కమల్ హాసన్) కొడుకులు, తమ కుటుంబాలతో తల్లి, తండ్రి దగ్గరకు వస్తారు. లలిత (రాధిక) ఆరోగ్యం బాగుండదు. శివయ్య మనవరాలు కథ రాయటానికి తండ్రి సహాయం కోరగా, తాతగారి కథను రాయమంటాడు.

పెద్దలను ఎదిరించి పెళ్ళి చేసుకున్న లలిత భర్తను పోగొట్టుకుని, సోదరుడైన చలపతి (శరత్ బాబు), కొడుకుతో కలిసి అత్తగారింటికి వెళుతుంది. కోటీశ్వరుడైన మామగారు లోపలికి రానివ్వకుండా, బయటికి గెంటేస్తాడు. అన్నగారింటికి చేరిన లలితకి వదినగారి (వై. విజయ) సాధింపులు మొదలవుతాయి. వారు వున్న ఇంటి లోగిలిలోనే శివయ్య తన నాయనమ్మ (నిర్మలమ్మ) తో కలిసి ఉంటుంటాడు. చిన్నపిల్లవాడి మనస్తత్వం గల అమాయకుడు శివయ్య. లలిత పడుతున్న బాధలని చూసి చలించిపోయి తన వంతు సహాయం చేద్దామని అనుకుంటాడు. ఆమెకు కొత్త జీవితం ఇవ్వటమే ఎవరైనా చేయగలిగే అతిపెద్ద సహాయం అన్న నాయనమ్మ మాటలకి స్పందించి, శ్రీరామ నవమి పందిళ్ళలో గుడిలో అకస్మాత్తుగా ఆమె మెడలో తాళి కడతాడు.

నాయనమ్మ మరణం తరువాత, శివయ్య లలితని, ఆమె కొడుకును తీసుకుని పట్నం వెళ్ళిపోతాడు. అక్కడ వారు అద్దెకు తీసుకున్న ఇంటి యజమాని (గొల్లపూడి మారుతీరావు) లలిత మీద కన్నువేసి, మగవాడు అన్నాక అడుక్కుని అయినా భార్యను పోషించాలి అని శివయ్యను అవమానిస్తాడు. ఆ మాటలు నిజమని నమ్మిన అమాయకపు శివయ్య, బిచ్చానికి వెళతాడు. అక్కడ తారసపడ్డ లలిత సంగీత గురువు (జె.వి. సోమయాజులు) సాయంతో గుడిలో ఉద్యోగం సంపాదిస్తాడు. ఆ తర్వాత తన నిజాయితీతో, మంచితనంతో సమాజంలో ఎలా ఎదిగాడు, లలిత పట్ల తన ప్రేమను ఎలా చాటుకున్నాడు అనేది మిగతా కథ. మరణ శయ్య మీద ఉన్న మామగారిని ఎదిరించి లలిత తన భర్త దగ్గరకు చేరుతుంది. కథ ముగిసే సమయానికి లలిత కన్నుమూస్తుంది. లలిత మరణంతో, కొడుకులతో కలిసి ఆమె పూజించిన తులసికోటను తీసుకుని బయల్దేరుతాడు శివయ్య. కథ పూర్తి చేసిన మనవరాలు దానికి "స్వాతిముత్యం" అని పేరు పెడుతుంది.

తారాగణం

• కమల్ హాసన్ - శివయ్య
• రాధిక - లలిత
• గొల్లపూడి మారుతీరావు - ఇంటి యజమాని
• జె.వి. సోమయాజులు - లలిత గురువు
• నిర్మలమ్మ - శివయ్య నాయనమ్మ
• శరత్ బాబు - చలపతి, లలిత అన్నగారు
• వై. విజయ - లలిత వదిన
• సుత్తి వీరభద్రరావు - గురవయ్య
• దీప - సుబ్బలక్ష్మి
• డబ్బింగ్ జానకి - రాజ్యం
• మేజర్ సుందరరాజన్ - రావు
• మల్లిఖార్జునరావు
• పొట్టి ప్రసాద్
• విద్యాసాగర్ రాజు
• ఏడిద శ్రీరామ్
• అల్లు అర్జున్ - (బాల నటుడు, మనవడి పాత్రలో)
• మాస్టర్ అలీ

నిర్మాణం - విశేషాలు

• అభివృద్ధి: సాగర సంగమం (1983) అద్భుత విజయం తర్వాత కమల్ హాసన్ మరియు కె. విశ్వనాథ్ ల కలయికలో వచ్చిన రెండవ చిత్రమిది. సాగరసంగమం 511 రోజుల ఫంక్షన్ నిమిత్తం బెంగళూరు వెళ్ళినప్పుడు హోటల్ రూములో దర్శకుడు విశ్వనాథ్.. వయస్సు పెరిగినా, బుద్ధి ఎదగని ఒక వ్యక్తి పాత్ర గురించి కమల్ కు చెప్పారు. ఆ పాత్ర చుట్టూ ఈ కథను అభివృద్ధి చేశారు.
• చిత్రీకరణ: ఈ సినిమాను రాజమండ్రి, తొర్రేడు, పట్టిసీమ, తాడికొండ, చెన్నై, మరియు మైసూర్ తదితర ప్రాంతాల్లో చిత్రీకరించారు.
• నటన: శివయ్య పాత్రలో కమల్ హాసన్ నటన భారతీయ సినిమా చరిత్రలోనే ఉత్తమమైన నటనలో ఒకటిగా నిలిచిపోయింది. ఆయన బాడీ లాంగ్వేజ్, డైలాగ్ డెలివరీ ప్రేక్షకులను కట్టిపడేసాయి. కమలహాసన్, సుత్తివీరభద్రరావు కొట్టుకునే సన్నివేశంలో సహజత్వం కోసం ఇద్దరూ నిజంగానే కొట్టుకున్నారు, వారికి కొన్ని దెబ్బలు కూడా తగిలాయి.

