సూర్యకాంతం

ఈ వ్యాసం తెలుగు చలనచిత్ర నటీమణి సూర్యకాంతం గురించి. ఇతర వాడుకల కొరకు, సూర్యకాంతం (అయోమయ నివృత్తి) చూడండి.

సూర్యకాంతం
ఆంధ్రుల అభిమాన గయ్యాళి అత్త
జననం	సూర్యకాంతం అక్టోబర్ 28, 1924 వెంకట కృష్ణరాయపురం
మరణం	డిసెంబర్ 17, 1996 చెన్నై]
మరణ కారణం	సహజ మరణం
వృత్తి	నటి
పదవి పేరు	సహజ నట కళా శిరోమణి, హాస్య నట శిరోమణి, బహుముఖ నటనా ప్రవీణా, రంగస్థల శిరోమణి
భాగస్వాములు	పెద్దిబొట్ల చలపతిరావు (హైకోర్టు జడ్జి, 1950లో వివాహం)
తండ్రి	పొన్నాడ అనంతరామయ్య
తల్లి	వెంకట రత్నమ్మ

సూర్యకాంతం (అక్టోబర్ 28, 1924 - డిసెంబర్ 17, 1996) సినీ నటి. తెలుగు సినిమాల్లో గయ్యాళి పాత్రల్లో తన సహజ నటనతో ప్రాచుర్యం పొందింది.

నటుడు గుమ్మడి వెంకటేశ్వరరావు ఒకసారి టెలివిజన్ ఇంటర్వ్యూలో తాను హాస్యానికి సూర్యకాంతంతో స్వయంగా ఇలా అన్నానని చెప్పాడు - "నువ్వు తెలుగు భాషకు చేసిన అన్యాయం ఒకటుంది. 'సూర్యకాంతం' అనే చక్కని పేరు ఇంకెవరూ పెట్టుకోకుండా చేశావు"

బాల్యం

సూర్యకాంతం తూర్పు గోదావరి జిల్లా కాకినాడ దగ్గరున్న వెంకట కృష్ణరాయపురంలో 1924 అక్టోబర్ 28న తన తల్లితండ్రులకు 14వ సంతానంగా జన్మించింది. ఆరేళ్ళ చిన్న వయసులోనే పాడటం, నాట్యమాడటం నేర్చుకొంది. పెరిగే వయసులో హిందీ సినిమా పోస్టర్లు బాగా ఆకర్షించాయి. సినిమాల్లో నటించాలనే కోరిక ఆపుకోలేక చెన్నై చేరుకొంది.

సినీ జీవితం

మొదట జెమిని స్టూడియో నిర్మించిన చంద్రలేఖ సినిమాలో డాన్సర్గా అవకాశం వచ్చింది. అప్పట్లో నెలకు 65 రూ. జీతం ఇవ్వబోతే నిర్మాతతో తన అసంతృప్తిని తెలియబరచిన మీదట 75 రూపాయలు చేశారు. తరువాత ధర్మాంగద (1949)లో ఆమెది మూగవేషం. ధర్మాంగద టైములో చిన్నా చితకా వేషాలువేసినా తరువాత లీలాకుమారి సాయంతో మొదటిసారిగా నారద నారది సినిమాలో సహాయ నటిగా అవకాశం వచ్చింది. చిన్న చిన్న పాత్రలు నచ్చక జెమినీ స్టూడియో నుంచి బయటకు వచ్చేసింది. మనసులో బొంబాయికి వెళదామని ఉన్నా అందుకు ఆర్థిక స్తోమత సరిపోక ఆ ఆలోచనను విరమించు కొంది.

ఆ పరిస్థితిలో సహాయ నటిగా గృహప్రవేశం సినిమాలో మంచి అవకాశం వచ్చింది. తరువాత తన కల అయిన హీరోయిన్ వేషం సౌదామిని చిత్రం ద్వారా వచ్చింది. కానీ ఆ సమయంలో కారు ప్రమాదం జరిగి ముఖానికి గాయం అవడంతో ఆ అవకాశం తప్పిపోయింది. బాగైన తరువాత సంసారం చిత్రంలో మొట్టమొదటి సారిగా గయ్యాళి అత్త పాత్ర వచ్చింది. తరువాత తిరిగి చూసుకోవాల్సిన అవసరం లేకుండా ఆంధ్ర సినీ అభిమానుల గుండెల్లో నిలిపోయేలా జీవితాంతం అవే పాత్రలలో నటించింది.

అసలు సంసారం చిత్రం తరువాత బొంబాయికి చెందిన ఒక నిర్మాత ద్వారా హీరోయిన్ గా అవకాశం వచ్చింది. కానీ తనకు అవకాశం రాక ముందే ఇంకొక హీరోయిన్ ను తీశేసారని తెలియడంతో, "ఒకరి బాధను నా సంతోషంగా తీసుకోలేను" అని ఆ సినిమాను నిరాకరించింది. కోడరికం సినిమా ఆమెకు ఎంతో పేరు తీసుకొచ్చింది. బి.నాగిరెడ్డి, చక్రపాణిలు ఆమె లేకుండా సినిమాలు తీసేవారు కారు.

