చాచా నెహ్రూ పార్క్ (మాసాబ్‌ట్యాంక్‌)

చాచా నెహ్రూ పార్క్
చాచా నెహ్రూ పార్క్
రకం	పార్కు
స్థానం	మాసాబ్‌ట్యాంక్‌ హైదరాబాదు, తెలంగాణ
సమీప పట్టణం	హైదరాబాదు
విస్తీర్ణం	13 ఎకరాలు
నవీకరణ	1988, నవంబరు 14
నిర్వహిస్తుంది	జీహెచ్ఎంసీ
తెరుచు సమయం	ఉదయం 8
స్థితి	వాడుకలో ఉంది

చాచా నెహ్రూ పార్క్‌, తెలంగాణ రాష్ట్ర రాజధాని హైదరాబాదులోని మాసాబ్‌ట్యాంక్‌ ప్రాంతంలో ఉన్న పార్క్. 13 ఎకరాల విస్తీర్ణంలో నగరంలో అత్యంత ప్రసిద్ధి చెందిన పచ్చటి ప్రదేశాలలో ఒకటైన ఈ పార్కుకు ప్రతిరోజూ వందలాది మంది ప్రజలు వస్తుంటారు. అందమైన పచ్చిక బయళ్ళతో మార్నింగ్ వాకింగ్, స్లైడ్‌లు, స్వింగ్‌లు, ఆటలకు ప్లేగ్రౌండ్‌గా ఈ పార్కు ఉపయోగపడుతున్నది.

చరిత్ర

1988, నవంబరు 14న బాలల దినోత్సవం సందర్భంగా అప్పటి ఉమ్మడి ఆంధ్రప్రదేశ్ గవర్నర్ కుముద్భేన్ మణిశంకర్ జోషి చేత ఈ పార్కు ప్రారంభించబడింది. నాల్గవ కులీ కుతుబ్‌షాహీ ప్రభువు మహ్మద్‌ కుతుబ్‌షాహీ భార్య పేరు హయ్యత్‌ బక్షీ బేగం. ఈమెను 'మా-సాహెబా' అని గౌరవంగా పిలిచేవారు. ఈ ప్రాంతంలో కుతుబ్‌షాహీ ప్రభువులు తవ్వించిన చెరువును మాసాహెబా పేరున స్థానికులు గౌరవంగా పిలిచేవారు. ఆ చెరువు స్థానంలోనే ఈ పార్క్ ఏర్పాటైందని చెప్తారు.

ఆధునీకరణ

తెలంగాణ ప్రభుత్వం ఆధ్వర్యంలోని హైదరాబాదు మహానగరపాలక సంస్థ నుండి ఈ పార్కు ఆధునీకరణకు 2 కోట్ల రూపాయలు మంజూరుచేయబడ్డాయి. ఆ నిధులతో క్యాంటీన్, గ్రంథాలయం, పార్క్‌కు వచ్చే సందర్శకులు పలు కార్యక్రమాలను నిర్వహించేందుకు వీలుగా 60 లక్షల రూపాయలతో 120 సీట్లతో ఓపెన్‌ థియేటర్‌ మొదలైనవి ఏర్పాటు చేశారు.