సంగీతం

ఈ చిత్రానికి ఇళయరాజా అందించిన సంగీతం ఒక మాస్టర్ పీస్ గా పరిగణించబడుతుంది. నేపథ్య సంగీతం మరియు పాటలు సినిమా విజయానికి అత్యంత కీలకంగా మారాయి. సిరివెన్నెల, ఆత్రేయ, సినారె అందించిన సాహిత్యం అద్భుతమైన ప్రజాదరణ పొందింది.

Untitled

సంగీతాన్ని పూర్తిగా సమకూర్చినవారు: ఇళయరాజా.

పాటలు

సం.	పాట	పాట రచయిత	గానం	పాట నిడివి
1.	"చిన్నారి పొన్నారి కిట్టయ్య నిన్నెవరు కొట్టారయ్య"	ఆత్రేయ	ఎస్.పి.బాలసుబ్రహ్మణ్యం, ఎస్. జానకి
2.	"ధర్మం శరణం గచ్ఛామి సంఘం శరణం గచ్ఛామి"	ఆత్రేయ	ఎస్.పి.బాలసుబ్రహ్మణ్యం, ఎస్. జానకి
3.	"పట్టుసీర తెస్తానని"	ఆత్రేయ	ఎస్.పి.బాలసుబ్రహ్మణ్యం, ఎస్. జానకి
4.	"మనసు పలికే మౌనగీతం మమతలోలికే స్వాతిముత్యం"	సిరివెన్నెల సీతారామశాస్త్రి	ఎస్.పి.బాలసుబ్రహ్మణ్యం, ఎస్. జానకి
5.	"రామా కనవేమిరా శ్రీ రఘురామ కనవేమిరా (హరికథ)"	ఆత్రేయ	ఎస్.పి.బాలసుబ్రహ్మణ్యం, ఎస్. జానకి
6.	"వటపత్రశాయికి వరహాల లాలి"	సినారె	పి.సుశీల
7.	"సువ్వి సువ్వి సువ్వాలమ్మా"	సినారె	ఎస్.పి.బాలసుబ్రహ్మణ్యం, ఎస్. జానకి

పునర్నిర్మాణాలు (Remakes)

ఈ చిత్రం దేశవ్యాప్తంగా వివిధ భాషల్లో పునర్నిర్మించబడింది మరియు అనువదించబడింది:

• తమిళం: ఈ చిత్రాన్ని తమిళంలో సిప్పికుల్ ముత్తు అనే పేరుతో అనువదించారు. అక్కడ కూడా వంద రోజులు ఆడి ఘన విజయం సాధించింది.
• హిందీ: 1987లో దర్శకుడు కె.విశ్వనాథ్ స్వయంగా ఈ చిత్రాన్ని బాలీవుడ్ లో ఈశ్వర్ (Eeshwar) పేరుతో పునర్నిర్మించారు. ఇందులో అనిల్ కపూర్, విజయశాంతి ప్రధాన పాత్రలు పోషించారు.
• కన్నడ: 2003లో సుదీప్, మీనా ప్రధాన తారాగణంగా స్వాతిముత్తు పేరుతో కన్నడంలో రీమేక్ చేయబడింది.

పురస్కారాలు

స్వాతి ముత్యం సినిమా భారతీయ చలనచిత్ర రంగంలో అనేక ప్రతిష్టాత్మక అవార్డులను గెలుచుకుంది.

• ఆస్కార్ ఎంట్రీ: 1986 లో 59వ అకాడమీ అవార్డులకు (ఆస్కార్) భారతదేశం తరపున 'ఉత్తమ విదేశీ భాషా చిత్రం' కేటగిరీలో అధికారికంగా పంపబడింది.

సంవత్సరం	ప్రతిపాదించిన విభాగం	పురస్కారం	ఫలితం
1986	కె.విశ్వనాథ్	జాతీయ చలనచిత్ర పురస్కారాలు - ఉత్తమ ప్రాంతీయ (తెలుగు) చిత్రం	గెలుపు
		నంది పురస్కారాలు - స్వర్ణ నంది (ఉత్తమ చిత్రం)	గెలుపు
		ఫిల్మ్‌ఫేర్ పురస్కారాలు (దక్షిణ) - ఉత్తమ దర్శకుడు (తెలుగు)	గెలుపు
	కమల్ హాసన్	నంది ఉత్తమ నటులు	గెలుపు
	రాధిక	ఫిల్మ్‌ఫేర్ ఉత్తమ నటి (తెలుగు)	ప్రతిపాదన

మూలాలు

• డి.వి.వి.ఎస్.నారాయణ సంకలనం చేసిన మధుర గాయని పి.సుశీల మధుర గీతాలు, జె.పి.పబ్లికేషన్స్, విజయవాడ, 2007.

బయటి లింకులు

• ఇంటర్నెట్ మూవీ డేటాబేసు లో స్వాతిముత్యం