ఆ రోజుల్లోని అనేక సాంఘిక చిత్రాల్లో రేలంగి - సూర్యకాంతం, రమణారెడ్డి - సూర్యకాంతం, ఎస్.వి.రంగారావు - సూర్యకాంతం- జంటలు, వాళ్ల దృశ్యాలు గుర్తుకు తెచ్చుకుని ఇవాళ కూడా హాయిగా నవ్వుకోవడం కద్దు. కొత్త సినిమా వస్తూంటే అందులో సూర్యకాంతం వుందా? అని ప్రేక్షకులూ, తారాగణంలో సూర్యకాంతం వున్నట్టేగదా? అని సినిమా డిస్ట్రిబ్యూటర్లూ - ఎదురు చూసేవారు. చక్రపాణి (1954), దొంగరాముడు (1955), చిరంజీవులు (1956), తోడికోడళ్లు (1957), అత్తా ఒకింటి కోడలే (1958), ఇల్లరికం (1959), భార్యాభర్తలు (1961), గుండమ్మకథ (1962), కులగోత్రాలు (1962), దాగుడుమూతలు (1964), అత్తగారు-కొత్తకోడలు, మూహూర్తబలం (1969) లాంటి మరపురాని ఎన్నో సినిమాలలో నటించింది.

నటనా శైలి

సూర్యకాంతాన్ని హాస్యనటీమణిగా ముద్ర వెయ్యడానికి లేదు. ఆమె ప్రత్యేకంగా హాస్యం చెయ్యకపోయినా ఆమె సంభాషణ చెప్పే తీరు, నవ్వు తెప్పిస్తుంది, చేసే చేష్టలు కోపం తెప్పిస్తాయి. అలా అని ఆమె దుష్టపాత్రధారిణి అని కూడా అనలేం. సహాయ నటి అనే అనాలి. గయ్యాళి అత్తకి మారుపేరు సూర్యకాంతం అనిపించుకుంది. ఓర చూపులు చూస్తూ, ఎడంచెయ్యి విసుర్తూ కుడిచెయ్యి నడుం మీద నిలబెట్టి ఆమె చెప్పిన సంభాషణా చాతుర్యం, అంతలోనే వెక్కిరిస్తూ, అంతలోనే కల్లబొల్లి కబుర్లతో ఏడుపులు ఏడుస్తూ ఆమె ధరించిన అత్త పాత్రలు సజీవ శిల్పాలు.

వ్యక్తిత్వం

వ్యక్తిగా సూర్యకాంతం గయ్యాళి కానేకాదు - మామూలు మనిషే. ఏ సమావేశాలకో, సినిమా ఉత్సవాలకో ఆమె వెళ్లినప్పుడు ఆటోగ్రాపులకోసం వెళ్లే స్త్రీలు సూర్యకాంతం దగ్గరకి వెళ్లడానికి భయపడేవారు. ఐతే ఆమె నికార్సయిన మనిషి, కచ్చితమైన మనిషి, సహృదయం గల మనిషి, సహాయపడే మనిషి. ఆమె శుభ్రంగా కడుపునిండా తినేది, పదిమందికీ పెట్టేది. షూటింగ్‌కి వచ్చినప్పుడల్లా - తనతో ఏవో తినుబండారాలు తీసుకురావడం, అందరికీ పెట్టడం అలవాటు. ఇలాంటి అలవాటు సావిత్రి, కృష్ణకుమారి, జానకి వంటి నటీమణులకీ వుండేది. విశేష దినాలూ, పండగపబ్బాలూవస్తే సరేసరి!

షూటింగుల్లో జోకులు చెప్పడం, సూర్యకాంతం సరదాల్లో ఒకటి. ఒక షూటింగులో బయట కేకలు వినిపిస్తున్నాయని ‘సైలెన్స్‌! అవుట్‌సైడ్‌’ అని ప్రొడక్షన్‌ మేనేజర్‌ గట్టిగా అరిచాడు. ఫ్లోర్‌లో వున్న సూర్యకాంతం ‘ఓ!’ అని అంతకన్నా గట్టిగా అరిచింది. ‘ఏమిటమ్మా?’ అని అడిగితే, ‘సైలెన్స్‌ అవుట్‌ సైడ్‌ - అని గదా అన్నారు!’ అందామె నవ్విస్తూ. అలాంటి అల్లరి వుండేది ఆమెలో. ఓ సినిమాలో నాగయ్యను నానామాటలూ అని, నోటికొచ్చిన తిట్లు తిట్టాలి. షాట్‌ అయిపోయాక ఆయన కాళ్లమీద పడి ‘అపరాధం - క్షమించండి!’ అని వేడుకుంది. ‘పాత్ర తిట్టిందమ్మా, నువ్వెందుకు బాధపడతావూ? లే!-’ అని నాగయ్య లేవనెత్తితే, కన్నీళ్లు తుడుచుకున్న భక్తీ, సెంటిమెంటూ ఆమెవి. దబాయింపూ, కచ్చితత్వమూ ఉన్న మనిషే అయినా, మనసు మాత్రం వెన్న, సున్నితం. అవసరమైన వాళ్లకి ఆర్థికసహాయం చేసేదిగాని అనవసరం అనిపిస్తే మాత్రం ‘పూచికపుల్ల’ కూడా విదిలించేది కాదు.

మొహమాటపడకుండా తనకి రావాల్సిన పారితోషకాన్ని అడగవలసిన నిర్మాతల్ని గట్టిగా అడిగేది. ఆమె అందర్నీ నమ్మేది కాదు. తన కారు రిపేరుకొస్తే ఎంత పెద్ద రిపేరైనా, మెకానిక్‌ ఇంటికొచ్చి తన కళ్లముందు చెయ్యవలసిందే - ఎంత ‘ఎక్స్‌ట్రా మనీ’ అయినా తీసుకోనీగాక! చివరి దశలో వేషాలు తగ్గిపోయినా, చివరిదాకా నటిస్తూ ఉండాలనే కోరుకునేది. తన ఆరోగ్యం బాగులేకపోయినా, ‘నటిస్తాను’ అని ధైర్యంగా చెప్పేది.

నటించిన సినిమాలు

• ధర్మాంగద (1949)
• సంసారం (1950)
• పెళ్ళిచేసి చూడు (1952)
• బ్రతుకుతెరువు (1953)
• కన్యాశుల్కం (1955) (మీనాక్షి)
• దొంగరాముడు (1955)
• చరణదాసి (1956)
• శ్రీ గౌరీ మహత్యం (1956)
• భాగ్యరేఖ (1957)
• మాయాబజార్ (1957)
• తోడికోడళ్ళు (1957)
• దొంగల్లో దొర (1957)
• సామ్రాట్ విక్రమార్క (1958)
• అప్పుచేసి పప్పుకూడు (1959)
• మాంగల్యబలం (1959)
• కృష్ణలీలలు (1959)
• భాగ్యదేవత (1959)

• జయభేరి (1959)
• శాంతినివాసం (1960)
• ఇద్దరు మిత్రులు (1961)
• పెళ్లికాని పిల్లలు (1961)
• భార్యా భర్తలు (1961)
• వాగ్దానం (1961)
• వెలుగునీడలు (1961)
• శభాష్ రాజా (1961
• కలసి ఉంటే కలదు సుఖం (1961)
• మంచిమనసులు (1962)
• రక్తసంబంధం (1962)
• సిరిసంపదలు (1962)
• గుండమ్మకథ (1962)
• తిరుపతమ్మకథ (1963)
• నర్తనశాల (1963) (అథిది పాత్ర)
• పరువు ప్రతిష్ఠ (1963)

• చదువుకున్న అమ్మాయిలు (1963)
• మురళీకృష్ణ (1964)
• మూగమనసులు (1964)
• డాక్టర్ చక్రవర్తి (1964)
• ఉయ్యాల జంపాల (1965)
• నవరాత్రి (1966)
• సంగీతలక్ష్మి (1966)
• ఆస్తిపరులు (1966)
• కన్నెమనసులు (1966)
• బ్రహ్మచారి (1967)
• సుఖ దు:ఖాలు (1967)
• ఉమ్మడికుటుంబం (1967)
• అత్తగారు-కొత్తకోడలు (1968)
• వింత కాపురం (1968)
• బుద్ధిమంతుడు (1969)
• ఆత్మీయులు (1969)
• అల్లుడే మేనల్లుడు (1970) - విశాలాక్షి
• బాలరాజు కథ (1970)

• దసరాబుల్లోడు (1971)
• అమాయకురాలు (1971)
• కాలం మారింది (1972)
• కొడుకు కోడలు (1972)
• మేన కోడలు (1972)
• అందాల రాముడు (1973)
• ముత్యాల ముగ్గు (1975)
• సెక్రటరి (1976)
• గోరంతదీపం (1978)
• రాధాకృష్ణ (1978)
• కార్తీక దీపం (1979) (శారదా తల్లి)
• వియ్యాలవారి కయ్యాలు (1979)
• చుట్టాలున్నారు జాగ్రత్త (1980)
• పెళ్ళిచూపులు (1983
• బంధువులు వస్తున్నారు జాగ్రత్త (1989)
• వన్ బయ్ టూ (1993)
• ఎస్.పి.పరశురాం

తెలుగింటి అత్తగా పేరుపొందిన సూర్యకాంతం కోడలు ఈశ్వరీ రాణి మాత్రం ఆమె అంటే చాలా గౌరవం ప్రేమ చూపిస్తుంది . ఇవ్వడమే కానీ తీసుకోవడం తెలియని వ్యక్తి అని ఆమె అత్తమ్మ సూర్యకాంతం గురించి పేర్కొంది .

వనరులు

• telugupeople.com సూర్యకాంతం మీద వ్యాసం
• 1952లో రూపవాణిలో సూర్యకాంతం మీద వ్యాసం
• ఫిలించాంబర్ లో సూర్యకాంతం మీద వ్యాసం
• ఇంటర్నెట్ మూవీ డేటాబేసు లో సూర్యకాంతం పేజీ